USathane laye unjalo, kabonakali, kunzima ukuthi abantu bananzelele ukuthi ukhona njalo uyingozi kakhulu. Kodwa uNkulunkulu kasitshiyi sinjalo, uyasinceda. Yikho-ke akudingeki ukuthi umesabe uSathane nxa usebenzisa izipho ezilandelayo esiziphiwa nguNkulunkulu.

Inkululeko yokuzikhethela. UJakhobe 4:7 uthi: “Menqabeni uSathane, uzalibalekela.” Lanxa uSathane elamandla, ngeke akubambe ngenkani ukuthi wenze izinto ongazifuniyo. Wena uyazikhethela ukuthi ufunani. U-1 Phetro 5:9 uthi: “Menqabeni [uDeveli], liqinile ekukholweni.” Ungakhohlwa ukuthi uSathane wamtshiya uJesu lapho esebona ukuthi wehluleke kathathu ukumlinga. (UMathewu 4:11) Kusegcekeni ukuthi lawe ungazikhethela ukuthi ungaweli emijibileni kaSathane.

Ubungane loNkulunkulu. UJakhobe 4:8 usikhuthaza ukuthi ‘sisondele phansi kukaNkulunkulu.’ UJehova uyakunxusa yena ngokwakhe ukuthi ube ngumngane wakhe. Ungakwenza njani lokhu? Qala ngokufunda okunengi ngaye usebenzisa iBhayibhili. Lokhu kuzakunceda kakhulu. (UJohane 17:3) Ozakufunda ngoJehova kuzakwenza ukuthi ucine usumthanda kakhulu. Kanti njalo nxa usumthanda kuzakuba lula ukuthi wenze intando yakhe. (1 UJohane 5:3) Nxa usondela kuYihlo osezulwini, yena uzakwenzani? UJakhobe uthi: ‘[UNkulunkulu] laye uzasondela kuwe.’

Isithembiso sokuthi sizavikelwa. UZaga 18:10 uthi: “Ibizo likaJehova liyinqaba eqinileyo; abalungileyo babalekela kulo baphephe.” Kodwa lokho akutsho ukuthi ibizo likaNkulunkulu seliyintebe. Kutsho ukuthi abahlonipha ibizo lakhe ngenhliziyo yonke bangambiza loba ngasiphi isikhathi ukuze abavikele.

 Isibonelo esiseBhayibhilini. KumiSebenzi 19:19 sithola okuthile okuhle kakhulu okwenziwa ngamaKhristu ase-Efesu ayesanda kuphenduka. Ivesi le ithi: “Abanengi ababehlahlula baletha ndawonye izincwadimgoqwa zabo bazitshisa obala. Bathi sebehlolile izindleko zalezozincwadimgoqwa kwabonakala kungaba ngamadrakhima ayizinkulungwane ezingamatshumi amahlanu.” * AmaKhristu la akutshisa konke ayelakho okwakuphathelane lobudimoni lanxa kwakudula kakhulu. Abakwenzayo lathi kungasinceda kakhulu. Emhlabeni lo kugcwele ubudimoni lamasalamusi. Kanti njalo ezinye izinto kumbe izenzo eziphathelane lamadimoni ezingakhanya zizincane zingasingenisela amadimoni singananzeleli. Kuqakatheke kakhulu ukuthi sitshiye zonke izinto lezi lanxa zingabe ziligugu kithi.​—UDutheronomi 18:10-12.

URogelio esikhulume ngaye esihlokweni sokuqala wahlala iminyaka engu-50 engakholwa ukuthi uDeveli ukhona. Kodwa wantshintsha umbono wakhe. Ngenxa yani? Uthi: “Ngangiqala ngqa ukuthola iBhayibhili empilweni yami. Ulwazi engaluthola eMibhalweni lwangenza ngangathandabuzi ukuthi uDeveli ukhona. Yilo oselungivikela lokuthi ngingahugwa ngamacebo akhe.”

Uyafisa yini ukuphila emhlabeni uSathane engasekho? Kungenzakala lokhu ngenxa yokuthi iMibhalo iyakutsho ukuthi esikhathini esizayo uDeveli onguye odukisa abantu abanengi kangaka ‘uzaphoselwa echibini lesolufa elivuthayo.’ (ISambulo 20:10) Kodwa-ke izidalwa zomoya ezingabonakaliyo azingeke zilinyazwe ngumlilo lesolufa. Yikho-ke kumele ukuthi ichibi lomlilo litsho ukutshabalaliswa phakade. Lokhu kutsho ukuthi uSathane uzasuswa angaphindi abe khona futhi. Ngalesosikhathi abantu abathanda uNkulunkulu bazabe sebethokoza kakhulu.

Okwakhathesi qhubeka ufunda okunengi kakhulu ngoJehova kanye lalokho akufunayo. * Sizafika sibili isikhathi lapho okuzabe sekuliqiniso ukuthi, “Akula Sathane!”