Ruka 7:1-50
7 Jesu paakapeja kuvhunja vandhu zvaainga nazvo, iyena wakanghwina mu Kafarnaume.
2 Mushandiri wo mutungamiriri wo masoca waaida maningi, waihwaja, wainga woda kufa.
3 Mutungamiriri wo masoca paakazwa ngo pamusoro pa Jesu, wakatuma vakuru vo Vajudha kuti vaende komukumbira kuti aviye korapa mushandiri wake.
4 Ivona vakaenda kuna Jesu, votanga kumudeketerera ngo mwoyo wese, veciti: “Iyena anofanera kubesehwa ndimwi,
5 ngokuti anoda maningi jinja redu, wakavaka sinagoga yedu.”
6 Ngo kudaro, Jesu wakaenda navo. Asi paainga waaphedo no kumuzi kwake, mutungamiriri wo masoca, wakatuma shamwari jake kuti jimuvhunje kudari: “Mucakaya-kaya, ngokuti andifaneri kuti imwimwi munghwine mumba mangu.
7 Ngo zvandiitisa kuti ndijivone kuti andifaneri kuguma kwamuri. Asi nanganyi gama rimwe basi, muite kuti mushandiri wangu avange.
8 Inini ndinotongwavo, asi ndino masoca andinotonga. Pandinovhunja musoca kuti, ‘endai inoo!’ iyena anoenda. Ndikavhunja umweni kuti, ‘viya kuno!’ iyena anoviya. Ndikavhunja muranda wangu kuti, ‘itai ici!’ iyena anoita.”
9 Jesu paakazwa zviro izvi, wakakahamara ndiyena, wosika ecisota mbungano yaimutevera, wonanga kuti: “Ndinomuvhunja kuti, pikija mu Iziraeri andizivi kuwana mundhu ano rutendo hwakakura inga hwo mwanarume uwu.”
10 Vakatumwaya pavakahwirira kanyi kwake, vakakhanda* mushandiri wiya wavanga.
11 Pasure pazvo, Jesu wakaenda ku dhorobha rinozwi Naini, vajiji vake no vandhu vakawanda vakaendavo naye.
12 Paakaguma phedo no musuvo wo dhorobha, paithwahwa mutembo wo jaha rainga mwana umwe ega wo noni. Vandhu vazinji vo mudhorobhemo vaimuperekeja.
13 Jesu paakavona mwanakaji uwu, wakamuzwira pena, womuvhunja kuti: “Ucacema.”
14 Ngo kudaro, iyena wakakhwedera, wobata makha, vaithwaraya makha vakaima. Jesu wonanga kuti: “Mujaha, ndinoti kwauri, mukai!”
15 Mujaha waingaya wakafa wakagara pasi wotanga kuvereketa, Jesu womupekeja mai wake.
16 Vese vakathya maningi, votanga kukuja Mwari, veciti: “Pakati pedu pabuda muporofeti mukuru,” vecitizve, “Mwari warangarira vandhu vake.”
17 Masoko ngo pamusoro pake akatokota mu Judheya mwese, no mutundhu yese yocigarisano.
18 Johani wakavhunjwa zviro zvese izvi ngo vajiji vake.
19 Ngo kudaro, iyena wakadanija vajiji vake vaviri, wovatuma kuenda ka Mambo kovhunjisa kuti: “Ndimwi Wiya Anozoviya, kana kuti tinodikana kuvetera umweni?”
20 Vandhu vaya pavakaguma kwaari, vakati: “Tatumwa ndi Johani Mubhabhatiji kuti timuvhunjise kudari: ‘Ndimwi Wiya Anozoviya, kana kuti tinodikana kuvetera umweni?’”
21 Pa mukuvo wondhowo, Jesu wakarapa vandhu vazinji vaihwaja, vainga no ndhendha jinonesa, mujimu yakashata no kuita kuti mapofu mazinji avone.
22 Jesu wakavadavira kuti: “Endanyi koovhunja Johani zvamazwa no kuvona: Mapofu ari kuvona, zvigono zviri kufamba, vano mapere vari kuraphwa, vano mandondo vari kuzwa, vakafa vari kumuswa no varombo vari kuvhunjwa masoko akanaka.
23 Anodakara wiya acikakhugunyiki ngo ndava yangu.”
24 Vandhu vakatumwa ndi Johani pavainga vapinda, Jesu wakatanga kuvhunja mbungano ngo pamusoro pa Johani eciti: “Makaenda koovonenyi mu zvipare? Makaenda koovona njanga iri kuzungunyiswa ngo mbhepo?
25 Waro makaenda koovonenyi? Makaenda koovona mundhu wakasimira nguvo jakaseja? Haiwa! Vanosimira nguvo jakaseja, vanogara mu nyumba jo majimambo.
26 Waro makaenderenyi? Koovona muporofeti? Hina, ndinomuvhunja kuti Johani, muporofeti. Asi iyena waisisira maningi kupinda vaporofeti vamweni.
27 Uwu ndiyena waingaya akatahwa ngo zvake kuti: ‘Vonanyi! Ndiri kumutumira ndhumwa inozonasirira gwanja renyu pambeji penyu!’
28 Ndinomuvhunja kuti pakati po vandhu vakabahwa ngo mwanakaji, apana mundhu mukuru anopinda Johani. Asi mundhu mudoko mu Umambo hwa Mwari, wakakura kupinda iyena.”
29 (Vandhu vese no vashabisi pavakazvizwa, vakaziva kuti Mwari wakarurama, ngokuti vainga vabhabhatijwa ngo rubhabhatijo hwa Johani.
30 Vafarisi no vazivi vo Mutemo avazivi kutenda ndhungamiriro ya Mwari kwavari, ngokuti vainga vacizivi kubhabhatijwa ndi Johani.)
31 “Vandhu vo mubarihwana uwu ndingavaezanisa naani, vakaezana naani?
32 Ivona vakaezana no vana vadoko vakagara pa bazari vecidanijana ngocavo, veciti: ‘Takamurijira mutoriro, asi imwimwi amuzivi kutamba; itusu takacumba, asi imwimwi amuzivi kucema.’*
33 Mukufananavo, Johani Mubhabhatiji wakaviya acikahi pau nee kumwa vhinyu, asi imwimwi munonanga kuti: ‘Iyena ano dhimoni.’
34 Mwana wo mundhu wakaviya eciha no kumwa, asi imwimwi munonanga kuti: ‘Vonanyi! Mundhu uwu anohisa, anomwa maningi vhinyu, ano ushamwari no vashabisi pomwe no vashaishi!’
35 Asi ungwaru hunovoneswa kuti hwakarurama ngo mabasa ahwo.”
36 Mufarisi umweni waindomukumbira kuti aende koha naye. Ngo kudaro, Jesu paakanghwina mu nyumba yo Mufarisi uwu, wakagara pasi* kuti ahe.
37 Mwanakaji umweni waizivika mudhorobhemo kuva mushaishi, paakaziva kuti Jesu waiha mu nyumba yo Mufarisi, wakaviisa botiri* rainga no mafuta anonuhira.
38 Iyena wakagara ngo sure kwa Jesu, ngo kumurenje jake. Mwanakaji uwu wakacema,* wotanga kubija soka ja Jesu ngo musoji, ecipukuta ngo vhuji ro mumusoro mwake. Iyena waibhejhari soka jake no kujizoja ngo mafuta anonuhira.
39 Mufarisi wakamukokaya paakazvivona, wakati ngo mumwoyo mwake: “Nokwainga kuti mundhu uwu muporofeti kamare, waizoziva kuti ndiyani ari kumupsasaro. Waizozivazve kuti iyena mwanakaji wo mushovonyi. Ngokuti mwanakaji uwu mushaishi.”
40 Asi Jesu wakati kwaari: “Simoni, ndino ciro candinoda kukuvhunja.” Iyena wakati: “Mujijisi, nanganyi!”
41 “Vandhu vaviri vakafiyari mundhu umweni; umwe wakafiyari mazana mashanu* o madhenariyo,* umweni wakafiyari makumashanu.
42 Pavakatama ciro co kumupagari ndicona, iyena wakavaregerera ngo mwoyo wese. Pa vaviri ava, ngowapi anozomuda maningi?”
43 Simoni wakamudavira kuti: “Inini ndinovona kuti nga wiya wakaregerehwaya madhenariyo akawanda.” Jesu wakamuvhunja kuti: “Wadavira ushoni.”
44 Iyena wakasika wosota mwanakaji, wovhunja Simoni kuti: “Wamuvona mwanakaji uwu? Inini ndanghwina mu nyumba yako; iwewe auzivi kundipa kumwa yo kusuka soka jangu. Asi mwanakaji uwu wabija soka jangu ngo musoji no kujipukuta ngo vhuji rake.
45 Iwewe auzivi kundibhejhari. Asi kuvhira pandanghwina, mwanakaji uwu aazivi kuregera kubhejhari soka jangu.
46 Iwewe auzivi kudururira mafuta mu musoro wangu, asi mwanakaji uwu wadururira soka jangu mafuta anonuhira.
47 Ngo ndava yazvo, ndinokuvhunja kuti: Zvishaishi zvake zvaregerehwa, pikija kuti zvakawanda kudini, ngokuti iyena wandida maningi. Asi wiya anoregerehwa padoko, anoda padoko.”
48 Jesu wakavhunja mwanakaji wiya kuti: “Zvishaishi zvako zvaregerehwa.”
49 Vaya vaaigara navo pa meza vakatanga kuvhunjisana kuti: “Ndiyani mundhu uwu anokwanisari kuregerera zvishaishi?”
50 Asi Jesu wakavhunja mwanakaji kuti: “Rutendo hwako hwakuponesa; endai, ucathya.”*
Masoko o Pasi
^ Kana: “wakawana.”
^ Kana: “kurira.”
^ Kana: “wakacamira pa meza.”
^ Gama ngo Gama: “botiri ro arabhasto.” Mujiyo wo botiri rakaitwa ngo buwe rakawanika phedo no Arabhastroni ku Ejipita.
^ Kana: “wakarira.”
^ 500.
^ Zingwenjere ro Ciroma rairema mutengo wo 3,85g, raidanijwa kuti dhenariyo.
^ Gama ngo Gama: “endai mu runyararo.”
