1, 2. Vandhu vazinji vanovona kudini basa ravo?

VANDHU vazinji vanojizwa kuti vanosisira kana kuti haiwa vakacijikira pa basa rovanoita. Povanozivana no mundhu mu ndharaundha jimweni, zvakareruka kumubvunjisa kuti, “unoita basa renyi?”

² Bhaibheri nguva jimweni rinosanangura vandhu ngo kunanga mukhaindi wo basa rovaiita. Inga muezaniso, rinonanga kuti “Mateu muxabisi,” “Simoni musukuti wo matovo,” zve “Luka, murapi wakadikwa.” (Mateu 10:3; Maitiro o Vapostori 10:6; VaKolosi 4:14) Nguva jimweni, rinonanga mabasa aiita vandhu mu basa ra Jehovha. Rangariranyi ndi Mambo Dhvhidhi, muphorofita Erija no mupostori Pauro. Vandhu ava vaireremeja maningi basa rovakapuwa ndi Jehovha. Mukuezana, tinodikanavo kureremeja basa riri rese rotiri kuita pa kushandira Jehovha.

3. Ngenyi madhodha anodikana kuroveja majaha? (Vonanyi pikica yo kutanga.)

³ Itusu tinoda Jehovha no kureremeja basa rotakagajwa.  Uzinji hwedu tinoda maningi basa redu zvokuti tinovetera kuriita mbhera potinokwanisa. Asi zvinosuruvarisa ngo zvokuti vandhu povanoita madhodha, avakwanisizve kuita zvese zvovaiita povaenga majaha. (Mucumaeri 1:4) Izvi zvinoviisa zvineso zvizinji maningi ku vandhu va Jehovha. Nyamasi uno, basa ro kucumaira riri kuramba ricikura, zve sangano ra Jehovha riri kushandisa uzivi hwo wari hwo zvosiensia kuitira kugumisa masoko akanaka ku vandhu vakawanda maningi. Asi madhodha nguva jimweni anganesehwa maningi ngo kujijira njira imbza jo kuita zviro. (Luka 5:39) Zve vandhu povanoita madhodha, simba ravo no kuvanga kwavo zvinopera. (Mazwi Akangwara 20:29) Ngo iyo ndava, zvinoshanda zve ngo zvorudo, kuti madhodha anoroveja majaha kuti aite mabasa mu sangano ra Jehovha.—Verenganyi Nduyo 71:18.

4. Ngenyi vamweni vanonesehwa kupa vamweni mabasa? (Vonanyi bhokiso rinoti “ Ngenyi Zvingatinesa Kupa Vamweni Mabasa?”)

⁴ Azvizivi kureruka nguva jese kwa vaya vanotungamirira kuti vapekeje mabasa ovanoita ku majaha. Zvinoitisa kuti vahwajihwe ngo kupekeja vamweni basa ro vanoda maningi. Zvingavasuruvarisa kurangarira ngo pamusoro po kuruza basa rovari kuita. Kana vangathya kuti kudari vakatama kutungamirira basero, arizoitiwi ushoni. Kangaije vanorangarira kuti avana nguva yo kuroveja vamweni. Nguva jimweni, majaha anodikana kuva anosengerera paanonga acikapuwi mabasa.

5. Mubvunjo japi joticabhuisana pa musoro uu?

⁵ Waro ngenyi zvinosisira kuti madhodha abesere majaha kuita mabasa? Angazviitisa kudini? (2 Timoti 2:2) Zve ngenyi majaha anodikana kuva no murangariro waushoni paanoshanda no hama jaamadhodha zve jaana uzivi? Zve ngenyi anodikana kujija ngo hama iji? Kuti titange, ngativone kuti Mambo Dhavhidhi vakanasirira kudini mwana wavo kuti aite basa rinosisira maningi.

6. Mambo Dhavhidhi vaida kuitenyi? Jehovha wakavabvunjenyi?

⁶ Dhavhidhi waiteverehwa ko makore akawanda zve waithutha kubva ku ndau imwe kuenda ku ndau imweni. Tevere, wairarama mu nyumba yaushoni acito waa mambo. Ngokudaro, wakabvunja muphorofita Natani kudari: “Inini ndinogara mu nyumba yo muti wo ‘sedro’, Bokiso ro Citenderano ca [Jehovha] Mwari rinogara mu tende.” Dhavhidhi waida kuvakira Jehovha temberi yakanyara. Natani wakamubvunja kudari: “Itai bzo unoda mwoyo wako, ngokuti Mwari anewe.” Asi izvo andizvopi zvaida Jehovha. Wakabvunja Natani kuti abvunje Dhavhidhi kudari: “Iwewe auzondivakiri nyumba kuti ndigaremo.” Jehovha wakapikira Dhavhidhi kuti Iyena waizova naye nguva jese, Dhavhidhi wakaziva kuti umwe wo vana vake ngaaizovaka temberi. Waro Dhavhidhi wakazoitenyi?—1 Kronike 17:1-4, 8, 11, 12; 29:1.

7. Dhavhidhi wakadavirisa kudini ndhungamiriro ya Jehovha?

⁷ Dhavhidhi kangaije wakacamwa maningi ngokuti waidadi kuvaka temberi ya Jehovha. Asi waindobesera ngo mwoyo wese basa raizotungamirihwa ngo mwana wake  Soromona. Iyena wakabesera kuronga vashandi no kuunganija simbi, mutovhe, sirivha, goridhi no matabwa. Dhavhidhi aacaithyepi ngo ndava yokuti ndiyani waizokujwa ngo kuvaka temberi, yakazozivika weya inga temberi ya Soromana. Kusiyapo izvo, wakavangisa Soromona aciti: “Mwana wangu! [Jehovha] Mwari ngaagare newe wari, aite kuti upeje uxoni nyumba ya [Jehovha] Mwari wako, inga bzaakananga ngo njio yako.”—1 Kronike 22:11, 14-16.

8. Ngenyi Dhavhidhi kangaije wairangarija kuti Soromona aacaenga no zvikwaniriso kuti avake temberi? Asi Dhavhidhi wakaitenyi?

⁸ Verenganyi 1 Kronike 22:5. Kangaije Dhavhidhi waivona kuti Soromona aacainasiririka kuti atungamirire basa rondhoro. Temberi yaidikana kuva “yokuxamaisa” zve Soromona waenga “mudoko.” Asi Dhavhidhi waiziva kuti Jehovha waibesera Soromona kuti aite basa guru iri. Ngokudaro, Dhavhidhi wakaita zvese zvaaikwanisa kuti amubesere kuita basa rondhoro.

9. Madhodha anozwa kudini ngo kubesera vamweni kuti vaite mabasa? Itanyi mufananijo.

⁹ Hama jaamadhodha ajidikani kucamwa pojinodikana kupa mabasa ku majaha. Tese tinoziva kuti ciro cinosisira maningi i basa ra Jehovha. Kuroveja majaha kuti aite mabasa zvinozobesera kuti basa iri riitike. Rangariranyi izvi basi. Pomaenga mwana mudoko, maivona baba wenyu vaciita basa ririrese, rakadari inga kufambisa karu. Asi pomaikura, baba wenyu vaimudurujira kuti basa riya rinoitiswa kudini. Pa kufamba ko nguva, makakwanisavo kuita basa rondhoro zve motanga kuriita mwega. Pikija zvakadaro, baba wenyu vaindhomubvunja kuti itai kudari. Nguva jimweni maicinjana pa kuriita. Baba wenyu povaiita musharuka, waisara aciita maningi basero ndimwi.  Baba wenyu vaicamwa ndizvona here? Haiwa, kangaije vaitodakara ngokuti vaibesereka ngo kuriita kwenyu. Mu njira yakafanana, hama jaamadhodha jiri kudakara ngo kuvona majaha ojakaroveja akakwanisa kuita mabasa mu sangano ra Jehovha.

10. Mosi waijizwa kudini ngo pamusoro po kureremejwa no kuva mutongi?

¹⁰ Tinodikana kungwarira kuti titame kuva no ushanje ngo mabasa o vamweni. Tinojija cijijo ngo madaviriro akaita Mosi vaIziraeri vamweni povakatanga kuita inga vaphorofita. (Verenganyi Bzviverengo 11:24-29.) Joshuwa waida kuvarambisa, asi Mosi wakananga kudari: “Uno ruvindo [kana ushanje] ngo ndava yangu? Ndaida kuti vandhu vese va [Jehovha] Mwari vaite vaporofeti, vecipuwa ndi [Jehovha] Mwari Mwiha [kana mujimu] wake!” Mosi waizviziva kuti Jehovha ngaaitungamirira basero. Kunja ko kujipsakira kukujwa, Mosi waida kuti vashandiri vese va Jehovha vagajwe mabasa. Tingativo kudini ndisu? Tinodakara vamweni povanogajwa mabasa mu basa ra Jehovha here?

11. Hama imweni yakananga kudini ngo pamusoro po kupa mabasa vamweni?

¹¹ Kuna hama zinji jakashandira Jehovha ngo simba ko makumi o makore zve jakaroveja majaha kuti aite mabasa. Inga muezaniso, ngativone hama inodanijwa kuti Peter. Pa makore 74 o yakashandira mu nguva yakazara, yakapeja makore 35 icishandira pa hofisi yo cine yo ku Europa. Yakashanda inga muvonereri wo Bauhwa ro Basa ko nguva yakareba. Tevere, basa iri rakazopuwa mujaha wakarovejwa ndiyena anozwi Paul. Peter wakacamwa ngo ndava yo cinjo iyi here? Aazivi. Iyena wakati: “Ndiri kudakara maningi ngokuti kuvepo ko hama jakarovejwa kuti jiite mabasa makuru zve jinoita zvaushoni ngo kuita basero.”

12. Tinojijenyi ngo muezaniso wa Rehobhoamu?

¹² Rehobhoamu mwana wa Soromona paakava mambo, wakakumbira mazano ku madhodha ngo mashandiro aaizoita pa basa rake ibza. Asi wakazoramba kumashandisa. Kusiapo izvo, wakazotevera mazano o majaha o mupira wake. Muviyo wakona wakava wo ngozi. (2 Kronike 10:6-11, 18c) Tinojijenyi? Ngo zvoungwaru kookumbira mazano ku vaya vaamadhodha zve vano uzivi kupinda itusu. Majaha aadikani kuzwa kuvangijihwa kuti aite zviro kudeya kamare inga zvozvaiitwa kare. Asi,  anodikana kunasa kureremeja mavonero o madhodha zve aadikani kukasira kurangarira kuti maitiro o zviro o madhodha aashandi.

13. Majaha anodikana kushanda kudini no madhodha?

¹³ Pa nguva jimweni, majaha anogajwa kuti avonerere basa ro hama jina uzivi, zve jaamadhodha. Zvaizova zvo ungwaru kuti majaheo ajije ngo madhodheo. Pa muezaniso wotabhuyaya pakutanga, Paul wakafakeya Peter kuva muvonereri wo bauhwa ro pa Bheteri. Iyena wakati: “Ndakapeja mukuvo wakareba ndicipsaka mazano a Peter, zve ndakavangisa vamweni pa bauhwa rangu kuti vaitevo kudaro.”

14. Tinojijenyi ngo kushandira pamwe kwakaita Timoti no mupostori Pauro?

¹⁴ Timoti wakashanda makore mazinji na Pauro pikija kuti Pauro waenga dhodha maningi. (Verenganyi VaFilipi 2:20-22.) Pauro wakabvunja vaKorinto kudari: ‘Ngo ndava yondhoyo, ndakamutumira Timoti, mwana wangu wokudikana no wokugondeka mwa Tenji. Yena anozomuceukijisa mararamiro angu kuna Kristu, o ndinojijisa, kurikwese no ku ungano jese.’ (1 VaKorinto 4:17) Nga izvi tinovona zvakajeka kuti Pauro na Timoti vakashanda ushoni vese no kubeserana ngocavo. Pauro wakapeja mukuvo wakawanda acijijisa Timoti “mararamiro [ake] kuna Kristu,” zve Timoti wakanasa kujija. Pauro wakawana Timoti, wova no gwinyiso rokuti waizongwarira ushoni hama no hambzaji jo kuKorinto. Vakuru vanotevejera mupostori Pauro povanoroveja vanarume vamweni kuti vatungamirire ungano.

15. VaRoma 12:3-5 ingatibesesa kudini kuhwisana no cinjo?

¹⁵ Tiri kurarama mu mukuvo unonyaukirisa. Divi ro pasi ro sangano ra Jehovha riri kukura mu njira jinoshamaisa. Izvi zvinoreva kuti zviro zvicaramba zvicicinja. Cinjo jimweni jinopsasa mumwe na umwe wedu zve jinonesa maningi kuhwisana najo. Tinozobesereka kudari tikava vanojidodokesa no kusotesesa mativi akanaka o basa ro Umambo kunja ko kusotesesa pa zviro zvotingada. Potinoita izvi, tinogara takabatana. Pauro wakatarira maKristu o ku Roma kudari: “Ndinobvunja mundhu no mundhu, kuti acajivona kupinda bzokudikana.” Iyena wakazodurujira kuti kudari inga divi rimwe na rimwe ro muviri wedu rina basa rakasiana no divi rimweni, umwe na umwe pa ungano ana basa rakasiana no umweni.—VaRoma 12:3-5.

16. MuKristu umwe na umwe angaitenyi kuti sangano ra Jehovha rigare rina runyararo no rubatano?

¹⁶ Vandhu vese va Jehovha vanoda kubesera Umambo no kuita ciricese covanobvunjwa. Hama jaamadhodha jingaroveja majaha. Hama jiciri majaha jingaita mabasa ngo njira yo kujibata no kureremeja. Zve hama jakacadha jinobonga maningi vakaji  vajo povanojibesera pikija mugariro pojinocinja. Vanakaji ava vangatevejera Prisira, uwo wakashandira pamwe no mwamunake Akira ngo kugondeka.—Maitiro o Vapostori 18:2.

17. Jesu wakaroveja vajiji vake kuti vaitenyi?

¹⁷ Jesu wakagaja muezaniso wakanaka wo kuroveja vamweni. Iyena waiziva kuti vamweni vaidikana kuenderera mberi no basa rake. Zvokadi, vaiziva kuti vajiji vake vaenga vacizivi kukwana. Asi waithemba kuti vaizocumaira masoko akanaka pikija mbera ndhambo kupinda kwaakaguma. (Johani 14:12) Jesu wakavaroveja ushoni, zve vakakwanisa vacumaire mu nyika iriyese yo vaizoenda.—VaKolosi 1:23.

18. Basa rapi roticazova naro kumbejiyo? Basa rapi rotinaro wari?

¹⁸ Jesu naafa, Jehovha wakamumusa womupa mabasa mazinji kuti aite, akadari inga utongi “pa nyezuru kamare po . . . utongi, masimba no umambo.” (VaEfeso 1:19-21) Pikija tikafa inga vashandiri vakagondeka va Jehovha Harmagedhoni icito yaitika, tinozoraramazve no kuzova no basa rakazara ngo revo mu nyika imbza. Gunwe rimwe aricwanyi inda; kudari tiri majaha kana madhodha, tese tinokwanisa kuramba takabatikana pa ‘kubatira Tenji ngo simba rese.’—1 VaKorinto 15:58.