TLAMACHTIL TLEN IKA PEUA
¿Tlen techpanoa ijkuak timikij?
“Onimokuayejyekoaya ijkuak timikij: tiauij iluikak, miktlan noso purgatorio. Onimokuayejyekoaya amo onikatka sapanoa niyolkuali, ik non, amo uelis niaskia iluikak, nion amo onikatka sapanoa amo niyolkuali, ik non, amo niaskia miktlan. Pero amo onikmatiaya tlen kijtosneki purgatorio. Amo keman oniktlajtolti Biblia; san onikmatiaya tlen okijtoayaj tlaltikpaktlakamej.” (Lionel.)
“Onechmachtijkej tinochtin tiaskej iluikak ijkuak timikiskej, pero ne amo ijkon onikneltokaya. Onimokuayejyekoaya ijkuak timikij ompa tlami nochi.” (Fernando.)
¿Se tonal yotimotlajtlani tlen techpanoa ijkuak timikij? ¿Ken katej akinmej yomikej? ¿Oksepa tikinmitaskej? ¿Tikmati tlen melauak itech mikilistli? Pampa uelis tikinnankiliskej ninmej tlajtlanilmej, ma tikitakan tlen kijtoa Biblia. Achto ma tikitakan tlen techiluia Biblia itech mikilistli uan satepan tikinnankiliskej okseki tlajtlanilmej.
¿Ken katej akinmej yomikej?
TLEN KIJTOA BIBLIA: “Pampa akinmej yoltokej kimatij mikiskej; uan akinmej yomikej yejuan ayakmo itlaj kimatij, nion ayakmo kintlaxtlauiaj, pampa yokinmilkajkej. Nochi tlen uelis tikchiuas, xikchiua ika mochikaualis, pampa amo onka tekitl nion uelis timokuayejyekos itlaj tikchiuas nion onka tlamatilistli nion ixtlamatilistli itech Mikakoyoktli, kanin tias.” * (Eclesiastés 9:5, 10.)
Ijkuak Biblia kijtoa “kanin tias”, kijtosneki itech mikakoyoktli. Ompa ayakmo itlaj tikmachiliaj nion ayakmo itlaj timokuayejyekoaj. Se neskayotl, ximokuayejyeko ken okitaya Job mikakoyoktli. San itech se tonal omikej nochtin ikoneuan uan okipolo nochi tlen okipiaya. Satepan omokoko uan otlajyoui miak. Ik non, okilui toTajtsin Dios: “¡Oh tla itech Mikakoyoktli [“miktlan”, ken kitlajtolkuepa La Sagrada Biblia, tlen iaxka Guillermo Jünemann] techtlatiskia, tla techpiaskia san ichtaka” (Job 1:13-19; 2:7; 14:13). Ken tikitaj, Job amo okitaya mikakoyoktli noso miktlan ken kanin onka tlitl, kanin okachi tlajyouiskiaj. Ye okitaya ken kanin ueliskia moyolseuiskia noso kanin moseuiskia.
Tla tiktlajtoltia itech Biblia ken okinyolitijkej sekimej tlaltikpaktlakamej, noijki techpaleuis ma tikmatikan ken katej akinmej yomikej. Uelis tikinmitas itech recuadro tlen itoka: “ Biblia techtlapouia itech chikueyi tlaltikpaktlakamej tlen okinyolitijkej”.
Nion se itech ninmej tlaltikpaktlakamej tlen okinyolitijkej okijto oyajki iluikak noso ijtik tlitl. Tla ompa yaskiaj, yejuan kijtoskiaj kanin okatkaj. Noso Biblia kijtoskia tla ompa yetoskiaj. Pero Biblia amo itlaj kijtoa itech non. Uan nonmej tlaltikpaktlakamej amo itlaj okijtojkej. ¿Tleka? Pampa amo itlaj okimatiayaj. Ijkuak omikej ayakmo itlaj omokuayejyekoayaj, nion okimachiliayaj, ken ijkuak ika sapanoa kochi. Itech Biblia ualeua kitekitiltia tlajtoli “okochki” pampa kijtos ika omikik. Se neskayotl, Biblia kijtoa tekiua David uan Esteban okochkej itech mikilistli (Hechos 7:60; 13:36).
Axkan, ¿tlami nochi ijkuak timikij? ¿Uelis oksepa yoltoskej akinmej yomikej?
^ párr. 7 Itech Traducción del Nuevo Mundo ika español, motekitiltia tlajtoli hebreo Seol uan tlajtoli griego Hades tlen kijtosnekij “mikakoyoktli”, “mikatekochtli”, “tekochtli” noso “kanin kintokaj mikamej”. Seki Biblias kintlajtolkuepaj ninmej tlajtolmej ika tlajtoli “miktlan”, pero Biblia amo tlamachtia onka itlaj kanin nochipa kintlajyouiltiaj tlaltikpaktlakamej ijtik tlitl.
Xamo noijki mitspaktis
AKIN TETLAPOUIJTOK
¿Melauak Jesús okinyolitiaya mikamej?
¿Tlen chialistli techmaka yolitilistli tlen okichi Jesús?
