Felisa: Onda putukila megumbo mu na aantu aaifupipiki moSpania. Atuhe maandjetu okwa li Aakatoolika notu hole ongeleka. Aapambele yandje ye li 13 oya li aasita. Gwaantsezi yameme okwa li omusita, ye okwa li wo omulongisikola gwaKatoolika. Sho a si, Omupapa John Paul Omutiyali okwe mu simaneke moku mu tanga. Tate okwa li omuhambudhi, meme omulongi gwomepya. Otwa valwa yahetatu, ngame osheeli.

Sho nda li ndi na omimvo 12, iita yopashigwana oya tameke moSpania. Konima yiita, tate okwa tulwa mondjedhililo, molwaashono epangelo kalya li tali tsu kumwe nomadhiladhilo ge kombinga yopolotika. Osha li oshidhigu kumeme oku tu kongela iikulya ya gwana. Onkee ano, meme okwa tumu aamwamemekadhona yatatu mboka aashona, Araceli, Lauri, naRamoni ya ka kale mehala lyoosesitela, moshilando Bilbao. Hoka oya ka kala ye na iikulya ya gwana okulya.

Araceli: Pethimbo mpono onda li ndi na omimvo 14, Lauri omimvo 12 naRamoni omimvo 10. Okwa li twa yuulukwa aanegumbo yaandjetu noonkondo. Mehala lyoosesitela, iilonga yetu oya li okwoopaleka. Konima yomimvo mbali, oosesitela oye tu tumine kehala enene lyawo ndyoka li li moZaragoza. Kehala hoka oko haku silwa oshimpwiyu aakulupe. Otwa kala ko tatu longo nuudhiginini mokwoopaleka mokombitha, naashika osha li she tu lolodha noonkondo.

Felisa: Sho aamwamemekadhona ya yi kehala lyoosesitela moZaragoza, meme natatekulu ngoka a li omusita moshitopolwa, oya tokola okutumina ndje wo hoka. Oya li ya hala ndi kale kokule nomumati ngoka a li hala ndje. Onda ningi ngaashi ya lombwele ndje. Onda kala handi yi kongeleka esiku kehe, nonda li nda hala nokuli okuninga omutumwa gwaKatoolika, ngaashi gwaantsezi ngono e li muAfrika.

Kehala lyoosesitela, onda li ndu uvite kutya itandi vulu okulonga oshindji ngaashi nda hala. Oosesitela ihaya ladhipike ndje ndi ka longele Kalunga koshilongo shilwe, ngaashi nda li nda hala. Konima yomumvo gumwe, onda shuna kegumbo nonda kala te tonatele tatekulu, ngoka omusita. Onda li omuniilonga gwe  gwomegumbo, nokongulohi kehe otwa kala hatu galikana pamwe Olusaalia. Onda li wo ndi hole okutula melandulathano oongala mongeleka nokuzaleka ethano lyaMaria nosho wo “gaayapuki” yalwe.

Araceli: Sho ndi li moZaragoza, onda gana lwotango kutya onda pumbwa okuninga sesitela. Oosesitela oya tokola ye tu topole naamwamemekadhona. Ngame onda tuminwa kehala lyoosesitela koMadrid, Lauri okoValencia naRamoni okwa thigala moZaragoza. Sho ndi li moMadrid onda gana oshikando oshitiyali ndi ninge sesitela. Aantu oyendji oye ya okukala kehala hoka, unene tuu aailongi naakokele. Omwa li mu na iilonga oyindji. Ngame onda li handi longo moshipangelo.

Osho nda ningi sesitela. Okwa li ndi shi otatu ka longitha ethimbo olindji okulesha Ombiimbeli noku yi ilonga, ihe kapwa li omuntu he yi longitha nenge ta popi kombinga yaKalunga naJesus. Shika osha yemateke ndje noonkondo! Onda li ndi ilongo Oshilatina kashona nosho wo kombinga yonkalamwenyo “yaayapuki” Aakatoolika. Onda li wo handi galikana kuMaria. Olundji otwa kala hatu longo iilonga iidhigu.

Onda tameke okukala ndu uvite uudhigu nokwiipula unene. Onda li ndu uvite kutya pehala lyokulonga mehala muka mokuninga yalwe aayamba, oshihwepo okukala te mono iimaliwa, opo ndi kwathele yaandjetu. Onda ka popya nomukuluntu gwoosesitela kombinga yoshinima shika nonde mu lombwele kutya onda hala okuya. Pehala lyokukwatha ndje, okwe edhilile ndje mokandunda moka hamu kala owala omuntu gumwe. Okwa li e shi shoka a ningi po otashi imbi ndje ndi ye.

Oosesitela oye egulula ndje mo mokandunda hoka, ihe sho ye shi dhimbulula kutya natango onda hala okuza mo mehala mono, oya shuna ndje mo. Oye shi ningi ndje lwiikando itatu. Lwanima, oya lombwele ndje kutya otandi vulu owala okuthiga po ehala ndika, ngele onda nyola ngaashi tashi landula: “Onda hala okuya, molwaashono onda hala okulongela Satana pehala lyokulongela Kalunga.” Shika osha li sha kumitha ndje noonkondo. Odhoshili kutya onda li nda hala okuya, ihe kanda li te vulu okunyola oohapu ndhoka. Hugunina, onda ti onda hala okupopya nomusita noku mu lombwela shoka sha ningwa po. Omusita okwa pewa epitikilo komumbishofi, ndi tuminwe kehala lyoosesitela koZaragoza. Konima yoomwedhi oonshona, onde ethwa ndi ye. Konima yaashono, Lauri naRamoni nayo oya zi ko komahala goosesitela hoka ya li.

Felisa: Mokweendela ko kwethimbo, onda hokanwa notwa ka kala moCantabria, oshitopolwa shi li moSpania. Onda tsikile okukala he yi kongeleka pandjigilile. Osoondaha yimwe, omusita gumwe manga tu li mongeleka, okwa li a geya nokwi igidha a ti: “Taleni kembo ndika!” Okwe tu ulukile embo Oshili ndjoka tayi  fala kOmwenyo Gwaaluhe. Okwa ti: “Ngele opu na omuntu e ku pe embo ndika, li pe ndje nenge wu li ekelehi!”

Embo ndyoka kanda li ndi li na, ihe onda li nde li hala. Konima yomasiku omashona, maandjetu omwe ya aakulukadhi yaali. Oya li Oonzapo dhaJehova noya pe ndje embo ndyoka. Kongulohi yesiku olyo tuu ndyono, onde li lesha. Sho ya ka galuka, oya pula ndje ngele onda hala okukonakona Ombiimbeli, nonda zimine.

Onda kala aluhe nda hala okunyanyudha Kalunga. Onkee ondi ilongo oshili kombinga yaJehova nonda tameke okukala ndi mu hole unene. Onda li nda hala okulombwela kehe gumwe kombinga ye. Mo 1973, onda ninginithwa. Mpoka tashi vulika, onda li he kambadhala okupopya naantu yaandjetu kombinga yoshili. Aantu yaandjetu unene tuu omumwamemekadhona Araceli, okwa ti kutya shoka ndi itaala osha puka.

Araceli: Kehala lyoosesitela onda kala tandi ningwa nayi nosha li sha geyitha ndje. Kanda li we nda nyanyukilwa elongelokalunga lyetu. Onda tsikile okukala he yi kongeleka osoondaha kehe nokugalikana Olusaalia esiku kehe. Onda kala nda hala okuuva ko Ombiimbeli, nonda pula Kalunga a kwathele ndje. Felisa okwa lombwele ndje kombinga yaashono i ilongo. Okwa li a nyanyukwa shambishi megumbo mwa tselwa kombinga yaashono i itaala. Kanda li te tsu kumwe naashoka ta lombwele ndje. Onda li ndi shi ota yi oompwengu.

Lwanima, onda shuna koMadrid omolwiilonga noko nda hokanenwa. Momukokomoko gwomimvo, onda ndhindhilike kutya aantu mboka ye hole okuya aluhe kongeleka inayi itaala lela melongo lyaJesus. Onkee ano, inandi kala we handi yi kongeleka. Inandi kala we ndi itaala “maayapuki” nenge momulilo gwoheli. Shimwe ishewe, ihandi dhiladhila we kutya omusita ota vulu okudhima po oondjo. Iihongwathano ayihe yelongelokalunga mbyoka nda li ndi na onde yi ekelehi. Kanda li ndi shi ngele shoka te ningi oshi li mondjila. Onda li nda yematekwa, ihe onda tsikile okugalikana Kalunga te ti: “Onda hala oku ku tseya. Alikana kwathela ndje!” Otandi dhimbulukwa kutya Oonzapo dhaJehova odha kala hadhi konkola olundji pegumbo lyandje, ihe ine kala handi dhi egulula. Inandi kala we ndi na ohokwe momalongelokalunga.

Omumwamemekadhona Lauri okwa li moFulaanisa, omanga Ramoni omoSpania. Momumvo 1980 lwaampono, nayo oya tameke okukonakona Ombiimbeli  nOonzapo dhaJehova. Onda li ndi wete kutya otaya longwa owala iifundja, ya fa Felisa. Lwanima, onda tsakanene naAngelines, omushiinda shandje, notwa panga uukuume wopothingo. Angelines okwa li Onzapo yaJehova. Ye nomusamane gwe oya pula ndje iikando oyindji, ngele onda hala okukonakona Ombiimbeli nayo. Oye shi dhimbulula kutya nonando onda ti kandi na ko nasha nomalongelokalunga, onda li lela nda hala okwiilonga kombinga yOmbiimbeli. Hugunina, onde ya lombwele nda ti: “Oshi li nawa. Ote zimine okukonakona nane, shampa owala te longitha Ombiimbeli yandje.” Onda li nOmbiimbeli yedhina Nácar-Colunga.

Felisa: Sho nda ninginithwa mo 1973, moshilandopangelo shaCantabria shedhina Santander, omwa li Oonzapo 70 lwaampono. Otwa li hatu ende iinano iile tatu uvithile aantu ayehe momikunda odhindjidhindji. Otwa kala hatu yi nombesa. Lwanima, otwa ka kala hatu yi nohauto tatu ende omukunda nomukunda.

Momukokomoko gwomimvo, onda konakona naantu oyendji Ombiimbeli, nokonima 11 oya ninginithwa. Oyendji oya li Aakatoolika. Onda li nda pumbwa oku yi idhidhimikila. Ngaashi ngame, nayo wo oya li ya pumbwa ethimbo ya mone kutya shoka yi itaala osha puka. Onda li ndi shi shi kutya Ombiimbeli nombepo ondjapuki yaJehova, oyo owala iinima tayi vulu okukwathela omuntu a lundulule omadhiladhilo ge noku uve ko oshili. (Aahebeli 4:12) Omusamane gwandje, Bienvenido, ngoka a li omupolisi, okwa ninginithwa mo 1979. Meme naye okwa tameke okukonakona Ombiimbeli muule wethimbo efupi, nokwa si.

Araceli: Sho nda tameke okukonakona nOonzapo dhaJehova, onda li ndu uvite kutya itandi vulu oku dhi inekela. Mokweendela ko kwethimbo, omadhiladhilo ngono naampoka ngaa ga ningine. Oonzapo ihadhi longo owala Ombiimbeli, ihe ohadhi vulika wo komalongo gayo. Eitaalo lyandje muJehova nosho wo mOmbiimbeli olya tameke okukoka nonda li ndi na enyanyu enene. Aashiinda yandje yamwe oya dhimbulula kutya onda ninga omalunduluko noya lombwele ndje ya ti: “Araceli, ondjila ndjono wa landula ino yi etha!”  

Otandi dhimbulukwa te galikana ngeyi: “Tangi Jehova, sho wa tsikile okukwathela ndje nokupa ndje oompito odhindji ndi mone shono nda li te kongo — ontseyo yashili yOmbiimbeli.” Onda li wo nda pula omumwameme Felisa a dhimine ndje po, sho nda kala te popi naye momukalo omwiinayi. Okuza mpono, pehala lyokukala tatu nyenyeta, otwa kala hatu popi nombili kombinga yOmbiimbeli. Onda ninginithwa mo 1989 sho ndi na omimvo 61.

Felisa: Ngashingeyi ondi na omimvo 91. Omusamane gwandje okwa sa. Ihandi vulu we okuninga oshindji ngaashi nale. Onkee ngaa te tsikile okulesha Ombiimbeli esiku kehe, okuya kokugongala nokuya momapya, uuna tandi vulu.

Araceli: Ondi hole okupopya naasita nosho wo noosesitela kombinga yaJehova uuna nda tsakanene nayo, oshoka onda li gumwe gwomuyo. Ohandi kala ndi na oonkundathana tadhi hokitha nayamwe yomuyo, noyendji ohaya taamba omambo niifo yetu. Otandi dhimbulukwa omusita gumwe. Konima sho nda popi naye uule wominute omishona, okwa li a tsu kumwe nangame. Okwa lombwele ndje a ti: “Sho nda kulupa ngeyi, otandi yi we peni? Iilyo yegongalo lyetu nosho wo aakwanezimo yandje otaya ka tila ndje ngiini?” Onda yamukula nda ti: “Ye Kalunga okwe shi tala ko ngiini?” Omusita okwe shi dhimbulula kutya shoka te popi oshi li mondjila, nonda mono kutya oshe mu guma. Ka li ta monika e na omukumo gwokulundulula onkalamwenyo ye.

Ihandi dhimbwa esiku omusamane gwandje a lombwele ndje kutya okwa hala okuya nangame kokugongala. Oshikando she shotango e ya kokugongala, okwa li e na omimvo 80 nasha. Okuza mpono ina faula we okugongala. Okwa konakona Ombiimbeli nokwa tameke okuuvitha. Ote dhimbulukwa iinima oyindji iiwanawa kombinga yaasho kwa li hatu longo pamwe naye muukalele. Okwa si manga ku na oomwedhi mbali a ka ninginithwe.

Felisa: Sho nda tameke okulongela Jehova, aamwamemekadhona yatatu mboka aashona kungame oya li ompinge nangame. Lwanima, nayo oya taamba ko oshili. Shoka osha li oshinima dhingi inaandi shi ningilwa nando onale. Konima yaashono, otwa kala hatu nyanyukilwa pamwe, tatu popi kombinga yaJehova noyOohapu dhe. Hugunina, atuhe otwa kala tatu longele Jehova. *