Nxa lokhu kungenzakala ibandla kumele lizwisise ukuthi umtshado omdala usuphelile lokuthi lo omutsha yiwo osusemthethweni. Ukuze sikuzwisise kuhle lokhu, asixoxeni ngokuthi uJesu wathini ngokuchitha umtshado langokuphinda utshade.

KuMathewu 19:9 uJesu wasitshela isizatho esivunyelwa yiMibhalo esingaqeda umtshado. Wathi: “Loba ngubani ochitha umtshado ehlukane lenkosikazi yakhe yona ingazange iziphathe kubi kwezemacansini, abesetshada lomunye umfazi, uyaphinga.” Emazwini la sifunda ukuthi ukufeba yiso sodwa isizatho esingenza umuntu otshadileyo adivose omunye wakhe lokuthi uyabe efeba nxa esehlukana laye atshade lomunye ngaphandle kwalesisizatho.

Okwatshiwo nguJesu kutsho yini ukuthi umuntu ofebileyo okhetha ukudivosa umkakhe ukhululekile ukuphinda atshade? Kuya ngokuthi omunye wakhe uthini. Nxa umuntu otshadileyo angafeba, lowo ongonanga lutho angakhetha ukuthi uyamxolela yini loba hatshi. Nxa engakhetha ukungamxoleli besebedivosa, bobabili bayabe sebekhululekile ukuphinda batshade.

Ngezinye izikhathi lowo ongonanga lutho uyabe ezimisele ukuxolela umkakhe ngoba engafuni ukuthi umtshado wabo uchitheke. Kodwa kuthiwani nxa ofebileyo engafuni ukuxolelwa abesedivosa umkakhe? Phela umkakhe uyabe ezimisele ukuthi amxolele lokuthi umtshado wabo ungachitheki. Yikho iMibhalo ayimvumeli ukuthi aphinde atshade. Nxa engatshada lomunye umuntu yona imibhalo ingamvumeli ukwenza njalo uyabe esefeba futhi. Abadala bazaphinda babumbe ikhomithi yokwahlulela ukuze indaba yakhe iphathwe.—1 Khor. 5:1, 2; 6:9, 10.

Nxa umKhristu engadivosa ngesizatho esingasekelwanga eMibhalweni abesetshada lomunye ibandla kumele liwubone njani umtshado osuchithekile lalowo omutsha? Ngokwalokho okutshiwo liBhayibhili, umtshado wokuqala uyabe ulokhu usasebenza yini? Lowo ongonanga lutho uyenelisa yini ukumxolela kumbe ukungamxoleli lowo abetshade laye? Ibandla kumele libone labo asebetshadile njengabantu abafebayo yini?

Kuqala ibandla lalisithi labo asebetshadile bayafeba nxa ongonanga lutho elokhu esaphila, elokhu engakatshadi futhi engazange afebe. Kodwa uJesu wathi ekhuluma ngokudivosa lokutshada kutsha kazange akhulume ngalowo ongonanga lutho. Wathi umuntu odivosa umkakhe kungelasizatho esisekelwe eMibhalweni atshade lomunye, uyafeba. Yikho umtshado wokuqala uyaphela nxa angadivosa umkakhe aphinde atshade ngoba lokhu kuyabe kufanana lokufeba njengoba uJesu watsho.

Nxa umtshado ungaphela ngenxa yokuthi ofebileyo udivose umkakhe wasetshada lomunye  lowo ongonanga lutho kaselamandla okuphinda abuyelelane laye. Yikho akusamelanga azihluphe ngokuthi uyabuyelelana laye yini kumbe hatshi. Kanti njalo ibandla kumele liwamukele umtshado omutsha kungelani lokuthi lo ongonanga lutho usaphila, kazange atshade kumbe afebe. *

Umuntu lo esikhuluma ngaye ufebile wasedivosa omunye wakhe. Kodwa kuthiwani nxa engafebanga kodwa wamdivosa wasetshada lomunye? Kuthiwani nxa efebe ngemva kokudivosa umkakhe wasetshada kutsha lanxa umkakhe ubezimisele ukumxolela? Ukudivosa lokutshada kutsha kufanana lokufeba yikho kuhle kuwuqede umtshado wokuqala. Umtshado omutsha yiwo oyabe ususemthethweni. INqabayokulinda yesiKhiwa kaNovember 15 1979 yathi “umuntu lo uyabe esetshade kutsha. Yikho kangeke aphonguwuchitha umtshado lo abuyele kulowo ayetshade laye kuqala. Umtshado wokuqala wahle waphela ngesikhathi edivosa, efeba njalo etshada kutsha.”

Indlela esesizwisisa ngayo indaba le ayitsho ukuthi kasisawuqakathekisi umtshado kumbe ukuthi ukufeba akuseyisono esikhulu. Nxa umuntu engadivosa ngesizatho esingekho eBhayibhilini abesetshada lomunye, abadala kumele babumbe ikhomithi yokwahlulela ngenxa yokuthi uyabe efebile. (Nxa lowo atshade laye enguFakazi laye uzabunjelwa ikhomithi yokwahlulela ngenxa yokuthi ufebile.) Lanxa umtshado wabo ungasiwo wobufebe, kuzahlala iminyaka eminengi indoda ingaphiwa imisebenzi ebandleni, kuze kube yilapho abantu bengasadananga kumbe bengasazihluphi kangako ngalokho eyakwenzayo. Ingakaphiwa imisebenzi le, abadala kumele bacabange langezimo zalowo owatshiywa ngobuqili kanye lezabantwana abatshiywa nguyise.—Mal. 2:14-16.

AmaKhristu ayananzelela ukuthi ukudivosa lokutshada kutsha kungelasizatho esisekelwe eMibhalweni ayisindaba encane. Ngakho balingisela uJehova ngokuqakathekisa umtshado.—UmTshu. 5:4, 5; Heb. 13:4.