UJehova wanika abantu umhlaba ukuthi ube likhaya labo. Yikho-ke, indoda lomfazi wokuqala, u-Adamu lo-Eva babengadalelwanga ukuhlala ezulwini ngoba uNkulunkulu wayesedale izingilosi ukuthi zihlale ezulwini. (Jobe 38:4, 7) Esikhundleni salokhu, uNkulunkulu wathatha umuntu wokuqala wambeka epharadayisi elihle elithiwa yinsimu yase-Edeni. (Genesisi 2:15-17) UJehova wanika umuntu wokuqala lenzalo yakhe ayezakuba layo ithemba lokujabulela ukuphila okungapheliyo emhlabeni.​—Bala iHubo 37:29; 115:16.

Ekuqaliseni, insimu yase-Edeni yiyo kuphela eyayilipharadayisi. Indoda yokuqala lomfazi wokuqala kwakumele bagcwalise umhlaba ngenzalo yabo. Ngokuhamba kwesikhathi kwakumele babuse umhlaba wonke bawenze ipharadayisi. (Genesisi 1:28) Umhlaba kawusoze ubhujiswe loba nini. Uzahlala ulikhaya labantu.​—Bala iHubo 104:5.

Bukela ividiyo ethi Kungani UNkulunkulu Wadala Umhlaba?

U-Adamu lo-Eva kabamlalelanga uNkulunkulu, yikho uJehova wabaxotsha ensimini. Ipharadayisi lalahleka njalo akula muntu osephumelele ukulibuyisela. IBhayibhili lithi: “Umhlaba unikelwe ezandleni zababi.”—Jobe 9:24, The Holy Bible In Ndebele.​—Bala uGenesisi 3:23, 24.

UJehova useyehlulekile yini ukugcwalisa injongo yakhe yokuqala ngabantu? Hatshi! UnguSomandla. Ngeke ehluleke. (Isaya 45:18) Uzabuyisela abantu esimeni okwakumele babe yiso.​—Bala iHubo 37:11, 34.

Umhlaba uzaphinda ube liPharadayisi ngesikhathi uJesu esebusa njengeNkosi kaNkulunkulu. Empini ebizwa kuthiwa yi-Amagedoni, uJesu uzakhokhela izingilosi zikaNkulunkulu  abhubhise bonke abaphikisana loNkulunkulu. Sekwenzakele lokho, uJesu uzabopha uSathane okweminyaka eyinkulungwane. Abantu bakaNkulunkulu bazasinda ekubhujisweni lokhu ngenxa yokuthi uJesu uzabakhokhela njalo abavikele. Bazakholisa impilo engapheliyo ePharadayisi emhlabeni.​—Bala iSambulo 20:1-3; 21:3, 4.

UNkulunkulu uzabuqeda nini ububi obusemhlabeni? UJesu wanika “isibonakaliso” esasizatshengisa ukuthi ukucina sekuseduze. Izimo ezikhona emhlabeni zithwalise nzima abantu njalo zitshengisa ukuthi siphila ‘ekucineni kwesikhathi.’​—Bala uMathewu 24:3, 7-14, 21, 22.

Nxa uJesu esebusa okweminyaka eyinkulungwane ebusa umhlaba esezulwini, uzakuqeda du konke ukuhlupheka. (Isaya 9:6, 7; 11:9) Ngaphandle kokuba yiNkosi, uJesu uzakuba nguMphristi oMkhulu njalo uzakwesula izono zalabo abathanda uNkulunkulu. Yikho-ke, uNkulunkulu uzaqeda ukugula, ukuguga lokufa esebenzisa uJesu.​—Bala u-Isaya 25:8; 33:24.

Abantu abalalela uNkulunkulu bazaphila ePharadayisi. (1 Johane 2:17) UJesu wathuma abalandeli bakhe ukuthi badinge abantu abathobekileyo besebebafundisa indlela yokwamukelwa nguNkulunkulu. Lamuhla, uJehova ulungiselela izigidi zabantu ukuthi ziphile ePharadayisi elizayo emhlabeni. (Zefaniya 2:3) EmaWolu oMbuso aboFakazi bakaJehova, abantu bafundiswa ukuba ngamadoda labobaba abangcono lokuba ngabafazi labomama abangcono. Abantwana labazali bakhonza ndawonye njalo bafunda indlela abangancedwa ngayo yizindaba ezinhle.​—Bala uMikha 4:1-4.