CIJIJO 01

Bhaibheri Ringamubesera Kudini Kuti Muve no Upenyu Waushoni?

RIJANYI

Tese tino muvhunjo ngo pamusoro po upenyu, matambujiko, rufu pomwe no kumbeji. Tinonesekazve ngo pamusoro po zviro zvo njiku ngo njiku, zvakadari inga kuwana mare yo kujisapota pomwe no kuva no mudakaro pa mbhuri. Vandhu vakawanda, vari kuvona kuti Bhaibheri, rinodavira muvhunjo jinonesa jo upenyu. Varikuvonazve kuti irona rinopa mazano ngo pamusoro po zviro zvo njiku ngo njiku. Kureva kuti Bhaibheri ringabesera ariwese wamunoziva?

1. Ngojapi muvhunjo jimweni jinodavihwa ngo Bhaibheri?

Mu Bhaibheri munowanika mupinguro jo muvhunjo jinosisira maningi jakadari inga iji: Upenyu wakatangisa kudini? Ngenyi takasikwa? Ngenyi vandhu vakanaka vanotambujika? Tinoenda kwapi patinofa? Kudari vandhu vese vanoda rugarisiko, ngenyi kuna hondo jakawanda? Kureva kuti nyika inozoparajwa kumbejiyo? Bhaibheri rinotivangisa kuti tipsake mupinguro jo muvhunjo iji, vandhu vakawanda vakadakara maningi ngo kuwana mupinguro jakona.

2. Bhaibheri ringatibesera kudini mazuva ano?

Bhaibheri rinotipa mazano aushoni. Inga muezaniso, rinojijisa mbhuri kuti ingawanisa kudini mudakaro wokadi. Rinopazve mazano okuti tingaitisa kudini kuti tihwisane no zvineso, tingaitisazve kudini kuti tidakare pa basa redu. Patinonga tecibhuisana tese, munozojijira kuti Bhaibheri, rinonangenyi ngo pamusoro po zviro zvese zvataperari kuvona pomwe no zviro zvimweni. Munozotendera kuti ‘Matahwa ese [zvese zvinowanika mu Bhaibheri] . . . zvinobesera.’—2 Timoti 3:16.

Bhuku iri asipi Bhaibheri. Asi, rinomuvangisa kuti munase kujija Bhaibheri. Ngo kudaro, tinomuvangisa kuti muverenge mavhesi ese anowanika pa cijijo ici, perapo maezanisirenyi no zvamuri kujijaro.

NASANYI KUPSAKISISA

Vonanyi kuti Bhaibheri rakabesera kudini vandhu. Vonanyizve kuti imwimwi mungadakarisa kudini ngo kuriverenga no kuvona kuti ngenyi zvinosisira kuwana besero kuti muzwisise.

3. Bhaibheri ringatitungamirira

Bhaibheri rakadari inga ruvheneko. Tingarishandisa kuti ritibesere kukheta zvisungo zvaushoni, ringatibeserazve kuziva kuti ngozvapi zvinozoitika kumbejiyo.

Verenganyi Nduyo 119:105, perapo bhuisananyi ngo muvhunjo iji:

Mutari wo nduyo wakaezanisa Bhaibheri nenyi?
Waro imwimwi munoezanisavo Bhaibheri nenyi?

4. Bhaibheri ringadavira muvhunjo jedu

Mwanakaji umweni wakavona kuti Bhaibheri, rakadavira muvhunjo jaimunesa kuvhira makore akawanda. Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Mucadoruza Vetero! (1:48)

Pa vhidhiyo iyi, mwanakaji uwu wainga no muvhunjo japi?
Kujija Bhaibheri kwakamubesera kudini?

Bhaibheri rinotivangisa kuti tiite muvhunjo. Verenganyi Mateu 7:7, perapo bhuisananyi ngo muvhunjo unotevera:

Ngowapi muvhunjo wamunawo, wokuti kangaije Bhaibheri ringaudavira?

5. Mungadakajihwa ngo kuverenga Bhaibheri

Vandhu vakawanda varikudakajihwa maningi ngo kuverenga Bhaibheri ngokuti varikubesehwa maningi ndirona. Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Kuverenga Bhaibheri (2:05)

Pa vhidhiyo iyi, majaha aya aijizwa kudini ngo pamusoro po kuverenga?
Ngenyi wari vano mazwiro akasiyana ngo pamusoro po kuverenga Bhaibheri?

Bhaibheri rinonanga kuti zviri mukatimo zvinotipa ndhungamiriro jinotinyaraja. Verenganyi Varoma 15:4, perapo bhuisananyi ngo muvhunjo uwu:

Kureva kuti cigondiso ici co Bhaibheri co kutinyaraja no kutipa vetero cinomudakajisavo?

6. Vamweni vangatibesera kuti tizwisise Bhaibheri

Pikija kuti kuverenga Bhaibheri no tiri tega zvaushoni, vazinji vakavona kuti kubhuisana no vamweni zvinobesera maningi. Verenganyi Mabasa o Vapostori 8:26-31, perapo bhuisananyi ngo muvhunjo uwu: