Nduyo 17:1-15
Mukumbiro wa Dhavhidhi.
17 Imwimwi Jehovha, izwanyi cicemo cangu co ururami candiri kumuitira;Purutananyi kukhuwira kwandiri kumuitira kuti mundibese;Izwanyi mukumbiro wangu wandiri kumuitira ngo mwoyo wese.
2 Nditongenyi mu njira yakarurama;Majiso enyu ngaavone zviro zvakanaka.
3 Makapopora mwoyo wangu, pikija cousiku;Imwimwi makandicenesa,Munozovona kuti apana candakaronga cakashata,Muromo wangu auzivi kushaisha.
4 Ngo pamusoro po mabasa o vandhu,Mukuzwirana no masoko o pamuromo penyu, inini andifambi mu makwanja o mbavha.
5 Itanyi kuti soka jangu jifambe mu makwanja enyuKuti murenje jangu jitame kukhugunyika.
6 Mwari wangu, inini ndinodainja imwimwi, ngokuti imwimwi munondidavira.
Sheamijanyi njeve yenyu kwandiri. Muzwe masoko angu.
7 Khombijanyi rudo hwenyu hucikacinji ngo manera anoshamaisa,Imwimwi muponesi wa vaya vanopsanga mukono wenyu wo muhoKuti vajivirihwe ku vandhu vaya vanomupandukira.
8 Ndingwarirenyi, inga mangwarire amunoita majiso enyu;Ndivigenyi mu munvuriri wo mapapiro enyu.
9 Ndijivirirenyi ku vashati vanondihwisa,Ku vavengi vangu vakanditendeneja vanoda kundiuraya.
10 Ivona avacina pena;Muromo yavo inobhuya masoko okuzvikuja;
11 Wari ivona vakatitendeneja;Vari kupsaka mukana wo kutiwisa pasi.
12 Iyena wakaezana no mbhondoro iri kuda kuha cinyama cayabata,Inga cimbhondoro cakafindara mu bako.
13 Jehovha Mwari wangu mukanyi, muhwisenyi no kumuwisa pasi;Ndiponesenyi ku mundhu wakashata mecishandisa banga renyu,
14 Jehovha ndiponesenyi mecishandisa nyara yenyu,Ku vandhu vo nyika ino, vano ndhaka mu upenyu huno,Ku vandhu vaya vamunopa zviro zvakanaka zvakawandaNo vandhu vaya vanosiira ndhaka yavo ku vana vavo vakawanda.
15 Asi inini, ndinozovona kumeso kwenyu ngo kugondeka kwangu;Ndinodakara pandinomuka ndoziva kuti ndiri pamberi penyu.
