Omuyapostoli Paulus okwa li a nyolele Aakriste yomuTessalonika a ti: “Otashi vulika ku na gumwe ngoka inaa hala okuvulika kelaka ndyoka twe mu tumine montumwafo ndjika. Ngele oku na omuntu a tya ngaaka, mu konekeni [“mu ndhindhilikeni,” NW].” (2 Tes. 3:14) Nale otwa li hatu ti kutya aakuluntugongalo taya lombwelwa. Uuna gumwe ta tsikile okwiipwililikila omakotampango gOmbiimbeli, nonando okwa kala ta pewa omayele ethimbo nethimbo, aakuluntugongalo oya li haya vulu okugandja oshipopiwa megongalo, shokundhindhilika omuntu ngoka. Konima yaashoka, aauvithi kaya li we ye na okweendathana naye.

Ihe otwa pumbwa okuningwa elunduluko meuvoko lyetu. Omayele gaPaulus otaga ulike konkatu ndjoka Omukriste e na okukatuka pauhandimwe, sha ikolelela koonkalo dhontumba. Onkee inashi pumbiwa aakuluntugongalo ya gandje oshipopiwa shokundhindhilika. Omolwashike twa lundulula euvoko lyetu? Natu ka taleni kutya Paulus okwa li ta popi kombinga yashike, sho a gandja omayele ngoka.

Paulus okwa li a ndhindhilike kutya yalwe megongalo kaya li haya “landula.” Oya li ya tindi omayele ga nwethwa mo. Petalelopo lye lya tetekele, okwa li a gandja elombwelo tali ti: “Ngoka inaa hala okulonga, ina ethiwa a lye.” Ihe yamwe oya li ya tindi okulonga, opo ya ikwathele yoyene, nonando oya li taya vulu okulonga. Shimwe ishewe, oya li haya idhopo miinima ya yalwe. Aakriste oya li ye na okuungaunga ngiini naamboka ihaaya landula? — 2 Tes. 3:6, 10-12.

Paulus okwa ti: ‘Mu konekeni.’ Oshitya shOshigreka shoka sha tolokwa mu konekeni nenge mu ndhindhilikeni, otashi gandja edhiladhilo lyokugandja eitulomo lya ikalekelwa kenwethomo lyomuntu ngoka. Paulus okwa li a gandja omayele ngoka kegongalo alihe, ihe hakaakuluntugongalo owala. (2 Tes. 1:1; 3:6) Onkee ano Aakriste pauhandimwe, mboka tashi vulika ya li ya ndhindhilike kutya Omukriste omukwawo ita landula omayele ga nwethwa mo, oya li taya vulu okuhogolola ya ‘hulithe po eendathano’ naye.

Mbela shika osha hala okutya omuntu ngoka ota ka ungaungiwa naye a fa ngoka a kuthwa mo megongalo? Hasho nando! Paulus okwa gwedha ko a ti: “Mu pukululeni ongomumwanyoko.” Onkee Aakriste pauhandimwe otaya vulu natango okweendathana naangoka a ndhindhilikwa pokugongala nomiilonga yokuuvitha, ihe otaya vulu okuhogolola kaaya endathane naye, ngele tashi ya pomainyanyudho nenge pokutalelathana po. Omolwashike mbela? Paulus okwa ti: “Opo a se ohoni.” Ngele otwa etha po okweendathana naye momukalo ngoka, Omukriste ngoka ihaa landula, otashi vulika a kale a sa ohoni omolwoshinima shoka a ninga, e ta ningi wo omalunduluko. — 2 Tes. 3:14, 15.

Ongiini Aakriste kunena taya vulu okutula miilonga omayele ngoka? Ngaashi Paulus a ti, tango, otwa hala okushilipaleka ngele omuntu ngoka iha “landula” ngaa shili. Paulus ka li ta popi kombinga yaamboka haya ningi iinima momukalo gwa yooloka ko kugwetu, omolweiyuvo lyawo, nenge molwetaloko lyopaumwene. Shimwe ishewe, ka li ta popi kombinga yaamboka ye tu uvitha nayi. Pehala lyaashono, Paulus okwa li ta popi kombinga yaamboka ihaaya vulika owina komayele ga yela, ngoka ge li mOmbiimbeli.

Kunena, ngele otwa ndhindhilike kutya Omukriste omukwetu oku na ombepo yokwaavulika, otatu vulu okutokola paumwene kaatu endathane naye nokukutha ombinga naye momainyanyudho. Molwaashoka ndika etokolo lyopaumwene, a inatu pumbwa oku shi kundathana nayalwe, mboka kaaye shi yaandjetu. Nonando ongawo, otatu vulu okweendathana naye pokugongala nomiilonga yokuuvitha. Ngele okwa lundulula omikalo neihumbato lye, otatu vulu ishewe okukutha ombinga naye momainyanyudho.