MUTEMO waitendera kuti magovora no njiva zvipihwe kuna Jehovha. Shiri mbiri iji nguva jese jinonangwa pamwepo mu mutemo ngo pamusoro po mupiro kana kuti imwe yaishandiswa kuitira kufakeya imweni. (VaLevi 1:14; 12:8; 14:30) Ngenyi kuita kudaro zvainga zviro zvaushoni? Thangwe rimwe ngo rokuti magovora aacainasa kuwanika nguva jese. Ngenyi?

Magovora i shiri jinofamba maningi, zvokuti jaigara mu Iziraeri yese mu mweji jokupisa basi. Makore ese mu mweji wa Outubro, iwona aienda ku nyika jimweni jaipisa, ohwirira ku Iziraeri mu cirimo. (Ndumbo jo rudo 2:11, 12; Jeremia 8:7) Ngo ndava yazvo, Vaiziraeri vaizonesehwa maningi kupira magovora mu nguva yo cipepo.

Ngo divi rimweni, njiva ajicaifamba maningi. Ngo kudaro, ijona jaiwanika mukuvo wese ku Iziraeri. Cimwenizve, vandhu vamweni vaitorera njiva pa muzi. (Ezanisanyi na Johani 2:14, 16.) Mukuzwirana no bhuku rimweni rinozwi Mamiti no Zvinyama zvo mu Nguva yo Bhaibheri, “ndharaundha jese no madhorobha ese o ku Parestina ainga no njiva. Muzi umwe nga umwe wainga no saki kana ndau yaigara njiva.”—Ezanisanyi na Isaia 60:8.

Ngo kuita izvi Jehovha wainga ecikhombija kuti iyena ano rudo. Cimwenizve, iyena imundhu wakaezanana ngo kutendera kwake kuti Vaiziraeri vapire shiri jaianja kuwanika mukati mo gore rese.