UJehova ubelokhu ewubekezelela umhlaba lo kodwa lokhu sokuzaphela. Inkolo yamanga izabhujiswa. Izizwe ezimanyeneyo zizahlasela abantu bakaNkulunkulu njalo uJehova uzabhubhisa abantu ababi ngesikhathi sempi ye-Amagedoni. AmaKhristu akulindele ngabomvu ukubona izinto lezi zisenzakala.

Asikwazi konke okuzakwenzakala ngesikhathi sokuhlupheka okukhulu. Ngokwesibonelo asikwazi ukuthi kuzaqalisa nini. Asikwazi ukuthi abezombusazwe bazathi bayihlaselelani inkolo yamanga. Asikwazi ukuthi izizwe ezimanyeneyo zizabahlasela okwesikhathi esingakanani abantu bakaNkulunkulu lokuthi zizabahlasela njani. Asikwazi lokuthi uJehova uzababhubhisa njani abantu ababi empini ye-Amagedoni.

Kodwa iMibhalo iyasitshela konke okumele sikwazi ukuze singesabi okuzakwenzakala esikhathini esizayo njalo sibe lethemba. Ngokwesibonelo, siyakwazi ukuthi siphila ekucineni ‘kwezinsuku zokucina.’ (2Thi 3:1) Siyakwazi ukuthi amalanga okuhlaselwa kwenkolo “azaphungulwa” ukwenzela ukuthi inkolo yeqiniso ingatshabalaliswa. (Mat 24:22) Siyakwazi ukuthi uJehova uzabasindisa abantu bakhe. (2Pe 2:9) Kanti njalo siyakwazi ukuthi lowo uJehova amkhethileyo ukuze abhubhise ababi njalo avikele ixuku elikhulu ngesikhathi sempi ye-Amagedoni ulungile futhi ulamandla.—Sam 19:11, 15, 16.

Izinto ezizenzakala esikhathini esizayo zizabangela ukuthi abantu “baphele amandla ngenxa yokwesaba.” Kodwa nxa singabala njalo sicabangisise ngendlela uJehova asindisa ngayo abantu bakhe kudala lalokhu asitshela khona ngekusasa ‘sizasukuma sime siphakamise amakhanda’ silethemba lokuthi ukukhululwa kwethu kuseduze.—Luk 21:26, 28.