Nduyo 118:1-29
118 Bonganyi Jehovha, ngokuti iyena wakanaka;Rudo hwake hucikacinji ahuna magumo.
2 Vaiziraeri ngavanange kudari:
“Rudo hwake hucikacinji ahuna magumo.”
3 Vandhu vo nyumba ya Aroni ngavanange kudari:
“Rudo hwake hucikacinji ahuna magumo.”
4 Vandhu vaya vanothya Jehovha ngavanange kudari:
“Rudo hwake hucikacinji ahuna magumo.”
5 Ndakadaninja Jehovha pandaitambujika;Jehovha* wakandidavira, iyena wakanditora wondiendesa ku ndau yakangwaririka.
6 Jehovha ari kudivi rangu, andizothyi.
Mundhu angandiitenyi?
7 Jehovha ari kudivi rangu inga mubeseri wangu;Ndinozosota ndakadakara vavengi vangu pavanozonyiswa.
8 Zviri nane kutizira kuna JehovhaKupinda kuthemba vandhu.
9 Zviri nane kutizira kuna JehovhaKupinda kuthemba vatongi.
10 Majinja ese akanditendeneja,Asi inini ndakamagogomera,Ngo zina ra Jehovha.
11 Vakanditendeneja, hina, ndainga ndakatendenejwa mu mativi ese.Asi inini ndakavagogomera,Ngo zina ra Jehovha.
12 Ivona vakanditendeneja inga nyuci,Asi vakajimwa ngo kukasika inga muriro uri pakati po pfiba.*
Asi inini ndakavagogomera,Ngo zina ra Jehovha.
13 Vakandindunda ngo simba kuti ndiwe,Asi Jehovha wakandibesera.
14 Jehovha* ndiyena mujiviriri wangu no simba rangu,Iyena wakava muponesi wangu.
15 Kukhuwa ngo mudakaro kuri kuzika mu tende jo vandhu vakarurama,Ruponeso unovha kwavari.
Mukono muho wa Jehovha unokhombija simba rawo.
16 Mukono muho wa Jehovha uri kumuka kuti unyise;Mukono muho wa Jehovha unokhombija simba rawo.
17 Haiwa, inini andizofi, asi ndinozopona,Kuti ndizivise zviito zva Jehovha.*
18 Jehovha* wakandipangira ngo simba,Asi aazivi kundiuraya.
19 Ndifunungurirenyi musuvo jo ururami,Ndinozonghwina ndijona kuti ndisimbe Jehovha.*
20 Uwu ndiwona musuvo wa Jehovha.
Vandhu vakarurama vanozonghwina ndiwona.
21 Inini ndinozomusimba ngokuti makandidavira,Imwimwi makava muponesi wangu.
22 Buwe rakarambhwa ngo vavakiRakazova buwe guru ro pacikina.*
23 Buwe iri rinovha kuna Jehovha;Irona rinoshamaisa kwatiri.
24 Iyi injiku yakaithwa ndi Jehovha;Pa njiku iyi, tinozotamba no kudakara.
25 Jehovha, itusu tinomukumbira, tapota tiponesenyi!
Jehovha, tapota, tiitenyi kuti tinyise
26 Wakakomborehwa mundhu wiya anoviya ngo zina ra Jehovha;Tinomukomborera tiri mu nyumba ya Jehovha.
27 Jehovha ndiyena Mwari;Iyena anotipa ruvheneko.
Fambanyi pamwepo no cikwata co vaimbi muno matavi mu nyara,Mbhera ku nyanga jo artari.
28 Imwimwi muri Mwari wangu, inini ndinozomusimba;Mwari wangu, inini ndinozomukuja.
29 Bonganyi Jehovha, ngokuti iyena wakanaka;Rudo hwake hucikacinji ahuna magumo.
Masoko o Pasi
^ Kana: “Jah.” Uku ikugurisihwa ko zina ra Jehovha.
^ Kana: “fusi.”
^ Kana: “Jah.” Uku ikugurisihwa ko zina ra Jehovha.
^ Kana: “Jah.” Uku ikugurisihwa ko zina ra Jehovha.
^ Kana: “Jah.” Uku ikugurisihwa ko zina ra Jehovha.
^ Kana: “Jah.” Uku ikugurisihwa ko zina ra Jehovha.
^ Kana: “pakhona.”
