Mupostori Pauro wakatara kudari ku Makristu o ku Tesaronika: “Kudari ariwese akatama kuzwira masoko akatahwari mu karata iyi, bhasopanyi naye.” (2 Vatesaronika 3:14) Kareko tainanga kuti ndhungamiriro iyi yainga yo vakuru basi. Kudari ari wese akaenderera mberi ecireja-reja ndhungamiriro jo Bhaibheri, pikija pasure pokuashira besero ko vhaza jakawanda, kangaije vakuru vanozoita hurukuro mu ungano veciivhunja kuti ibhasope ngo pamusoro pazvo. Perapo vacumaeri avacaizopeja mukuvo no mundhu wakadaro kuciripi basi pa musongano no mu basa ro kucumaera.

Ngo kudaro, panodikana kuithwa cinjo. Kuvhira wari, tiri kuzwisisa kuti ndungamiriro ya Pauro iri kureva kuti Mukristu umwe nga umwe anodikana kutema ega civaringo pa mugariro jiri jese. Ngo kudaro, apana thangwe kuti vakuru vaite hurukuro kuitira kuti ungano ibhasope ku zviro zvakadaro. Ngenyi kwaithwa cinjo iyi? Vonanyi zvese zvinobatanijwa pa ndhungamiriro yakanangwari ndi Pauro.

Pauro wakananga kuti vamweni vo mu ungano iya, ‘vaifamba mu njira icikafaneri.’ Pauro wainga akavapekeja ndhungamiriro jaicijikira mu Bhaibheri, asi ivona avacaida kujizwira. Pa hwendo hwaakavavhakacira, iyena wakavapa ndhungamiriro iyi: “Kudari mundhu acikadi kubata basa, acadoha.” Vamweni vairamba kushanda kuti vajisapote, pikija vaitokwanisa kuita zvonazvo. Kusiyapo zvondhozvo, ivona vaizvinghwinisa mu shwiro jo vamweni. Makristu aidikana kutaja vandhu ava vaingari vacikafaneri ngo njira yapi?—2 Vatesaronika 3:​6, 10-12.

Pauro wakati: ‘Bhasopanyi navo.’ Magama aya akasandujwa mu Cigiriki, anoreva kuti tinodikana kunasa kusotesesa mundhu uwu no kubhasopa kuti titame kucengejwa ndiyena. Pauro wakapa ndhungamiriro iyi ku ungano yese, kuciripi vakuru basi. (2 Vatesaronika 1:1; 3:6) Ngo kudaro, Mukristu umwe nga umwe kangaije akavona hama kana hambzaji icikaripi kuzwira ndungamiriro yo Soko ra Mwari, inodikana kutema civaringo co ‘kuima kushamwarijana’ naye.

Izvi zvinoreva kuti mundhuwo anodikana kutajwa inga mundhu wavhiswa mu ungano? Haiwa, ngokuti Pauro wakananga kudari: “Endereranyi mberi mecimupangira inga hama.” Ngo kudaro, izvi zvinovonesa kuti Mukristu umwe nga umwe anoenderera mberi ecibhuya no mundhu uwu pa musongano no mu basa ro kucumaera, asi iyena anotema civaringo cokuti anoda kupeja mukuvo naye kana kuti haiwa pamusongano jimweni no mu mabungaijo. Ngenyi? Pauro wakati: “Kuti apseruke.” Patinoima kushamwarijana no hama iyi, iyona inozopseruka ngo ndava yo zvairi kuita no kucinja zvairi kuita.—2 Vatesaronika 3:​14, 15.

Ndirini Makristu anodikana kuima kushamwarijana no hama iri yese? Pakutanga tinodikana kuva no cokwadi cokuti mufambiro wo mundhuwo ‘aufaneri’ inga zvakatahwa ndi Pauro. Iyena aacainangepi ngo pamusoro po mavonero akasiyana no edu pa shwiro yo hana no zvatinodakarira. Iyena aacainangirepi vandhu vanonga vakatikhugunya. Kusiyapo zvondhozvo, Pauro wainga ecibhuya ngo pamusoro po vandhu vakakheta kutama kuzwira ndhungamiriro jakajeka jo Soko ra Mwari ngocabomo.

Nyamasi unovo, kudari tikavona hama kana kuti hambzaji icikaripi kuzwira no kwenderera mberi yecireja-reja ndhungamiriro jo Soko ra Mwari, a tinodikana kutema civaringo pacedu cokutama kupeja nguva no mundhuwo pa musongano jimweni no pamabungaijo. Zvecivoneka kuti civaringo ici ngo co mundhu ega, itusu aticaizozvibhuya no vandhu vamweni kuciripi basi vo pa mbhuri yedu. Cimwenizve, taizova no mundhuwo pa musongano no mu basa ro kucumaera. Kudari iyena akacinja mufambiro wake no zviito, itusu tinozotangazve kushamwarijana naye.