Ingcitshi zokusebenza kwengqondo zithi abantu bathokoziswa yikuthola izinto abazidingayo kanye lokunye futhi okuqakathekileyo. Lokhu sikubona ngokuthi abantu bafuna ukufeza okuthile empilweni, ukukhonza othile omkhulu kulabo kumbe enye into ethile. Ukuze benze lokhu abanye bazilibazisa ngezinto ezidaliweyo, imidwebo lezomculo lokunye nje. Lanxa kunjalo, izinto lezi azibaniki intokozo abayidingayo.

Abantu ababala iBhayibhili bayakuzwisisa ukuthi abantu bazalwa belesifiso sokuba lobuhlobo loNkulunkulu. Izihloko zokuqala zikaGenesisi zitshengisa ukuthi uNkulunkulu esedale abantu bokuqala, wayehlala ekhuluma labo, ebavumela ukuthi babe lobuhlobo laye. (UGenesisi 3:8-10) UNkulunkulu wathi edala abantu wayengajonganga ukuthi baziphilele bodwa, bayakudinga ukuthi bakhulume loMenzi wabo. IBhayibhili likhuluma ngalokhu kanengi.

Ngokwesibonelo uJesu wathi: “Bayathokoza labo abaqaphela isidingo sabo esingokomoya.” (UMathewu 5:3, NW) Amazwi la asitshengisa ukuthi isiqokoqela esenza umuntu athokoze empilweni yikwanelisa isifiso esizalwa laso sokwazi uNkulunkulu. Singakwenza njani lokho? UJesu wasitshela impendulo lapho esithi: “Umuntu kaphili ngesinkwa kuphela, kodwa ngelizwi lonke eliphuma emlonyeni kaNkulunkulu.” (UMathewu 4:4) Yikho-ke, amazwi kaNkulunkulu, okutsho imicabango kanye lemilayezo yakhe esikuthola eBhayibhilini kungasinceda njani ukuthi sithokoze ezimpilweni zethu? Asihloleni izinto ezintathu eziqakathekileyo.

Namuhla kulentshantshu lengcitshi ezinengi ezithi zixwayisa abantu mayelana lezothando, ezemuli, inhlupho zalamuhla, intokozo, ubudlelwano kanye lokuthi siphilelani. Kodwa yiphi ingcitshi yoqobo enganika abantu isiqondiso esingcono kakhulu ezintweni lezi? NguMdali wethu uJehova uNkulunkulu kuphela.

Singakuzwisisa ngomzekeliso lo: Nxa uthenge impahla ethile kungaba yikhamera kumbe ikhompiyutha,  uyabe ukhangelele ukuthi ibuye ilebhukwana elithile elichaza ukuthi impahla le oyithengileyo ungayisebenzisa njani ngendlela eyiyo. IBhayibhili lingafaniswa lebhukwana leli. UMdali wethu, uNkulunkulu usinike lona ukuze silisebenzise. Lichaza ukuthi abantu badalelwani lokuthi kumele balisebenzise njani ukuze baphumelele empilweni.

IBhayibhili lifanana lawo wonke amabhukwana eziqondiso, lilimukisa abalibalayo ngemikhuba engaphambanisa ubuhle kanye lokusebenza “kwempahla le,” okutsho ukuphila kwethu. Iziqondiso lamacebo, akhulunywa ngabantu kungazwakala kumnandi futhi kulula ukukusebenzisa, kodwa ukulandela iziqondiso ezivela kuMdali wethu yikho okulengqondo futhi kwenza sithole impumela emihle njalo sibalekele izinkinga.

Lanxa uJehova uNkulunkulu enika iziqondiso lezixwayiso, kabambi abantu ngamandla ukuthi bazilandele. Kodwa ngenxa yokuthi uyasithanda ukhuluma lathi kuhle esithi: ‘Mina nginguJehova, uNkulunkulu wakho, okufundisa lokho okuhle kakhulu kuwe, ekutshengisa indlela okumele uhambe ngayo. Aluba ubungayilalela imilayo yami nje, ukuthula kwakho bekuzakuba njengomfula, ukulunga kwakho kube njengamagagasi olwandle.’ (U-Isaya 48:17, 18) Ngamafitshane nje uma singalandela isiqondiso sikaNkulunkulu singaphila kuhle kakhulu. Okutsho ukuthi ukuze siphile kuhle njalo sithokoze kumele sikhokhelwe nguNkulunkulu.

Abanye abantu bacabanga ukuthi akulalutho abaludingayo kuNkulunkulu ngoba kulezinto ezibaphicayo ekuphileni ezenza kube nzima ukukholwa ukuthi uNkulunkulu ulothando. Ngokwesibonelo bangabuza ukuthi: ‘Kungani abantu abalungileyo behlupheka?’ ‘Kungani abanye abantwana bezalwa beyizigoga?’ ‘Kungani abantu bephathana kubi kangaka?’ Le yimibuzo eqakathekileyo sibili, njalo ukuthola izimpendulo eziqondileyo zemibuzo le kungasinceda kakhulu ezimpilweni zethu. Kulokuthi sihle sisole uNkulunkulu ngenxa yezinhlupho lezi, asihloleni ukuthi iLizwi lakhe, iBhayibhili lithini.

Esahlukweni sesithathu kuGenesisi sithola indaba kaSathane owasebenzisa inyoka ukuze aqile abazali bethu bokuqala ukuthi bephule umthetho kaJehova uNkulunkulu mayelana lokuthi bangadli isihlahla sokwazi okuhle lokubi. USathane watshela u-Eva wathi: “Kalisoze life ngempela. Ngoba uNkulunkulu uyazi ukuthi lingasidla amehlo enu azavuleka, beselisiba njengoNkulunkulu, lazi okuhle lokubi.”​—UGenesisi 2:16, 17; 3:4, 5.

Amazwi kaSathane la ayesitsho ukuthi uNkulunkulu uqamba amanga, lokuthi indlela abusa ngayo ayilunganga. UDeveli waphinda wathi izinto zizabahambela kuhle abantu nxa bengalalela yena. Konke lokhu kwakuzaxazululwa njani? UJehova wavumela ukuthi kube lesikhathi sokuthi ubani lobani azibonele ukuthi kuliqiniso yini lokho uSathane ayekutsho ngaye. Ngamanye amazwi, uNkulunkulu wayenika uSathane labasekeli bakhe ithuba lokuthi  batshengise ukuthi abantu bangaphila kuhle yini bengelaye uNkulunkulu.

Wena ubona angani lokho uSathane ayekutsho kuliqiniso yini? Abantu bangaphumelela yini nxa bengelaye uNkulunkulu? Ukuhlupheka, ukungalungi, ukugula kanye lokufa, ubugebenga, izimpi, ukuqothulwa kwemihlobo yabantu, ulunya lokuziphatha okubi bekulokhu kuhlupha abantu okweminyaka eminengi. Konke lokhu kuyibufakazi obutshengisa ukuthi imizamo yabantu yokuzibusa ayiphumelelanga. Kulokuthi sisole uNkulunkulu ngakho konke lokhu, iBhayibhili liyakucacisa ukuthi: “Ngabona abantu bephethene ngokulukhuni bezwisana ubuhlungu.”​—UmTshumayeli 8:9, The Holy Bible in Ndebele.

Konke lokhu kutshengisa ukuthi kumele kube nguNkulunkulu osiphendulela imibuzo esihluphayo lokuthi nguye okumele asinike izindlela zokuxazulula izinhlupho. Uzakwenza njani lokhu?

Sokuleminyaka eminengi abantu bezama ukuqeda ukugula, ukuluphala kanye lokufa. Imizamo yabo eminengi, ibadlela isikhathi kanye lenotho yabo, kodwa kuncane abakutholayo futhi kanengi kabaphumeleli. Abanye bakholwa ukuthi abasoze baguge nxa bangasebenzisa imithi ethile yesintu, banganatha amanzi athile, kumbe bangayahlala endaweni ethile. Okudanisayo yikuthi konke lokhu kuphelela emoyeni.

UNkulunkulu ufuna abantu baphile kuhle njalo bethokoza. Yikho vele ayekuhlosile ngesikhathi edala abantu futhi kakakukhohlwa. (UGenesisi 1:27, 28; U-Isaya 45:18) UJehova uNkulunkulu usithembisa ukuthi loba kuyini akuhlosileyo kuzaphumelela loba sekutheni. (U-Isaya 55:10, 11) IBhayibhili lisitshela ngesithembiso sikaNkulunkulu sokuletha iPharadayisi elalahlwa ngabazali bethu bokuqala. Ebhukwini lokucina eliseBhayibhilini sithola amazwi la: “[UJehova uNkulunkulu] uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu, ngoba umumo omdala wezinto usudlule. (ISambulo 21:4) UNkulunkulu uzawuletha njani umumo wezinto omuhle kangaka njalo thina singakuthola njani lokho okuthenjisiweyo?

UJesu Khristu, iNdodana kaNkulunkulu, wafundisa abalandeli bakhe ukuthi bathandazele ukuthi intando kaNkulunkulu yenziwe. Abantu abanengi bawujayele futhi bahlala bewuphindaphinda umkhuleko lo abanye abawubiza ngokuthi nguMthandazo weNkosi. Uthi: “Baba wethu osezulwini, malihlonitshwe ibizo lakho, umbuso wakho kawuze, intando yakho yenziwe emhlabeni njengalokhu isenziwa ezulwini.” (UMathewu 6:9, 10) Yikho-ke uJehova uNkulunkulu uzasebenzisa uMbuso wakhe ukuze akhiphe bonke ubunzima obubangelwa yikubusa kwabantu futhi alethe umhlaba omutsha olokulunga asithembise wona. * (UDanyeli 2: 44; 2 UPhetro 3:13) Kumele senzeni ukuze siphile emhlabeni lo?

UJesu Khristu uyasitshela ukuthi kumele senzeni: ‘Manje-ke yilokhu ukuphila okungapheliyo: ukuthi bakwazi wena, onguwe wedwa uNkulunkulu weqiniso, loJesu Khristu omthumileyo.’ (UJohane 17:3) Yikho-ke uNkulunkulu angasincedisa ukuthi sithole ukuphila okungapheliyo emhlabeni omutsha othenjisiweyo. Isithembiso lesi singakunceda ukuthi uvume sibili ukuthi, uNkulunkulu uqakathekile ekuphileni kwakho.

Eminyakeni engu-2 000 edlulileyo e-Ariyophagu e-Athene, umphostoli uPhawuli ekhuluma lezazi zase-Athene wathi: “Upha bonke abantu impilo lomphefumulo lokunye konke. Ngokuba siphila kuye, sihambe. Njengokutsho kwezinye izimbongi zakini ukuthi, ‘Singabantwabakhe.’ ”​—ImiSebenzi 17:25, 28.

Lokho uPhawuli akutsho kwabase-Athene kulokhu kuliqiniso. UMdali wethu usipha umoya esiwuphefumulayo, ukudla kanye lamanzi esiwanathayo. Besingeke siphile singelazo izinto lezi ezinhle uJehova asinike zona ukuze siqhubeke siphila. Kodwa kungani uNkulunkulu enika abantu bonke izinto lezi kungelani lokuthi bayamkhonza kumbe hatshi? UPhawuli wathi: “UNkulunkulu wakwenza lokhu ukuze abantu bamdinge lokuthi mhlawumbe bamfinyelele bamfumane, loba nje uvele engakhatshana komunye lomunye wethu.”​—ImiSebenzi 17:27.

Uyafuna yini ukumazi ngcono uNkulunkulu, okutsho ukufunda okunengi ngaye, izinjongo zakhe kanye lezeluleko zakhe mayelana lendlela enhle yokuphila khathesi lasesikhathini esizayo? Nxa kunjalo ukhuthazwa ukuthi ukhulume lalowo okunike imagazini le kumbe uthintane labalobi bayo. Bangakunceda kakhulu.