CIJIJO 35

Tingaitenyi Kuti Tiite Zvisungo Zvakanaka?

RIJANYI

Tese tino zvatinodikana kukheta kuita mu upenyu. Zvimweni zvakona zvingatoviisa musiyano wakakura maningi mu upenyu hwedu no kupsasa ushamwari hwedu na Jehovha. Inga muezaniso, kangaije tingadikana kusana kwatinoda kugara, manera atingawana zvokupona ndizvona, no kusana kuti tinoda kucadha kana kuti atidi. Kudari tikaita zvisungo zvakanaka, tinova no upenyu hunodakajisa no kudakajisavo Jehovha.

1. Bhaibheri ringamubeseresa kudini kuti muite zvisungo zvakanaka?

Mucito maita cisungo, kumbiranyi besero kuna Jehovha no kuvona kuti Bhaibheri rinonangenyi ngo pamusoro po shwiroyo. (Verenganyi Mazwi Akangwara 2:3-6.) Mu shwiro jimweni, Jehovha anopekeja mutemo jakajeka. Ngo kudaro, cisungo cakanaka catingaita ngo cokuzwira mutemo wondhowo.

Asi kudari mu Bhaibheri mucina mutemo wakajeka wo zvatinodikana kuita keni? Pikija zvakadaro, Jehovha anozomutungamirira ‘ngo gwanja raunodikana kutevera.’ (Isaia 48:17) Kuitisa kudini? Bhaibheri rinondhungamiriro jingakwanisa kumubesera. Ndhungamiriro jondhojo jo Bhaibheri jinotibesera kuvona marangaririre a Jehovha no zvaanozwa. Kazinji tinopfumbura zvinorangarira Mwari, patinoverenga zviitiko zviri mu Bhaibheri. Tingaita zvisungo zvinodakajisa Jehovha patinozwisisa mazwiro ake.

2. Ngo zvapi zvamunodikana kutanga marangarira mucito maita cisungo?

Bhaibheri rinonanga kuti mundhu wakangwara “anovonesesa gwanja rake.” (Mazwi Akangwara 14:15) Izvi zvinoda kureva kuti, ticito taita cisungo, tinodikana kuima torangarira zvese zvinobatanijwa pa cisungo condhoco. Zvivhunjisenyi kudari: ‘Ngojapi ndhungamiriro jo Bhaibheri jandingashandisa pa cisungo ici? Cisungo ici cinozondipekeja runyararo mu murangariro? Cisungo cangu cinozopsasisa kudini vamweni? Muvhunjo unosisira maningi pa jese iji nga uwu, kureva kuti cisungo cangu cinozodakajisa Jehovha here?’—Deuteronòmio 32:29.

Jehovha ndiyena ano citendehwa cokutivhunja zvakanaka no zvakashata. Patinoziva ushoni mutemo no ndhungamiriro ja Jehovha, tosunga kujizwira, hana yedu inozova yakajijiswa ushoni. Hana ndiyona inotibesera kuzwisisa kuti izvi zvakanaka kana kuti zvakashata. (Varoma 2:14, 15) Hana yakajijiswa inotibesera pakuita zvisungo zvakanaka.

NASANYI KUPSAKISISA

Vonanyi kuti kuitisa kudini ndhungamiriro jo Bhaibheri no hana yedu zvingatibesera kuti tiite zvisungo zvakanaka.

3. Itanyi kuti Bhaibheri rimutungamirire

Bhaibheri ringatibeseresa kudini kuti tiite zvisungo zvakanaka? Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Itanyi Kuti Mutemo jo Bhaibheri Jitungamirire Upenyu Hwenyu (5:54)

Rusujunuko wo kuzvikhetera unoda kurevenyi?
Ngenyi Jehovha wakatipekeja rusujunuko wo kuzvikhetera?
Jehovha wakatipa cinyi cinotibesera kuti tiite zvisungo zvakanaka?

Kuti muvone muezaniso umwe wo mutemo wo Bhaibheri, verenganyi Vaefeso 5:15, 16. Perapo bhuisananyi ngo pamusoro pokuti, mungashandisa kudini nguva yenyu zvakanaka kuti . . .

muverenge Bhaibheri njiku jese.
muve mwamuna, mukaji, baba, mai kana mwana wakanaka.
mupinde musongano no ungano.

4. Rovejanyi hana yenyu kuti muteme zvivaringo zvakanaka

Kudari Bhaibheri rikapekeja ndhungamiriro yakajeka ngo pamusoro po shwiro iri yese, zvinozova zvakareruka kuziva zvokuita. Asi kudari Bhaibheri ricikabhuyi kamare ngo pamusoro po shwiroyo keni? Rijanyi VHIDHIYO, perapo bhuisananyi ngo muvhunjo unotevera.

VHIDHIYO: “Ivanyi no Hana Yakanaka” (5:13)

Pa vhidhiyo, zvicinyi zvakaithwa ngo hambzaji iyi pa kuroveja hana yayo kuti iteme civaringo cinodakajisa Jehovha?

Ngenyi atidikani kukumbira vamweni kuti vatitemere zvivaringo? Verenganyi Vahebheru 5:14, perapo bhuisananyi ngo muvhunjo jinotevera:

Kukumbira vamweni kuti vatitemere zvivaringo zvakareruka maningi, asi umwe nga umwe wedu ngozvapi zvaanodikana kuziva kusiyanisa?
Inga zvatavona muvhidhiyo, ngozvapi zvingamubesera kuti muroveje hana yenyu no kuita zvisungo zvakanaka?

Mukuezana no mapa, hana yedu ingatibesera kukheta gwanja ra ushoni ro upenyu

5. Reremejanyi hana jo vamweni

Vandhu vakasiyana, ndiyo ndava vanoita zvisungo zvakasiyana. Waro ngozvapi zvatingaita kuti tikhombije kuti tinoreremeja hana jo vamweni? Vonanyi muezaniso muviri:

Muezaniso wokutanga: Imwe hambzaji inodakarira maningi kumakiari kana kujipenda-penda, inocinja kwenda ku ungano imweni ino hambzaji jokuti jikavona hambzaji inojipenda-penda ajizvizwi ushoni.

Verenganyi Varoma 15:1 na 1 Vakorinte 10:23, 24, perapo bhuisananyi ngo muvhunjo jinotevera:

Takacijikira pa mavhesi aya, ngozvapi kangaije zvaizosunga kuita hambzaji iyi? Ngatiti hana yenyu inomutendera kuita ciri cese. Asi hana yo mundhu umweni inozvivona inga zviro zvakashata. Waro ngozvapi zvamaizosunga kuita?

Muezaniso wocipiri: Imwe hama inozviziva kuti Bhaibheri rinonanga kuti, azvizivi kushata kumwa doro weciziva po kuimira. Asi iyona inosunga kutama kumwa doro. Iyona inokokwa kwenda korarira kumuzi ko hama imweni, konayo inozovona kuti vamweni vari kumwa doro.

Verenganyi Mucumaeri 7:16 na Varoma 14:1, 10, perapo bhuisananyi ngo muvhunjo jinotevera:

Takacijikira pa mavhesi aya, ngozvapi kangaije zvaizosunga kuita hama iyi? Ngo zvapi zvamaizoita kudari muno mundhu anoita zviro zvinokhugunya hana yenyu?

Mungaitenyi Kuti Muite Zvisungo Zvakanaka?

1. Itanyi mukumbiro kuna Jehovha mecikumbira besero pamunoda kuita zvisungo. —Jakobo 1:5.

2. Psakisisanyi mu Bhaibheri no mu mabhuku edu akacijikira mu Bhaibheri kuti muwane ndhungamiriro jinoshanda. Mungabhuyazve no Makristu ano uzivi hwakati kuti.

3. Rangariranyi kuti cisungo cenyu cinozopsasisa kudini hana yenyu no hana jo vamweni.

VANDHU VAMWENI VANOTI: “Upenyu ngo hwangu, ndinoita zvandinoda. Nee andina basa no zvinorangarira vamweni.”

Ngenyi tinodikana kurangariravo mazwiro a Jehovha no o vamweni?

ZVOTAJIJA

Kuti tiite zvisungo zvakanaka, tinodikana kuziva zvinorangarira Jehovha ngo pamusoro po shwiro iri yese no kurangarira ngo pamusoro po cisungo cedu kuti cinozopsasisa kudini vamweni.

Kuhwirijira

Mungaitenyi kuti muite zvisungo zvinodakajisa Jehovha?
Imwimwi mungarovejesa kudini hana yenyu?
Mungakhombijisa kudini kuti munoreremeja hana jo vamweni?

Cijijo ici capera kujijwa mu

Ejanyi kuita izvi

Rangariranyi ngo cisungo camunodikana kuita ngo kukasika. Kuvha ponapo, mungashandisa mafundo matatu ari pa kwadhru inoti “ Mungaitenyi Kuti Muite Zvisungo Zvakanaka?”

Zvimweni:

Your other goal