Maizviziva Here?
Ngozvapi zvakaitika ku Ninivhe pasure po njiku ja Jona?
MU MAKORE o 670 Kristu Acito Aviya, Asiriya yainga nyika yainga no Umambo waitonga nyika jese. Saite imweni yo Muzeu wo Gra-Bretanya yakananga kuti ndau yaitongwa ngo Asiriya “yaivha kumavirira ko Shipre mbhera kumavhazuva ko Iraki, nguva jimweni yaitobatanijavo no Ejipita.” Dhorobha guru rakona ro Ninivhe rainga riri dhorobha guru maningi ro munyika. Ivona vaizvikuja ngo kuva no zvithombe zvinoshamaisa, jhardhim jakaseja, nyumba jakaseja no ndau jakakura jinovigihwa mabhuku. Zvakatahwa mu mabiravira o nyumba jo kare jo ku Ninivhe zvinokhombija kuti Mambo Asurbhanipari, mukuezana no majimabo amweni o Asiriya waijidanija ega kuva “mambo wo nyika.” Pa nguva iyi zvaivoneka inga kuti Asiriya no Ninivhe, ainga madhorobha ainesa maningi kuda kumanyisa.
Simba Guru ro Nyika yo Asiriya rainga rakakura maningi payaitonga nyika yese pa nguva yondhoyo
Asi Asiriya payainga yecitonga, muporofita wa Jehovha Sofonia wakati: “Tenji anozotambujavo . . . Asiria; Ninive rinozoitwa matongo, rakaoma inga bani ro bzipare.” Mukuengejera, muporofita wa Jehovha Nahumi wakati: “Bvisanyi siriva, toreranyi ndarama . . . Guta rapejwa, rabihwa, rapambwa, raitwa matongo! . . . Ndibzo vese vanokuvona vanozokutiza, vozoti. “Ninive rapejwa!”” (Sofonia 2:13; Nahumi 2:10, 11; 3:7) Pavaizwa zviporofita izvi kangaije vandhu vaizojivhunjisa kudari: ‘Izvi zvingaitikadi kamare? Kureva kuti njiku iri yese Asiriya inozonyiswa?’ Izvi zvaivoneka inga kuti azvikwanisiki.
Ninivhe yakangarangara aizivi kuzogahwazve!
Pikija zvakadaro, zvaivonekaya inga kuti azvikwanisiki, zvakazoitika! Mu makore o 600 Kristu Acito Aviya, Asiriya yakanyiswa ngo va Bhabhironi no Medho Persiya. Pakupejisira, Ninivhe rakasiiwa rotokanganika kamare. Mukuzwirana no musoro umweni wakabudiswa ngo Muzeu Metroporitano wo Arti yo Novha Yorki, “dhorobha ro Ninivhe rainga rasiiwa, rainga aricagahwizve, vandhu vaizwa ngo pamusoro paro pecishandiswa Bhaibheri basi.” Saite yo Zvovapsakisisi vo Mathere vanobhuya ngo zvo Bhaibheri, ivona vanonanga kuti matangiro o makore o 1800, “akuna waiziva kuti dhorobha ro Asiriya rakamboveyo kamare.” Asi mu gore ro 1845, mupsakisisi wo mathere Austen Henry Layard wakatanga kuca mathere o dhorobha ro Ninivhe. Zviro zvaakapfumbura zvinovonesa kuti Ninivhe yainga no nduma maningi.
Zviporofita ngo pamusoro po Ninivhe zvakakwanirisika kamare. Izvi zvinovangisa kuthemba kwedu kuti zvese zvinonanga Bhaibheri ngo pamusoro po majimambo ari kutonga wari uno, zvinozokwanirisikavo.—Danieli 2:44; Apokaripsi 19:15, 19-21.
