Mateu 16:1-28
16 Pondhopo Vafarisi no Vasadhusi vakamukhwederera kuti vamueje. Ivona vakamukumbira kuti, tivonesei citatijo cinovha kumatenga.
2 Jesu wakavadavira kuti: “Zuva rikavira, imwimwi munoti: ‘Mangwana kunozoeja ushoni, ngokuti gore rakapsukirikira.’
3 Comangwanani munoti: ‘Nyamasi kunotondhora, nvura inona, ngokuti gore rakapsukirikira pomwe no makwiti.’ Imwimwi munokwanisa kudurujira mugariro wokunja, asi amukwanisi kuzwisisa revo yo zviro zviri kuitikari wari.
4 Mubarihwana wakashata no wo upombo, iwona unoenderera mberi wecipsaka citatijo, asi akuna citatijo caunopuwa kuciripi citatijo ca Jona.” Ngo kudaro, Jesu wakapinda, wovasiya.
5 Vajiji vakaambuka mwombera umweni, asi vainga vakanganwa kutora pau.
6 Jesu wakati kwavari: “Bhasopanyi* mbijo yo Vafarisi no Vasadhusi.”
7 Ivona vakatanga kurangarira ngocavo veciti: “Atizivi kutora nee pau imwe hayo.”
8 Jesu naaziva murangariro wavo, wakati: “Vandhu vo kutenda padoko, ngenyi muri kunanga kuti amuzivi kuviya no pau?
9 Amuto mazvibata kani? Makanganwa pandakagutisaya zviuru zvishanu* zvo vandhu ngo hove shanu? Makaunganija zvitengu zvingana?
10 Kana makanganwa pandakagutisaya zviuru zvirongomuna* zvo vandhu ngo pau nomwe? Makaunganija zvitengu zvingana zvakakura?
11 Ngenyi amuripi kubata thangwe randiitisa kuti nditame kunanga ngo pamusoro po pau? Asi inini ndamuvhunja kuti mubhasope ngo pamusoro po mbijo yo Vafarisi no Vasadhusi.”
12 Perapo vakazozvibata kuti waibhuya ngo pamusoro po jijiso yo Vafarisi no Vasadhusi, haiwa ngo pamusoro po mbijo yo pau.
13 Jesu paakaguma ku ndharaundha yo Sezareya yo Firipi, iyena wakavhunjisa vajiji vake kuti: “Vandhu vanonanga kuti Mwana wo mundhu ndiyani?”
14 Ivona vakamudavira kuti: “Vamweni vanoti ndi Johani Mubhabhatiji, vamweni vanoti ndi Eriya, vamwenizve vanoti ndi Jeremiya dangani umwe wo vaporofeti.”
15 Jesu wakavavhunjisa kuti: “Waro imwimwi, munoti ndini ani?”
16 Simoni Pedhru wakadavira kuti: “Imwimwi ndimwi Kristu Mwana wa Mwari anopona.”
17 Jesu wakamuvhunja kuti: “Unomudakaro iwewe Simoni mwana wa Jona, ngokuti auzivi kuzvivhunjwa ngo vandhu,* asi wazvivhunjwa ndi Baba wangu vo kumatenga.
18 Ndinokuvhunjazve kuti: Iwewe ndiwe Pedhru, panyezuru po buwe iri, ndinozovakirepo ungano yangu. Guva* arizonyisi ungano iyi.
19 Ndinozokupa zvavhi zvo Umambo hwo kumatenga, zvese zvaunosunga pasi pano, zvinonga zvapera kusungwa kumatenga, zvese zvaunosujunura pasi pano, zvinonga zvapera kusujunuhwa kumatenga.”
20 Jesu wakarambisa vajiji vake kuti vacamutokotesa kuti iyena ndi Kristu.
21 Kuvhira pa mukuvo wondhowo, Jesu wakatanga kudurujira vajiji vake kuti anodikana kuenda Jerusarema, asongane no matambujiko mazinji anovha ku vakuru, vapiri vakuru no vatari. Iyena anozouraiwa, perapo womuswa pa njiku yocitatu.
22 Pedhru wakaenda naye pa mutivi, wotanga kumuvereketera eciti: “Jizwirenyi pena Mambo, izvi azvivhiri kuitika kwamuri.”
23 Asi iyena wakasota sure, wovhunja Pedhru kuti: “Endai sure kwangu, Sathana! Iwewe uri cikhugu kwandiri, ngokuti auna murangariro wa Mwari, asi uno murangariro jo vandhu.”
24 Jesu wakati ku vajiji vake: “Wiya anoda kunditevera, ngaajirambe athware mutanda wake wokutambujikira,* aenderere mberi ecinditevera.
25 Wiya anoda kuponesa upenyu hwake anozohuruza, asi wiya anoruza upenyu hwake ngo ndava yangu, anozohuwana.
26 Zvinobesenyi ku mundhu kuwana zviro zvese zvo nyika, woruza upenyu hwake? Mundhu anozopenyi kuti atenge upenyu hwake?
27 Ngokuti Mwana wo mundhu anozoviya mu simba ra* Baba wake no ngirozi jake, iyena anozopfupa umwe na umwe mukuzwirana no maitiro ake.
28 Ndinomuvhunja zvokadi kuti, vamweni venyu makaimari pano, avazofi vacito vavona kuviya ko Mwana wo mundhu mu Umambo hwake.”
Masoko o Pasi
^ Gama ngo Gama: “garanyi makapenya mecirindira ngo pamusoro po.”
^ 5.000.
^ 4.000.
^ Gama ngo Gama: “ngo muviri no ngazi.”
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “mu nduma ya”
