1. Kungani ilanga leSikhumbuzo liqakatheke kulawo wonke? (ULukha 22:​19, 20)

 ISIKHUMBUZO sokufa kukaJesu lilanga eliqakatheke kakhulu ebantwini bakaNkulunkulu. Yilo lodwa ilanga uJesu atshela abalandeli bakhe ukuthi balinanze. (Bala uLukha 22:​19, 20.) Silezizatho ezinengi ezenza sililindele ngabomvu ilanga leli. Asixoxeni ngezinye zakhona.

2. Yiziphi ezinye izizatho ezenza sisilindele ngabomvu iSikhumbuzo?

² ISikhumbuzo siyasinceda sicabangisise ngokuqakatheka kwenhlawulo. Siyasikhumbuza lendlela esingatshengisa ngazo ukuthi siyawubonga umhlatshelo kaJesu. (2 Khor. 5:​14, 15) Siyasinika lethuba lokuthi “sikhuthazane” labafowethu labodadewethu. (Rom. 1:12) Minyaka yonke abafowethu labodadewethu abanengi abangasafezi inkonzo bayabuya eSikhumbuzweni futhi indlela abemukelwa kuhle ngayo iyabakhuthaza ukuthi babuyele kuJehova. Kanti njalo abanye abanengi abayabe benxusiwe bathintwa inhliziyo yilokho abakuzwayo labakubonayo besebefisa ukufunda iBhayibhili. Lezi ngezinye izizatho ezenza iSikhumbuzo siqakatheke kakhulu kithi.

3. ISikhumbuzo sitshengisa njani ukuthi simanyene labafowethu labodadewethu emhlabeni wonke?(Khangela lomfanekiso.)

³ Cabanga ngokuthi iSikhumbuzo sitshengisa njani ukuthi simanyene labafowethu labodadewethu emhlabeni wonke. OFakazi bakaJehova emhlabeni wonke bayabuthana endaweni ezitshiyeneyo ntambama ukuze bananze iSikhumbuzo. Sonke siyalalela inkulumo egcizelela ukuthi inhlawulo iqakatheke kakhulu. Siyahlabela ingoma ezimbili zokudumisa, kudluliswe isinkwa  lewayini njalo sonke siyavuma ngenhliziyo yonke ngemva kwemithandazo emine sithi “ameni.” Kusiyaphela amahora angaba ngu-24, wonke amabandla ayabe esekwenzile lokhu. Cabanga ukuthi uJehova loJesu bathokoza njani nxa besibona sonke sibadumisa ngesikhathi sinanza iSikhumbuzo!

4. Sizaxoxa ngani esihlokweni lesi?

⁴ Esihlokweni lesi sizaxoxa ngemibuzo elandelayo: Singenzani ukuze silungise inhliziyo zethu singakangeni iSikhumbuzo? Singabanceda njani abanye? Kanti njalo singabanceda njani abangasafezi inkonzo? Impendulo zemibuzo le zizasinceda ukuthi sililindele ngabomvu ilanga leli eliqakathekileyo.

SINGENZANI UKUZE SILUNGISE INHLIZIYO ZETHU SINGAKANGENI ISIKHUMBUZO?

5. (a) Kungani kumele sicabangisise ngokuqakatheka kwenhlawulo? (IHubo 49:​7, 8) (b) Ufundeni kuvidiyo ethi Kungani UJesu Wafa?

⁵ Indlela eqakathekileyo yokulungisa inhliziyo zethu singakangeni iSikhumbuzo yikucabanga ngokuqakatheka komhlatshelo kaJesu Khristu. Akulalutho esingalwenza ukuze sizihlenge esonweni lasekufeni. (Bala iHubo 49:​7, 8; bukela levidiyo ethi Kungani UJesu Wafa?) a Yikho uJehova wahlela ukuthi uJesu anikele ngempilo yakhe ngenxa yethu. UJehova loJesu bazidela kakhulu ukuze benze lokhu. (Rom. 6:23) Nxa singahlala sicabangisisa ngalokho uJehova loJesu abakwenzayo ukuze basihlawulele sizayiqakathekisa kakhulu inhlawulo. Sizaxoxa ngokulutshwana nje uJehova loJesu ababezimisele ukusenzela khona. Kodwa asiqaleni sixoxe ngenhlawulo.

6. Kuyini inhlawulo? Chasisa.

⁶ Inhlawulo yimbadalo ekhitshwayo ukuze kuhlengwe ulutho oluthile. Indoda yokuqala u-Adamu yayingelasono ngesikhathi idalwa. Wathi esewonile, yena labantwabakhe babengaselathemba lokuphila phakade. Yikho uJesu wanikela ngempilo yakhe epheleleyo ukuze asihlenge besesisiba lethemba lokuphila okungapheliyo elaselilahlwe ngu-Adamu. Ngesikhathi esemhlabeni uJesu ‘kenzanga sono, lobuqili abutholakalanga emlonyeni wakhe.’ (1 Phet. 2:22) Ngesikhathi uJesu esifa wayephelele njengoba nje lo-Adamu wayenjalo engakawoni yikho wayesenelisa ukunikela ngempilo yakhe ukuze asihlenge.—1 Khor. 15:45; 1 Thim. 2:6.

7. Yibuphi obunye ubunzima uJesu ahlangana labo ngesikhathi esemhlabeni?

⁷ Ngesikhathi uJesu esemhlabeni waqhubeka emlalela uYise kukho konke lanxa wayehlangana lobunzima obutshiyeneyo. Esesengumntwana kwakumele alalele abazali bakhe ababelesono lanxa yena wayengelaso. (Luk. 2:51) Esekhulakhulile kwakumele alwisane lezinto ezazingamenza acine engasabalaleli abazali bakhe njalo acine engasathembekanga kuJehova. Esemdala kwakumele alwisane loSathane owayemlinga efuna enze isono. USathane waze watshela uJesu ukuthi angabi qotho kuNkulunkulu. (Mat. 4:​1-11) USathane wayezimisele ukuyenga uJesu ukuthi one ukuze engenelisi ukubhadala inhlawulo.

8. Yibuphi obunye ubunzima uJesu ahlangana labo?

⁸ Kulobunye ubunzima uJesu ahlangana labo ngesikhathi esenza inkonzo yakhe. Izitha zakhe zazimhlukuluza futhi zizama lokumbulala. (Luk. 4:​28, 29; 13:31) Kwakumele abekezelele abalandeli bakhe ababephambanisa. (Mak. 9:​33, 34) Ngesikhathi ethonisiswa, wahlukuluzwa njalo wahlekwa. Waphathwa ngendlela ebuhlungu kakhulu futhi wabulawa njengesigebenga. (Heb. 12:​1-3) Wathi esebulawa wathwala nzima yedwa, uJehova kazange amvikele. b—Mat. 27:46.

9. Uzwa njani ngomhlatshelo kaJesu? (U-1 Phetro 1:8)

 ⁹ Kuyacaca ukuthi uJesu wahlangana lobunzima obunengi ukuze asihlawulele. Uzwa njani nxa ucabangisisa ngokuthi wayezimisele ukunikela ngempilo yakhe ngenxa yethu ukuze asihlenge? Kumele ukuthi uyathokoza kakhulu.—Bala u-1 Phetro 1:8.

10. Kuyini okwazwisa uJehova ubuhlungu futhi kungani?

¹⁰ UJehova yena wazidela kangakanani ukuze uJesu asihlawulele? Indlela uJehova loJesu abathandana ngayo ngeke iqathaniswe laloba nguphi ubaba lendodana yakhe. (Zaga. 8:30) Cabanga ngokuthi uJehova wezwa njani ebona uJesu esebunzimeni lapha emhlabeni. Akuthandabuzwa ukuthi kwamzwisa ubuhlungu kakhulu uJehova ukubona iNdodana yakhe ihlukuluzwa, iphikwa futhi ilingwa.

11. Nika isibonelo esitshengisa ukuthi uJehova wayengabe esizwa njani ngesikhathi uJesu ebulawa.

¹¹ Loba nguphi umzali owake wafelwa ngumntanakhe uyakwazi ukuthi kubuhlungu njani ukufelwa ngumntwana. Siyakholwa sibili ukuthi abantu bazavuswa kodwa siyabuzwa ubuhlungu nxa singafelwa ngumuntu esimthandayo. Lokhu kuyasinceda sizwisise ukuthi uJehova wayengabe esizwa njani ngesikhathi ebona iNdodana yakhe ihlupheka futhi isifa ngo-33 C.E. c—Mat. 3:17.

12. Singenzani nxa iSikhumbuzo sesiseduze?

¹² Kusukela khathesi kuze kuyefika ilanga leSikhumbuzo zama ukutaditsha okunengi ngenhlawulo. Ngesikhathi utaditsha uwedwa kumbe ekukhonzeni kwemuli lingasebenzisa iBhuku Lokuchwayisisa LaboFakazi BakaJehova kumbe amanye amabhuku asekelwe eBhayibhilini azakunceda ukuthi uchwayisise ngendaba le. d Woba leqiniso lokuthi uyalulandela uhlelo lokubalwa kweBhayibhili ngesikhathi seSikhumbuzo olutholakala ku-Mpilo Lenkonzo YamaKhristu—UGwalo Lomhlangano. Kanti njalo ngelanga leSikhumbuzo ungakhohlwa ukubukela uhlelo oluqakathekileyo loKukhonza Kwekuseni. Nxa singalungisa inhliziyo zethu singakangeni iSikhumbuzo sizenelisa ukuncedisa abanye ukuthi babe khona ukuze bafunde okunengi.—Ezra. 7:10.

NCEDA ABANYE

13. Yiphi into yokuqala okumele siyenze ukuze sincede abanye bangene iSikhumbuzo?

¹³ Singenzani ukuze sincedise abanye ukuthi  babe khona eSikhumbuzweni futhi bafunde okunengi? Into yokuqala ongayenza yikubanxusa. Unganxusa abantu ohlangana labo ekutshumayeleni futhi ungabhala phansi abanye ofisa ukubanxusa. Abanye futhi ongabanxusa yizihlobo, osebenza labo, ofunda labo esikolo loba abanye nje. Nxa singelazo izimemo ezeneleyo singathumela abanye isimemo sisebenzisa ezempucuko. Kwazi bani, engxenye bangabuya ngobunengi babo.—Umtshu. 11:6.

14. Nika isibonelo esitshengisa ukuthi kungani kuqakathekile ukunxusa abantu.

¹⁴ Nxa ungalanda umuntu umnxuse eSikhumbuzweni kungamkhuthaza ukuthi abuye. Omunye udadewethu wamangala ngesikhathi esizwa umkakhe ongasuyeFakazi emtshela ukuthi uzahamba laye eSikhumbuzweni. Kuyini okwammangalisayo? Yikuthi wayeseke wamnxusa kanengi eSikhumbuzweni kodwa wayengakaze abuye. Pho kuyini okwamenza wafuna ukubuya? Wathi, “Kulomuntu obuye wazonginxusa wangipha isimemo,” wasechasisa ukuthi kwakungomunye umdala webandla ayemjayele. Indoda le yahamba eSikhumbuzweni ngalowomnyaka futhi yaqhubeka isiba khona eSikhumbuzweni okweminyaka eminengi eyalandelayo.

15. Kuyini okufanele sihlale sikukhumbula nxa sinxusa abantu eSikhumbuzweni?

¹⁵ Kumele sikhumbule ukuthi abanye abantu esizabanxusa bazabe belemibuzo ikakhulu nxa bengakaze babuye emihlanganweni yethu. Yikho kungaba kuhle ukuthi sicabange ngemibuzo abangayibuza besesilungiselela ukubaphendula. (Kol. 4:6) Ngokwesibonelo abanye bangazibuza bathi, ‘Kuzabe kusenziwani?’ ‘Kuzathatha isikhathi esinganani?’ ‘Kugqokwani?’ ‘Kuyabhadaliswa yini ukungena?’ ‘Kuzacelwa inkongozelo yini?’ Nxa sinxusa umuntu eSikhumbuzweni singambuza ukuthi ulemibuzo yini, besesiphendula loba yiphi imibuzo ayabe elayo. Singasebenzisa levidiyo ethi Khumbula Ukufa KukaJesu loba ethi Kuyini Okwenzakala EWolu YoMbuso? ukuze sincedise umuntu azwisise ukuthi kwenzakalani emihlanganweni yethu. Kanti njalo isifundo 28 sebhuku elithi Ungathokoza Kuze Kube Nini Lanini! silokunengi esingaxoxa ngakho labantu.

16. Yiphi eminye imibuzo abantu abasivakatshele eSikhumbuzweni abangaba layo?

 ¹⁶ Ngemva kweSikhumbuzo abanye abayabe bebuyile bangaba leminye imibuzo. Bangazibuza ukuthi kungani abantu bebengadli isinkwa futhi benganathi iwayini kumbe ukuthi kungani kulabalutshwane abadlileyo, banatha lewayini. Bangazibuza lokuthi iSikhumbuzo sisenza kangaki ngomnyaka. Kanti njalo bangazibuza lokuthi yonke imihlangano yaboFakazi bakaJehova yenziwa njalo yini? Lanxa izinto lezi kuzakhulunywa ngazo enkulumeni yeSikhumbuzo, abantu abasivakatsheleyo bangadinga ukuchasiselwa izinto ezinengi mayelana lendaba le. Isihloko esiku-jw.org esithi, “Kungani Indlela OFakazi BakaJehova Abananza Ngayo ISidlo SeNkosi Itshiyene Leyezinye Izinkolo?” singasinceda ukuthi siphendule eminye imibuzo abangaba layo. Sizimisele ukwenza konke esingakwenza iSikhumbuzo singakafiki, mhla weSikhumbuzo langemva kweSikhumbuzo ukuze sincedise ‘abalenhliziyo eziqotho’ ukuthi babe khona futhi bafunde eSikhumbuzweni.—Imiseb. 13:48.

NCEDISA ABANGASAFEZI INKONZO

17. Abadala bangabancedisa njani labo abangasafezi inkonzo? (UHezekheli 34:​12, 16)

¹⁷ Ngesikhathi seSikhumbuzo abadala bangabancedisa njani abangasayifezi inkonzo? Batshengiseni ukuthi liyabathanda lokuthi lilendaba labo. (Bala uHezekheli 34:​12, 16.) Kungakafiki iSikhumbuzo wobani leqiniso lokuthi liyakhuluma labo, libaqinisekise ukuthi liyabathanda lokuthi liyafuna ukubancedisa ngaloba yiphi indlela. Banxuseni eSikhumbuzweni. Nxa bangabuya libamukele ngazo zombili. Ngemva kweSikhumbuzo qhubekani libavakatshela kumbe libafonela abafowethu labodadewethu laba esibathandayo njalo lizimisele ukubancedisa ukuthi babuyele kuJehova.—1 Phet. 2:25.

18. Kumele sibaphathe njani abangasayifezi inkonzo? (URoma 12:10)

¹⁸ Sonke ebandleni kumele sibaphathe njani abangasayifezi inkonzo abayabe bebuye eSikhumbuzweni? Kumele sibatshengise ukuthi siyabathanda, sibe lomusa kubo futhi sibahloniphe. (Bala uRoma 12:10.) Khumbula ukuthi abafowethu labodadewethu laba bebengabe  bethikaza ukuthi babuye emihlanganweni, mhlawumbe besesaba ukuthi abasoze bamukelwe kuhle. e Ngakho ungababuzi imibuzo ezabenza bayangeke kumbe ukhulume izinto ezizabazwisa ubuhlungu. (1 Thes. 5:11) Phela lokhu bengabafowethu labodadewethu. Kuyasithokozisa kakhulu ukuphinda sikhonze labo!—Hubo. 119:176; Imiseb. 20:35.

19. Kusinceda ngani ukukhumbula ukufa kukaJesu?

¹⁹ Siyambonga uJesu ngokuhlela ukuthi sinanze iSikhumbuzo minyaka yonke njalo siyakuzwisisa ukuthi kungani kuqakathekile ukwenza njalo. Nxa sisiba khona eSikhumbuzweni siyancedakala njalo sincedise labanye ngendlela ezinengi. (Isaya. 48:​17, 18) Kwenza simthande kakhulu uJehova loJesu. Kuyasinceda sitshengise ukuthi siyababonga kakhulu ngalokho abasenzele khona. Kuphinda kusincede lokuthi sibathande kakhulu abafowethu labodadewethu. Singancedisa labanye ukuthi bakholise izibusiso esizithola ngenxa yenhlawulo. Ngakho asenzeni konke esingakwenza ukuze silungiselele iSikhumbuzo salonyaka njengoba kuyabe kulilanga eliqakatheke kakhulu.