Mateu 28:1-20
28 Pasure po Sabudu, pakundoeja mu njiku yokutanga yo sumana, Mariya Madharena na Mariya umweni, vakaenda kovona guva.
2 Ngo civhumbu, kwakaitika kuzungunyika ko pasi. Ngirozi ya Jehovha* yakaderuka kuvha kudenga, yokhwedera pa guva. Iyona yakavhisa buwe riya perapo yorigarira.
3 Mavonekero ayo aiita inga murabzu wo mbheni, nguvo jayo jaicena inga cando.
4 Varindiri vaya vakatetemera ngo kuthya, voita inga vandhu vakafa.
5 Asi ngirozi yakavhunja vanakaji vaya kuti: “Mucathya, ngokuti ndinozviziva kuti muri kupsaka Jesu wakakohomehwaya pa mutanda.
6 Iyena aacipo pano, wakamuswa ko vakafa inga zvaakanangaya. Viyanyi, muvone paakadihwaya.
7 Perapo, endanyi ngo kukasika kovhunja vajiji vake kuti Jesu wamuswa ko vakafa. Iyena anotungamira kuenda Garireya. Imwimwi munozomuvona kondhoyo. Aya ndiwona masoko andinawo kwamuri.”
8 Ngo kudaro, vakabuda pa guvepo ngo kukasika, vecithya no kudakara. Ivona vakagogoma kuenda kovhunja vajiji vake.
9 Jesu wakasongana navo ngo civhumbu, wovavhunja kudari: “Masoko enyu!” Ivona vakamukhwederera vobata soka jake no kumugwadamira.
10 Perapo Jesu wakavavhunja kuti: “Mucathya! Endanyi, moovhunja hama jangu kuti jiende Garireya, jinozondikhanda* kondhoyo.”
11 Pavainga vecipinda, varindiri vamweni vakanghwina mu dhorobha, vovhunja vapiri vakuru zviro zvese zvainga zvaitika.
12 Pavakapera kuungana no madhodha,* kuti vasunge zvavangaita. Ivona vakapa masoca mare* yakawanda
13 veciti: “Nanganyi kuti: ‘Vajiji vake vakaviya cousiku patainga takavata, vomuba.’
14 Govhernadhori akazvizwa, itusu tinozomudurujira* shwiro iyi, imwimwi amudikani kuthya.”
15 Ngo kudaro, ivona vakatora mare iya, voita zvavakavhunjwa. Masoko aya akaparajika pakati po Vajudha mbhera na nyamasi.
16 Ngo kudaro, vajiji gumi na umwe vakaenda Garireya ku dundhu ravakavhunjwa ndi Jesu kuti vawananeyo.
17 Pavakamuvona, vakamugwadamira, asi vamweni vaikana-kana.
18 Jesu wakavakhwederera, wobhuya navo eciti: “Ndakapuwa simba rese mudenga no pasi.
19 Ngo kudaro, endanyi, jijisanyi vandhu vo majinja ese kuti vave vateveri vangu, muvabhabhatije ngo zina ra Baba, ro Mwana no ro mujimu mucena.
20 Vajijisenyi kuzwira zvese zvandakamuvhunja. Zivanyi kuti ndina imwimwi mbhera pa kupera ko nyika.*
Masoko o Pasi
^ Vonanyi Kudurujihwa ko Magama.
^ Kana: “jinozondiwana.”
^ Kana: “vakuru.”
^ Gama ngo Gama: “mangwenjere o sirivha.”
^ Gama ngo Gama: “tinozomukhohwesa.”
^ Vonanyi Kudurujihwa ko Magama.
