UDutheronomi 8:1-20
8 “Kumele libe leqiniso lokuthi liyayigcina yonke imithetho engilinika yona lamuhla ukuze liqhubeke liphila+ njalo lande futhi lingene liyethatha ilizwe uJehova afunga ukuthi uzalinika okhokho benu.+
2 Khumbulani uhambo olude uJehova uNkulunkulu wenu enze ukuthi liluhambe okweminyaka le engu-40 enkangala+ ukuze alenze lithobeke njalo alilinge,+ ukwenzela ukuthi abone okusezinhliziyweni zenu,+ ukuthi lizayigcina yini imithetho yakhe loba hatshi.
3 Ngakho walenza lathobeka waliyekela lilamba,+ walinika imana+ elalingayazi, lina kanye laboyihlo ukuze alenze likwazi ukuthi umuntu kaphili ngesinkwa sodwa kodwa uphila ngawo wonke amazwi aphuma emlonyeni kaJehova.+
4 Okweminyaka le engu-40 izigqoko zenu azizange zidabuke lenyawo zenu kazizange zivuvuke.+
5 Likwazi mhlophe enhliziyweni zenu ukuthi uJehova uNkulunkulu wenu ubeliqondisa njengobaba eqondisa indodana yakhe.+
6 “Ngakho kumele ligcine imithetho kaJehova uNkulunkulu wenu ngokuhamba ezindleleni zakhe langokumesaba.
7 Phela uJehova uNkulunkulu wenu ulingenisa elizweni elihle,+ ilizwe elilezifula zamanzi lemithombo* kanye lendawo ezimpompoza amanzi agelezela emagcekeni lasendaweni elezintaba,
8 ilizwe lengqoloyi lebhali, lamasimu amagilebisi, lezihlahla zomkhiwa, lamaharinathi,+ ilizwe elilamafutha ama-oliva kanye loluju,+
9 ilizwe elilokudla okunengi njalo ngeke liswele lutho kulo, ilizwe elilamatshe alensimbi futhi lizagebha ikhopha ezintabeni zalo.
10 “Nxa selidlile lasutha kumele limdumise uJehova uNkulunkulu wenu ngenxa yelizwe elihle alinike lona.+
11 Nanzelelani lingamkhohlwa uJehova uNkulunkulu wenu ngokwehluleka ukugcina imithetho yakhe lemilayo yakhe kanye lemithetho yakhe yokwahlulela engilinika yona lamuhla.
12 Nxa selidlile lasutha, lakha izindlu ezinhle futhi selihlala kuzo,+
13 nxa imihlambi yezifuyo zenu isiminengi, lesiliva kanye legolide lenu selilinengi, konke elilakho sekukunengi kakhulu,
14 lingavumeli inhliziyo zenu ziziphakamise+ besekubangela ukuthi limkhohlwe uJehova uNkulunkulu wenu owalikhipha elizweni laseGibhithe, elizweni lobugqili,+
15 lowo owenza ukuthi lidabule enkangala enkulu njalo eyesabekayo,+ elezinyoka eziyingozi lenkume, indawo elomhlabathi owomileyo ongelamanzi. Wenza ukuthi amanzi aphume edwaleni,+
16 walinika imana+ enkangala, into oyihlo ababengayazi ukuze alenze lithobeke+ njalo alilinge ukuze kulincede esikhathini esizayo.+
17 Nxa lingaziyenga ezinhliziyweni zenu lithi, ‘Inotho engilayo ngayisebenzela ngamandla ami langezandla zami lezi,’+
18 khumbulani ukuthi uJehova uNkulunkulu wenu nguye olinika amandla okuthi lizuze inotho+ ukuze agcwalise isivumelwano asenza kubokhokho benu, njengoba nje kunjalo lamuhla.+
19 “Ngiyalixwayisa lamuhla ukuthi nxa lingake limkhohlwe uJehova uNkulunkulu wenu beselilandela abanye onkulunkulu libakhonze njalo libakhothamele, lizakufa loba sekutheni.+
20 Lani lizatshabalala njengezizwe uJehova azibhubhisayo phambi kwenu ngenxa yokuthi liyabe lingalilalelanga ilizwi likaJehova uNkulunkulu wenu.+
Amabala angaphansi
^ Kumbe, “leziziba ezitshonayo.”
