Häst duu al forspoirt dat feel kirche sich düler bekümre daue in gild krijgen as dai lüür helpe God kenelëre? Dai praisters wile dat dai lüür kööpe wat sai anbaire. Feel fon eer krijge hoog loon un leewe soo as rijk lüür. Sai wek daile wat passijrt sin:

•   Air jornal hät ruuterfunge dat air katolisch praister doir 13 jårelang hät dat gild fone kirch benutst taum air luftschif pachte un bijnå 150 rëse måke un ain 200 rëse in limusine. Hai hät uk mër as 4 miljone dólares gastijrt in sijn parokieshuus woo hai wåne däir.

•   In ain stel in África air praister hült kirche woo feel lüür hengåe. In sijne groote kirch hai däit al sort daile forkööpe, soo as “hailig ööl” urer sogår handdöiker un tüüg mit sijn bijld. Dai mëste wat dårmit an sin, sin arm, åwer dai praister is sër rijk.

•   In China sin 4 hailig bärg tau dai budistas. 2 fon dai ware benutst taum hanlerig måke ine bolsa de valores. Ain groot kirch wat Shaolin hit mökt feel hanlerig un dai praister fon dëse kirch is soo bekand as “monge schef”.

•   In Estados Unidos wek lüür fone kirche ware betålt taum dai lüür, wat in wek stele arbëre daue, inlëre oiwer religione moors un taum andrer daile tau eer måke.

 Wat mainst duu oiwer dai kirche wat sich inlåte mit hanlerig? Häst duu dij al frågt wat God dåroiwer denke däit wen dai lüür dai kirche benutse taum gild fordaine?

 God däit ni anneeme religion t’hoopmische mit hanlerig. Ine Bijbel stäit dat God ine früüsche tijd is wüütend woore oiwer dai praisters wat säge däire sai däire tau God arbëre, åwer däire sich gild fordaine mit dem inlëren. (Miqueias 3:11) God hät ni annåme dai hanlerig wat dai lüür maike in sijn huus. (Jeremias 7:11)

 Jësus däir dat neemlig maine wat God oiwer dai wat dai religion benutse däire taum gild fordaine. In Jësus sijne tijd dai religionschefs däire erlaube dat wek lüür hanlerig maike im Godeshuus in Jerusalém. Sai däire sich dår gild mit fordaine. Dai wat dår hanlerig maike wule bloos profijt häwe fon dai gaure lüür wat dår hengünge taum God anbeere. Mit koråsch Jësus hät dai wat im Godeshuus wat forkööpe däire ruuterjågt un hät sägt: “Hult an hanlerig måke in mijn Fåter sij huus!” (João 2:14 bet 16)

 Wen Jësus preege däir hai däir wijse dat hai grår soo denke däir as God. (João 8:28 un 29) Hai hät ais kair gild forlangt taum oiwer God inlëre. Un wen hai wat måke däir wat taum bewunren wäir, soo as dai wat hunger däire sat måke, kranke kurijre un doore upleewe, hai däir uk kair gild forlange. Jësus däir ni der preegarbëd benutse taum rijk ware - hai har nog nijmåls kair huus. (Lucas 9:58)

 Jësus hät sägt tau dai wat em någünge sai schule ni eene arbëd benutse ine religion taum gild fordaine. Hai hät sägt: “Ümsüss häwe jij kreege, ümsüss muite jij geewe.” (Mateus 10:8) Dës lüür wat Jësus någünge, wat nent woore sin soo as kristen, häwe dat måkt wat Jësus sägt hät. Dau dat saie:

•   Air mål, air kërl wat Simão haite däir hät gild anbåre tau apostel Pedro. Pedro wäir t’hoop mit Jësus as hai preege däir. Simão hät dat måkt weegen hai wul macht oiwer dai lüür häwe. Gans glijk, Pedro hät dat afsägt, hät em stram formånt un hät sägt: “Dat’s duu un dij silwer uutrot ware, weegen duu häst dacht duu küüst God sij geschenk mit gild kööpe.” (Atos 8:18 bet 20)

•   Dai apostel Paulo däir God horge un wäir sër bekand. Hai däir rëse taum dai kristlige gemainde besuike. Hai hät sich sër anstrengt taum dai bruirers un swesters helpe, åwer hai hät wut nij ais sich dår gild mit fordaine. Hai un andrer kristen däire “ni gild fordaine mit God sij woord soo as feel dat måke”. (2 Coríntios 2:17) Aners as dit, Paulo hät sreewe: “Dat wij küüne dai gaure nijges fon God preege, wij däire dag un nacht arbëre dat jij ni oiwer juuch hare ales for oos betåle.” (1 Tessalonicenses 2:9)

 Gewiss, dai kristen däire gild bruuke taum preegen un dai andrer helpe, åwer sai däire as kair gild forlange taum dës daile måke. Dai wat mithelpe wule küüne mit fraiwile gild geewe un küüne andenke an dës 2 sprüüch:

•   2 Coríntios 8:12: “Weegen wen jij al trecht sin taum geewen, wart dat geschenk annåme nå dat wat dai mësch hät un ni nå dat wat dai mësch ni hät.”

   Wat däit dit bedüüre? Dat wat mëre wërd hät is waite woweegen as dai mësch wat geewe däit un ni wofeel as dai giwt.

•   2 Coríntios 9:7: “Måk soo as jërer sich in sijn härts innåme hät, ni åne wile uk ni mit gewald, weegen God lijbt wee mit fruir giwt.”

   Wat däit dit bedüüre? God wil ni dat air mit gewald wat geewe schal. Hai fröögt sich wen air wat uut’m härts giwt.

 Ine Bijbel stäit gans klår dat God ni al dai religione anneeme däit. (Mateus 7:21 bet 23) In aine profesijr al dai falsche religione ware t’hoopmaint mit ain huur. Woweegen ware sai t’hoopmaint mit ain huur? Weegen sai daue sich t’hoopmische mit dai wat regijre taum gild un andrer hülps krijge un daue dai lüür fon al lands bedraige taum profijt for eer krijge. (Apocalipse 17:1 bet 3 un 18:3) Dës profesijr däit uk wijse dat God bald gericht bringe däit oiwer al dës religione. (Apocalipse 17:15 bet 17 un 18:7)

 Bet dårhen, dat wat dai falsche religione nog måke kan dai lüür bedraige un aflenke fon God un God wil soo wat ni. (Mateus 24:11 un 12) Dårweegen God wil dat dai lüür wat ain gaur härts häwe lëre wosoo em sijne wile måke un gåe uut dai falsch religion ruuter. (2 Coríntios 6:16 un 17)