CIJIJO 24
Icinyi Ngirozi, Ijona Jinoita Basa Renyi?
Jehovha anoda kuti tijijire ngo pamusoro po mbhuri yake yo mugore. Mbhuri iyi inobatanija ngirozi, jinodanijwaya kuti “vana . . . va Mwari.” (Jobe 38:7) Bhaibheri rinonangenyi ngo pamusoro po ngirozi? Ijona jinoita basa renyi? Kureva kuti ngirozi jese jinoita rutivi hwo mbhuri ya Mwari?
1. Icinyi ngirozi?
Jehovha wakasika ngirozi acito asika nyika. Mukufanana na Mwari, ngirozi ajivoneki, ijona jinopona mugore. (Vahebheru 1:14) Kuno mamiriau no mamiriau o ngirozi, asi ijona ajizivi kutojana, jakasiyana-siyana inga zvakaitarivo vandhu. (Apokaripsi 5:11) Ijona ‘jinoteveja izwi ra Jehovha, no kupurutana bzaanonanga.’ (Nduyo 103:20) Kareko, nguva jimweni Jehovha waishandisa ngirozi kuti atumire masoko, abesere vandhu vake no kuvaponesa pavainga vari pangozi. Nyamasi uno ngirozi jinobesera Makristu kuti awane vandhu vanoda kujija ngo pamusoro pa Mwari.
2. Ndiyani Sathana no madhimoni ake?
Ngirozi jimweni ajizivi kuenderera mberi jakagondeka kuna Jehovha. Ngirozi yokutanga icizivi kuzwira inodanijwa kuti “Dhiyabhu kana Sathana, . . . [ari] kucengeja vandhu vese vanogara pasi pano.” (Apokaripsi 12:9) Sathana wakada kutonga vamweni. Ndiyo ndava iyena wakakwanisa kucengeja Adhamu na Evha no ngirozi jimweni kuti jibatane naye pakutama kuzwira. Ngirozi iji jicizivi wari kuzwira jinodanijwa kuti madhimoni. Jehovha wakagogomera ngirozi iji kudenga kuti jiviye pasi pano. Asi ijona jinozoparajwa.—Verenganyi Apokaripsi 12:9, 12.
3. Sathana no madhimoni ake vanoejesa kudini kuticengeja?
Sathana no madhimoni ake vanocengeja vandhu vakawanda ngo kuita zvomujimu, kana zvomadhimoni. Zvomujimu zviito zvakashata kamare zvokueja kubhuisana no madhimoni. Inga muezaniso, vandhu vamweni vanovhunjisa vazivi vo ndhondho, vafemberi, varingiji no madhokodheya. Vamweni vanopsaka marapihwe akabatana no zvomadhimoni. Sathana anoitisazve kuti vandhu vatende kuti vangabhuya no vandhu vakafa. Asi Jehovha anotivhunja kuti: “Mucazoenda kwa avo vanoringija vakafa, nokuti kubvunjisa majinyamusoro.” (VaLevi 19:31) Iyena wakatipekeja ngwajo iyi kuti atijivirire kuna Sathana no madhimoni. Ivona ivavengi va Mwari, nokutizve vanoda zvakashata kwatiri.
NASANYI KUPSAKISISA
Jijiranyi ngo pamusoro po zviro zvakanaka zvinoithwa ngo ngirozi, ngozi jo zvokuita zvomujimu no manera atingajijivirira kuna Sathana no madhimoni.
4. Ngirozi jinobesera vandhu kuti vajijire cokwadi ngo pamusoro pa Jehovha
Ngirozi andijopi jinocumaera vandhu. Asi jinobesera vandhu va Mwari kuti vawane vandhu vanoda kujija ngo pamusoro pa Jehovha. Verenganyi Apokaripsi 14:6, 7, perapo bhuisananyi ngo muvhunjo jinotevera:
-
Ngenyi tinodikana kubesera ngirozi pakucumaera?
-
Amuvoni kuti zvakanaka maningi kuziva kuti ngirozi jingatibesera kuwana vandhu vanoda kujija Bhaibheri? Ngenyi munovona kudaro?
5. Mucadoita zvo madhimoni
Sathana no madhimoni ivavengi va Jehovha. Na itusuvo vanodikanavo kuita vavengi vedu. Verenganyi Ruka 9:38-42, perapo bhuisananyi ngo muvhunjo unotevera:
-
Madhimoni anotambujisa kudini vandhu?
Atidi kuti madhimoni avonerere upenyu hwedu. Verenganyi Deuteronòmio 18:10-12, perapo bhuisananyi ngo muvhunjo jinotevera:
-
Madhimoni anoshandisa njira japi kuti ativonerere no kubhuya nawo? Kwamunogararo vandhu vanonyanya kuita zviro zvapi zvakabatana no zvomadhimoni?
-
Imwimwi munovonavo kudini ngo kurambisa kunoita Jehovha zvomadhimoni? Ngenyi?
Rijanyi VHIDHIYO, perapo bhuisananyi ngo muvhunjo jinotevera.
-
Munorangarira kuti citovo cainga mu mukono mo mwana wa Parisa caibesera? Ngenyi munonanga kudaro?
-
Parisa waidikana kuitenyi kuti ajijivirire ku madhimoni?
Makristu okadi nguva jese anozonda zvo madhimoni. Verenganyi Mabasa o Vapostori 19:19 na 1 Vakorinte 10:21, perapo bhuisananyi ngo muvhunjo unotevera:
-
Ngenyi zvakanaka maningi kupisa zviro zvese zvakabatana no zvomadhimoni?
6. Mungakwanisa kuwina pakuhwa na Sathana no madhimoni
Madhimoni anotongwa ndi Sathana. Asi ngirozi jakagondeka jinotungamirihwa ndi Arkanjo Migeri, ngo zina rimweni ndi Jesu. Migeri anosimba rakadini? Verenganyi Apokaripsi 12:7-9, perapo bhuisananyi ngo muvhunjo jinotevera:
-
Ndiyani ano simba maningi: Ndi Migeri no ngirozi jake kana kuti ndi Sathana no madhimoni ake?
-
Munorangarira kuti vateveri va Jesu vanodikana kuthya Sathana no madhimoni ake?
Imwimwi mungakwanisa kuwina pakuhwa na Sathana no madhimoni. Verenganyi Jakobo 4:7, perapo bhuisananyi ngo muvhunjo unotevera:
-
Mungaitenyi kuti mujijivirire kuna Sathana no madhimoni?
VANDHU VAMWENI VANOTI: “Azvizivi kushata kutamba mavhidhiyo gemi kana kuvona mavhidhiyo anovonesa zvomadhimoni. Iwona i mabungaijo basi.”
-
Ngenyi kurangarira kudaro kwakashata maningi?
ZVOTAJIJA
Ngirozi jakagondeka jinotibesera. Sathana no madhimoni ake i vavengi va Jehovha. Ivona vanoshandisazve zvomadhimoni kuti vacengeje vandhu.
Kuhwirijira
-
Ngirozi jinobeseresa kudini vandhu kuti vajije ngo pamusoro pa Jehovha?
-
Ndiyani Sathana no madhimoni ake?
-
Ngenyi munoda kugara ndhambo no zvomadhimoni?
ZIVANYI ZVIMWENI
Vonanyi zvinokhombija kuti Jesu ndiyena Arkanjo Migeri.
Vonanyi zvinovonesa kuti Sathana ariyodi kamare, kuciripi zviro zvakashata zviri mu mwoyo mo mundhu.
Verenganyi muzwe kuti mwanakaji umweni wakasujunuka pa madhimoni.
“Iye Akawana Donzo Muupenyu” (Murindiri, No. 1 wa Julho wo 1993, Cishona)
Vonanyi kuti Sathana anoshandisa kudini zvomadhimoni kuti acengeje vandhu.
“Chokwadi Pamusoro Pemashiripiti Nouroyi” (Mugwagwa Unoenda Kuupenyu Husingaperi, divi 5, Cishona)
