Ombiimbeli oyu ulika wo kutya opo aayengeli ya gwanithe ehalo lyaKalunga, oya li ya gamene aalongelikalunga ye yashili poompito dhimwe. (Episalomi 34:7) Pashiholelwa:

• Sho Jehova a hanagula po iilando yu udha uukolokoshi yaSodom naGomorra, aayengeli oya li ya kwathele omulumentu omuyuuki Lot naanegumbo lye ya ye ontuku. — Genesis 19:1, 15-26.

• MuBabilonia shonale, sho aagundjuka yatatu Aahebeli ya li yu umbilwa meziko lya hanya, opo ya sile mo, Kalunga “okwa tumu omuyengeli gwe nokwa hupitha aalumentu mbaka haye mu longele.” — Daniel 3:19-28.

• Konima sho omulumentu omuyuuki Daniel a li a lala uusiku mekololo lyu udha oonime, okwa yelitha kutya okwa hupu, oshoka “Kalunga okwa tumu omuyengeli gwe, a mutike omakana goonime.” — Daniel 6:16, 22.

Omathimbo gamwe, aayengeli mboka ya tumwa kuJehova oya yile olunyala miilonga mbyoka ya li hayi longwa megongalo lyopaKriste lyonale uuna sha pumbiwa, opo ya gwanithe po elalakano lye. Pashiholelwa:

• Omuyengeli gumwe okwa li e egulula omiyelo dhondholongo e ta lombwele aayapostoli mboka ya li mo ya tsikile okuuvitha motempeli. — Iilonga 5:17-21.

• Omuyengeli gumwe okwa li a lombwele omweevaangeli Filippus a ye nondjila ye enda mombuga ndjoka ya za muJerusalem yu uka kuGaza noku uvithile omulumentu Omuetiopia ngoka a li a ya kuJerusalem a ka galikane Kalunga. — Iilonga 8:26-33.

• Sho ethimbo lyaKalunga lya adha, opo mboka kaaye shi Aajuda ya ninge Aakriste, omuyengeli gumwe okwa li a holokele omukuluntu gwetangakwiita lyaRoma, Kornelius, memoniko e te mu lombwele a tume omuyapostoli Petrus e ye kegumbo lye. — Iilonga 10:3-5.

• Sho omuyapostoli Petrus a li mondholongo, omuyengeli okwe ya kuye e te mu pititha mo. — Iilonga 12:1-11.

Kapu na shoka tashi ulike kutya Kalunga ota longitha aayengeli kunena ya kwathele aantu pashikumithalonga momikalo ndhoka dha popiwa mOmbiimbeli. Ihe Jesus okwa popi kombinga yethimbo lyetu, a ti: “Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” (Mateus 24:14) Owu shi shi ngaa kutya aalongwa yaKristus ohaya longo iilonga mbika taya wilikwa kaayengeli?

Embo lyEhololo otali ulike kutya aayengeli otaya ka kwathela lela aantu muuyuni awuhe yi ilonge kombinga yaJehova Kalunga nelalakano lye li na ko nasha naantu. Omuyapostoli Johannes okwa nyola a ti: “Nena onda mono omuyengeli gulwe e na oohapu dhelaka etoye lyaaluhe, a tuka mombanda muule, a ka uvithile aantu yokombanda yevi, omihoko adhihe, omaludhi agehe, omalaka agehe niigwana ayihe. Oye okwa popi newi enene a ti: ‘Tileni Kalunga, ne mu simaneke uunene we! Oshoka ethimbo lyokupangula aantu olya thikana. Galikaneni Kalunga, ngoka a shiti egulu, evi, efuta noothithiya dhomeya!’” (Ehololo 14:6, 7) Omahokololo ogendji kunena otagu ulike kutya aayengeli otaya ambidhidha iilonga yokuuvitha kombinga yUukwaniilwa muuyuni awuhe. Odhoshili kutya nokuli nuuna omulunde gumwe i iyele ombedhi e ta galukile kuKalunga, ‘aayengeli yaKalunga ohaya kala ya nyanyukwa.’ — Lukas 15:10.

Oshike tashi ka ningwa po, ngele iilonga yokuuvitha ya hulu? Aayengeli mboka ye li “omatanga gaakwiita yomegulu” otaya ka ambidhidha Jesus Kristus, Omukwaniilwa gwaakwaniilwa, mokukondja ‘miita mesiku enene lyaKalunga Omunankondoadhihe’ puArmagedon. (Ehololo 16:14-16; 19:14-16) Aayengeli aanankondo otaya ka dhipaga aantu mesiku lyepangulo, sho Omuwa Jesus ta ka ‘geela mboka ihaaya vulika kelaka etoye tali popi kombinga ye.’ — 2 Aatessalonika 1:7, 8.

Kala wu na einekelo kutya aayengeli oye na ko nasha nangoye. Oye na ko nasha lela nonkalonawa yaantu mboka ya hala okulongela Jehova, na Jehova okwa kala te ya longitha olundji, opo ya nkondopaleke noya gamene aapiya ye aadhiginini kombanda yevi. — Aahebeli 1:14.

Kehe gumwe gwomutse oku na okuninga etokolo lya simanenena. Mbela otatu ka pulakena ngaa nokuvulika konkundana ombwanawa ndjoka tayi uvithwa muuyuni awuhe? Oonzapo dhaJehova dhopomudhingoloko gweni otadhi ka kala dha hala oku ku kwathela wu mone uuwanawa mekwatho lyopahole ndyoka hali gandjwa kaayengeli yaKalunga aanankondo.