Muri Kuramba Makasotesesa Kuna Jehovha Here?
“Ndinomusa majiso angu komuri, komuri munogara mu gore.”—NDUYO 123:1.
1, 2. Zvinoda kurevenyi kusota kuna Jehovha?
TIRI KUPONA mu “mukuvo wokunesa” unonesa kubata nao. (2 Timoti 3:1) Zve Jehovha acito aparaja nyika ino yakashata no kuviisa runyararo wo kadi pasi pano, upenyu uciri kuramba ucinesa. Ngo iyo ndava, tinodikana kuzvibvunjisa kudari: ‘Ndiani wandinosota kuti andibesere zve anditungamirire?’ Ngokukasika tingadavira kuti “Ndi Jehovha” zve uwo ndiwona mupinguro waushoni.
2 Zvinoda kurevenyi kusota kuna Jehovha? Zve tingava kudini no cokwadi cokuti tiri kuramba tecimusota patinosongana no zvineso? Pa makore aperari, Mutari umweni wo Bhaibheri, wakasanangura kuti tinodikana kusota kuna Jehovha patinoda besero. (Verenganyi Nduyo 123:1-4.) Iyena wakananga kuti patinosota kuna Jehovha, tinodari inga mushandi anosota tenji wake. Kuitisa kudini? Mushandi anosota kana anothemba kuti tenji wake anomupa zvokuha no kumungwarira. Asi, iyena anodikanavo kusota tenji wake nguva jese kuti azwisise zvovanoda kuti aite, perapo wozviita. Mu njira yakafanana, tinodikana kujija Soko ra Mwari njiku jese no kungwarira kwese kuti tizwisise zvinoda Jehovha kuti tiite, perapo tozviita. Perepo tingava no gwinyiso ro kuti Jehovha anozotibesera patinoda besero.—VaEfeso 5:17.
3. Zvicinyi zvingatikangaija pa kusota kuna Jehovha?
3 Pikija tinoziva kuti tinodikana kusota Jehovha, nguva jimweni tingakangaijika. Izvo ndizvona zvakaitika kamare na Marita, shamwari ya Jesu. Iyena ‘wakakangaijwa ngo kuita mabasa mazinji.’ (Luka 10:40-42, Shanduro yeNyika Itsva) Kudari mundhu wakagondeka wakadari inga ndi Marita wakaguma pa kukangaijika, Jesu paainga na iyena kamare, azvidikani kutikahamaja kuti itusu tingagumavo pa kukangaijika. Waro, zvicinyi zvingatikangaija pa kusota Jehovha? Pa musoro uno, tinozovona kuti tingakangaijwa kudini ngo zvinoita vamweni? Zve tinozojija kuti tinozorambisa kudini tecisota Jehovha.
MWANARUME WAIGONDEKA WAKARUZA CIDAKAJISO
4. Ngenyi zvingatishamaisa kuvona kuti Mosi wakaruza cidakajiso co kunghwina mu Nyika yo Cipikihwa?
4 Zvokadi kamare, Mosi waisota Jehovha kuitira ndhungamiro. Bhaibheri rinotibvunja kuti iyena ‘wakavangirira, inga mundhu anovona Acingavoneki.’ (Verenganyi Vaheberi 11:24-27.) Irona rinonangazve kuti “apazivi kubudabze muporofeti wakadaro inga Mosi. Mwari waivereketa naye hope ngo hope.” (Deuteronòmio 34:10) Asi, pikija Mosi wainga shamwari yo phedo ya Jehovha, iyena wakaruza cidakajiso co kunghwina mu Nyika yo Cipikihwa. (Bziverengo 20:12) Icinyi cakashata?
5-7. Zvicinyi zvakaitika nopapera mukuvo mushoma vaIziraeri no vabuda Ejipita zve Mosi wakaitenyi?
5 Pacito papera mweji muviri vaIziraeri novabva Ejipita zve vacito vaguma pa Dundhu ro Sinai, pakabuda cineso cikuru. Vandhu vakatanga kun’gun’guta ngo kuti akucainga no kumwa. Ivona vakatanga kun’ gun’gutira Mosi no kunyangajwa maningi ndiyena zvo kuti “Mosi wakamima kuna Tenji Mwari eciti: ‘Ndinozoitenyi kuno vandhu ava? Kwasara padoko kuti vandifure ngo mapuwe!’” (Exodo 17:4) Jehovha wakapa Mosi ndhungamiro jakajeka. Jehovha wakamubvunja kuti atore ndonga yake atake buwe ro Horebhi. Bhaibheri rinoti: “Mosi wakabziita pamberi po vakuru vo vaIsraeli.” Perapo, kumwa yakabuda, vaIziraeri vakamwa kumwa yakawanda zve cineso cakapera.—Exodo 17:5, 6.
6 Bhaibheri rinotibvunja kuti Mosi wakadanija ndau iyi kuti Masa, zvinoreva “Muejo,” zve Meribhaa, zvinoreva “Kupopana.” Ngenyi? “Ngo ndava yo kupopana ko vaIsraeli, ngokutibze vakaeja Tenji Mwari veciti: ‘Tenji Mwari ari pakati pedu here, nokuti aapo?’”—Exodo 17:7.
7 Jehovha wakazwa kudini ngo zvakaitikari ku Meribhaa? Iyena wakavona inga kuti vaIziraeri vakapandukira iyena kamare haiwa Mosi. (Verenganyi Nduyo 95:8, 9.) Zvakaitari vaIziraeri zvainga zvakashata kamare. Asi, Mosi wakaita ciro caushoni. Iyena wakasota kuna Jehovha zve no kungwarira kwese wakatevera ndhungamiro jake.
8. VaIziraeri pavainga phedo no kupeja hwendo hwavo mu zvipare, cicinyi cakaitika?
8 Asi, zvicinyi zvakaitika mu mugariro wakafanana, no papera 40 o makore? VaIziraeri vainga vaaphedo no kupeja hwendo hwavo mu zvipare. Vakaguma pa ndau imweni phedo no Kadeshi, dhuze no pa mugano no Nyika yo Cipikihwa. Ndau iyi yakagumavo pa kuzivika inga Meribhaa. * (Vonanyi masoko o pasi.) Ngenyi? Ngokuti vaIziraeri vakan’gun’gutazve kuti kondhoyo akucainga no kumwa. (Bziverengo 20:1-5) Asi, pa nguva iyi, Mosi wakaita cishaishi cikuru.
9. Jehovha wakapa ndhungamiro japi kuna Mosi, asi Mosi wakaitenyi? (Vonanyi pikica yo kutanga.)
9 Mosi wakaitenyi vandhu povakamupandukira? Iyena wakasotazve Jehovha kuitira ndhungamiro. Asi, pa nguva iyi Jehovha aazivi kubvunja Mosi kuti atake buwe. Iyena wakabvunja Mosi, kuti atore ndonga yake, aviise vandhu dhuze no buwe, perapo arivereketere. (Bziverengo 20:6-8) Kunanga kuti Mosi wakazvinanga here? Haiwa. Iyena wakanyangajwa zve wocamwa zvokuti wakavereketera eciti: “Zvino, mecizwanyi imwi vapanduki, tomubudisira kumwa inobva pa buwe iri here?” Perepo wakataka buwe riya, haiwa kamwe, asi kaviri.—Bziverengo 20:10, 11, Shanduro yeNyika Itsva.
Mosi aazivi kuzwira ndhungamiro imbza yaakapuwa ndi Jehovha
10. Jehovha wakadavirisa kudini zvakaitari Mosi?
10 Jehovha wakanyangajwa maningi na Mosi. (Deuteronòmio 1:37; 3:26) Ngenyi? Thangwe rimwe rakaitisa kudaro, ngo ro kuti Mosi aazivi kuzwira ndhungamiro imbza yaakapuwa ndi Jehovha.
11. Ngo kutaka buwe, ngenyi kangaije Mosi wakaitisa kuti vaIziraeri varangarire kuti Jehovha aazivi kuita mushamaiso?
11 Kangaije kwainga no thangwe rimweni rakaitisa kuti Jehovha anyangajwe. Mapuwe akavanga aiwanika ku Meribhaa wo kutanga, ngo mushovo unozwi granito. Pikija mundhu akatomataka zvakadini, apana angavetera kuti anobuda kumwa. Asi mapuwe o ku Meribhaa wo cipiri aisiana maningi. Uzinji hwao ainga o mushovo wo mapuwe anodanijwaya karkario. Zvecivoneka kuti karkario i mukhaindi wo buwe rakapfava, kumwa nguva jese inomwirira yoenda pasi. Perepo, vandhu vangaca mwimbo pa buwe rondhoro vocerepo kumwa. Waro Mosi paakataka buwe kusiapo kurivereketera, kunanga kuti waida kuti vaIziraeri varangarire kuti kumwa iya yaibuda inga zvayaizoita mu cirovejeso zve asipi Jehovha wainga aita mushamaiso here? * (Vonanyi masoko o pasi.) Atizvizivi.
MOSI WAKAPANDUKISA KUDINI?
12. Ngorapi rakava thangwe rimweni rakaitisa kuti Jehovha anyangajwe na Mosi zve na Aroni?
12 Panazve thangwe rimweni rakaitisa kuti Jehovha anyangajwe na Mosi na Aroni. Mosi wakabvunja vandhu kuti: ‘Tomubudisira kumwa inobva pa buwe iri here?’ Mosi paakananaga ‘tomubudisira,’ zvingaita kuti wainangira iyena na Aroni. Zvakanangari Mosi, azvicainga zvo nderemejo ngokuti aazivi kupa Jehovha rukujo hwaanofanera ngo mushamaisowo. Nduyo 106:32, 33, Shanduro yeNyika Itsva inoti: ‘Vakamucamwisavo pa kumwa yo Meribhaa, zvo kuti zvakashatira Mosi ngo ndava yavo. Ngo kuti vakamunyangajisa, iyena wakatanga kuvereketa ngo hasha ngo muromo wake.’ * (Vonanyi masoko o pasi.) (Bziverengo 27:14) Mosi aazivi kupa Jehovha rukujo Hwaifanera. Jehovha wakabvunja Mosi na Aroni kuti: ‘Imwimwi movaviri mwakamukira izwi rangu.’ (Bziverengo 20:24) Cainga cishaishi cikuru maningi!
13. Ngenyi mapanicire akaita Jehovha Mosi, ainga akanaka zve akarungama?
13 Jehovha waivetera kuti Mosi na Aroni vanase kuzwira, ngokuti ivona vaitungamirira vandhu vake. (Luka 12:48) Kare, Jehovha aazivi kutendera kuti mubarihwana wese wo vaIziraeri ughwine mu Nyika yo Cipikihwa ngokuti wakamupandukira. (Bziverengo 14:26-30, 34) Ngokudaro, zvainga zvakanaka zve zvakarungama, zvokuti Mosi paakapandukira, Jehovha wakamupanica mu njira yakafanana. Inga vapandukiri vamweni, Mosi aazivi kutendehwa kunghwina mu Nyika yo Cipikihwa.
THANGWE RAKONA
14, 15. Zvicinyi zvakaitisa kuti Mosi apandukire Jehovha?
14 Zvicinyi zvakaitisa kuti Mosi apandukire Jehovha? Vonanyizve zvinonanga Nduyo 106:32, 33, iyona inoti: ‘Vakamucamwisavo pa kumwa yo Meribhaa, zvo kuti zvakashatira Mosi ngo ndava yavo. Ngo kuti vakamunyangajisa, iyena wakatanga kuverenga ngo hasha ngo muromo wake.’ Ngokudaro, pikija vaIziraeri vainga vapandukira Jehovha, zvakaita kuti Mosi anyangajwe. Iyena aazivi kujibata, asi wakavereketa acizivi kurangarira muviyo waizovepo.
15 Mosi wakaima kusotesesa kuna Jehovha ngokuti wakatendera kuti zviito zvo vamweni zvimukangaije. Pa bvaza yokutanga vandhu vakan’gun’guta ngo ndava yo kumwa, Mosi wakaita zvakarungama. (Exodo 7:6) Asi, zvingaita kuti wainga waremba zve wakanyangajwa ngokuti vaIziraeri vaipandukira pa makore akawanda. Zvingaita kuti pa nguva iyi Mosi wairangarira ngo pamusoro po kunyangajwa kwake kusiapo pa kuda kukuja Jehovha.
Tinodikana kuramba tecisota kuna Jehovha no kumuzwira nguva jese
16. Ngenyi tinodikana kurangarira ngo zvakaita Mosi?
16 Kudari muporofita wakagondeka inga Mosi wakaguma pa kukangaijika zve woshaisha, zvondhozvo zvingatiitikiravo. Mosi wainga dhuze no kunghwina mu Nyika yo Cipikihwa zve itusu tiri dhuze no kughwina mu nyika imbza. (2 Pedru 3:13) Zvokadi, atidi kuruza cidakajiso ici cinosisirari. Asi, kuti tinghwine mu nyika imbza, tinodikana kuramba tecisota Jehovha no kumuzwira. (1 Johani 2:17) Tingajijenyi ngo kuposa ka Mosi?
MUCATENDERA KUTI VAMWENI VAMUKANGAIJE
17. Tingaruzisa kudini kujibata kwedu patinonga takanyangajwa?
17 Mucaruza kujibata kwenyu pamunonga makanyangajwa. Nguva jimweni tinosongana no muejo jakafanana kuphinda no kuphinda. Asi Bhaibheri rinonanga kudari: “Ticadoremba ngo kuita bzauxoni. Ngokuti, tikatama kurembejeka, tinozokotora pa ngari yokudikana.” (VaGalàsia 6:9; 2 VaTesalonika 3:13) Kudari ciri cese kana mundhu akaramba ecindotinyangajisa, tinorangarira ticito tavereketa here? Tinongwarira madavirire edu? (Mazwi Akangwara 10:19; 17:27; Mateu 5:22) Vamweni vakatinyangajisa, tinodikana kujijira ‘kuvetera runya hwa Mwari,’ kana kusiya kuti Jehovha avonese ushungu hwake. (Verenganyi VaRoma 12:17-21.) Zvinoda kurevenyi? Kusiapo kunyangajwa, tinosengerera tecivetera kuti Jehovha aite ciri cese ngo pamusoro po cineso cedu paanovona kuti zvinodikana. Kudari tikaeja kuhwirijira kunja ko kusotesesa kuna Jehovha, aticaizomureremeja.
18. Zvicinyi zvatinodikana kuceukija ngo pamusoro po kuteverera ndhungamiro?
18 Ngwariranyi pa kutevera ndhungamiro imbza. No kugondeka kwese tinotevera ndhungamiro imbza yatinopuwa ndi Jehovha here? Atidikani kundoita zviro mu njira yataiita kare ngo kuti ndizvona zvatakarovejana nazvo basi. Kunja kwa izvo, ngo kukasika, tinodikana kutevera ndhungamiro iri yese imbza yatinopuwa ndi Jehovha ecishandisa sangano rake. (Vaheberi 13:17) Cimwenizve, ngo cokuti tinodikana kungwarira kuti titame ‘kupindirija bzakatahwa.’ (1 VaKorinto 4:6) Patinoteverera ndhungamiro ja Jehovha no kungwarira kwese, tinoramba tecimusota.
Zvicinyi zvatinodikana kujija ngo madavirire akaita Mosi, vamweni povakaposa? (Vonanyi ndima 19)
19. Tingaitisa kudini kuti kuposa ko vamweni kutame kukhuvaza ushamwari wedu na Jehovha?
19 Mucatendera kuti kuposa ko vamweni kukhuvaze ushamwari wenyu na Jehovha. Kudari tikaramba tecisota kuna Jehovha, atizokhuvazi ushamwari wedu naye kana toguma pa kunyangajwa ngo zvinoita vamweni. Izvi zvinosisira maningi kuna itusu, kudari tino mutoro mu sangano ra Mwari, inga ndi Mosi. Zvokadi kamare, umwe nga umwe wedu anodikana kushanda ngo simba no kuzwira Jehovha kuti aponeswe. (VaFilipi 2:12) Asi, patinova no mutoro jakawanda, Jehovha anovetera kuti tinase kuzwira. (Luka 12:48) Kudari tinoda Jehovha kamare, apana cinozotikhungunya kana kutiparajanisa mu rudo hwake.—Nduyo 119:165; VaRoma 8:37-39.
20. Tinodikana kusunga kuitenyi?
20 Tiri kupona mu nguva jinonesa. Ngo kudaro zvinosisira maningi kuti tirambe tecisotesesa Jehovha, uwo ‘anogara mugore,’ kuitira kuti tizwisise zvaanoda kuti tiite. Atidikani kutendera kuti zviito zvo vamweni zvikhuvaze ushamwari wedu na Jehovha. Zvakaitikari na Mosi zvinotipa cijijo ici cinosisira. Kusiyapo kukasika kunyangajwa ngo kuposa ko vamweni, ngatiteme civaringo co ‘kuringisisa Tenji Mwari wedu mbhera atiitire unyaxa.’—Nduyo 123:1, 2.
^ ndim. 8 Mutundhu wo Meribhaa uwu, wainga wakasiyana no Meribhaa wiyana wainga dhuze no ku Repidhini kwaidanijwayazve Masa. Asi, ndau mbiri iji jaidanijwa Meribhaa ngo kuti vaIziraeri vakapopera kana kun’gun’nguta, pavainga vari kondhono.—Vonanyi mapa pa Apendice B3 mu Tradução do Novo Mundo da Bíblia Sagrada.
^ ndim. 11 Umwe mujiji wo zvo Bhaibheri wakananga kuti mukuzwirana no cirovejeso co Cijudha, vapanduki vaizonanga kuti ciya acicaengepi cishamaiso ngokuti Mosi waizviziva kuti buwe riya rainga no kumwa. Ngokudaro, ivona vaida kuti iyena aite mushamaiso wiya pa buwe rimweni. Zvokadi kamare, ici ndi cirovejeso haco.
^ ndim. 12 Vonanyi Murindiri wa 15 ya Outubro wo 1987, pa “Mubvunjo jo Vaverengi,” mu Ciputukezi.
