Dhanyeri 11:1-45
11 “Mu gore ro kutanga ra Dhariyo mu Medhiya, inini ndakamuka kuti ndimubesere no kumujivirira.*
2 Zvandinoda kukuvhunja wari ngo zvokadi.
“Mu Persiya munozomuka majimambo amweni matatu. Umambo wocirongomuna unozounganija upfumi wakawanda maningi kupinda majimambo amweni. Iwona ukazovanga ngo upfumi hwawo, hunozoita kuti vandhu vese vahwisane no umambo wo Gresiya.
3 “Mambo umweni ano simba maningi anozobuda. Iyena anozotonga ndau jakawanda, ozoita zvese zvaanoda.
4 Ngo kudaro, iyena paanozova no simba guru, umambo wake unozoguhwa woendeswa ku mativi marongomuna o mbhepo jo kumatenga. Asi auzopekejwi mubarihwana wake. Iwona unonga ucina simba inga raainga naro. Ngokuti umambo hwake unozovhithwa* opekejwa vamweni.
5 “Mambo wo kakusi anozova no simba, zvinoreva umwe wo vatongi vake. Asi kunozomuka mambo umweni wakavanga maningi kupinda iyena. Anozotonga ndharaundha jakawanda ngo simba guru rinopinda rake.
6 “Sure ko makore manganani, ivona vanozoitirana citenderano. Mwana wokaji wa mambo wo kakusi, anozoenda ka mambo wo kanjikazi kuti vazwirane. Asi mwana wokaji uwu, aazoendereri mberi ano simba inga raainga naro. Mambo wake aazoendereri mberi akaima no simba raainga naro. Mwana wokaji uwu, na vayani vakaviya naye no vakamubara na vaya vaimupa simba pa nguva yondhoyo vanozopekejwa mu nyara jo vandhu vamweni.
7 Pa ndau yake, panozogahwa ngo hama yo mwana wake wokaji. Iyena anozoviya no masoca ohwisa dhorobha rakavanga ra mambo wo kanjikazi. Iyena anozohwisana na ivona ozovanyisa.
8 Iyena anozotoravo zvimwari zvavo, zvithombe zvavo zvo simbi, zviro zvavo zvakanaka* zvo sirivha no zvo goridhi no vakasungwa kwenda navo ku Ejipita. Anozosiyana na mambo wo kanjikazi ko makore akatikuti.
9 Mambo wo kanjikazi anozohwisana no umambo hwa mambo wo kakusi. Asi anozohwirira ku nyika yake.
10 “Vana vake vanozonasirira kuitira hondo vounganija masoca akawanda maningi. Iyena anozoenderera mberi ecitora zviro zvese inga zvinoithwa ngo usore.* Asi anozohwirira eciita hondo mbhera ku dhorobha rake rakavanga.
11 “Mambo wo kakusi anozonyangajwa, omuka kwenda koohwisana naye, zvinoreva mambo wo kanjikazi. Iyena anozounganija vandhu vakawanda maningi, asi vandhu vondhovo vanozopekejwa mu nyara jake.
12 Vandhu vazinji vanozotohwa, mwoyo wake unozozvikuja. Iyena anozouraya mazana o zviuru, asi aazoshandisi mukana wo kunyisa kwaanonga aita.
13 “Mambo wo kanjikazi anozohwirira ozounganija vandhu vakawanda maningi kupinda vo kutanga. Mu njiku jo kupejisira no papera makore, iyena anozoguma no masoca akawanda maningi pamwepo no zviro zvizinji.
14 Mu njikujo, vazinji vanozomukira mambo wo kakusi.
“Vana vo mbavha vo vandhu vako vanozoeja kuita kuti civoniso cikwanirisike, asi avazobudiriri.
15 “Mambo wo kanjikazi anozoviya omusa mupfimbiji wo hondo, ozotora dhorobha rakavangiswa. Masoca o kakusi aazomunyisi pikija no shasha jake. Ivona avazovi no simba ro kumunyisa.
16 Wiya anozoviya kuzohwisana na mambo wo kakusi, anozoita zvaanoda. Apana ari wese anozokwanisa kumunyisa. Iyena anozogara akaima pa nyika Yakanaka ano simba rinopeja.
17 Iyena anozozvipira kuti aviye no simba rake rese ro umambo hwake. Anozozwirana na iyena ozoita zviri mu mwoyo make. Ngo pamusoro po mwana wokaji wo mwanakaji, anozotendehwa kuti amuuraye. Mwana wokaji aazobudiriri nee aazoendereri mberi ari mwana wake.
18 Ngo kudaro, anozosotesa kumeso kwake ku nyika yo zvirundu ozotora ndharaundha jakawanda. Asi mutungamiriri umweni anozoita kuti kushohwa kwaakaithwa ndiyena kupere. Kushohwa kondhoko kunozopera kamare. Iyena anozoita kuti kushohweko kuhwirire kwaari.
19 Tevere, anozosotesa kumeso kwake ku madhorobha o nyika yake. Anozokhugunyika ozowa, aazowanikizve.
20 “Pa ndau yake panozobuda umweni anozoita kuti mushabisi akhirire ngo mu umambo wakanaka. Ngo kudaro, pasure po njiku nganana, iyena anozourawa. Asi aazourawi ngo ushungu no hondo.
21 “Pa ndau yake panozomuka mundhu umweni anoshohwa. Iyena aazoreremejwi inga mambo. Anozoguma pa mukuvo wokuti zviro zvinonga zvakagajana. Ozotora umambo ngo kucengeja.
22 Masoca akaita inga usore,* anozopejwa ngo ndava yake, ozourawa. Mutungamiriri wo citenderano anozourawavo.
23 Ngo ndava yo citenderano cavanozoitirana naye, anozocengeja. Anozomuka ozova akavanga, ecishandisa jinja doko.
24 Pa mukuvo wokuti zviro zvinonga zvakagajana, iyena anozonghwina mu mativi akaganya maningi o porovhinsiya ozoita zviro zvicizivi kuitwa ngo majibaba ake no majibaba o majibaba ake. Anozovakovanisa zviro zvakasara, zviro zvakatohwa no upfumi. Anozorura mazano kuti ahwisane no ndau jakavanga. Asi anozoita izvi pa mukuvo mudoko basi.
25 “Iyena anozovangisa simba rake no kucunga kwake kuti ahwisane na mambo wo kakusi ano masoca akawanda. Mambo wo kakusi anozonasirira kuti aite hondo ano masoca akawanda maningi ano simba. Iyena aazomunyisi ngokuti vanozomuitira mazano.
26 Vaya vanoha zvokuha zvake zvaushoni vanozomuuraya.
“Masoca ake anozopejwa, vazinji vanozourawa.
27 “Ngo pamusoro po majimambo maviri aya, mwoyo yavo inozorangarira kuita zvakashata. Ivona vanozogara pa meza yondhoyo vecinyeperana ngocavo. Asi apana cinozovafambira ushoni, ngokuti nguva kwayo yakagajwa ndi Mwari.
28 “Mambo wo kanjikazi anozohwirira ku nyika yake ano upfumi hwakawanda. Mwoyo wake unozorangarira kuitira zvakashata citenderano cakacena. Iyena anozoita zviri mu mwoyo mwake, ozohwirira ku nyika yake.
29 “Pa nguva kwayo, iyena anozohwirira woenda koita hondo no kakusi. Asi pa vhaza iyi, azvizoitiki inga pakutanga.
30 Piketi jo Kitimi jinozohwisana na iyena. Iyena anozododokeswa.
“Iyena anozohwirira okhombija ushungu hwake ku citenderano cakacena. Anozoita zviri mu mwoyo mwake. Anozohwirira, orangarira ngo pamusoro pa vaya vari kusiya citenderano cakacena.
31 Masoca anovha kwaari anozomuka ozosvipisa ndau yakacena no dhorobha. Vozovhisa mupiro jinoithwa mazuva ese.
“Vanozodira ciro cinonyangaja, cinouraya zviro zvese.
32 “Ecishandisa masoko anotapira, mambo wo kanjikazi anozocengeja vandhu vanoita zvakashata veciphwanya citenderano. Asi vandhu vanoziva Mwari wavo vanozonyisa, vozoita zviri mu mwoyo mavo.
33 Vaya vano zwisiso pakati po vandhu, vanozobesera vandhu vazinji kuti vazwisise. Vanozokhugunyika, vanozowa ngo ndava yo banga no muriro. Vanozosungwa no kutohwa pa njiku nganani.
34 Asi pavanozokhugunyika, vanozobesehwa padoko. Vazinji vanozobatana navo ngo kubhuya masoko anotapira.
35 Pakati po vandhu vaya vanozwisisa, vamweni vanozokhugunywa vowa, kuti basa ro kueja kucenesa no kuvhisa zviro zvese zvakasvipa pakati pavo, riithwe mbhera pa nguva yakagajwa. Ngokuti izvi zvinozoitika pa nguva yakagajwa ndi Mwari.
36 “Mambo wo kanjikazi anozoita zvese zvaanoda. Iyena anozojikuja no kujikukumuja panyezuru po zvimwari zvese. Anozobhuya zviro zvinotuka Mwari wo zvimwari. Iyena anozobudirira mbhera kupeja ushungu hwake, ngokuti zvakanangwa zvinozoitika.
37 Iyena aazoreremeji Mwari wo majibaba ake, aazoreremeji zvinodiwa ngo vanakaji nee aazoreremejizve cimwari ciri cese haco. Asi anozojikuja panyezuru po vandhu vese.
38 Kusiyapo izvi, anozokuja cimwari co mupfimbiji. Cimwari cicikambozivi kuzivika ngo majibaba ake. Anozocikuja ngo goridhi, sirivha, mapuwe o mutengo mukuru no zviro zvakanaka.
39 Iyena anozoita zvaanoda ecihwisana no mupfimbiji yakavanga maningi ecishandisa cimwari co nyikanja. Anozokuja maningi vaya vanozomureremeja, ozovaita kuti vatonge vandhu vazinji. Iyena anozokovanisa nyika ngo kupuwa mare.
40 “Pa mukuvo wo kupejisira, mambo wo kakusi anozohwisana naye vecigwandhana. Mambo wo kanjikazi anozoviya kwaari inga mbhepo ano ngoro* jo hondo, vapakiri vo haci no piketi zinji. Iyena anozonghwina mu nyika ecitora zviro zvese inga usore.
41 Anozonghwinavo mu nyika Yakanaka. Nyika zinji jinozophwanywa. Asi nyika jinozopokonyoka mu nyara jake nga iji: Edhomi, Mowabhi no divi rinosisira ro Vaamoni.
42 Anozoenderera mberi ecitambanuja nyara yake, ecihwisana no nyika. Ngo pamusoro po nyika yo Ejipita, aizopokonyoki.
43 Iyena anozotonga upfumi hwakavigika wo goridhi, wo sirivha no zviro zvese zvakanaka zvo Ejipita. Varibhiya no Vaetiyopiya vanozomutevera.
44 “Asi kunozova no masoko anovha kumavhazuva no kanjikazi anozomuvhiringija. Iyena anozobuda ano ushungu maningi hwo kuuraya, wozouraisa vandhu vazinji.
45 Anozoimisa matende ake o umambo pakati po jombe guru no dundhu rakacena ro nyika Yakanaka. Kusarepo, anozoguma kumagumo, apana anozomubesera.
Masoko o Pasi
^ Zvinoreva: “Migeri.”
^ Kana: “unozobzuhwa.”
^ Kana: “zvinosisira.”
^ Kana: “ushau.”
^ Kana: “ushau.”
^ Kana: “kareta.”
