Jesu paanopera kusungwa mu munda wo Getsemani, vapostori vanomusia ega votiza ngo kuthya. Asi vaviri avaendi ndhambo maningi. Vaviri ava ndi Pedhru “no mujiji umweni,” kangaije angathuka aita mupostori Johani. (Johani 18:15; 19:35; 21:24) Zvingaita kuti vakazowanana no mbungano iyi payaienda na Jesu kumuzi ka Anasi. Anasi paanotumira Jesu kuti aendeswe ku mupiri mukuru Kaifasi, Pedhru na Johani vanomuteverera ngo ndhambo. Kangaije vainga vecithyira upenyu hwavo, pomwe no kuthimwa-thimwa ngo zvinozoithwa Tenji wavo.

Johani waizivika ngo mupiri mukuru, ngo kudaro vanomutendera kuti anghwine pa ruvanje po muzi wa Kaifasi. Pedhru anoima pamusuvo ngo divi ro kunja, mbhera Johani aviye kuzobhuya no murandakaji waingwarira pa musuvo. Pedhru anotendehwa kunghwina.

Hwainga usiku hwaitondhora maningi, vainga paruvanjepo vakabasera muriro. Pedhru anoendavo kokota muriro na ivona paanonga ecivetera “kuti avone maperero” o shwiro ya Jesu. (Mateu 26:58) Murandakaji watenderaya Pedhru kuti angwine wari wonasa kuvona ushoni Pedhru ngo kuti waakwakaeja ngo muriro. Iyena anobvunjisa kuti: “Dangani iwewevo uri umwe o vajiji vo mundhu uwo?” (Johani 18:17) Zve andiepi ega ari kuziva Pedhru no kumupumbha kuti waingavo na Jesu.—Mateu 26:69, 71-73; Marco 14:70.

Izvi zvakanyangajisa maningi Pedhru. Iyena aaripi kuda kuti azivike, ngo kudaro anofunduruka woenda ku musuvo wo paruvanje. Anoramba kuti aacaingepi na Jesu, woguma pakunanga kuti: ‘Andimuzivi, nee anditozvizivi zvaunonangaro.’ (Marco 14:67, 68) Iyena anotanga “kutuka no kupika,” zvinovonesa kuti iyena angatoita no kupika kuti zvivoneke kuti ari kuvereketa zvokadi kamare. No kutizve kudari ecinyepa angatambujwa hake nee aana basa nazvo.—Mateu 26:74.

Pavainga veciita izvi Jesu wainga ecitongwa, kangaije ku divi rimweni ro ruvanje hwa Kaifasi ngo kuberere ro mudenga. Zvingaita kuti Pedhru no vamweni vari kuveteravo ngo pasi, vaikwanisa kuvona uminye-minye huri kuithwa ngo vandhu vaienda koita ucapupu kuberere ro mudenga.

Pedhru i muGarireya, mavereketere ake anovonesa kuti iyena wanyepa paaramba Jesu. Kunja kwa izvi, pakati po cikwata ici painga pano ukama hwa Marko wakacekwaya njeve ndi Pedhru. Waro, vanomupumbha veciti: “Andizivi kukuvona na yena mu munda, kani?” Pedhru paanoramba masoko aya hwo citatu, jongwe rinorira inga zvainga zvakanangwa ndi Jesu.—Johani 13:38; 18:26, 27.

Panguva iyi zvinoita inga kuti Jesu wainga akaima paanokwanisa kuvona zviri kuitika paruvanje. Iyena anotendeuka woti, ndee kusota Pedhru. Izvo zvakahwaja Pedhru zvo kuti izanyi muzovona. Ngo kudaro anorangarira zvananga Jesu pa nguva nganani japera mu nyumba yo mudenga. Rangariranyi mazwire a Pedhru paanorangarijisa ushoni zvaaita. Iyena anobuda ecicema maningi kamare.—Luka 22:61, 62.

Pedhru wazozviitisazve kudini? Zvingaitisa kudini kuti, Pedhru, waithembaya kuti kutendeseka kwake no umujimu hwake azvizozungunyiswi, angaramba Tenji wake? Jesu ari kupumbhwa zviciripi izvona, zve ari kutambujwa inga mushaishi wakashatisisa maningi. Apa ndipona Pedhru paainga no mukana wo kuinikira mwanarume wainga acina ndava, asi ari kufuratira Wiyani ano “mazwi o uhomi hucingaperi.”—Johani 6:68.

Ciitiko ca Pedhru cinosuruvarisa ici, cinovonesa kuti nee mundhu wakavanga kumujimu zve wakajipira kuna Mwari, angathuka asejemuka kudari akatama kunasirira ushoni kuitira muejo jinozothuka jaitika. Vashandiri va Mwari vese vanodikana kuwana cijijo kubva muciitiko ca Pedhru.