Mabasa o Vapostori 8:1-40
8 Sauro, ndiyena wakatendera kuti Estefano aurawe.
Pa njiku yondhoyo, ungano jese jainga mu Jerusarema jakatanga kuteverehwa maningi; vajiji vese vainga mu ndharaundha jo Judheya no Samariya vakaparajika, kosara vapostori basi.
2 Asi vandhu vaya vaithya Mwari, vakaenda koviga Estefano. Ivona vakamucumba maningi.
3 Asi Sauro wakatanga kuhwisa ungano. Iyena wainghwina mu nyumba imwe na imwe, ecikhwekhwereja vanarume no vanakaji, no kuvaendesa mu kadheya.
4 Asi vaya vaingaya vakaparajika, vaifamba ndau ngo ndau vecitokotesa masoko akanaka.
5 Firipi wakaenda ku dhorobha ro Samariya, wotanga kucumaera ngo pamusoro pa Kristu ku vandhu veyo.
6 Mbungano yaibatana yecinasa kupurukira zvainanga Firipi payaimuzwa no kuvona mushamaiso yaaiita.
7 Ngokuti vandhu vazinji vainga no mujimu jakashata, ijona jaikhuwa ngo izwi guru, perapo jobuda pa vandhu vaigahwa ndijona. Kusiyapo izvo, vandhu vazinji vainga vakaoma muviri no vairemara vairaphwa.
8 Izvo zvakaita kuti mudhorobha rondhoro muve no mudakaro mukuru.
9 Mudhorobha mondhomo mainga muno mwanarume waidanijwa Simoni. Iyena waimboita basa ro masaramuso. Vandhu vese vo munyika yo Samariya vaikahamara ndiyena, ecijiita mundhu mukuru.
10 Vandhu vese, kutangira vana vadoko mbhera vasharuka vaimupurutana veciti: “Mwanarume uwu ndiyena Simba Guru ra Mwari.”
11 Ivona vaimupurutana ngokuti wainga avaitira masaramuso anoshamaisa ko nguva yakareba.
12 Asi ivona pavakatenda Firipi, waitokotesaya masoko akanaka kwavari ngo pamusoro po Umambo hwa Mwari no zina ra Jesu Kristu, vanarume no vanakaji vakabhabhatijwa.
13 Simoni pakace wakavavo mutendi. Pasure po kubhabhatijwa iyena wakava mudoni wa Firipi; ecikahamara ngo kuvona zvitatijo no mabasa makuru ano simba eciitika.
14 Vapostori vainga ku Jerusarema pavakazwa kuti Samariya yakaashira soko ra Mwari, vakatuma Pedhru na Johani kuti vaende kondhono;
15 ivona vakaenda, voita mukumbiro kuti Vasamariya vaashire mujimu mucena.
16 Ngokuti ivona vainga vacito vaashira mujimu mucena, pikija vainga vakabhabhatijwa ngo zina ra Mambo Jesu.
17 Ivona vakavacanjikira nyara, perapo votanga kuashira mujimu mucena.
18 Simoni paakavona kuti vandhu vaashira mujimu mucena ngo kucanjikihwa nyara ngo vapostori, iyena wakavapa mare,
19 eciti: “Ndipenyivo simba iri, kuti mundhu ari wese wandinozocanjikira nyara jangu, aashire mujimu mucena.”
20 Pedhru wakamuvhunja kuti: “Sirivha yakoyo ngaipere pamwepo na iwewe, ngokuti warangarira kuti unozowana cipo co mwoyo wese ca Mwari ngo mare.
21 Iwewe auna rutivi kana ciricese pa shwiro iyi, ngokuti mwoyo wako auzivi kururama pa mavonero a Mwari.
22 Ngo kudaro, khauyai pa ushaishi hwako uhu, uite mukumbiro wo kudeketera kuna Jehovha,* kuti dangani zvikakwanisika, murangariro wo kushata wo mwoyo wako uregerehwe;
23 ngokuti ndiri kuvona kuti uri nvenene inovava no muranda wo ushaishi.”
24 Simoni wakavadavira kuti: “Ndiitirenyi mukumbiro wo kudeketera kuna Jehovha,* kuti zviro zvamandivhunjari zvitame kundiitikira.”
25 Ngo kudaro, pavakapera kuita ucapupu hwakaperera no kuvhunja vamweni soko ra Jehovha,* vakahwirira Jerusarema. Ivona vakapinda vecitokotesa masoko akanaka mu ndharaundha zinji jo Vasamariya.
26 Asi ngirozi ya Jehovha* yakabhuya na Firipi yeciti: “Mukai uende kakusi ku gwanja rinovha Jerusarema recienda Gaza.” (Gwanja iri rinowanika mubani.)
27 Iyena wakamuka woenda, wosongana no mukuru-mukuru* wo Etiopiya, mushandiri wa Kandasi, hosi wo Etiyopiya, waingwarira upfumi hwa Kandasi. Iyena wainga aenda konamata ku Jerusarema.
28 Paainga eciviya, iyena waigara mu ngoro eciverenga zvakatahwa ngo muporofeti Isaya.
29 Mujimu mucena wakavhunja Firipi kuti: “Fambai, khwederai ku ngoro iyoo.”
30 Firipi wakagogoma ngo mumbhiripiri mo ngoro, wozwa mwanarume wiya eciverenga zvakatahwa ngo muporofeti Isaya, perapo iyena wakamuvhunjisa kuti: “Muri kuzvizwisisa zvamuri kuverengaro here?”
31 Iyena wakadavira kuti: “Ndingazvizivisa kudini pacina mundhu anondijijisa?” Wokumbira Firipi kuti akhwire mungoromo agare naye.
32 Ndima yo Matahwa yaaiverengaro, yainga yakatahwa kuti: “Iyena wakaendeswa kourahwa inga vhuta. Aacaishamisepi muromo, inga zvinoithwa ngo civhuta ciri pamberi po mundhu ari kugunda* ukuse hwaco.
33 Aazivi kuitihwa ururami paaipserujwa. Ndiyani anozobhuya ngo pamusoro po mubarihwana wake? Ngokuti upenyu hwake hwakavhiswa pasi pano.”
34 Mwanarume* wiya wakavhunja Firipi kuti: “Ndapota, muporofeti uwu ari kubhuya ngo pamusoro paani? Waibhuya ngo pamusoro pake, kana waibhuya ngo pamusoro po mundhu umweni?”
35 Firipi wakatanga kuvereketa, kutangira pa matahwa aya ecimuzivisa masoko akanaka ngo pamusoro pa Jesu.
36 Pavainga vecifamba mugwanja, vakaguma pandau yainga no kumwa. Mwanarume* wiya wakati: “Vonai! Kumwa nga iyi, icinyi cingandiphinga kuti nditame kubhabhatijwa?”
37 *——
38 Ngo kudaro, ivona vakaimisa ngoro, vovaviri, Firipi no mwanarume* wiya, vakaenda mu kumwa, Firipi womubhabhatija.
39 Pavakabuda mukumwa, mujimu wa Jehovha* wakavhisa Firipi ngo kukasika. Mwanarume wiya aazivi kuzomuvonazve, asi wakabata gwanja rake wopinda akadakara maningi.
40 Firipi wakazovona waakundharaundha yo Ashidhodhi. Paaipinda* ngo kumutundhu uwu, wakaenderera mberi ecicumaera masoko akanaka ku madhorobha ese mbhera ku Sezareya.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “ngomwa.” Vonanyi Kudurujihwa ko Magama pa gama rokuti “Ngomwa.”
^ Kana kuti: “kuceka.”
^ Gama ngo Gama: “ngomwa.” Vonanyi Kudurujihwa ko Magama pa gama rokuti “Ngomwa.”
^ Gama ngo Gama: “ngomwa.” Vonanyi Kudurujihwa ko Magama pa gama rokuti “Ngomwa.”
^ Vonanyi masoko o pasi ari pana Mateu 17:21.
^ Gama ngo Gama: “ngomwa.” Vonanyi Kudurujihwa ko Magama pa gama rokuti Ngomwa.
^ Vonanyi Kudurujihwa ko Magama.
^ Kana: “paaikhirira.”
