2 Pedhru 3:1-18
3 Hama jinodiwa, iyi yaakarata yocipiri yandiri kumutarira, inga zvandakaita pa karata yokutanga, ndiri kucunguja* kukwanisa kwenyu kurangarira ushoni ndecishandisa ngwajo,
2 kuti mutame kukanganwa masoko akanangwa kare ngo vaporofeti vakagondeka no mutemo wa Mambo no Muponesi, ecishandisa vapostori venyu.
3 Cokutanga, munodikana kuziva kuti mu mazuva okupejisira kunozobuda vaiti vo jee vanozoviya kuzoita jee, veciita mukuzwirana no kuda kwavo
4 vecinanga kuti: “Iyena aazivi kugondesa kuti waizoviya here? Waro ari kwapi?* Ngokuti kuvhira majicekuru edu paakavata mu rufu, zviro zvese zvakandogara zvakadaro, inga zvazvainga kuvhira pa kutanga ko nyika.”
5 Ngokuti ivona vanojiitisa inga vacikazivi kuti kuvhira kare, denga no pasi zvainga zviriyo, zvakanasa kuimiswa pasi pakaoma no pakati po kumwa ngo soko ra Mwari;
6 ngo zviro izvi, nyika yokare yakandondomera payakabobojwa ngo kumwa.
7 Asi ngo soko rondhoro, matenga no pasi patiri kuvonari nyamasi zviri kuvigihwa muriro, zvecivigihwazve njiku yo kutongwa no kuparajwa ko vandhu vakashata.
8 Mucakanganwa izvi hama: kuna Jehovha,* njiku imwe inoita inga ciuru co makore, ciuru co makore cinoita inga njiku imwe.
9 Jehovha* aanonoki kuita cigondiso cake inga zvinorangarira vamweni. Asi ano unyasha na imwimwi; ngo kudaro aadi kuti mundhu afe, asi anoda kuti vese vakhauye.
10 Njiku ya Jehovha* inozoviya inga mbavha, pa njiku iyi denga rinozopera ngo kutindhira, asi zviro zvaro zvecipisa, zvinozonyunguruka. Pasi pano no mabasa apo, zvinozobudiswa pambhene.
11 Zvecivoneka kuti zviro zvese izvi zvinozonyunguruka ngo njira iyi, rangariranyi kuti munodikana kuva mundhu wo mushovonyi. Munodikana kuva vandhu vano mufambiro wakacena meciita mabasa o kujipira kuna Mwari.
12 Meciimira no kunasa kuziva* kuguma ko njiku ya Jehovha,* matenga paanozoparajwa pa njikuyo ngo murazvu, no zviro zvayo zvinozonyunguruka ngo kupisa maningi!
13 Asi kuno matenga mapsa no pasi papsa zvatiri kuimira mukuzwirana no cigondiso cake, mondhomo munozogara urungami.
14 Ngo kudaro hama jinodiwa, zvecivoneka kuti muri kuimira zviro izvo, vangisiranyi kuti mukhandike mucina uposi no ndava iri yese, muri mu runyararo.
15 Zvimwenizve, vonanyi kusengerera kwa Mambo wedu inga ruponeso, inga zvamakatarihwa ndi hama yedu Pauro mu kuzwirana no ungwaru hwayakapuwa.
16 Yecibhuya ngo zviro izvi inga zvayaiita mu karata jayo jese. Zviro zvimweni zvinonesa kuzwisisa, zviro izvi zvaitoregehwa no kuphindujwa* ngo vandhu vanonesa kuzwisisa no vacizivi kugajana, veciitavo kudaroko no mu Matahwa ese, vecipsaka kuparajwa kwavo.
17 Ngo kudaro hama jinodiwa, meciziva izvi nguva iciripo, ngwariranyi kuti mutame kupauswa ngo cishaishi co vashaishi kutizve mutame kuwa pa kuvanga kwenyu.
18 Asi rambanyi mecikura mu unyasha hucikaezaniswi no zivo ya Mambo wedu no Muponesi Jesu Kristu. Iyena ngaakujwe kuvhira wari mbhera narini. Ameni.
Masoko o Pasi
^ Kana: “ndiri kumungwaja kuti mushandise.”
^ Gama ngo Gama: “Kuvepo kwake kwainga kwakagondeswa, kuri kwapi?”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “no cidisiso cakakura.” Gama ngo Gama: “no kukasikisa.”
^ Vonanyi Kudurujihwa ko Magama.
^ Kana: “kukunukuja.”
