1, 2. (a) Iinima yini ya simanenena tu na okuninga opo tu kale tu na ekwatathano ewanawa naJehova? (b) Ongiini tatu ka mona uuwanawa mokukonakona omahokololo gomOmbiimbeli gankene aantu ya li ya taamba ko egeeloputudho lyaKalunga?

“NGAME, osho opalela ndje okukala popepi naKalunga. OMUWA Omupangeliawike onde mu ningi egameno lyandje.” (Eps. 73:28) Moohapu ndhoka, omupisalomi oku ulike einekelo lye muKalunga. Oonkalo dhini dha li dhe mu ningitha a thike pehulithodhiladhilo ndika? Sho omupisalomi a mono aakaanakalunga ye li mombili, petameko okwa li u uvu nayi noonkondo. Okwa li a popi e na eyeme a ti: “Itashi kwatha sha nani, sho ndi ikeelele kuuwinayi nonda kala inee yona?” (Eps. 73:2, 3, 13, 21) Ihe sho e ya “mongulu yaKalunga,” okwa li mehala ndyoka lya li lye mu kwathele a lundulule okudhiladhila kwe, ye a kaleke po ekwatathano lye naKalunga. (Eps. 73:16-18) Oshimoniwa shika osha li sha longo omulumentu ngoka omutilikalunga oshiilongomwa sha simanenena shika: Okukala mokati koshigwana shaKalunga, okutaamba ko omayele, noku ga tula miilonga okwa simanenena opo a kale e na ekwatathano lyopothingo naJehova. — Eps. 73:24.

² Natse wo otwa hala okukala tu na ekwatathano lyopothingo naKalunga kashili noku li omunamwenyo. Opo tu adhe elalakano ndyoka, osha simanenena tu pitike omayele ge nenge egeeloputudho lye li tu zule, opo tu kale tatu mu nyanyudha. Methimbo lyonale, Kalunga okwa li u ulike ohenda sho a pe oohandimwe nosho wo iigwana ompito yi taambe ko egeeloputudho lye. Omahokololo kombinga yankene ya li yi inyenge oga nyolwa mOmbiimbeli ‘ge tu longe’ noge ‘tu londodhe oshoka otu li methimbo moka ehulilo li li popepi.’ (Rom. 15:4; 1 Kor. 10:11) Okukonakona nuukeka omahokololo ngaka otaku ke tu kwathela tu tseye uukwatya waJehova noku tu ulukila nkene tatu vulu okumona uuwanawa moku tu zula.

3. Oshiholelwa shini tashi ulike oonkondopangelo dhaJehova dhokuzula aantu shoka sha popiwa muJesaja 64:8 nosho wo muJeremia 18:1-6? (Tala kethano ndyoka li li petameko)

³ Jesaja 64:8 okwa popi kombinga yankene Jehova ha longitha  oonkondopangelo dhe uuna tu ungaunga nomuntu kehe nosho wo niigwana a longitha oshiholelwa, a ti: “OMUWA, ongoye tate. Tse eloya, ngoye omuhongi gwiiyuma. Owe tu shiti.” Omuhongi gwiiyuma oku na oonkondopangelo dhokuma eloya e te li hongo oshiyuma shoka a hala. Eloya itali vulu okulombwela omuhongi kutya nali hongwe oshiyuma sha tya ngiini. Osho wo shi li ngaaka pokati komuntu naKalunga. Omuntu ke na uuthemba wokupatana naKalunga ngaashi owala eloya kaali na uuthemba wokupatana nomuhongi gwiiyuma ngoka te li me li ninge oshiyuma. — Lesha Jeremia 18:1-6.

4. Mbela Jehova oha ningi aantu yamwe aawanawa yo yamwe aawinayi, nenge a ninge iigwana yimwe iiwanawa yo yimwe iiwinayi? Shi yelitha.

⁴ Sho Jehova a li tu ungaunga naIsraeli shonale okwa li u ulike kutya oku na oonkondo dhokuninga ngaashi omuhongi gwiiyuma ha ningile eloya. Ihe opu na eyooloko enene pokati kaJehova nomuhongi gwiiyuma gwopantu. Omuhongi gwiiyuma oha vulu okuhonga oludhi lwoshiyuma kehe shoka a hala. Mbela Jehova naye oha ningi aantu yamwe aawanawa yo yamwe aawinayi, nenge a ninge iigwana yimwe iiwanawa yo yimwe iiwinayi? Ombiimbeli otayi yamukula kutya ahawe. Jehova okwa pa aantu omagano ge na ondilo, ngoka ge li omagano gokukala ye na emanguluko lyokuninga omatokolo. E li Omupangeliawike, iha longitha oonkondo dhemomukalo ngoka tagu ningitha aantu ya kale itaaya vulu okulongitha omagano ngoka. Ihe aantu oye na okuhogolola ya zulwe kOmushiti, Jehova. — Lesha Jeremia 18:7-10.

5. Jehova oha longitha ngiini oonkondopangelo dhe uuna aantu ya tindi okuzulwa kuye?

⁵ Ongiini ngele aantu oya tindi okuzulwa kOmuhongi gwiiyuma Omunene molwaashoka ye na omanganga? Ongiini nduno ha longitha oonkondopangelo dhe e li Kalunga? Dhiladhila kwaashoka hashi ningilwa eloya ngele olya kala itaali vulu okuhongwa oshiyuma shoka sha halika. Omuhongi gwiiyuma ota vulu okuhonga oshiyuma shimwe shi ili ta longitha eloya ndyoka nenge e li ekelehi owala. Pakukala, uuna eloya kaali na we oshilonga, omuhongi gwiiyuma oye ha kala e na epuko. Shika hasho nando shi li ngaaka nOmuhongi gwetu. (Deut. 32:4) Uuna omuntu itii iyetha a zulwe kuJehova, epuko ohali kala aluhe lyomuntu ngoka. Jehova oha longitha oonkondopangelo dhe e li omuhongi gwiiyuma mokulundulula omukalo gwe gwokuungaunga naantu shi ikolelela kunkene tayi inyenge kokuzulwa kuye. Mboka hayi iyetha ya zulwe kuye ohaya kala ye na oshilonga. Pashiholelwa, Aakriste aagwayekwa oye li ‘iiyuma yesilohenda’ mbyoka ya hongwa yi ‘ninge iiyuma yi na ondilo.’ Mepingathano naashono, mboka haya tsu ondumbo naKalunga ohaya ka ninga ‘iiyuma yondjahi, mbyoka yo opala okuyonwa po.’ — Rom. 9:19-23, yelekanitha OB-1954.

6, 7. Eyooloko lini li li pokati komukwaniilwa David nomukwaniilwa Saul shi na ko nasha nankene ya li yi inyenge komayele gaJehova?

 ⁶ Omukalo gumwe moka Jehova ha zula aantu okupitila mokugandja omayele nenge egeeloputudho. Otatu ka mona nkene ha longitha oonkondopangelo dhe uuna tu ungaunga naamboka ha zula moku ka tala kaakwaniilwa yaali yotango yaIsraeli Saul naDavid. Sho omukwaniilwa David a li a yi moluhondelo naBatseba, oonkatu dhe odhe mu gumu shinyanyalithi nosho wo yalwe. Nonando David okwa li omukwaniilwa, Jehova okwe mu pe egeeloputudho. Kalunga okwa li a tumu omupolofeti Natan kuDavid netumwalaka lya kwata miiti. (2 Sam. 12:1-12) David okwi inyenge ngiini? Okwa hendwa komwenyo nokwi iyele ombedhi. David okwa silwa ohenda kuKalunga. —  Lesha 2 Samuel 12:13.

 ⁷ Mepingathano naashono, omukwaniilwa Saul ngoka a li koshipundi manga David inaa ya ko, ka li a taamba ko omayele. Jehova okwa li a pe Saul oshipango shu ukilila okupitila momupolofeti Samuel a ti: Hanagula po thilu Aayamaleki niimuna yawo. Saul ka li a vulika koshipango shaKalunga shika. Okwa hupitha Agag, omukwaniilwa nosho wo iimuna yimwe mbyoka iiwanawa. Omolwashike mbela? Kombinga yimwe okwe shi ningi molwaashoka a hala okwiitumbalekitha. (1 Sam. 15:1-3, 7-9, 12) Sho a pukululwa, Saul okwa li e na okwiifupipika, e te  etha a zulwe kOmuhongi gwiiyuma Omunene. Ihe pehala lyaashono, Saul okwa tindi okuzulwa. Okwa yukipalitha eihumbato lye. Okwa kala ti imbembeleke kutya shoka a ningi oshi li owala nawa molwaashoka iimuna oya li tayi vulu okulongithwa mokuninga omayambo, nokwa li a dhini omayele gaSamuel. Jehova okwa li e ekelehi Saul kaa kale we omukwaniilwa, noina kala we nando e na ekwatathano ewanawa naKalunga kashili. — Lesha 1 Samuel 15:13-15, 20-23.

8. Oshiilongomwa shini tatu vulu okwiilonga momukalo ngoka oshigwana shaIsraeli sha li shi inyenge kokuzulwa kuJehova?

⁸ Kalunga iha pe owala oohandimwe ompito yi iyethe ya zulwe kuye ihe ohe yi gandja wo nokiigwana. Mo 1513 K.E.N., (pwa pita ngashingeyi oomvula 3 526), Aaisraeli oya li ya manguluka muupika waEgipiti, e taya ningi ehangano naKalunga. Israeli okwa li oshigwana she oshihogololwa nosha li shi na uuthembahenda wokuzulwa kuye, sha fa shi li poshidhingolokitaafula shOmuhongi gwiiyuma Omunene. Ihe oshigwana osha li tashi ningi iinima iiwinayi koshipala shaJehova, sha li nokuli sha galikana iikalunga yiigwana mbyoka ya li ye shi kundukidha. Iikando niikando, Jehova okwa kala ta tumu aapolofeti ye ke shi kwathele shi lundulule, ihe oshigwana inashi pulakena. (Jer. 35:12-15) Omolwomitse dhawo omikukutu, Aaisraeli oya li ye na okupewa egeeloputudho lya kwata miiti. Ngaashi oshiyuma shoka sha gwana okuhanagulwa po, uukwaniilwa womazimo omulongo gokuumbangalantu owa li wa sindika kAayassur nuukwaniilwa womazimo gaali gokuumbugantu owa li wa ningilwa sha faathana kAababilonia. Shika kashi na tuu oku tu longa oshiilongomwa sha simana! Otatu ka mona owala uuwanawa mokuzulwa kuJehova ngele otwe etha e shi ninge.

9, 10. Aaninive oya li yi inyenge ngiini sho Kalunga e ya londodha?

 ⁹ Jehova okwa li wo a gandja ompito kaantu yomoshilandopangelo shaAssur, Ninive, yi inyenge kelondodho lye. Jehova okwa li a lombwele Jona a ti: “Inda kuNinive, oshilando shiyaka oshinene, u shi uvithile egeelo; ondi shi shi kutya aantu yasho aakaanakalunga.” Ninive okwa li a talwa ko a gwana okuhanagulwa po. — Jona 1:1, 2; 3:1-4.

¹⁰ Ihe, sho Jona e ya tseyithile etumwalaka lyehanagulo, “aantu yomuNinive oyi itaale etumwalaka lyaKalunga. Onkee oya tokola okwiidhilika iikulya, naantu ayehe, okuza kaakuluntu sigo okaanona, oya zala omahahi okuholola ngeyi eitedhululo.” Omukwaniilwa gwawo “okwa zi ko koshipangelapundi she, a hula mo oonguwo dhe dhuukwaniilwa e ta zala ehahi nokwa kuutumba momutoko.” Aaninive oya li yi iyetha ya zulwe kuJehova noyi itedhulula. Onkee ano, Jehova okwi igaluluka noine ya geela we. — Jona 3:5-10.

11. Uukwatya wuni Jehova u ulike sho a li tu ungaunga naIsraeli nosho wo naNinive?

¹¹ Okukala kwaIsraeli e li oshigwana oshihogololwa inaku mu ningitha a kale inaa pewa egeeloputudho. Mepingathano naashono, Aaninive kaya li ya ninga ehangano naKalunga. Ihe nonando ongawo, Jehova okwa li e ya tumine etumwalaka lye lyehanagulo nokwe ya sile ohenda sho yu ulike kutya oya fa eloya ndyoka tali vulu okumewa kuye nuupu. Iiholelwa mbika iyali itayi ulike tuu sha yela kutya Jehova Kalunga ketu “ke na ontondo”! — Deut. 10:17.

12, 13. (a) Omolwashike Kalunga ha lundulula omatokolo ge uuna oohandimwe yi inyenge kokuzulwa kuye? (b) Okukala kwaJehova ‘hi igaluluka’ okwa li taku ti shike moshinima shaSaul nosho wo shaNinive?

¹² Molwaashoka Kalunga oku na ehalo lyoku tu zula otashi tu ulukile kutya oku na ondjele nosho wo kutya oha ningi omalunduluko. Shoka oshi iwetikile moonkalo moka Jehova ha tokola okukatuka oonkatu dhi ikolelela kokupangula kwe aantu pauyuuki ihe ta lundulula omadhiladhilo ge shi ikolelela kunkene yi inyenge. Omanyolo oga popi kombinga yomukwaniilwa gwaIsraeli gwotango kutya Jehova okwa li ‘e ehama komwenyo, sho a ningi Saul omukwaniilwa.’ (1 Sam. 15:11) Ombiimbeli oya popi kombinga yaasho aantu yokuNinive yi itedhulula e ta ye etha po iilonga yawo iiwinayi, ya ti: ‘Kalunga okwi igaluluka noine ya geela, ngaashi a tile.’ — Jona 3:10.

¹³ Uutumbulilo wOshihebeli mboka wa tolokwa “okwi igaluluka” otawu gandja edhiladhilo lyokulundulula iikala nenge elalakano. Iikala yaJehova yokuungaunga naSaul oya li ya lunduluka okuza sho e mu hogolola a ninge omukwaniilwa sigo oosho e mu ekelehi kaa kale we omukwaniilwa. Elunduluko ndyoka olya li lya ningwa molwaashoka Saul okwa li a katuka oonkatu kee na eitaalo nokwa li inaa vulika, ihe hamolwaashoka ando Jehova a li a ningi epuko sho e mu hogolola. Kalunga kashili okwa li i igaluluka sho tu ungaunga nAaninive; ano a lundulula elalakano lye li na ko nasha nayo. Itashi hekeleke tuu okutseya kutya Jehova Omuhongi gwetu oku na ondjele noha ningi omalunduluko, omwaanawa noku na ohenda, nokwi ilongekidha okulundulula omatokolo ge shi ikolelela komalunduluko ngoka haga ningwa kwaamboka ye li mepuko!

14. (a) Jehova ohe tu zula ngiini kunena? (b) Otu na okwiinyenga ngiini uuna Kalunga te tu zula?

¹⁴ Kunena, Jehova ohe tu zula okupitila mOohapu dhe, Ombiimbeli, nosho wo mehangano lye. (2 Tim. 3:16, 17) Mbela katu na okuutaamba ko epukululo nenge egeeloputudho ndyoka te tu pe okupitila momasiloshimpwiyu ngaka? Kashi na nduno mbudhi kutya otwa ninginithwa pwa pita oomvula dhi thike peni nenge kutya otu na omauthembahenda giilonga ge thike peni, otu na okutsikila okutaamba ko omapukululo gaJehova, tu ethe ge tu zule tu ninge iiyuma yondilo.

15, 16. (a) Omaiyuvo omawinayi geni omuntu ha vulu okukala e na uuna a pewa egeeloputudho lya kwatela mo okukanitha iinakugwanithwa? Gandja oshiholelwa. (b) Oshike tashi vulu oku tu kwathela tu ungaunge nomaiyuvo omawinayi ngoka haga vulu okukala po konima yegeeloputudho?

¹⁵ Egeeloputudho limwe otatu vulu oku li  pewa momukalo gwelombwelo nenge gwepukululo. Ihe omathimbo gamwe, otashi vulika tu kale twa pumbwa egeeloputudho molwaashoka twa ninga sha sha puka. Egeeloputudho ndyoka otali vulu okukala lya kwatela mo okukanitha iinakugwanithwa. Tala koshiholelwa shomumwatate Dennis * ngoka a li omukuluntugongalo. Okwa li a gwile meyono molwaashoka ka li a katuka pandunge miinima yopangeshefa, nokwa li a geyelwa meholamo. Omumwatate Dennis okwa li u uvite ngiini ongulohi ndjoka egongalo lya tseyithilwa kutya ke shi we omukuluntugongalo? Okwa ti: “Onda li nda gwililwa po noonkondo komadhiladhilo ngoka kutya inandi pondola sha. Muule woomvula 30 dha ka pita, onda kala ndi na omauthembahenda ogendji. Onda li omukokolindjila gwondjigilile, nda li nda longo koBetel, nda li nda langekwa po ndi li omuyakuligongalo nokonima onda li nda ningi omukuluntugongalo. Onda li wo opo nda gandja oshipopiwa shandje shotango poshigongi shoshitopolwa. Ombaadhilila, ayihe oya kana. Kakele kokukala nda sa ohoni, onda li ndi uvite kutya mehangano lyaJehova kandi na mo we ehala.”

¹⁶ Omumwatate Dennis okwa li e na okuza mo mondjila ndjoka ombwinayi ndjoka ya li ye mu ningitha a pewe epukululo. Ihe mbela oshike sha li she mu kwathele u ungaunge nomaiyuvo omawinayi? Okwa yelitha a ti: “Onda li nda tokola toko ndi kale ndi na omukalondjigilile gwokwiipalutha pambepo. Naashoka ishewe sha simana, eyambidhidho ndyoka nda li nda mono kAakriste ooyakwetu nosho wo eladhipiko ndyoka nda li nda mono miileshomwa yetu. Oshitopolwa ‘Did You Once Serve? Can You Serve Again?’ (Mbela owa li nale wu na oshilongayakulo? Mbela ito vulu okukala nasho ishewe?) mOshungolangelo yOshiingilisa yo 15 Auguste 2009, osha li sha fa ombilive ndjoka nda nyolelwa yi li eyamukulo komagalikano gandje. Omayele ngoka nda li nda nyanyukilwa noonkondo oongoka taga ti kutya, ‘manga kuu na iinakugwanithwa ya gwedhwa po megongalo, gandja eitulomo kokunkondopaleka ekwatathano lyoye naJehova.’” Uuwanawa washike omumwatate Dennis a mona megeeloputudho ndyoka? Konima yoomvula dhontumba okwa popi a ti: “Jehova okwa laleka ndje nuuyamba ishewe nuuthembahenda wokukala omuyakuligongalo.”

17. Okukonda ohaku vulu okukwathela omuyoni ngiini? Shi thaneka.

¹⁷ Okukonda okwo omukalo gulwe ngoka Jehova ha gandja egeeloputudho. Ohaku gamene egongalo kenwethomo ewinayi nohaku kwathele omuyoni i itedhulule. (1 Kor. 5:6, 7, 11) Omumwatate Robert okwa li a kala a kondwa uule woomvula tadhi ihilile po 16, pethimbo ndyoka aavali ye naamwayina oya kala ya dhiginina lela ewiliko ndyoka li li mOohapu dhaKalunga kutya kaye na okukwatathana nomuyoni nokaye na nokuli okupopitha omuntu ngoka. Omumwatate Robert okwa li a galulilwa megongalo pwa pita ngashingeyi oomvula dhontumba nota humu nawa komeho pambepo. Sho a pulwa kutya oshike she mu inyengitha a galukile kuJehova nokoshigwana She konima yethimbo ele li thike mpoka, okwa yamukula kutya okukala kwoyaandjawo ya kakatela ewiliko lyaJehova okwo kwe mu inyengitha. “Ando yaandjetu oya kalele taye endathana nangame nokuli nando okashona, okutala kutya ondi li ngiini, ando oshinima shoka oshishona osha ningitha ndje ndi kale nda gwanenwa notashi vulika andola inaashi ningitha ndje ndi kale ndi na ehalo lyokugalukila kuKalunga.”

18. Otu na okukala eloya lya tya ngiini miikaha yOmuhongi gwiiyuma Omunene?

¹⁸ Otashi vulika itaatu ka pumbwa egeeloputudho lya tya ngaaka, ihe mbela otatu ka kala eloya lya tya ngiini miikaha yOmuhongi gwiiyuma Omunene? Otatu ki inyenga ngiini uuna twa pewa egeeloputudho? Mbela otatu ki inyenga ngaashi David nenge ongaashi Saul? Omuhongi gwiiyuma Omunene oye Tate yetu. Ino dhimbwa kutya “OMUWA ota dhenge ngoka e hole, ngaashi he omwana ngoka a hokwa.” Onkee ano, “ino dhina eputudho lyOMUWA, nomageelo ge inage ku sitha uunye.” — Omayel. 3:11, 12.