OLUKENO uukwatya mboka hawu tsu omuntu omukumo noku mu hekeleka. Uuna twa mono kutya gulwe oku na ko nasha natse, ohashi tu nyanyudha. Molwaashono kehe gumwe gwomutse oku hole okuulukilwa olukeno, ongiini tatu vulu okukokeka uukwatya mboka?

Olukeno olwa kwatela mo okupititha komeho uuwanawa wayalwe. Shoka ohashi ulikwa moohapu nomiilonga iiwanawa. Molwaashono olukeno ohalu ulikwa miilonga, shoka otashi tu ulukile kutya inashi gwana owala okupopya oohapu dhombili. Olukeno lwashili ohalu inyengithwa kohole yashili nokuukwawo wanankali. Kakele kaashono, olukeno olu li oshitopolwa shoshiyimati shombepo yaKalunga, shoka Aakriste ya lombwela ya kale ye na. (Gal. 5:22, 23) Onkee ano, natu kokeke uukwatya wolukeno. Natu ka kundathaneni nkene Jehova nOmwana ya li ya ulike uukwatya mbuka nankene tatu vulu oku ya holela.

Jehova oku na ko nasha naantu ayehe mwa kwatelwa mboka “ihaa pandula naamboka oonakwiihola” nenge tu tye aakolokoshi. (Luk. 6:35) Pashiholelwa, “etango lye ohe li pitithile aawinayi naawanawa, nomvula ye ohe yi lokithile aayuuki naalunde.” (Mat. 5:45) Nokuli naamboka inaaya zimina kutya Jehova oye e ya shita, onkee ngaa taya mono mo uuwanawa miinima iiwanawa mbyoka e tu pa monkalamwenyo, notashi vulika yi ya etele enyanyu lyontumba.

Jehova okwe tu tulila po oshiholelwa sha dhenga mbanda sholukeno, kombinga yaashoka a ningile Adam naEva. Nziya konima sho ya yono, “oya hondjele kumwe iifo yomukwiyu e taa isiikile.” Jehova okwa li e shi kutya otaye ki imonena oonguwo tadhi opalele, opo ya ka kale kondje yoshikunino shaEden, hoka evi lya li lya thingwa ‘noondjoho nomakwega.’ Onkee ano, otu wete kutya Jehova okwe ya kwathele nombili kombinga yaashoka ya pumbwa, moku ya ningila “oonguwo dhiipa.” — Gen. 3:7, 17, 18, 21.

Nonando Jehova omunalukeno kwaamboka “aawinayi naawanawa,” okwa hala unene okukenukila aapiya ye mboka aadhiginini. Pashiholelwa, pethimbo lyomuhunganeki Sakaria, omuyengeli gumwe ka li e shi uvitile nawa, sho a tala otempeli muJerusalem inaayi pwa natango okutungwa. Jehova okwa pulakene kwaashoka omuyengeli a li ti ipula nasho, e ta “hekeleke omuyengeli noohapu dho opala.” (Sak. 1:12, 13) Jehova okwa li a ungaunga nomuhunganeki Elia momukalo gwa faathana. Pompito yimwe, omuhunganeki ngoka okwa li a gwililwa po, e ta pula Jehova e mu kuthe omwenyo. Jehova okwa li u uvite ko onkalo yaElia, nokwa li e mu tumine omuyengeli, opo e mu nkondopaleke. Shimwe ishewe, okwe mu shilipaleke kutya haye awike a thigala po. Konima sho Elia a lombwelwa oohapu ndhoka dho opala nokupewa ekwatho ndyoka a pumbwa, okwa vulu okutsikila noshinakugwanithwa she. (1 Aak. 19:1-18) Maapiya ayehe yaKalunga, olye a ulike thiluthilu uukwatya we wolukeno?

Pethimbo lyuukalele we kombanda yevi, Jesus okwa li e shiwike e li omuntu ngoka e na olukeno noku na ko nasha nayalwe. Ka li nando e na onyanya nenge a thiminike aantu ya ninge shoka itaaya vulu. Okwa popi nohenda a ti: “Ileni kungame amuhe mwa vulwa nomwa humbatekwa uudhigu, ongame notandi mu pe evululuko. . . . Oshoka ondjoko yandje ombwanawa.” (Mat. 11:28-30) Aantu oya li ya landula Jesus kehe mpoka ta yi, omolwolukeno lwe. Molwaashono okwa li “e ya uvitile olukeno,” okwe ya palutha, okwa aludha aavu yawo nokwe ya longo “iinima oyindji” kombinga yaHe. — Mark. 6:34; Mat. 14:14; 15:32-38.

Jesus okwa li ha kala u uvite ko yalwe noku shi nkene e na okuungaunga nayo, shoka tashi ulike kutya okwa li ha kenukile aantu thiluthilu. Kutya nduno onkalo oya li ya tya ngiini, okwa li ha taamba “nenyanyu” ayehe mboka taye mu kongo. (Luk. 9:10, 11) Pashiholelwa, ka li a ganda omukiintu ngoka a li e niwe kuumbanda, nonando ka li a yogoka pampango yaMoses. Omukiintu ngoka okwa li a gumu konguwo ye yokombanda, e na einekelo kutya ota aluka kuuvu wetiko lyombinzi. (Lev. 15:25-28) Molwaashono Jesus okwa li u uvitile olukeno omukiintu ngoka a kala e na uuvu wetiko lyombinzi omimvo adhihe 12, okwe mu lombwele a ti: “Mumwandje, eitaalo lyoye lye ku aludha. Inda nombili, ngu u kale wa aluka kuuvu woye.” (Mark. 5:25-34) Jesus ka li tuu a ulike olukeno lwa dhenga mbanda!

Miiholelwa mbyoka ya popiwa metetekelo, otu wete kutya olukeno lwashili, ohalu ulikwa miilonga. Jesus okwa gandja oshiholelwa kombinga yokuulika olukeno, meyele li na ko nasha nOmusamaria omunamutimahenda. Nonando opwa li pu na uutondwe pokati kAasamaria nAajuda, omulumentu Omusamaria ngoka a popiwa meyele ndyoka okwa li u uvitile olukeno omulumentu Omujuda, ngoka a li a hulwa oonguwo dhe kaayugi noye mu mokagula e taye mu thigi mondjila e na okamwenyo okashona. Olukeno olwi inyengitha Omusamaria a katuke onkatu. Okwa panga iilalo ye e te mu sisidhile kongulu yaayenda. Opo nduno, okwa pe mwene gwongulu ndjoka oshimaliwa, a sile oshimpwiyu omulumentu ngoka. Okwe mu uvanekele wo kutya ote ke mu galulila ashihe shoka e mu futile. — Luk. 10:29-37.

Olundji olukeno ohalu ulikwa miilonga, ihe nonando ongawo, otalu vulu wo okuulikwa moohapu dha dhiladhilwa nawa notadhi tsu omukumo. Ombiimbeli otayi ti: “Oshimpwiyu shomomutima gwomuntu otashi mu thindile pohi, ihe oohapu dhuukuume ohadhi gu nyanyudha.” (Omayel. 12:25) Onkee ano, otatu vulu okunyanyudha omuntu, ngele olukeno nosho wo uuwanawa oye tu inyengitha tu popye iinima mbyoka tayi tungu. * Oohapu dhetu oombwanawa, otadhi ka ulika kutya otu na ko nasha naye. Otadhi ke mu tsa omukumo a vule okuungaunga nomaupyakadhi monkalamwenyo ye. — Omayel. 16:24.

Kalunga okwa shita omuntu “oshifetha she,” nomolwaashono aantu ayehe taya vulu okukokeka uukwatya wolukeno. (Gen. 1:27) Pashiholelwa, Julius, omukuluntu gwetangakwiita lyaRoma, ngoka a li a fala omuyapostoli Paulus kuRoma, okwa li e na “ombili naPaulus nokwe mu pe epitikilo oku ka talela po ookuume, opo ye mu pe shoka te shi pumbwa” koshilando Sidon. (Iil. 27:3) Konima yethimbo, aakalimo yomuMalta oya ulukile Paulus ‘uukuume uunene’ nosho wo yalwe mboka ya li moshiponga sheteko lyosikepa. Aantu yokontuntu ndjoka oye ya temene nokuli omulilo, opo ya vule okuhuhulukwa. (Iil. 28:1, 2) Shoka ya ningi oshi shi okupandulwa, ihe olukeno olwa kwatela mo oshindji shi vulithe owala poku li ulika omathimbo gamwe.

Opo tu kale twa hokiwa lela kuKalunga, natu kokeke uukwatya wolukeno noku wu ulika aluhe. Omolwetompelo ndyoka, Jehova ote tu lombwele tu ‘kale’ tu na olukeno. (Kol. 3:12) Nonando ongawo, haaluhe hashi kala oshipu okuulika  uukwatya mboka wopakalunga monkalamwenyo yetu. Omolwashike? Otashi vulika omolwohoni, tatu patanekwa, tu na uukwatya wokwiihola mwene nenge kaatu na omukumo oku shi ninga. Nonando ongawo, otatu vulu okukondjitha iinima mbyoka, mokukala twi inekela mombepo ondjapuki nokuholela omukalo gwaJehova gwokuulika olukeno. — 1 Kor. 2:12.

Mbela itatu vulu okutala mpoka twa pumbwa okuninga omalunduluko, ngele tashi ya pokuulika olukeno? Otu na okwiipula ngeyi: ‘Mbela ohandi pulakene ngaa neitulomo kuyalwe? Mbela ohandi gandja ngaa eitulomo koompumbwe dhayalwe? Uunake ndi ihula okuulukila gulwe olukeno, ngoka kee shi omukwanezimo nenge kuume kandje kopothingo?’ Omapulo ngoka otage ke tu kwathela tu itulile po omalalakano, ngaashi okutseya nawa aantu mboka ye tu kundukidha, unene tuu yomegongalo. Okuninga ngawo, otaku vulu oku tu kwathela tu kale tu shi oonkalo dhawo naashoka ya pumbwa. Onkee ano, otu na okukambadhala okuulukila yalwe olukeno momikalo ndhoka twa hala tu lu ulukilwe, ando otwa li moonkalo dhawo. (Mat. 7:12) Hugunina, Jehova ota ka yambeka oonkambadhala dhetu dhokukokeka uukwatya wolukeno, ngele otwe mu pula e tu kwathele. — Luk. 11:13.

Sho omuyapostoli Paulus a popi iinima mbyoka yu ulike kutya ye omukalele gwaKalunga, okwa kwatele mo ‘uukuume,’ ano olukeno. (2 Kor. 6:3-6) Aantu oya li ya nanenwa kuPaulus, molwaashoka okwa li e na ko nasha nayo, shoka e shi ulike okupitila miilonga nomoohapu. (Iil. 28:30, 31) Sha faathana, otatu vulu okunanena aantu moshili, omolwomikalo dhetu omiwanawa. Uuna tatu ulukile aantu ayehe olukeno, mwa kwatelwa mboka taye tu pataneke, otashi vulu oku ya inyengitha ya lundulule e taya kala nayo ye na olukeno. (Rom. 12:20) Mokweendela ko kwethimbo, otashi vulika ya kale ya hala okupulakena ketumwalaka lyOmbiimbeli.

MOparadisa ndjoka tayi ke ya, kapu na omalimbililo kutya aantu oyendjiyendji mboka taya ka yumudhwa, otaya ka nyanyukilwa okuulukilwa olukeno lwashili, tashi vulika nokuli osho tashi ka kala oshikando shawo shotango. Olupandu lwawo, otali ke ya inyengitha ya ulukile wo yalwe olukeno. Kehe ngoka itaa ka kala a hala okuulika uukwatya mboka nokukwathela yalwe, ita ka vula okukala moparadisa kohi yUukwaniilwa waKalunga. Shimwe ishewe, mboka taya ka pitikwa kuKalunga ya kale nomwenyo sigo aluhe, otaya ka ungaungathana nohole nonombili. (Eps. 37:9-11) Mbela muuyuni mboka itamu ka kala ngaa egameno nombili! Nonando ongawo, manga oparadisa inaayi ya, ongiini tatu vulu okumona mo ngashingeyi uuwanawa mokuulika olukeno?

Ombiimbeli otayi ti: “Omulumentu omunamikalo ota kala nawa.” (Omayel. 11:17) Aantu oye hole okukala nomuntu ngoka e na olukeno, nohashi ya inyengitha wo ye mu ulukile olukeno. Jesus okwa ti: ‘Oshiyelekitho shoka tamu shi yelekitha yakweni, osho wo nayo taye ke mu yelekitha.’ (Luk. 6:38, yelekanitha OB-1954.) Onkene, omuntu ngoka e na olukeno, oha mono nuupu ookuume ye li nawa noku ya kaleka po.

Omuyapostoli Paulus okwa li a ladhipike aantu yomegongalo lyomuEfeso a ti: “Kalathaneni mu na uukuume nolukeno. Silathaneni ohenda nokudhiminathana po oondjo.” (Ef. 4:32) Egongalo ohali mono uuwanawa lela, ngele oli na Aakriste ye na ondjaalela, mboka haya ulukile yalwe olukeno nohaya kwathelathana. Aakriste ya tya ngawo ihaya dhiladhila ya popye oohapu oonkukutu, ihaya gandja uusama unene nenge ya sheke yalwe. Pehala lyokutaandelitha oluhoko, ohaya kambadhala ya longithe elaka lyawo ya kwathele yalwe. (Omayel. 12:18) Oshizemo? Egongalo ohali kala lya kola nohali longele Jehova nenyanyu.

Eeno, olukeno uukwatya mboka hawu ulikwa moohapu nomiilonga. Ngele otu na olukeno, otatu ulike uukwatya uuwanawa waKalunga ketu, Jehova. (Ef. 5:1) Ngele otu na uukwatya mboka otatu koleke egongalo notatu ka nanena yalwe kelongelokalunga lyashili. Onkee ano, natu kale aluhe tu shiwikile uukwatya wolukeno.