1. Ehalo lyopaunshitwe lini tu na, nolya kwatela mo shike?

OTO ka kala wu uvite ngiini, uuna omuntu ngoka wu shi nowa simaneka a dhimbwa edhina lyoye nenge itee ku dhimbulukwa nokuli? Shoka otashi vulu oku ku uvitha nayi. Omolwashike mbela? Omolwaashoka kehe gumwe gwomutse oku na ehalo lyopaunshitwe lyokukala e shiwike. Ehalo lya tya ngaaka ohali tu ningitha tu kale twa hala okukonekiwa kuyalwe. Olya kwatela mo wo okukala twa hala aantu ya tseye kutya otse oolye notwa tompola po shike. — Num. 11:16; Job 31:6.

2, 3. Ehalo lyetu lyokusimanekwa kuyalwe, otali vulu ngiini okukala lya penga? (Tala kethano lyopetameko.)

² Ngaashi owala omahalo getu galwe ogendji, ehalo lyetu lyokukala twa simanekwa kuyalwe, otali vulu okukala lya penga omolwokwaagwanenena kwetu. Otashi vulika tu kale tatu lalakanene esimano lya pitilila. Uuyuni waSatana otawu hwahwameke ehalo lyokwiikongela edhina nokukala twa tumbala. Shoka ohashi tu ningitha kaatu gandje we esimano kuTate yetu gwomegulu, Jehova Kalunga, ngoka oye e na oku li pewa nokulongelwa. — Eh. 4:11.

³ Aawiliki yomalongelokalunga yamwe yopethimbo lyaJesus,  oya li ye na etaloko lya puka kombinga yesimano. Onkee ano, Jesus okwa londodha aalongwa ye a ti: “Angaleni aalongimpango mboka ye hole okweenda ya zala oonguwo oondeendeka nokukundilwa pokuma hapu gongala aantu. Oyo oye hole kiipundi yokomeho moosinagoga nopomahala ga simana miituthi.” Okwa tsikile ko ta ti: “Oyo otaa ka mona epangulo edhigu.” (Luk. 20:46, 47) Mepingathano nayo, Jesus okwa li a pandula omuselekadhi ohepele, ngoka a gandja omayambidhidho guupeni uyali, oshinima shoka yalwe tashi vulika ya li inaaye shi nongela. (Luk. 21:1-4) Etaloko lyaJesus olya li lya yooloka ko noonkondo kulyayalwe. Oshitopolwa shika otashi ke tu kwathela tu kale tu na etaloko li li pandjele, ndyoka Jehova a hokwa.

4. Esimano lini unene olyo tu na okukala tatu lalakanene, nomolwashike?

⁴ Esimano lini unene olyo tu na okukala tatu lalakanene? Katu na okutidha esimano ndyoka aantu taya kongo okupitila melongo lyopombanda, moongeshefa nomomainyanyudho guuyuni mbuka. Pehala lyaashono, natu lalakanene esimano ndyoka Paulus a popi, sho a ti: ‘Ngashingeyi sho mwa tseya Kalunga, nenge ndi tye, ngashingeyi sho mwa tseyika kuKalunga, otamu vulu ngiini okwiigameka ishewe komikalo ndhoka dhonale dhaa na oshilonga nodhaa na oonkondo, nomwa hala, mu ninge aapika yadho ishewe?’ (Gal. 4:9, yelekanitha OB-1954.) Oshi li uuthembahenda uunene, okukala twa “tseyika kuKalunga,” Omupangeli Omunenenene gweshito alihe. Okwa hala okukala e na ekwatathano lyopothingo natse. Omulongwantu gumwe okwa ti kutya “ohatu ningi ookuume Ke mboka a hokwa.” Uuna Jehova e tu tala ko tu li ookuume ke, nena otwa adha elalakano lye kutya omolwashike e tu shitila. — Omuuv. 12:13, 14.

5. Otu na oku shi enda ngiini, opo tu tseyike kuKalunga?

⁵ Moses okwa li a hokiwa kuJehova. Sho Moses e mu pula e mu pitike, opo a tseye nawa oondjila Dhe, Jehova okwa yamukula a ti: “Otandi ningi naanaa ngaashi wi indile, oshoka ondi ku shi nawa nondi na ombili nangoye.” (Eks. 33:12-17) Ongiini kombinga yetu? Otatu ka mona omayambeko kaage shi okuyelekwa, ngele Jehova oku tu shi paumwene. Otu na oku shi enda ngiini, opo e tu tseye? Otu na okukala tu mu hole noku mu iyapulila tu mu longele onkalamwenyo yetu ayihe. — Lesha 1 Aakorinto 8:3.

6, 7. Oshike tashi vulu oku tu ningitha tu kanithe ekwatathano lyetu naJehova?

⁶ Otu na okukaleka po ekwatathano lyetu naTate yetu gwomegulu ndyoka twa lenga. Paulus okwa li a nyolele Aakriste Aagalati ya yande ‘omikalo dhonale dhaa na oshilonga nodhaa na oonkondo’ mwa kwatelwa okukonga esimano lyomuuyuni. (Gal. 4:9, yelekanitha OB-1954.) Aakriste mboka ya li ko omimvo 2 000 nasha dha ka pita, oya li ya humu komeho sigo oposhitsa shokutseyika kuKalunga. Lwanima, aamwatate oyo tuu mboka, Paulus okwa li e ya popi kutya oyi ‘igameke ishewe’ kiinima yaa na oshilonga. Niitya yimwe, Paulus okwa li ta ti: “Ngele omwa tseya oshindji ngawo, omolwashike mu na okushuna kiinima ya nika uugoya, mbyoka yaa na oshilonga mwa li mwa thiga po?”

⁷ Mbela natse otatu vulu okwiiyadha monkalo ya tya ngawo kunena? Eeno. Petameko sho twa tseya Jehova, otashi vulika twa kambadhala okweetha po iikala yokukala twa hokiwa kuuyuni mbuka waSatana, ngaashi Paulus. (Lesha Aafilippi 3:7, 8.) Otashi vulika twa tindi okulalakanena elongo lyopombanda, okuyelwa miilonga nenge oompito dhokulikola iimaliwa okupitila moongeshefa.  Otashi vulika twa li tu na oshipewa shokuhika oongalo nenge shokumatuka, iinima mbyoka tayi vulu oku tu etela esimano nuuyamba, ihe ayihe mbyoka otwe yi pilamene. (Heb. 11:24-27) Itashi ka kala pandunge ngele otu wete twa ‘hepitha ethimbo’ lyetu, sho twa thiga po iinima mbyoka. Okudhiladhila kwa tya ngawo, otaku ke tu ningitha tu lalakanene ‘omikalo dhonale dhaa na oshilonga nodhaa na oonkondo’ dhuuyuni mbuka. *

8. Oshike tashi ka koleka uudhiginini wetu wokukala twa hokiwa kuJehova?

⁸ Ongiini tatu vulu okukoleka uudhiginini wetu, opo tu kale twa hokiwa kuJehova, pehala lyokuhokiwa kuuyuni? Otu na okukaleka momadhiladhilo iinima iyali ya simana. Shotango, Jehova iha dhimbwa nando mboka haye mu longele nuudhiginini. (Lesha Aahebeli 6:10; 11:6) Oha pandula noonkondo omupiya gwe kehe, ye oku shi ‘okwiinekelwa.’ Onkene oha dhimbulukwa aluhe aapiya ye mboka aadhiginini. Jehova “oku ya shi mboka ye.” (2 Tim. 2:19) ‘Ondjila yaayuuki’ oku yi shi nokwa tseya nkene e na oku ya hupitha momamakelo. — Eps. 1:6; 2 Pet. 2:9.

9. Gandja iiholelwa mbyoka tayi ulike kutya Jehova okwa hokwa oshigwana she.

⁹ Omathimbo gamwe, Jehova okwa li u ulike momikalo dhi ikalekelwa kutya okwa hokwa oshigwana she. (2 Ondjal. 20:20, 29) Pashiholelwa, okwe shi hupitha pEfuta etiligane, sho sha li sha landulwa ketangakwiita enankondo lyaFarao. (Eks. 14:21-30; Eps. 106:9-11) Oshinima shoka aantu muuyuni oya li ye shi tseya nawa, noshe ya ningitha ya kale noku shi popya nokuli nokonima yomimvo 40 lwaampono. (Jos. 2:9-11) Oshi li nawa natse tu dhimbulukwe oonkondo nohole yaJehova ndjoka he tu ulukile, oshoka masiku otu li pokuponokelwa kuGog yaMagog. (Hes. 38:8-12) Pethimbo ndyoka, otatu ka pandula unene sho twa lalakanene okuhokiwa kuKalunga ketu, ihe hakuuyuni.

10. Oshike tu na okukaleka momadhiladhilo ngele tashi ya pesimano ndyoka Jehova he tu pe?

¹⁰ Oshinima oshitiyali sha simana shoka tu na okukaleka momadhiladhilo, osho kutya: Jehova otashi vulika e tu pe esimano momikalo ndhoka inaatu tegelela nando. Mboka haya ningile yalwe uuwanawa nelalakano lyokusimanekwa kaantu, Ombiimbeli otayi ti kutya Jehova ite ke ya pa ondjambi. Omolwashike mbela? Omolwaashoka oya mona nale ondjambi yawo yokusimanekwa kuyalwe. (Lesha Mateus 6:1-5.) Jesus okwa ti kutya He ‘oha mono meholamo’ mboka haya ningile yalwe uuwanawa, nopwaa na okwiikongela esimano. Oha mono iilonga yawo noha futu omuntu kehe shi thike piilonga ye. Omathimbo gamwe Jehova ohe tu pe ondjambi momikalo ndhoka inaatu tegelela. Natu tale kiiholelwa yimwe.

11. Jehova okwa li u ulike ngiini kutya okwa hokwa omukiintu omugundjuka, Maria?

¹¹ Sho ethimbo lyOmwana gwaKalunga lya thiki lyokuvalwa e li omuntu gwopanyama, Jehova okwa li a hogolola omukadhona omwiifupipiki, Maria, oye a kale yina yokanona haka ki ikalekelwa. Maria okwa li ha zi moshilando oshishona, Nasareti, shoka sha li kokule naJerusalem moka mwa li otempeli. (Lesha Lukas 1:26-33.) Omolwashike Maria oye a li a hogololwa a ninge yina yaJesus? Okwa li a lombwelwa komuyengeli Gabriel kutya okwa “silwa ohenda kuKalunga.” Maria oku ulike kutya oku na uupambepo wa kola,  sho konima a ka popya nomupambele gwe, Elisabet. (Luk. 1:46-55) Eeno, Jehova okwa kala a tala Maria, nokwe mu pe uuthembahenda mboka a li inaa tegelela, omolwuudhiginini we.

12, 13. Jesus okwa li a simanekwa ngiini pethimbo lyokuvalwa kwe naasho a falwa kotempeli konima yomasiku 40?

¹² Sho Maria a vala Jesus, Jehova ka li nando a tseyithile aakwanepangelo nenge mboka ye na oondondo dhopombanda muJerusalem naBetlehem, shoka sha ningwa po. Pehala lyaashono, omuyengeli okwa li a holokele aasita yoonzi mboka ya langela iimuna yawo uusiku melundu kondje yaBetlehem. (Luk. 2:8-14) Aasita mboka oya yi ya ka talele po okanona haka opo ka valwa. (Luk. 2:15-17) Maria naJosef oye na okukala ya li ya kumwa, sho Jesus a tseyika momukalo ngoka. Natu tale eyooloko pokati komukalo ngoka Jehova ha ningi iinima nosho wo omukalo ngoka Satana he yi ningi. Sho Satana a tumu aayanekelinyothi ya ka talele po Jesus naavali ye, aantu ayehe muJerusalem oya li ya haluka, sho yu uvu kutya Jesus okwa valwa. (Mat. 2:3) Sho aantu ya tseya okuvalwa kwaJesus, oshe etitha edhipago lyaanona oyendji mboka kaaye na ondjo yasha. — Mat. 2:16.

¹³ Yina yaJesus, Maria, okwa li a tegelelwa a ka gandje omayambo kotempeli yaJehova kuJerusalem, konima yomasiku 40. Okuza kuBetlehem okuya kotempeli, opwa li oshinano shookilometa omugoyi. (Luk. 2:22-24) Sho Maria, Josef naJesus ye li mondjila, Maria otashi vulika a li ti ipula ngele omuyambi ota ka tya sha shi ikalekelwa kombinga yonkandangala ndjoka Jesus a li ta ka dhana monakuyiwa. Odhoshili kutya Jesus okwa li a simanekwa, ihe omomukalo moka yina a li inaa tegelela. Jehova okwa li a longitha omulumentu “omuyuuki, ha tila Kalunga,” Simeon pamwe nomuselekadhi gwomimvo 84, omuhunganeki omukiintu, Anna. Oya zimine kutya okanona hoka oko Mesiasa nenge Kristus ngoka a uvanekwa. — Luk. 2:25-38.

14. Omayambeko geni Maria a li a pewa kuJehova?

¹⁴ Ongiini kombinga yaMaria? Mbela Jehova okwa tsikile noku mu simaneka, sho a kala ta tekula nokuputudha Omwana? Eeno. Kalunga okwa shilipaleke iilonga yaMaria noohapu dhe yi nyolwe mOmbiimbeli. Osha fa shi li ngeyi kutya pethimbo lyomimvo ndatu netata lyuukalele waJesus, Maria ine enda pamwe naye. Okwa kala muNasaret, tashi vulika shaashi a li omuselekadhi. Nonando okwa li a pitililwa po koompito ndhoka odhindji, okwa li a vulu okukala pamwe naJesus sho ta alelwa komuti gwomahepeko. (Joh. 19:26) Lwanima, Maria okwa kala muJerusalem pamwe naalongwa yaJesus, manga inaaya tililwa ombepo ondjapuki pOpentekoste. (Iil. 1:13, 14) Otashi vulika naye a li a gwayekwa pamwe naamboka ya li po. Ngele osho, shino otashi ti kutya okwa pewa ompito yokukala pamwe naJesus megulu sigo aluhe. Ina pewa tuu ondjambi ombwanawa, omolwiilonga ye yuudhiginini!

15. Sho Jesus a li kombanda yevi, Jehova oku ulike ngiini kutya okwe mu hokwa?

¹⁵ Jesus ka li ta lilile a pewe esimano kaawiliki yomalongelokalunga nenge yopapolitika yopethimbo lye. Jehova okwa li a popi naye shu ukilila okuza megulu iikando itatu. Shoka oshi na okukala sha li sha tsu Jesus omukumo sho He e mu hokwa. Shotango, sho Jesus a ninginithwa momulonga gwaJordan, Jehova okwa ti: “Nguka Omumwandje omuholike nde mu hokwa.” (Mat. 3:17) Kakele kaJesus, Johannes Omuninginithi naye okwa li u uvu oohapu ndhoka. Oshitiyali, omumvo gumwe lwaampono manga Jesus inaa sa, aalongwa ye yatatu oya li yu uvu Jehova  ta popi Jesus ta ti: “Nguka Omumwandje omuholike nde mu hokwa, mu uveni!” (Mat. 17:5) Oshititatu, Jehova okwa popi ishewe nOmwana okuza megulu, sho e na ko owala omasiku omashona a ka dhipagwe. — Joh. 12:28.

16, 17. Jehova okwa pe Jesus esimano lini momukalo ngoka inaa tegelela?

¹⁶ Nonando Jesus okwa li e shi kutya ota ka sa eso tali sitha ohoni nokulundilwa kutya ota sheke Kalunga, okwa galikana ehalo lyaHe li gwanithwe, ihe halye. (Mat. 26:39, 42) “Okwi idhidhimikile esheko nokwa si eso [lyokomuti gwomahepeko],” noka li ta kongo esimano muuyuni, ihe okuHe owala. (Heb. 12:2) Jehova okwe shi ulike ngiini kutya okwa hokwa Jesus?

¹⁷ Sho Jesus a li kombanda yevi, okwa hololele He kutya okwa hala okupewa eadhimo ndyoka a li e na megulu. (Joh. 17:5) Kapu na sha shoka tashi ulike kutya Jesus okwa li a hala okupewa shi vulithe pwaashoka. Ka li a tegelela a ka pewe ondondo yopombanda ngele a yi megulu. Jehova okwa ningi po shike? Okwe shi ulike kutya okwa simaneka Jesus, sho e mu yumudha, e te mu “yele pombandambanda.” Okwe mu pe wo omwenyo gwopambepo ihaagu si, oshinima shoka kaasha li sha ningilwa nale omuntu gwontumba pethimbo ndyoka. * (Fil. 2:9; 1 Tim. 6:16) Shono osha li ondjambi ya dhenga mbanda ndjoka Jesus a pewa, omolwuudhiginini we.

18. Oshike tashi ke tu kwathela kaatu ikongele esimano muuyuni mbuka?

¹⁸ Oshike tashi ke tu kwathela kaatu ikongele esimano muuyuni mbuka? Kaleka momadhiladhilo kutya Jehova oha kala e wete aluhe aapiya ye aadhiginini nohe ya yambeke momikalo ndhoka inaaya tegelela. Odhoshili kutya otwa tegelela Jehova e ke tu pe shoka inaatu tegelela monakuyiwa. Ihe ngashingeyi otu na okwiidhidhimikila omaudhigu noothina muuyuni mbuka wa kolokosha. Otu na wo okudhimbulukwa kutya uuyuni niinima ayihe yi li mo, mwa kwatelwa esimano, otayi hulu po. (1 Joh. 2:17) Tate yetu omunahole, Jehova ‘ita dhimbwa iilonga nohole yetu mokusimanekitha edhina lye.’ (Heb. 6:10) Eeno, ote ke tu yambeka, tashi vulika momikalo ndhoka inaatu dhiladhila ngashingeyi.