MOMASIKU 7 Septemba 1950, onda taambwa kObetel koBrooklyn. Pethimbo mpoka, mObetel omwa li mu na aantu ye li mepipi lyoomvula 19 sigo 80 ye li 355 ya za kiilongo yi ili noyi ili. Oyendji yomuyo oya li Aakriste aagwayekwa.

Meme oye a kwathele ndje ndi ilonge kombinga ‘yaKalunga ketu omunyanyukwi.’ (1 Tim. 1:11, NW) Okwa li a tameke okulongela Jehova manga ndi li okamatyona. Onda li nda ninginithwa mu 1 Juli 1939 poshigongi shoshikandjo moColumbus moNebraska moAmerika, sho ndi na oomvula 10. Ngame naantu ethele lwaampono otwa li twa gongala tu pulakene koshipopiwa shaJoseph Rutherford “Uukayamukulwa nenge Emanguluko” sha kwatwa mokangalo. Manga twa pulakena, ongundu yaantu ya geya oya kondeke ehala moka twa li. Oye ya mo koonkondo e taye tu tidha mo moshilando. Otwa ka gongala ishewe pofaalama yOnzapo yimwe e tatu tsikile okupulakena koshipopiwa. Osha yela kutya kandi na nando siku ndi dhimbwe esiku ndyoka nda ninginithwa!

Meme okwa li a longo nuudhiginini, opo a putudhile ndje moshili. Tate okwa li e li nawa nohe tu sile oshimpwiyu nonando ka li naanaa i itula momalongelokalunga nomokukwathela ndje pambepo. Ihe meme nOonzapo dhilwe megongalo lyaOmaha oya li ya kumike ndje.

Sho ndi li pokumana osikola, onda li ndi na okutokola shoka tandi ka ninga monkalamwenyo yandje. Onda kala nokukutha uukwathelikokolindjila pamwe nayalwe yepipi lyandje efudho kehe lyosikola.

Koshitopolwa shetu okwa li kwa tuminwa aamati aagundjuka, John Chimiklis naTed Jaracz, mboka ya piti ongundu ontiheyali yOsikola yaGilead, ye ye ya longe miilonga yuuyendi. Onda li nda kumwa shili sho ndu uvu kutya oye na owala oomvula 20 nasha. Pethimbo ndyoka onda li ndi li pokumana osikola nonda li ndi na oomvula 18. Natango ote dhimbulukwa sho John Chimiklis a pula ndje kutya otandi ka ninga shike monkalamwenyo yandje. Sho nde mu lombwele, okwa ladhipike ndje a ti: “Ino kakadhala, inda miilonga yethimbo  lyu udha. Shaashi ku shi kutya uuwanawa wuni tayi ke ku etela.” Omayele ngoka noshiholelwa shooitaali mboka osha tsu ndje shili omukumo. Onkee ano, mo 1948, konima sho nda mana osikola, onda ningi omukokolindjila.

MuJuli mo 1950, ngame naavali yandje otwa yi koshigongi shopaigwana koYankee Stadium moNew York City. Poshigongi mpoka, onda ka kala pokugongala kwaamboka ya hala okuya kObetel. Nokonima onda ningi eindilo.

Nonando tate ka li u uvite nayi sho nda tokola ndi kokole ondjila nenge sho handi zi pegumbo, okwa li u uvite kutya ondi na okukala handi futu omulalo niikulya. Esiku limwe muAuguste, manga tandi ka konga iilonga, onda piti popoosa. Mokaketha onda adha mo ombilive ya za koBrooklyn, kuNathan H. Knorr, ngoka a nyola a ti: “Eindilo lyoye lyokuya kObetel otwe li mona. Ondi wete kutya owa hala okukala mObetel onkalamwenyo yoye ayihe. Ngele osho, onda hala wu kale wi ilopota kObetel, kondjukithi 124 Columbia Heights moBrooklyn moNew York, mu 7 Septemba 1950.”

Tate sho a zi kiilonga esiku ndyoka, onde mu lombwele kutya onda mona iilonga. Okwa pula ndje a ti: “Owa mona iilonga peni?” Onde mu yamukula kutya, “OkObetel koBrooklyn, notandi kala handi kwata oodola 10 (dhaAmerika) komwedhi.” Osha li she mu halutha kashona, ihe okwa ti ngele shoka osho nda hala okuninga, nandi shi ninge nuudhiginini. Mathimbo hamale, tate okwa li a ningithwa mo 1953 poshigongi poYankee Stadium.

KObetel onda hiywa ko oshita nakuume kandje, Alfred Nussrallah, ngoka twa li hatu kokola ondjila pamwe naye notwa yi pamwe. Konima okwa ka hokana Joan, e taya yi koGilead nokonima oya tuminwa koLebanon. Oya ka galukila koAmerika e taya yi miilonga yuuyendi.

Oshilonga shandje shotango mOshinyanyangidho, osha li shokutula omambo omapeko. Embo ndyoka nda longo nalyo tango olya li What Has Religion Done for Mankind? Konima sho nda kala mOshinyanyangidho oomwedhi 8, onda tulwa kOshikondo shIilonga, kohi yewiliko lyaThomas J. Sullivan. Onda li nda nyanyukwa shili okulonga pamwe naye nondi ilonga oshindji kuye, molwashoka okwa li e na uunongo owindji nowino oyindji ndjoka a mono uule woomvula odhindji ndhoka a longo mehangano.

Sho nda longo mOshikondo shIilonga konyala oomvula 3, omutonateli gwoshinyanyangidho, Max Larson, okwa lombwele ndje kutya tate Knorr ota pula ndje. Onda li tandi ipula ngele pamwe onda ninga epuko lyasha. Ihe omutima gwandje ogwa shuna pehala sho tate Knorr a ti kutya okwa hala owala okutseya ngele ondi na omadhiladhilo gokuthiga po Obetel momasiku gokomeho. Okwa li a pumbwa omuntu ngoka ta vulu okulonga mombelewa ye uule wokathimbo okafupi nokwa li a hala okutala ngele otandi vulu okulonga oshilonga shoka. Onde mu lombwele kutya inandi dhiladhila okuthinga po Obetel. Uule woomvula 20 onda kala te longo mombelewa ye.

Onda kala handi popi olundji kutya ngele ando onda li ndi na okufutila elongo nenge edheulo ndyoka nda pewa kootate Sullivan naKnorr nayalwe mObetel ngaashi Milton Henschel, Klaus Jensen , Max Larson, Hugo Riemer naGrant Suiter, ando inandi vula oku li futila. *

 Ooitaali mbaka nda kala nokulonga kohi yewiliko lyawo, oya kaleke iilonga yawo yu unganekwa nawa. Tate Knorr okwa kala ta longo kee na ezimbuko, oshoka okwa li a hala iilonga yUukwaniilwa yi hume komeho lela. Kehe ngoka a longo pamwe naye okwa li e mu mangulukila. Uuna tu na etaloko lya yooloka ko kulye, otwa li hatu vulu oku mu lombwela twa manguluka nkene tu uvite, ihe okwa li natango e tu inekela.

Oshikando shimwe tate Knorr okwa popi nangame kombinga yokusila oshimpwiyu iinima mbyoka tashi vulika ya tali ka ko iishona. Pashiholelwa, esiku limwe okwa lombwele ndje kutya sho a li omutonateli gwoshinyanyangidho, tate Rutherford okwe mu dhengele ongodhi e ta ti kuye: “Tate Knorr, onda pumbwa uudhimitho poshitaafula shandje, wu etelela sho to ya komwiha.” Tate Knorr okwa ti oshinima shotango shoka a ningi okwa ka tala uudhimitho kompungulilo e te wu tula mondjato ye yombulukweya. Nopomwiha okwa li he wu fala kombelewa yatate Rutherford. Osha li oshinima oshishona, ihe kutate Rutherford osha li sha simana. Opo nduno tate Knorr okwa ti kungame: “Ondi hole okukala noopena dhandje dhekala dha hongwa nawa poshitaafula. Alikana ongulonene kehe nadhi kale dha hongwa.” Uule woomvula odhindji onda li handi shilipaleke kutya oopena dhe dhekala odha hongwa nawa.

Tate Knorr okwa kala olundji ha popi kombinga yokupulakena nawa uuna twa pewa tu longe oshilonga shontumba. Oshikando shimwe, okwa pele ndje omalombwelo ga yela nawa nkene ndi na okulonga oshilonga shontumba, ihe kanda li nda pulakene nawa. Oshizemo? Onda li nde mu sitha ohoni nayi. Molwashoka onda li ndu uvite nayi, onda nyola ombilive tandi gandja ombili nonda nyola wo kutya otashi ka kala hwepo ngele onda zi mo mombelewa ye. Tate Knorr okwe ya kungame konima yethimbo ongulonene ndjoka ta ti: “Ombilive yoye onde yi mona Robert. Owa ningi epuko e tandi li ku lombwele, nondi inekela kutya oto ka kala wa kotoka monakuyiwa. Ngashingeyi natu tsikile niilonga yetu.” Onda li nda pandula shili sho ungaunga nangame nolukeno.

Konima yoomvula 8 sho nda kala mObetel, kanda li ndi na omadhiladhilo gokuhokana. Ihe shoka osha lunduluka, oshoka onda tsakanene ishewe naLorraine Brookes poshigongi shopaigwana poYankee Stadium nopoPolo Grounds mo 1958. Oshikando shotango twa monathanene naye omo 1955, sho a li ta kokola ondjila moMontreal moKanada. Okwa li e na etaloko ewanawa kombinga yiilonga yethimbo lyu udha nokwa li wo e na ombepo yeiyambo yokuya kehe nkoka ehangano lyaJehova tali mu tumu. Uukwatya mboka onda li nde wu hokwa shili. Lorraine okwa kala a halelela okuya kOsikola yaGilead. Mo 1956, manga e na oomvula 22, okwa taambwa mongundu 27 yOsikola yaGilead. Sho a mana okwa tuminwa koBrasilia e li omutumwa. Mo 1958, otwa panga ishewe  uukuume, e tatu tokola tu hokane. Otwa li tatu dhiladhila okuhokana omumvo gwa landula, opo ando tu ye miilonga yuutumwa.

Sho nda lombwele tate Knorr kutya onda hala okuhokana, okwa ti otashi ka kala nawa ngele onda tegelele manga oomvula 3, opo nawa ndi hokane, nokonima tatu tsikile niilonga yetu mObetel moBrooklyn. Nale, opo aanandjokana ya tsikile niilonga mObetel, gumwe okwa li e na okukala a longa mo oomvula 10 nenge dhi vulithe po, nomukwawo oomvula 3. Onkee ano, manga inaatu hokana, Lorraine okwa ka longa oomvula 2 mObetel yaBrasilia nomvula yimwe omObetel yaBrooklyn.

Oomvula mbali ndhoka otwa kala owala hatu nyolelathana oombilive. Kakwa li ooe-maila pethimbo ndyoka, ko okudhenga ongodhi okwa li ku na ondilo! Sho twa hokana mo 16 Septemba 1961, tate Knorr oye a gandja oshipopiwa shetu. Ethimbo olya li lya fa itaali endelele sho twa tegelela tu hokane. Ihe sho tatu tala koomvula 50 ndhoka twa kala mondjokana, otu wete kutya oshi li nawa sho inaatu endelela okuhokana.

Mo 1964 onda ningi omutonateli gwiitayimbelewa yomiilongo yi ili noyi ili. Pethimbo mpoka, aasamane oya li haya yi oyo ayeke. Ihe mo 1977, aasamane oya tameke okuya pamwe naakulukadhi yawo. Momumvo ogwo tuu ngoka, ngame, Lorraine nosho wo Grant naEdith Suiter, otwa talele po oshitayimbelewa shaNdowishi, shaAustria, shaGreka, shaCyprus, shaTurkey noshaIsraeli. Onda talela po iilongo 70 lwaampo.

Mo 1980 sho twa talele po Brasilia otwa yi koshilando shaBelém moka Lorraine a li ha longele sho a li omutumwa. Otwa talele po wo ooitaali ooyakwetu moshilando shaManaus. Poshipopiwa shoka sha gandjwa pokapale, opwa li pu na ongundu yaantu yi ikuutumbila nokaya li taya landula omuthigululwakalo gwAabrasilia gwokuthipathana koompanda nogwokuminikathana. Omolwashike mbela?

Ongundu ndjoka oya li yOonzapo dha za kehala lyaanuulepera li li mokuti kwaAmazon. Opo kaaya pe yalwe uuvu wawo oyi iyoolola ko. Nonando ongawo, oya li ya nyanyukwa shili naashoka osha li she tu gumu koomwenyo! Otwa mono uushili woohapu dhaJesaja ndhoka a nyola a ti: “[Aapiya yandje] otaa ka imba omahambelelo.” —  Jes. 65:14.

Olundji, ngame naLorraine ohatu dhiladhila koomvula dhi vulithe po 60 ndhoka twa kala nokulongela Jehova. Otwa pandula shili omayambeko ngoka twa mona, naasho Jehova a kala noku tu wilika okupitila mehangano lye. Ngashingeyi ihandi vulu we okutalela po iilongo yilwe ngaashi nale, ihe esiku kehe ohandi kwathele natango Olutuwiliki mOkomitiye yAaunganeki nomOkomitiye yIilonga. Onda lenga noonkondo okukutha ombinga miilonga mbika yokuyambidhidha ooitaali ooyakwetu muuyuni awuhe. Ohashi tu kumitha natango okumona aagundjuka oyendji ye li miilonga yethimbo lyu udha noye na ombepo ngaashi yaJesaja, ngoka a ti: “Otandi yi! Tuma ndje!” (Jes. 6:8) Aagundjuka mbaka otaya ningi shoka sha popilwe komutonatelishikandjo oomvula dha piti, a ti: “Ino kakadhala, inda miilonga yethimbo lyu udha. Shaashi ku shi kutya uuwanawa wuni tayi ke ku etela.”