“Ukholo yikuqiniseka ngalokho esikulindeleyo esithemba ukuthi kuzakwenzakala futhi yikuba lobufakazi obutshengisa ukuthi okungabonakaliyo kukhona sibili.”—KumaHebheru 11:1, INguqulo Yomhlaba Omutsha.

 “Ukholo luyikuqiniseka kwezinto ezithenjwayo, ubufakazi bezinto ezingabonwayo.”—KumaHebheru 11:1, TBS.

 Ivesi le isinika ingcazelo ecacileyo yokuthi ukholo luyini njalo itshengisa ukuthi ukukholwa ayisiyondaba yokwazi nje lokho okufundiswa liBhayibhili.

 “Ukholo yikuqiniseka ngalokho esikulindeleyo esithemba ukuthi kuzakwenzakala.” Ibala lesiGrikhi elihunyutshwe ngokuthi “ukholo” kuHebheru 11:1, litsho ukuqiniseka, ukuthemba kanye lokungathandabuzi. Ukholo olunjalo alusekelwanga ezintweni esifisa ukuthi zenzakale, kodwa ‘luyikuqiniseka ngalokho esikulindeleyo.’ Ibala lesiGrikhi elihunyutshwe ngokuthi ‘ukuqiniseka’ a lingahunyutswa langokuthi “ubufakazi bokuthi into ethile ngeyakho.” Yikho umuntu olokholo ulobufakazi obumenza angathandabuzi ukuthi akuthenjisiweyo kuzagcwaliseka.

 ‘Ukholo yikuba lobufakazi [kumbe “lobufakazi obusuthisayo,” amabala angaphansi] obutshengisa ukuthi okungabonakaliyo kukhona sibili.’ Ukholo lusekelwa yibufakazi obuqinileyo. Ubufakazi lobo buqine okokuthi bunceda umuntu olokholo aqiniseke ukuthi into ethile ikhona sibili lanxa engayiboni.

 Ibhuku lamaHebheru labhalwa ngumphostoli uPhawuli ebhalela amaKhristu akuqala ayehlala eJerusalema lasezindaweni ezaziseduze kwayo. Esahlukweni 11 uPhawuli wakhuluma ngokuqakatheka kokuba lokholo. Ngokwesibonelo wathi: “Nxa umuntu engelakholo, akwenzakali ukuthi amthokozise uNkulunkulu ngoba loba ngubani osondela kuNkulunkulu kumele akholwe ukuthi ukhona lokuthi uyabapha umvuzo labo abamdinga ngeqiniso.” (KumaHebheru 11:6) Ngemva kokuchasisa ukuthi luyini ukholo kumaHebheru 11:1, uPhawuli waqamba izibonelo zamadoda labesifazana okukhulunywa ngabo eBhayibhilini abatshengisa ukuthi babe lokholo. Wakhuluma ngalokho abakwenzayo okuvumelana lentando kaNkulunkulu okwakutshengisa ukuthi babe lokholo.—KumaHebheru 11:4-38.