Onimoskalti itech se altepetsintli tlen itoka Warialda kajki Nueva Gales del Sur. Ompa kinpiaj miakej ichkamej uan toros, noijki kitokaj xinachtli uan kilitl. Itech non altepetl kajki tlakualtsin, tlachipauak uan amo ikaj temiktia.

Nikinpia chiknaui nokniuan pero ne achto onineski, ik non, ijkuak onikpiaya 13 xiuitl opejki nitekipanoua para nikpaleuiskia nofamilia. Onitekipanouaya itech ranchos porque ayakmo onimomachtiaya itech escuela. Ijkuak onikpiaya 15 xiuitl yonikatka se tlakeuali uan onikinmaluiaya caballos.

Ualeua onikitaya oui ompa nitekipanoskia pero noijki onechpaktiaya tlen onikchiuaya uan kanin onitekipanouaya. Ijkuak yotlayouaya onitlatlatiaya uan onimotlaliaya para nikitas metstli uan sitlalimej. Onimokuayejyekouaya ikaj okichijchi nochi tlen onikitaya. Pero akinmej inmiuan onimouikaya amo okatkaj yolkualmej. Tlen ompa otekipanouayaj otlajtouayaj pitsotik uan otlachichinayaj, ik non, ne noijki ijkon onikchiuaya.

Ijkuak yonikpiaya 18 xiuitl onichantito okse altepetsintli itoka Sydney. Oniknekiaya niyetos itech ejército, pero amo onechselijkej porque amo onia escuela. Satepan onikajsik kanin nitekipanos uan ompa onimoka kanaj se xiuitl. Ompa onikinmixmatki iTlaixpantijkauan Jehová, yejuan onechyolejkej inmiuan manimonechiko, ik non, onimonechikoto uan onikitak yejuan otlamachtiayaj tlen melauak.

Satepan oksepa onichantito itech altepetl Goondiwindi tlen kajki Queensland. Ompa opejki nitekipanoua uan noijki onimonamikti pero satepan opejki nitlauana.

Otikinpixkej ome tokoneuan, ik non, opejki nimokuayejyekoua amo kuali tlen onikchijtoka. San niman onikilnamik tlen onikkak ijkuak onimonechiko inmiuan iTlaixpantijkauan Jehová ompa Sydney uan onikijto itlaj omonekiaya nikchiuas.

Onikajsik se revista Akin Tetlapouijtok tlen yiuejkika okiski. Ompa okijtouaya kanin omonechikouayaj iTlaixpantijkauan Jehová uan onikinmilui manechmachtikan ika Biblia. San niman onechtlajpaloto se iTlaixpantijka Jehová uan iuan onimomachti Biblia.

Ijkuak okachi onimomachtiaya Biblia, onikitaya omonekiaya nikpatlas nonemilis. Oajsik itech noyolo tlen kijtoua 2 Corintios 7:1, ompa techyoleua matimochipauakan uan ayakmo matikchiuakan tlen “weletis kijtlakos tokuerpo”.

Onikijto ayakmo nitlauanaskia nion nitlachichinaskia. Onikmachiliaya oui ayakmo nitlauanas nion nitlachichinas porque nochipa ijkon onikchiuaya. Pero oniknekiaya nikyolpaktis toTajtsin Dios. Noijki onechpaleui Romanos 12:2, ompa kijtoua “Ayakmó xinemikah kemi nemih n tlaltikpaktlakah, yej xikpatlakah nomotlayejyekolis”. Onikajsikamatki omonekiaya nimokuayejyekos ken toTajtsin Dios uan nikokoliskia nochi tlen ye kikokolia. ToTajtsin Dios onechpaleui ayakmo manitlachichina nion manitlauana.

Pero okachi oui onikmachili ayakmo nikijtos tlajtolmej tlen pitsotikej. Onikmatiaya tlen kijtoua Efesios 4:29: “Amo xikinmijtokah tlajtolteh pitsotikeh”, pero onikmachili oui niktlakamatis nin tlanauatil. Onechpaleui manimokuayejyeko tlen kijtoua Isaías 40:26: “Xiajkotlachiakan iluikak uan xikitakan. ¿Akin okichijchi nochi non tlamantli? Ye kinyekana ken ijkuak ikaj kinyekana miakej soldados uan nochi kinnotsa ika intoka. Porque ye sapanoua chikauak uan ichikaualis tetlajtlachialtia uan nion se amo poliui”. ToTajtsin Dios sapanoua chikauak, ik non, okichijchi nochi tlen onka iluikak uan tlaltikpak, ye noijki uelis nechpaleuiskia manikpatla nonemilis para nikyolpaktis. Sapanoua onimotlatlaujti uan onimochijchika para ayakmo nikijtos tlajtolmej tlen pitsotikej.

Ijkuak onitekipanouaya itech rancho amo okachi onimotlapouiaya inmiuan oksekimej porque amo miakej ompa ochantiayaj. Pero ijkuak opejki nimonechikoua inmiuan iTlaixpantijkauan Jehová ayakmo onikijtouaya tlajtolmej tlen pitsotikej uan kuali onimotlapouiaya inmiuan oksekimej. Tlen onimomachtiaya itech Biblia onechyoleuaya manikintlapoui oksekimej tlen kichiuas itekiuajkayo toTajtsin Dios (Mateo 6:9, 10; 24:14).

Yikipia seki xiuitl onimochi tlayekanki itech tlanechikol. Niyolpaki porque axkan nikinpaleuia nokniuan itech tlanechikol.

Niktlasojkamatilia Jehová porque onechpaleui manikixmati uan maniktekichiuili maski amo onia escuela (Isaías 54:13). Yonikitak ken melauak mochiua tlen kijtoua Proverbios 10:22: “Itlateochiualis Jehová non tlen okachi tlapaleuia uan ye amo tetlajyouiltia”.