Marko 2:1-28
2 Sure ko njiku nganani, Jesu wakaendazve mu dhorobha ro Kafarnaume. Vazinji vakaziva kuti iyena wainga waa kumuzi.
2 Vandhu vakawanda vakaviya kuzoungana, zvokuti painga pacinazve ndau mbhera pa musuvo. Iyena wakatanga kuvavhunja masoko akanaka.
3 Ivona vakamuviisira mundhu wakaoma muviri wainga akathwahwa ngo vandhu varongomuna.
4 Zvecivoneka kuti avacaikwanisepi kumuendesa kuna Jesu ngo ndava yo uzinji hwo vandhu, ivona vakakwamura denga ro nyumba ngo panyezuru po ndau yainga na Jesu, vodereja ngo pabovopo makha ainga no mundhu wakaoma muviri.
5 Jesu paakavona rutendo hwavo, wakavhunja mundhu waiomaya muviri kuti: “Mwana, zvishaishi zvako zvaregerehwa.”
6 Vatari vamweni vaingepo, vaigara vecirangarira mu mwoyo mavo kuti:
7 “Ngenyi mundhu uwu ari kubhuya zviro izvi? Iyena ari kutuka Mwari. Ndiyani angaregerera zvishaishi kuciripi Mwari basi?”
8 Asi ngo kukasika, Jesu wakazviziva ngo mukati mwake zvavainga vecirangarira ngo cavo, wovavhunja kuti: “Ngenyi muri kurangarira zviro izvi mu mwoyo mwenyu?
9 Zvakareruka kuti ari wese avhunje mwanarume uwu kuti: ‘Zvishaishi zvako zvaregerehwa.’ Asi kudari ari wese akati: ‘Mukai, torai makha ako ufambe,’ kunanga kuti waizofamba here?
10 Asi, kuti muzive kuti Mwana wo mundhu ano simba ro kuregerera zvishaishi pa nyika . . .,” iyena wakavhunja mundhu waioma muviri kuti:
11 “Ndinokuvhunja kuti: Mukai, torai makha ako upinde kanyi.”
12 Iyena wakamuka, wotora makha ake, wofamba pamberi po vandhu vese. Vese vaingepo, vakakahamara ndizvona, vokuja Mwari veciti: “Atizivi kumbovona zviro zvakadari.”
13 Jesu wakaendazve mu mbhiripiri mo jombe. Vandhu vese vaienda kwaari. Iyena wakatanga kuvajijisa.
14 Paaikhirira, wakavona Revhi mwana wa Arifeu akagara pa ndau yo kushabisa, womuvhunja kuti: “Ivai muteveri wangu.” Iyena wakamuka womutevera.
15 Pa mukuvo wakazotevera, Jesu paaiha mu nyumba ya Revhi, vashabisi vazinji no vashaishi vakaviya kuzoha naye pamwepo no vajiji vake, ngokuti vazinji vavo vaimutevera.
16 Asi vatari vo Vafarisi povakavona kuti waiha no vashaishi pamwepo no vashabisi, vakatanga kuvhunjisa vajiji vake kuti: “Iyena anoha no vashabisi no vashaishi here?”
17 Jesu paakazvizwa, wakavavhunja kuti: “Vandhu vakavanga avadi murapi, asi vanohwaja vanoda murapi. Ngokuti andizivi kuviya kuzodanija vandhu vakarurama, asi ndakaviira vashaishi.”
18 Vajiji va Johani no Vafarisi vaizira. Ngo kudaro, ivona vakaviya kwaari, vomuvhunjisa kuti: “Ngenyi vajiji va Johani no vajiji vo Vafarisi vanozira, asi vajiji vako vacikaziri?”
19 Ngo kudaro, Jesu wakavadavira kuti: “Mukwambo naaripo, shamwari jake jinothangwe rokuzira here? Ijona ajiziri pajinonga jino mukwambo.
20 Asi jinozoguma njiku jaanozotohwa mukwambo, ijona jinozozira pa njiku yondhoyo.
21 Apana mundhu anosonera cigamba cipsa pa nguvo yokare. Kudari akazviita, cigamba cipsa cinokweva nguvo yokare, zibovo rayo rokura maningi.
22 Apanazve mundhu anodira vhinyu imbza mu cinyede cokare. Kudari akazviita, vhinyu inozomwesa cinyede, zvese zvoruzika. Asi vhinyu imbza inodihwa mu cinyede cipsa.”
23 Paaikhirira ngo mu maminda ngo Musabudu, vajiji vake vakatanga kupurura musoso, pavainga vecifamba.
24 Ngo kudaro, Vafarisi vakamuvhunja kuti: “Vonai! Vari kuitirenyi zvicikatendehwi ngo Musabudu?”
25 Iyena wakavadavira kuti: “Amuzivi kumboverenga zvakaitwa ndi Dhavhidhi paainga atama zvokuha, wozwa njara iyena no vamweni vaainga navo?
26 Inga zvakaitwa ndi Abhiyatari mutungamiriri wo vapiri, iyena wakanghwina mu nyumba ya Mwari woha pau jaiitwa mupiro, wopavo jimweni vandhu vaainga navo. Ijona ajicaitendehwepi kuhiwa ngo mundhu ariwese kuciripi vapiri.”
27 Iyena wakavavhunjazve kuti: “Sabudu rakavepo ngo ndava yo mundhu, asipi mundhu wakavepo ngo ndava yo Sabudu.
28 Ngo kudaro, Mwana wo mundhu ndiyena Mambo wo Sabudu.”
