Mu gore rakatevera, hama jakazivisa ku mbhuri yese yo Bheteri, kuti Bheteri ro Afrika dhu Suri raida vandhu vanojipira kuti vaende koshanda no mucini jo kuimprimiri. Ndakataririsa zina rangu. Ngo kudaro, ndakadakara maningi pondakasanwa. Jakasanwavo hama jimweni ndhatu jaishanda pa Bheteri ro Kanadhaa, hama Dennis Leech, Bill McLellan na Ken Nordin. Takavhunjwa kuti taizoshandira Afrika dhu Suri ko mukuvo wakareba.

Ndakafonera mamaa, ndovavhunja kudari: “Mamaa, ndino masoko ondinoda kumuvhunja. Ndiri kwenda koshandira Afrika dhu Suri!” Mai wangu vainga vakanyararisa maningi, asi vainga mwanakaji wainga no rutendo hwakavanga i vainga no ushamwari wo phedo na Jehovha. Ivona avazivi kunanga zviro zvakawanda, asi ndaizviziva kuti ivona vaizondibesera. Pikija mamaa na papaa vainga vakasuruvara ngo kwenda kwangu ndhambo, ivona avazivi kundirambisa.

Pakutanga itusu takaenda ku Bheteri ro Brokrini kotaizojijiswa ko mweji mutatu manera okushandisa mucini iji. Tevere, takakhwira piketi tecienda Khapi Thauni, Afrika dhu Suri. Ndainga ndino makumaviri o makore basi. Wainga waausiku potakatanga hwendo hwakareba ngo karu kuvha Khapi Thauni kwenda Johannesbhurgi. Ndakatanga kugara ku dhorobha dokowane, ku Karoo, maitonga musora hamo. Kwainga no mabukuta maningi i kwaipisa. Tovarongomuna takasota kunja ngo pa jhanera, totanga kujivhunjisa kudari: Taviya koitenyi kuno? Pa kupera mukuvo wakati kuti, potakaendazve ku ndau iyi, takakwanisa kuvona kuti zvidhorobha zvidoko zviya, yainga yaandau inodakajisa kugara.

Ko makore manganani, basa rangu rainga ro kushanda no mucini unoshamaisa no kunesa, waizwi Linotipo, waishandiswa pa kudira rinya kuitira kuimprimiri marevhista Murindiri no Mukai! Bheteri raiimprimiri mabhuku kuitira ndumi jakawanda, kuciripi basi jaibhuiwa mu Afrika dhu Suri. Asi raibatanijavo ndumi jaibhuiwa mu nyika jimweni jo Afrika. Takadakara maningi ngo kuvona kuti mucini mupsa uwu wo kuimprimiri wataviyari koshanda nawo tecivha ngo Kanadhaa, wainga wecishandiswa maningi!

Pakufamba ko nguva, ndakazoshanda mu Hofise yo Fabirika. Iyona yaivonerera mabasa akawanda, kubatanijavo basa ro kuimprimiri, basa ro bauhwa  ro kutumira mabhuku no basa ro kusanduja. Upenyu hwangu hwainga hwakabatikana maningi asi waidakajisa.

Mu gore ro 1968, ndakacadha na Laura Bowen, waigara phedo no Bheteri. Iyena waishanda inga piyona no kubesera ku Bheteri pa Bauhwa ro Kusanduja. Mu njiku jiyana, kwainga kucina nasiriro yo kuti vavha kucadha vagare pa Bheteri. Ngo kudaro, takagajwa kuti tishande inga mapiyona anosisira. Ndainga ndecithimwa-thimwa padoko. Pa makore anokwana kuita gumi ndecishanda pa Bheteri, ndirona raindipa zvokuha no pokugara. Waro taizoitisa kudini kuti tikwanise kupagari dhispeza jedu ngo mare shoma yotaizoashira ngo kushanda inga mapiyona anosisira? Mundhu umwe nga umwe waizoashira 25 rande, pa mukuvo wondhowo yainga 35 dhorari. Taizoashira mare iyi kudari no taikwanirisa nguva jaidikana kuitwa pa mweji, kuita hwiririro no kubudisa mabhuku. Mare iyi yaidikana kukwana kuti ipagari nyumba, zvokuha, hwendo jotaizoita, yaidikanazve kupagari mamedhiko potaizohwaja no zviro zvotaizoda.

Tainga takagajwa kuti tiende koshanda ku cikwata cidoko phedo no dhorobha ro Dhurbhani, ku Oseano Indiko. Kondhono kwainga no vandhu vakawanda maningi vo India, vazinji vavo vainga mubarihwana wo vandhu vaishanda ku fabirika yo sikiri ku Afrika dhu Suri mu makore o 1800. Wari ivona vainga vecitobatikana pa kuita mabasa amweni. Asi vainga vecibatisisa zvirovejeso zvavo, mabikire, kubatanijavo manera ovaibika usavi hwavo. Cimwenizve, ivona vaibhuya Cingezi, izvo zvaiita kuti zvireruke kubhuya navo.

Mapiyona anosisira aidikana kupeja nguva jinokwana kuita 150 vecicumaera mweji jese. Ngo kudaro, inini na Laura takaita urongwa wo kupeja nguva ndhandhatu pa njiku yo kutanga. Kwainga kwecipisa, kweciita zihiti. Aticainga no hwiririro kana jijo jo Bhaibheri. Ngo kudaro, taidikana kuita nguva ndhandhatu tecicumaera muzi ngo muzi. No papera mukuvo wakati kuti, ndakasota rorojho yangu ndakavona kuti taita makumarongomuna o museswa basi! Ndaijivhunjisa kuti taizokwanisa kuva mapiyona anosisira?

Ngo kukasika, takatanga kuronga ushoni basa redu. Njiku jese tainasirira zviri zvese kuti tihe, zvakadari inga pau no sopa kana khofi. Potaida kuzorora, taiimisa karu yedu pa munvhuriri wo muti. Nguva jimweni taitendenejwa ngo zvivana zvakanyara maningi zvo Maindiano, zvecitisotesesa. No pakhirira njiku nganani basi, takazwisisa kuti patinopeja nguva mbiri kana ndhatu, nguva jimweni jinosararo jinozopera ngo kukasika.

Zvaidakajisa maningi kuvhunja vandhu vo mu ndima yedu cokwadi cinosisira co Bhaibheri. Takavona kuti Maindiano aireremeja maningi vamweni, vainga vandhu vanobonga no kuda Mwari. Vandhu vazinji vo ciyara co Cihindu, vaiashira masoko otaicumaera. Ivona vaida kujija ngo pamusoro pa Jehovha, Jesu no Bhaibheri. Vaidazve kujija ngo pamusoro po nyika imbza ino runyararo no vetero yo vakafa. Pakupera ko gore rimwe basi, tainga taano makumaviri o jijo jo Bhaibheri. Njiku jese, taidakara ngo kuha no mbhuri jo vaya vataijija navo. Tainga takadakara maningi.

Asi ngo kukasika takaashira basa rimweni. Takagajwa kuti tiende koshanda inga vavonereri vo ndharaundha mu mbhiripiri mo Oseano Indiko. Sumana ngo sumana, taigara mu muzi jo hama jotaivhakacira, tecishanda no vacumaeri vo ungano, tecivavangisa. Takaguma pa kuva divi ro mbhuri javo, tecidakara no vana vavo pomwe no zvinyama zvavo. Akapera makore maviri teciita basa iri. Zvinosuruvarisa ngo zvokuti, takafonehwa ngo Bheteri. Hama yakatifoneraya yakativhunja kudari: “Tinoda kuti imwimwi muhwirire ku Bheteri.” Inini ndakadavira kudari: “Munozviziva kuti itusu takadakara maningi kuno kotiri wari.” Asi itusu tainga no cido co kuda kushandira kuri kwese kotaizogajwa.

Ku Bheteri ndakagajwa kuti ndishande ku Bauhwa ro Basa. Kondhoyo ndakava no cidakajiso co kushanda pamwepo no hama jaano makore akawanda mu cokwadi. Mu njiku jiya, muvonereri wo ndharaundha paaipejisa kuvhakacira ungano, iyena waitumira ripoti ku Bheteri. Perapo Bauhwa ro Basa raizotumira karata ku ungano, vakacijikira pa zviro zvanangwaya ngo muvonereri wo ndharaundha. Karata iji jainga no cinangwa co kuvangisa no kupa ndhungamiriro  jaidiwa. Izvi zvaipa maningi basa hama kuti jisanduje karata iji kuvha mu cingezi kwenda ku ndumi jimweni jakadari inga Cixhosa, Cizuru no ndumi jimweni jaibhuiwa mu Afrika. Ndinobonga maningi vasanduji ava vaivangisira no kundibesera kuzwisisa zvineso zvaisongana no hama no hambzaji jedu mu Afrika.

Pa mukuvo uwu, ku Afrika dhu Suri kwainga no cineso cikuru maningi. Hama jo majinja akasiyana ajicaitendehwa kuti jigare pamwepo. Hama jedu jo cipsipe jaidikana kubhuya ndumi yavo basi, kucumaera ngo ndumi yavo no kuita musongano basi ngo ndumi yavo.

Andizivi kukwanisa kuziva hama jakawanda jo cipsipe. Ngokuti ndima yo ungano yondakagajwa yainga no vandhu vaibhuya Cingezi nguva jese. Wari, ndinovona kuti ndino mukana wo kujija ngo pamusoro po hama jedu jo cipsipe, kujija ngo pamusoro po mugariro wavo no zvirovejeso zvavo. Ndakajija ngo pamusoro po zvineso zvaisongana no hama no hambzaji jedu ngo ndava yo zvirovejeso zvo mu ndharaundha mavo no zviya zvavaitenda. Ivona vainga vandhu vano cicunge kamare! Ivona vairamba kuita zviro zvicikazwirani no matahwa kana kutoramba kuita zviro zvomadhimoni, pikija zvondhozvo zvaizoita kuti ivona vateverehwe ngo ukama hwavo no vandhu vo mu ndharaundha mavo. Vandhu vo mu ndharaundhemo vainga varombo maningi. Vazinji vavo avatozivi kwenda ku cikora, asi vaireremeja maningi Bhaibheri.

Ndakava no cidakajiso co kubesera pa shwiro jimweni jo zvo mutemo ngo pamusoro po rusujunuko hwo kunamata no kutama kuva no kotakapeamira. Zvaivangisa maningi rutendo hwangu, kuvona kugondeka no kucunga ko majaha ari Zvapupu, aigogomehwa ku cikora ngo kuramba kuita mukumbiro no kuimba ino nasionari.

Hama jakasongana no cineso cimweni ku nyika doko yo ku Afrika inodanwa Suwazirandiya. Mambo Sobhuza woshipiri paakafa, vandhu vese vakavhunjwa kuti vaidikana kuita zvirovejeso zvinoizwa kudari pakafa mundhu. Vanarume vaidikana kupara musoro wavo, vanakaji vaidikana kuceka vhuji ravo. Hama no hambzaji jakawanda jaiteverehwa ngo kuramba kwavo kuita zviro zvaibatanija kunamata vandhu vakafa. Kugondeka kwavo kuna Jehovha, kwaitidakajisa maningi! Takajija zvakawanda maningi ngo pamusoro po kugondeka no kusengerera kuvha ku hama jedu jo ku Afrika. Izvo zvakavangisa maningi rutendo hwedu.

Mu gore ro 1981, ndakaendazve koita basa ro kuimprimiri. Pa vhaza iyi, taiita basa iri tecibesehwa ngo komputadhori. Wainga mukuvo unodakajisa maningi! Manera okuimprimiri zviro ainga acinja maningi. Hama jaiita basa ro kutenga zviro, jakatenga mucini jipsa kuti jishandiswe pa Bheteri. Izvo zvakaita kuti tifakeye mucini mupfumbamwe jotaingaya najo, todira mushanu jaingaya jatengwa. Cimwenizve, hama jakapera kudira mucini jipsa jiya pa ndau yajo. Kuvhira pondhopo zviro zvakatanga kufamba kamare!

Komputadhori jakatibesera kuti tijijire manera mapsa o kuronga mapheji anoda kuimprimihwi tecishandisa porograma inozwi MEPS. Zina rokuti MEPS rinoreva, Sistema de Editoração Eletrônica Multilíngue. Kushandisa komputadhori kwakaitisa maningi nane basa redu, kuvhira patakavaha ku Kanadhaa toviyari koshanda muno mu Afrika dhu Suri. (Isaia 60:17) Tese takawana vakaji vaushoni maningi, vaishanda inga mapiyona i vaida Jehovha. Inini na Bill, ticiri kushanda pa Bheteri. Asi Ken na Dennis vakadikana kurera vana vavo, vecigara phedo no Bheteri.

Painga pano basa rakawanda maningi ro kuita pa Bheteri. Mabhuku akacijikira mu Bhaibheri ainga ecitanga kusandujwa no kuimprimihwi mu ndumi jakawanda maningi no kutumihwa ku mabheteri amweni. Ngo ndava yazvo, paidika Bheteri rakakura. Hama jakatanga kuvaka Bheteri rimweni kumavirazuva ko Johannesbhurgi, ropera mu gore ro 1987. Zvaidakajisa maningi kuva no divi pa basa rese rakaitwari pa kuvaka no kushanda inga umwe wo vo Komisau yo Bheteri ro Afrika dhu Suri ko makore akawanda.

Takashamaisika maningi mu gore ra 2001, pondakakokwa kuti ndiende koshandira ku Komisau yo Bheteri imbza ro Estadhus Unidhus. Pikija tainga takasuruvara ngo kusiya basa redu no shamwari jedu ku Afrika dhu Suri, taingavo tecidakara ngo kuda kutanga upenyu umweni inga divi ro mbhuri yo Bheteri ro Estadhus Unidhus.

Asi tainga tecithimwa-thimwa ngo kuti taizogara ndhambo na mai va Laura. Aticaizokwanisa kuita zvizinji notiri Novha Yorki. Hambzaji ndhatu ja Laura, jakananga kuti ijona jaizobesera mamaa pa zvese zvavaida. Ivona vakananga kudari: “Itusu atingakwanisi kughwina mu basa ro mu nguva yakazara, asi kudari tikakhorondha mamaa, tinonga tecimubesera kuti muenderere mberi mu basa renyu.” Tinovabonga maningi ngo besero ravo.

Ndizvona zvakaitavo hama yangu no mukaji wayo, inogara Toronto, ku Kanadhaa kwayaikhorondhera mai wedu vakafihwa. Ivona vakatoguma pa kuva divi ro mbhuri yavo kamare, ko makore anopindirija makumaviri. Tinobonga maningi ngo rudo no manera ovakavakhorondha mbhera kufa kwavo, pacicota mukuvo mushoma ticito taenda Novha Yorki. Makomborero makuru maningi kuva no ukama uno cido co kuda kuita cinjo mu upenyu hwavo kuti ukwanise kusapota vamweni, zviro zvokuti nguva jimweni zvinonesa maningi!

Ko makore akati kuti, basa rangu ku Estadhus Unidhus rainga ro kubudisa mabhuku, pa mukuvo uwu zviro zvainga zvicikanesizve. Wari uno, ndiri kushanda ku Bauhwa ro Kutenga Zviro. Cakava cidakajiso cikuru maningi kuva divi ro mbhuri yakakura ko makumaviri o makore! Wari iyona ino vandhu vanokhwedera kuita 5.000 kubatanijavo vandhu vanokwana kuita 2.000 vanoshanda vecivha ngo kumuzi.

Andicairangarira kuti ndaizoita zvese zvondakaitari pa makore anodarika makumatandhatu. Laura wakandibesera maningi ko makore ese aya. Wakava upenyu unodakajisa maningi kamare! Itusu takadakarira maningi mabasa ese otakaita no vandhu vese vanoshamaisa, votakashanda navo. Kubatanijavo vaya votakaziva mu mabheteri akawanda otakavhakacira mu mabasa otaiita, mu mativi akasiyana-siyana o nyika. Wari ndaano makumasere o makore, mabasa mazinji ondaiita, akadikana kupunguhwa kuti aithwe ngo hama jimweni jiri majaha.

Mutari wo nduyo wakatara kudari: “Rinodakara jinja rinoromberera Tenji Mwari.” (Nduyo 33:12) Izvi ndizvonadi kamare! Ndinodakara maningi ngo kushandira kwangu Jehovha no vandhu vake vakadakara.