Ombiimbeli otayi ti: “Oshipewa kehe oshiwanawa nomagano kehe ga gwana ga pwa ohaga zi kuKalunga, Omushiti gwomaminikilo gokegulu.” (Jakob 1:17) Enyolo ndika otali popi kutya Tate yetu gwomegulu, Jehova Kalunga, oha gandja. Ihe momagano agehe ngoka Kalunga a pa aantu, omagano gekulilo ogo dhingi kwaagehe. Otu shi shi ngiini? Oohapu dhaJesus dha tseyika nawa dhi li muJohannes 3:16 otadhi ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”

Omagano dhingi ngoka twa pewa kuKalunga, ogo Omwana gwe epona, oshoka omolwe, otatu vulu okumangululwa mo muupika wuulunde, wuukulupe noweso. (Episalomi 51:5; Johannes 8:34) Itatu vulu okwiimangulula mo tse yene muwo, kutya nduno otu kambadhale shi thike peni. Ihe molwaashoka Kalunga oku tu hole noonkondo, okwe tu pe shoka twa pumbwa, opo tu mangululwe mo muwo. Okwa pa aantu mboka taya vulika kuye etegameno lyoku ka kala nomwenyo sigo aluhe, sho a gandja Omwana epona, Jesus Kristus, e li ekulilo. Mbela ekulilo oshike naanaa? Omolwashike lya pumbiwa? Uuwanawa wuni tatu mono mulyo?

Ekulilo olyo ofuto ndjoka hayi gandjwa yi futile po oshinima shontumba shoka sha kanithwa nenge opo omuntu a mangululwe mo muupika. Ombiimbeli otayi ti kutya aavali yetu yotango, Adam naEva, oya li ya shitwa kaaye shi aalunde. Oya li ye na etegameno lyokukala nomwenyo sigo aluhe moparadisa kombanda yevi pamwe noluvalo lwawo. (Genesis 1:26-28) Shinikitha oluhodhi, oya kanitha ashihe shoka, sho inaaya vulika kuKalunga, nokungawo, oya ningi aalunde. Oshizemo? Ombiimbeli otayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) Adam pehala lyokupa oluvalo lwe omwenyo gwa gwanenena, okwe ye etele uulunde neso.

Ngele tashi ya pekulilo, ofuto ndjoka tayi gandjwa oyi na okukala yi thike pwaashoka sha kanithwa. Adam okwa longo uulunde, sho a yonene owina kuKalunga, noshizemo, okwa kanitha omwenyo gwa gwanenena. Ombiimbeli otayi ti kutya shoka osha ningitha oluvalo lwe lu ye muupika wuulunde neso. Onkee ano, osha li sha pula omwenyo gwa gwanenena, ano gwaJesus, gu yambwe po, opo oluvalo lwaAdam lu mangululwe muupika. (Aaroma 5:19; Aaefeso 1:7) Molwaashoka Kalunga okwa gandja ofuto yekulilo, ngashingeyi aantu oye na etegameno lyoku ka nyanyukilwa omwenyo gwaaluhe, ngoka gwa kanithwa kuAdam naEva, moparadisa kombanda yevi. — Ehololo 21:3-5.

Okutala kwaashoka ekulilo tali gwanitha po, osha yela kutya omagano ngoka twa pewa kuKalunga gekulilo, ngoka tage tu kwathele tu ka mone omwenyo gwaaluhe, ogo dhingi. Opo tu kale twa pandula ‘omagano ngoka ga gwana ga pwa,’ natu taleni komikalo dha dhenga mbanda ndhoka tadhi ga ningitha ga kale ge na ongushu, dha popiwa moshitopolwa sha tetekele.

Otaga gwanitha po ehalo lyetu. Aantu otwa shitwa nehalo lyokukala nomwenyo sigo aluhe. (Omuuvithi 3:11) Nonando itatu vulu okukala nomwenyo sigo aluhe kutse yene, ekulilo otali shi ningitha tashi wapa. Ombiimbeli otayi ti: “Eso olyo ondjambi yuulunde, ihe omwenyo gwaaluhe ogwo omagano gesilohenda  lyaKalunga muukumwe naJesus Kristus, Omuwa gwetu.” — Aaroma 6:23.

Otaga gwanitha po ompumbwe yetu. Aantu kaya li taya vulu okugandja ekulilo. Ombiimbeli otayi ti: “Omuntu ita vulu okwiihupitha; ita vulu okufuta Kalunga, e mu kaleke nomwenyo, oshoka ofuto molwomwenyo gwomuntu onene noonkondo. Shoka te shi futu ando, itashi gwana.” (Episalomi 49:7, 8) Onkee ano, otwa li twa pumbwa lela ekwatho lyaKalunga, opo tu mangululwe muupika wuulunde neso. Ihe Kalunga okwe tu mangulula mo, ‘sho Jesus Kristus e tu kulile.’ — Aaroma 3:23, 24.

Oga gandjwa pethimbo lyo opala. Ombiimbeli otayi tu lombwele tayi ti: ‘Kristus okwa si peha lyetu, manga twa li aalunde.’ (Aaroma 5:8) Molwaashoka ekulilo olya gandjwa “manga twa li aalunde,” otali tu ulukile kutya Kalunga oku tu hole shi thike peni, nonando otu li aalunde. Otali tu kwathela tu kale tu na etegameno, nonando otwa pumbwa okwiidhidhimikila iilanduliko yuulunde.

Oga gandjwa netompelo lyokwaaihola mwene. Ombiimbeli oya popya kutya oshike shi inyengitha Kalunga a gandje Omwana e li ekulilo. Oya ti: “Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe. Ohole hayo ndjoka kutya ando twa li tu hole Kalunga, aawe, ihe Kalunga oye kwa li e tu hole tango.” — 1 Johannes 4:9, 10.

Ongiini to vulu okuulika kutya owa pandula omagano dhingi ngoka twa pewa kuKalunga? Dhimbulukwa kutya muJohannes 3:16 Jesus okwa ti kutya oomboka owala yi ‘itaala’ muye taya ka hupithwa. Ombiimbeli otayi ti kutya eitaalo olyo “okukala tu na einekelo lya kola miinima mbyoka twa tegamena.” (Aahebeli 11:1) Opo tu kale tu na einekelo ndyoka, osha simanenena tu kale tu na ontseyo yashili. Otatu ku ladhipike wu ilonge kombinga yaJehova Kalunga, Omugandji ‘gwomagano ngoka ga gwana ga pwa.’ Tseya wo kutya oshike wu na okuninga, opo wu ka nyanyukilwe omwenyo gwaaluhe ngoka to ke gu mona owala okupitila mekulilo lyaJesus.

Iinima ayihe mbyoka oto ke yi ilonga owala ngele owa konakona uuyelele wopaMbiimbeli mboka wu li kepandja lyetu lyokointaneta, www.ps8318.com. Oonzapo dhaJehova otadhi ka kala dha nyanyukwa oku ku kwathela. Otu na einekelo kutya sho to ilongo kombinga yomagano dhingi gekulilo noyuuwanawa mboka to mono mugo, oto ki inyengithwa wu tye: “Kalunga na hambelelwe omolwaJesus Kristus, Omuwa gwetu!” — Aaroma 7:25.