Makwanisa kuvona rato-rato mu bhurushura iri masimiriro aushoni o Zvapupu zva Jehovha pazvinonga zvecienda ku musongano jazvo jo ungano here? Ngenyi tinotambujikira maningi masimiriro edu no kujinemesa?

Kuti titatije nderemejo Mwari wedu. Ngo zvokadi kuti Mwari anovona zvatiri mu muviri. (1 Samueli 16:7) Ngo kudaro patinoungana kuti timunamate, cido cedu co mwoyo wese ngo co kutatija nderemejo kwaari zve ku vanamati doni vedu. Kudari itusu tecienda kovonana no mutongi ku citongero, taizotambujikira maningi masimiriro edu kuti ngo o nderemejo here. Mukufananavo, masimiriro edu patinoenda ku musongano anotatija nderemejo yedu ku “Mutongi wo nyika yese”, Jehovha Mwari zve no pandau yatinomunamatira.—Genesi 18:25.

Kuitira kuvonesa ndhungamiriro jinotitungamirira. Bhaibheri rinokohomeja maKristu kuti vasimire “ngo kujibata no ureremejo” inga vaya vano kuja Mwari. (1 Timoti 2:9, 10) Kusimira “ngo kujibata” zvinoreva kuramba nguvo jinopingaija ngo vamweni, jinovonekera kana kubata. Kuva no “ureremejo” kunotibeserazve kukheta nguvo jinofanea, kuciripi jicizivi kurongejwa ushoni kana jiciripi jo mupimo kwao. Ndhungamiro iji jinoramba jicisiya mukana mukuru wo kukheta kwakasiyana-siyana ko umwe na umwe. Ticizivi kubhuya ciri cese, masimiriro edu no mavonekero edu anganemesa “majijisiro a Mwari muponesi wedu” zve kuti ‘akujwe Mwari’. (Tito 2:10; 1 Pedru 2:12) Ngo kusimira ushoni patinoenda ku musongano, ngo njira ii tinoita kuti vamweni vavone manamatihwe a Jehovha.

Pikija mucina nguvo jakafanera , munoashihwa ngo nyara mbiri ku Nyumba yo Umambo. Kuti nguvo jedu jive jakafanera azvirevi kuva jinodhura kana kumonikira asi jakacena zve jinoreremeja.

• Ngenyi tinodika kuvona ushoni masimiriro edu patinonga tecinamata Mwari?

• I ndhungamiriro japi jinotitungamirira pa kukheta zvokusimira no kujinemesa?