Apokaripsi 3:1-22
3 “Tarai kudari ku ndhumwa* yo mu ungano yo ku Sardhi: Wiyani ano mujimu munomwe ja Mwari no ndhondho nomwe, ari kunanga kudari: ‘Ndinoziva zviito zvako, iwewe unovoneka inga uri penye kuveni wakatofa hako.
2 Ivai wakarinda, uvangise zvasara zvainga zvoda kufa, ngokuti ndavona kuti auzivi kuita ushoni mabasa ako pamberi pa Mwari wangu.
3 Ngo kudaro, endererai mberi weciceukija zviro zvowakaashira no zvowakazwa, woenderera mberi weciviga zviro zvondhozvo perapo wokhauya. Zvokadi ukatama kungwara, ndinoviya inga mbavha, iwewe auzoizivi nguva yandinozoguma ndiyona.
4 “‘Ngo kudaro, iwewe no vandhu vanganani ku Sardhi vacizivi kusvipisa nguvo javo, ivona vanozofamba na inini vakasimira nguvo jakacena, ngokuti vanofanera.
5 Wiya anozowina anozogara akasimira nguvo jakacena, inini andizopfujuri zina rake mu bhuku ro upenyu, asi inini ndinozomuziva pamberi pa Baba wangu no po ngirozi javo.
6 Wiya ano njeve ngaazwe zvinonanga mujimu ku ungano.’
7 “Tarai kudari ku ndhumwa* yo mu ungano yo ku Firadhefiya: Wiya wakacena, wocokwadi, ano shavhi ya Dhavhidhi, anofunungura pacikafungwi ngo mundhu ari wese, wofunga pacikafununguhwi ngo mundhu ari wese, ari kunanga zviro izvi:
8 ‘Ndinoziva zviito zvako, vonai! Ndadira musuvo wakafununguka pambeji pako, ucikafungwi ngo mundhu ari wese. Ndinoziva kuti iwewe auna simba rakawanda, wakaviga soko rangu wova wakagondeka pamberi po zina rangu.
9 Vonai! Ndicaita kuti vaya vo sinagoga ya Sathana vanonyepa veciti tiri Vajudha kuveni asipi, vaviye kuzopfukama pamberi pako, ndozovadira pasi po soka jako, ndoita kuti vazive kuti inini ndakakuda.
10 Zvecivoneka kuti wakangwarira soko ngo pamusoro po kucungirira kwangu, inini ndinozokungwariravo pa nguva yo kuejwa. Kuejwa uku kunozoviira vandhu vese vanogara pasi pano.
11 Ndiri kuzeyo ngo kukasika. Endererai mberi wecibatisisa zvounazvo, kuti pacadova no mundhu anokutorera junguja rako.
12 “‘Wiya anowina, ndinozomuita njiki mu nyumba ya Mwari wangu, iyena aazobudimo. Inini ndinozomutara zina ra Mwari wangu no zina ro dhorobha ra Mwari wangu, Jerusarema ibza rinovha kudenga ka Mwari wangu, ndinozomutaravo zina rangu.
13 Wiya ano njeve ngaazwe zvinonanga mujimu ku ungano.’
14 “Tarai kudari ku ndhumwa* yo ku ungano yo Raodhiseya: Wiya anodanijwa kuti Ameni, capupu cakagondeka, cokadi, cisikwa cokutanga ca Mwari, cinonanga zviro izvi:
15 ‘Inini ndinoziva zviito zvako, iwewe autondhori nee aupisi. Inini ndaida kuti iwewe utondhore kana kuti upise.
16 Zvecivoneka kuti iwewe unojiya, aupisi nee kutondhora, inini ndinozokuruca.
17 Zvecivoneka kuti iwewe unonanga kuti, “Inini ndakakhupuka, ndakawana zviro zvakawanda apana candicada,” asi auzvizivi kuti uri kutambujika, unoitisa pena, uri murombo, uri bofu, uri mitu.
18 Ndinokupa zano kuti utenge na inini goridhi rakanyunguruswa pa muriro kuti ukhupuke, wotengazve nguvo yokucena kuti usimire utame kuvoneka umitu hwako no mafuta okuzora ndiwona mu meso mako kuti uvone.
19 “‘Vese vandinoda, ndinovapangira no kuvajijisa. Ngo kudaro, vangisirai ukhauye.
20 Izwanyi! Ndakaima pa musuvo ndecigogoja. Mundhu anozwa izwi rangu wondifunungurira musuvo, inini ndinozonghwina mumba make, ndozorarira na iyena. Iyena anozorarira na inini.
21 Wiya anozowina, ndinozoita kuti azogare pamwepo na inini pa cigaro co umambo, inga zvondakawina ndogara pa cigaro co umambo ca Baba wangu.
22 Wiya ano njeve ngaazwe zvinonanga mujimu ku ungano.’”
