Dhanyeri 10:1-21
10 Mu gore ro citatu ra Siro mambo wo Persiya, Dhanyeri waidaninjwaya kuti Bheriteshazari, wakakhombijwa masoko aibhuya ngo pamusoro po kuhwisana kukuru; masoko ondhowo ainga ocokwadi. Iyena wakazwisisa masokowo, obesehwa kuziva zvaainga akavona.
2 Mu njiku jondhojo, inini Dhanyeri, ndakapeja sumana ndhatu ndecicema.*
3 Andizivi kuha zvokuha zvinonaka. Apana nyama nee vhinyu yakanghwina mukanwa mangu, andizivi kuzora mafuta mu muviri wangu ko sumana ndhatu.
4 Mu njiku makumaviri na murongomuna yo mweji wokutanga, pandainga ndiri mumbhiripiri mo murambo mukuru wo Tigre,*
5 ndakamusa majiso ndovona mwanarume wainga wakasimira nguvo yo mutengo mukuru, mucihunu* make mainga muno bhande ro goridhi ro Ufazi.
6 Muviri wake waiita inga wo buwe ro krizorito, kumeso kwake kwaiita inga mbheni, majiso ake ainga o mwenje* unobwaka, mukono jake no mukumbo jake jaiita inga jo utare unomonikira, izwi ro mazwi ake raiita inga izwi ro vandhu vakawanda.
7 Inini basi Dhanyeri, ndini ndakava no civoniso ici. Vanarume vandainga navo avazivi kucivona. Ngo kudaro, ivona vakatanga kundhyandhya maningi, perapo vakatiza voenda koofindara.
8 Ngo kudaro, ndakasara ndega pandakavona civoniso ici cikuru, ndakapera simba, kumeso kwangu kwakacinja, ndakasara ndakati rekete kamare.
9 Ndakazwa masoko aaivereketa, pandakazwa zvaaivereketa, ndakawa cinyamuzuwa* ngo hope ndakasikimara pasi.
10 Tevere nyara yo mundhu yakandibata, yondizunguza kuti ndimuke, yondiimisa ngo makokovhi ndakabatirira pasi ngo nyara jangu.
11 Iyena wakandivhunja kudari:
“Dhanyeri, uri mwanarume anosisira* maningi, izwai masoko andinodari kukuvhunja. Wari uno imai, ngokuti ndatumwa kuti ndibhuye na iwewe.”
Paakandivhunja masoko aya, ndakaima ndecitetemera.
12 Iyena wakati: “Ucathya Dhanyeri, masoko ako akazika kuvhira pa njiku yawakazvipira wecipsaka kuzwisisa, wozvidodokesa pamberi pa Mwari wako. Inini ndaviya ngo ndava yo masoko ako.
13 Asi mutongi wo umambo wo Persiya, wakahwisana na inini ko makumaviri o njiku no njiku imwe. Ngo kudaro, Migeri,* mutongi anosisira maningi* wakaviya koondibesa; pa mukuvo uwu ndainga kondhoyo no majimambo o Persiya.
14 Wari ndaviya kuzokubesera kuti uzwisise zvinozoitika no vandhu pa njiku jo kupejisira, ngokuti civoniso ici ngo co njiku jo kumbeji.”
15 Paakandivhunja masoko aya, ndakasikimara pasi ngo kumeso ndoita mbeveve.
16 Ngo kudaro, wiya waiita inga mundhu wakapsasa muromo wangu. Perapo ndakafunungura muromo, ndovhunja wiya waiima pamberi pangu kudari: “Mambo wangu ndiri kundhyandhya ngo ndava yo civoniso ici, andicina simba.
17 Ngo kudaro, inini muranda wenyu ndingabhuisa kudini na imwimwi mambo wangu? Ngokuti wari uno andicina simba, andicakwanisi no kufema.”
18 Wiya waingaya wakatojana no mundhu wakandibatazve wondivangisa.
19 Ngo kudaro, iyena wakati: “Mwanarume anosisira* maningi, ucathya. Runyararo ngahuve newe. Ivai wakavanga, vangai.” Iyena paaibhuya na inini, ndakajizwa ndakavanga maningi, perapo ndakati: “Bhuyanyi mambo wangu ngokuti mandivangisa.”
20 Tevere iyena wakati: “Unozviziva kuti ngenyi inini ndaviya kouri? Wari inini ndinohwirira kohwisana no mutongi wo Persiya. Asi ndikapinda, mutongi wo Gresiya anozoviyavo.
21 Ngo kudaro, inini ndinokuvhunja zviro zvakatahwa mu bhuku ro cokwadi. Apana mundhu anondibesa mu zvese izvi kuciripi Migeri mutongi wenyu.
Masoko o Pasi
^ Kana: “ndecirira.”
^ Gama ngo Gama: “Hidhekeri.”
^ Vonanyi Kudurujihwa ko Magama.
^ Kana: “masasira, mazenje.”
^ ndakazirika.
^ Kana: “anodiwa, anoreremejwa.”
^ Zvinoreva: “Ndiyani Wakaezana Na Mwari?”
^ Kana: “mutongi anocigaro cikuru.”
^ Kana: “anodiwa, anoreremejwa.”
