Genesisi 9:1-29
9 Mwari wakakomborera Nowa no vana vake eciti: “Barananyi muwande muzaje nyika.
2 Zvinyama zvese zvinomburuka kudenga, zvisikwa zvese zvinofamba pa nyika no hove jese jo mujombe, zvinozoenderera mberi zvicimuthya no kutetemera. Zvinyama zvese zvaazvenyu.*
3 Zvinyama zvinofamba, zvino upenyu munozozviha inga zvondakamupekejaya zviro zvese zvinomera mu munda, zvese ndinomupa.
4 So mucadoha nyama no upenyu hwayo kana kuti ngazi, amudikani kuiha.
5 Ndinozosvuzvunura wiyani anomuuraya. Kudari ariwese akauraiwa ngo cinyama ciri cese, cinyama condhoco cinodikana kufa. Mundhu ari wese anouraya hama yake, inini ndinozomusvuzvunura.
6 Ariwese anouraya mundhu, anozourawavo,* ngokuti Mwari wakamuita ngo muezaniso wake.
7 Barananyi muwande muzaje nyika, muve vazinji.”
8 Perapo Mwari wakavhunja Nowa no vana vake vaainga navo kudari:
9 “Ndiri kuita citenderano na imwimwi no vana venyu vamunozobara,
10 no zvisikwa zvese zvinopona zvamunazvo, shiri, zvinyama no zvisikwa zvese zvinopona zvo panyika zvamunazvo, zvese zvakabuda mu arka, zvisikwa zvese zvinopona zvo pasi.
11 Citenderano candinoita na imwimwi nga ici: Zviro zvese zvinopona azvicazoparajwizve ngo ndambi.* Ndambi aicaparajizve nyika.”
12 Mwari wakaengejera eciti: “Citatijo co citenderano candiri kuita, inini na imwimwi no zvisikwa zvese zvinopona, zvina imwimwi, ku mubarihwa unozoza, nga ici:
13 Ndinobudisa utawahumbe wangu pa makore, kuti uite citatijo ku citenderano cangu no pasi.
14 Pandinozoviisa makore, utawahumbe unozobuda pamakorepo.
15 Inini ndinozoceukija citenderano condakaita inini na imwimwi no mukhaindi wese wo zvisikwa zvinopona, cokuti andizonisizve nvura kuti iite ndambi* inoparaja zviro zvese zvinopona.
16 Utawahumbe unozobuda pa makore, inini ndinozouvona ndoceukija citenderano cicikaperi condakaita inini no zvisikwa zvese zvinopona pasi.”
17 Mwari wakavhunjazve Nowa kudari: “Ici ngo citatijo co citenderano candinozoita inini no zvisikwa zvese zvinopona pasi.”
18 Vana va Nowa vakabuda mu arka nga ava: Semi, Kami na Jafeti. Kami wakazobara Khanani.
19 Vana vatatu ava, vakava va Nowa. Vandhu vese vo pasi pano vakavha kovari, voparajika pasi pese.
20 Nowa wakatanga kurima wosima muuvha.
21 Paakamwa worejera, wakavata mitu mukati mo tende yake.
22 Kami baba wa Khanani wakavona umitu hwa baba wake, wovhunja hama jake mbiri jainga ngo kunja.
23 Semi na Jafeti vakatora jira voridira pa mapfuji* avo, vonghwina mu tende ngo cosure-sure. Ngo kudaro, vakakwanisa kufukija umitu hwa baba wavo, vakafuratira. Ivona avazivi kuvona umitu hwa baba wavo.
24 Nowa paakaanganuka, woziva zvaainga aitihwa ngo mwana* wake wo cigumaura,
25 iyena wakati:
“Khanani ngaatukwe.
Ngaave mudoko kupinda varanda vo hama jake.”
26 Iyena wakaengejera eciti:
“Ngaasimbhwe Jehovha, Mwari wa Semi,Khanani ngaave murekhi wa Semi.
27 Mwari ngaape Jafeti ndau huru,Iyena ngaagare mu matende a Semi.
Khanani ngaave murekhi wakevo.”
28 Pasure po ndambi,* Nowa wakavazve no 350 o makore.
29 Ngo kudaro, makore ese a Nowa akakwana kuita 950, perapo wakatamika.
Masoko o Pasi
^ Kana: “maakuzvitonga.”
^ Gama ngo Gama: “ariwese anopopomeja ngazi yo mundhu, ngazi yake inozopopomejwavo.”
^ Kana: “guwe.”
^ Kana: “guwe.”
^ Kana: “makhaja.”
^ Mu Bhaibheri, gama rokuti “mwana,” nguva jimweni rinonangira muzukuru.
^ Kana: “guwe.”
