Häst wut duu al dai Bijbel leese? Åwer dij is dat lëd woore soo as Jovy, Queennie un Ezekiel? Feel lüür daue denke sai krëge nij ais dai Bijbel leest. Åwer wen’s duu ruuterkrijge däist dat dai Bijbel dij helpe kan air fröölig leewend häwe? Un wen’s duu lëre däist wosoo dat leesen fone Bijbel måke taum dij lust geewe? Wilst duu gërn waite wosoo dai Bijbel dij helpe kan?

Feel lüür häwe forsöcht dai Bijbel leese un dat is sër gaud tau eer wääst. Dau saie wat wek sägt häwe.

Ezekiel, wat bits üler is as 20 jår, hät sägt: “Airste ik däir ni waite wat ik måke wul, wäir soo as air wat fuire däir ån waite woo hen. Dai Bijbel leese hät mij hulpe waite wat ik måke müst in mijn leewend. Dai formånen fone Bijbel helpe mij dag for dag.”

Frieda, wat uk bits üler is as 20 jår, däit säge: “Ik wäir ümer wüütend un mitm kop hait. Åwer as ik anfånge häw dai Bijbel leese, häw ik lërt mij selwst hule krijge. Nuu bün ik fründliger un häw ümgang mit mër lüür.”

Eunice wat üler is as 50 jår, hät sägt oiwer dai Bijbel: “Dai Bijbel däit mij helpe beeter sin, ik müst aners ware un nuu bün ik aners.”

Miljone lüür sijn leewend is beeter woore doir dai Bijbel leese. (Isaias 48:17 un 18) Dai Bijbel kan dij uk helpe air beetet leewend häwe. Dat, kan dij helpe gaur uutsuiken måke, gaure ümgang häwe mit lüür wat sich loone däit, air leewend häwe mit wënige unruigkët un wat nog mëre wërd hät, dai wårhët lëre oiwer God. Dai formånen fone Bijbel kåme fon God. Wen’s duu dårnå leewe däist wat dai Bijbel sägt, ales däit gaud gåe weegen God giwt ais nij slecht formånen.

Den, dat hauptsach is anfänge. Åwer wat kan dij helpe anfänge dit måke? Wiman’s wek daile saie wat dij helpe gefalen häwe an dat Bijbel leesen.