1, 2. (a) Jesus okwa ti oshipango oshitiyali oshinene oshini (b) Omapulo geni tatu ka kundathana?

OMUFARISAYI gumwe okwa makele Jesus a ti: ‘Muhongi, oshipango oshinene shomompango oshinipo?’ Ngaashi twi ilongo moshileshwa sha tetekele, Jesus okwa ti kutya “oshipango oshinene noshotango” osho: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” Okwa gwedha ko a ti: “Oshitiyali shi thike pusho osho shika: ‘Hola mukweni ngaashi ngoye wi ihole mwene.’” —  Mat. 22:34-39.

² Jesus okwa ti natu hole ooyakwetu ngaashi twi ihole tse yene. Onkee ano otu na okwiipula ngeyi: Ooyakwetu oolye? Otatu ke yu ulukila ngiini ohole?

3, 4. (a) Jesus okwa yamukula ngiini epulo: “Mukwetu olye”? (b) Omusamaria okwa kwathele ngiini omulumentu ngoka a yugwa nokwa mokagulwa e ta thigwa e na okamwenyo okashona? (Tala ethano petameko.)

³ Otatu vulu okutya mukwetu omushiinda nenge kuume ketu kopothingo ngoka he tu kwatha. (Omayel. 27:10) Ihe dhiladhila  kwaashono Jesus a lombwele omulumentu ngoka i ishi uuyuuki sho e mu pula a ti: “Mukwetu olye?” Opo a yamukule epulo lye, Jesus okwe mu lombwele eyele lyOmusamaria omunamutimahenda. (Lesha Lukas 10:29-37.) Omusaaseri nOmulevi oya li taya vulu okukwathela omulumentu ngoka a yugwa nokwa mokagulwa e ta thigwa e na okamwenyo okashona. Ihe oye mu pitilile owala. Omulumentu okwa kwathelwa kOmusamaria gwomoshigwana shoka sha li sha simaneka Ompango yaMoses, ihe osha li shi tondike kAajuda. —  Joh. 4:9.

⁴ Omusamaria omunamutimahenda okwa panga iilalo ye noku yi tila omagadhi nomaviinu. Okwa pe mwene gwongulu yaayenda iimaliwa iisiliveli iyali nenge oondenari mbali, a hunge omuvu, mbyoka ya li yi thike pondjambi yomasiku gaali. (Mat. 20:2, enyolo lyopevi.) Osha yela kutya ogunipo u ulike kutya oku hole shili aantu ooyakwawo. Otatu ilongo meyele lyaJesus kutya otu na okuulukila ooyakwetu olukeno nohole.

5. Aapiya yaJehova oyu ulukilile ooyakwawo ohole ngiini sho pwa holokele oshiponga shopaunshitwe?

⁵ Aantu oyendji kaye na olukeno ya fa Omusamaria omunamutimahenda. Shika ohashi imonikila unene tuu ‘momasiku ngaka gahugunina’ moka aantu oyendji kaaye na olukeno nohenda, aadhudhu noye tonde uuwanawa. (2 Tim. 3:1-3, NW) Pashiholelwa, otashi vulika pu holoke oshiponga shopaunshitwe shoka hashi dhigupaleke onkalo. Tala kwaashoka sha ningilwe po sho oshikungulu oshinene sha dhenge oshilando shaNew York muKotoba 2012. Moshitopolwa shoka sha dhengwa unene moshilando, aafuthi oya tameke okututa po iinima momagumbo gaantu mboka ye li nale monkalo ondhigu molwaashoka kaya li ye na olusheno, niipumbiwa yilwe. Oonzapo dhaJehova moshitopolwa shoka oya ningi elongekidho opo ya kwathelathane noya kwathele wo yalwe. Aakriste ohaya longele ooyakwawo uuwanawa mboka, oshoka oye ya hole. Omomikalo dhilwe dhini tatu vulu okuulukila ooyakwetu ohole?

6. Okulonga yakwetu oshili okwa pambathana ngiini noku ya ulukila ohole?

⁶ Kwathela aantu pambepo. Ohatu shi ningi moku ya kwathela ya ‘mone omukumo okuza mOohapu dhaKalunga.’ (Rom. 15:4) Kapu na omalimbililo kutya uuna tatu longo yakwetu oshili yOmbiimbeli otatu ya ulukile ohole. (Mat. 24:14) Katu na tuu uuthembahenda wa shiga ko wokuuvitha etumwalaka lyUukwaniilwa ndyoka lya za ‘kuKalunga, ngoka oluthithiya lwetegameno’! —  Rom. 15:13.

7. Oshipango sha tseyika nawa oshini, notwa yambekwa ngiini sho hatu shi tula miilonga?

⁷ Tula oshipango sha tseyika nawa miilonga. Jesus okwa popi oshipango shika meuvitho lye lyokondundu a ti: “Onkee ano shaa shoka mwa hala aantu ye mú ningile, osho ya ningileni wo. Ndjika oyo ompango nomahunganeko.” (Mat. 7:12) Ngele otwa kala naantu ngaashi Jesus a popi, nena otu li metsokumwe ‘nOmpango’ (okuza kuGenesis sigo Deuteronomium) nosho wo “nomahunganeko” (omambo gomahunganeko gOmanyolo gOshihebeli). Omambo ngoka otaga holola sha yela kutya Kalunga oha yambeke mboka ye hole yakwawo. Pashiholelwa, Jehova okwa popi okupitila muJesaja a ti: ‘Dhiginineni oshili ne mu longe shoka shu uka. Otandi ka yambeka mboka haye shi ningi.’ (Jes. 56:1, 2, yelekanitha NW.) Otwa yambekwa shili, oshoka ohatu ulukile ooyakwetu ohole nohatu ungaunga nayo pauyuuki.        

8. Omolwashike tu na okuulukila aatondi yetu ohole, noshike tashi vulika shi ningwe po ngele otwe shi ningi?

⁸ Hola aatondi yoye. “One mu uvu kwa tiwa: ‘Hola mukweni, tonda omutondi gwoye.’ Ihe ngame otandi mú lombwele: Holeni aatondi  yeni, galikaneneni aahepeki yeni, opo mu ninge aana yaHo yeni yomegulu.” (Mat. 5:43-45) Omuyapostoli okwa popi wo sha faathana a ti: “Omutondi gwoye ngele okwa sa ondjala, mu pa a lye. Ngele okwa sa enota, mu pa a nwe.” (Rom. 12:20; Omayel. 25:21) Ompango yaMoses oya ti kutya omuntu oku na okukwathela omutondi gwe ngele oshimuna she osha gundikwa komutenge. (Eks. 23:5) Kungeyi otashi vulika mboka ya li nale ye tondathane ya pange uukuume. Molwaashoka ohatu ulukile aantu ohole, oyendji mboka ya li nale ye tu tonde oya lundulula omikalo dhawo. Itatu ka kala tuu twa nyanyukwa ngele yamwe yomaatondi yetu, mwa kwatelwa naamboka haye tu hepeke nonyanya, oya ningi Aakriste yashili molwaashoka hatu yu ulukile ohole!           

9. Jesus okwa ti ngiini kombinga yokupaathana ombili naamwameme?

⁹ “Kambadhaleni okukala nombili naantu ayehe.” (Heb. 12:14) Shika osha kwatela mo aamwameme meitaalo, oshoka Jesus okwa ti: “Ngele to fala omagano goye koshiyambelo, ihe ohaluka wa dhimbulukwa hoka kutya ou na omuntu e ku ninga nayi, nena omagano goye ga thiga ko, u ye manga, mu paathane ombili namukweni, opo u galuke ihe, u gandje omagano goye kuKalunga.” (Mat. 5:23, 24) Kalunga ote ke tu yambeka ngele ohatu ulukile aamwameme ohole nohatu katuka nziya tu pange ombili nayo.

10. Omolwashike kaatu na okukala tu na oombedhi?

¹⁰ Ino kala wu na oombedhi. “Inamu pangula yakweni, opo Kalunga kee mú pangule. Oshoka omukalo ngoka tamu gu pangulitha yakweni, ogwo Kalunga te ke mú pangulitha, noshiyelekitho shoka tamu shi yelekitha yakweni, osho Kalunga te ke mú yelekitha. Ongiini ano wa tala okahwandu okashona ke li meho lyamukweni, ihe endangalati li li meho lyoye ku li wete? Nenge oto vulu ngiini okulombwela mukweni: ‘Andiya, ndi kuthe mo okahwandu ke li meho lyoye,’ ihe ngoye ou na endangalati meho lyoye mwene? Mufudhime ngoye, kutha mo tango endangalati meho lyoye mwene, opo ihe u tale, ngele oto vulu okukutha mo okahwandu ke li meho lyamukweni.” (Mat. 7:1-5) Kagu shi tuu omukalo omwaanawa goku tu kwathela kaatu gandje uusama muupuko uushona mboka yakwetu ye na, omanga tashi vulika tu na omapuko omanenenene!         

11, 12. Omomukalo guni gwi ikalekelwa hatu ulukile yakwetu ohole?

¹¹ Otwa hala okuulukila yakwetu ohole momukalo gwi ikalekelwa. Ohatu uvithile aantu onkundana ombwanawa yUukwaniilwa ngaashi Jesus a li he shi ningi. (Luk. 8:1) Jesus okwa li a lombwele aalanduli ye ya ‘ninge aantu ayehe aalongwa.’ (Mat. 28:19, 20) Sho tatu shi ningi, ohatu kambadhala okukwathela yakwetu ya ze mo mondjila ndjoka ya mbwalangandja tayi fala mekano, ye ye mondjila ndjoka ya thinana notayi fala komwenyo. (Mat. 7:13, 14) Osha yela kutya Jehova oha yambeke oonkambadhala ndhoka.

¹² Ohatu kwathele aantu ya tseye kutya oya pumbwa iinima yopambepo ngaashi Jesus a li he shi ningi. (Mat. 5:3) Mboka haya dhimbulula kutya oye na ompumbwe ndjoka ohatu ya kwathele ye yi gwanithe po moku ya ‘uvithila elaka etoye lyaKalunga.’ (Rom. 1:1) Mboka haye li taamba ko ohaya hanganithwa naKalunga okupitila muJesus Kristus. (2 Kor. 5:18, 19) Onkee ano, sho tatu uvitha onkundana ombwanawa otatu ulukile yakwetu ohole momukalo gwa simanenena.

13. Ohashi ku uvitha ngiini okuuvithila yalwe etumwalaka lyUukwaniilwa?

¹³ Sho tatu ningi omaishunoko neitulomo naasho tatu konakona naantu momagumbo gawo, ohatu ya kwathele ya tse kumwe nomithikampango dhaKalunga omiyapuki. Shika otashi vulika shi ningithe omukonakonimbiimbeli a lundulule onkalamwenyo ye thiluthilu. (1 Kor. 6:9-11) Ohashi nyanyudha shili omutima okumona nkene Kalunga ta kwathele mboka “ya hala oku ka mona omwenyo gwaaluhe” (NW) ya ninge omalunduluko noya kale ye na ekwatathano lyopothingo naye. (Iil. 13:48) Kungeyi mboka yi ihupula ohaya mono ishewe enyanyu, naamboka ye na iimpwiyu ya pitilila ohaya kala ishewe ye na einekelo muTate yetu gwomegulu. Oshiwanawa ngiini okumona mboka opo tayi ilongo oshili taya humu komeho pambepo! Otashi vulika to ka zimina kutya, oshi li eyambeko okuulukila yakwetu ohole momukalo nguka gwi ikalekelwa gwokuuvitha etumwalaka lyUukwaniilwa.

14. Popya niitya yoye mwene iinima yimwe yi nako nasha nohole mbyoka ya popiwa 1 Aakorinto 13:4-8.

¹⁴ Ngele otwa tula miilonga shoka Paulus a popi kombinga yohole uuna tu li nayakwetu, otatu ka yanda omaupyakadhi ogendji, otatu ka mona enyanyu notatu ka lalekwa nuuyamba kuKalunga. (Lesha 1 Aakorinto 13:4-8.) Natu tale pauhupi shoka Paulus a popi kombinga yohole, tu tale nkene tatu vulu oku shi tula miilonga mekwatathano lyetu nayakwetu.

15. (a) Omolwashike tu na okwiidhidhimikila yakwetu noku yu ulukila olukeno? (b) Omolwashike kaatu na okusila yalwe efupa nenge tu inome?

¹⁵ “Ohole ohayi idhidhimikile ayihe noyi na olukeno.” Ngaashi owala Kalunga hu ulukile aantu inaaya gwanenena olukeno nohe yi idhidhimikile, natse wo otu na okwiidhidhimikila yalwe noku yu ulukila olukeno, ngele oya ningi epuko nenge taye tu ningi nayi. “Ohole ihayi si efupa,” onkee ano ngele otu na ohole yashili, itatu ka haluka iinima yayakwetu nenge iinakugwanithwa yawo megongalo. Niishewe, ngele otu na ohole, itatu ki inoma nenge tu tuwalale kuuntsa. Molwaashoka “omeho ga pota nomwenyo gu hole uuntsa —  onyeka yaakaanakalunga —  oyo uulunde.” —  Omayel. 21:4.

16, 17. Otatu ka tula ngiini 1 Aakorinto 13:5, 6 miilonga?

¹⁶ Omuntu ngoka e na ohole, ihi ihumbatele nayi ooyakwawo. Iha lombwele yakwawo iifundja, iha yaka po iinima yawo nenge a ninge oshinima shoka tashi tsu ompinge nomakotampango gaJehova nonoompango dhe. Ohole otayi ke tu kwathela wo tu lalakanene uuwanawa wooyakwetu, haamboka ashike wetu yene. —  Fil. 2:4.

 ¹⁷ Ohole yashili ihayi uvithwa nayi nuupu. “Ihayi dhimbulukwa uuwinayi ye u ningilwa,” ano ihatu nyola omusholondondo gwomapuko ngoka yakwetu yetu ningila. (1 Tes. 5:15) Kalunga ite ke tu hokwa, ngele otu nine yalwe onkone. Shika otashi ka kala owala sha fa omuntu ta tile omahooli momulilo ngoka tashi vulika gu ndwafuke e tagu mu fike ye mwene nosho wo yakwawo. (Lev. 19:18) Ngele otu na ohole, itatu ka “nyanyukilwa uugoyoki,” ihe oshili. Tashi ti, itatu ka nyanyukwa uuna mboka ye tu tonde taya hepekwa nenge taya mono iihuna. —  Lesha Omayeletumbulo 24:17, 18.

18. Oshike tatu ilongo 1 Aakorinto 13:7, 8 kombinga yohole?

¹⁸ Natu taleni ishewe kwaashoka Paulus a popi kombinga yohole. Okwa ti ohole “ihayi tonyala.” Ngele omuntu okwa pula tu mu dhimine po molwaashoka e tu ninga nayi, ohole otayi ke tu inyengitha tu mu dhimine po. Ohole ‘ohayi itaale’ ashihe shoka shi li mOohapu dhaKalunga nohayi tu inyengitha tu kale twa lenga iikulya yopambepo mbyoka hatu pewa. Ohole ‘ohayi tegamene’ ashihe shoka Ombiimbeli tayi ti nohayi tu inyengitha tu yamukule kehe ngoka te tu pula okufatulula etegameno lyetu. (1 Pet. 3:15) Uuna tatu yelekwa, ohatu galikana tu na etegameno kutya otatu ka pita mo momayeleko. Ohole ‘ohayi idhidhimikile’ ashihe, mwa kwatelwa iinima iiwinayi mbyoka hatu ningilwa kuyalwe, omahepeko nenge omayeleko galwe. Oshikwawo, “ohole itayi hulu po.” Aayuuki otaya kala haye yi ulike aluhe sigo aluhe.

19, 20. Omanyolo geni ge na oku tu inyengitha tu kale hatu ulukile yalwe ohole?

¹⁹ Ngele otwa tula miilonga omayele gOmbiimbeli, otatu vulu okutsikila okuulukila yakwetu ohole. Ohole ndjoka ohatu yi ulukile aantu ayehe, haamboka owala yomuhoko gwetu. Otu na wo okudhimbulukwa kutya Jesus okwa ti: “Hola mukweni ngaashi ngoye wi ihole mwene.” (Mat. 22:39) Kalunga nosho wo Kristus oya tegelela tu kale tu hole yakwetu. Ngele otwa nyengwa kutya natu ungaunge ngiini namukwetu, onawa ngele tatu galikana opo Kalunga e tu wilike okupitila mombepo ye ondjapuki. Kungeyi Jehova ote ke tu laleka nuuyamba note ke tu kwathela tu ulike ohole. —  Rom. 8:26, 27.

²⁰ Oshipango shoka tashi ti otu na okuhola yakwetu ngaashi twi ihole tse yene ohashi ithanwa ‘ompango yOshilongo shaKalunga.’ (Jak. 2:8) Konima sho Paulus a popi kombinga yiipango yomOmpango yaMoses, okwa ti: “Iipango mbika ayihe niikwawo ya gwedhwa ko, oya kwatelelwa moshipango shika: ‘Hola mukweni, ngaashi ngoye wi ihole mwene.’ Oshoka ngoka e hole mukwawo, ita vulu oku mu ningila uuwinayi. Onkee ano ohole oyo egwanitho lyompango ayihe.” (Rom. 13:8-10) Nomolwaashono tu na okuulukila aluhe yalwe ohole.         

21, 22. Omolwashike tu na okuhola Kalunga nosho wo yakwetu?

²¹ Sho tatu tedhatedha kutya otu nine shike okuhola yakwetu, onawa tu dhiladhile koohapu dhaJesus ndhoka tadhi ti He “etango lye ohe li pitithile aawinayi naawanawa, nomvula ye ohe yi lokithile aayuuki naalunde.” (Mat. 5:43-45) Otu na okuulukila yakwetu ohole, kutya nduno ohaya longo uuwanawa nenge uuwinayi. Ngaashi sha popiwa metetekelo, omukalo dhingi gwoku ya ulukila ohole, oku ya uvithila etumwalaka lyUukwaniilwa. Aantu mboka itaya ka mona tuu omalaleko nuuyamba ogendji, ngele oya taamba ko onkundana ombwanawa!

²² Otu na omatompelo ogendji okukala tu hole Jehova nomutima aguhe. Opu na wo omikalo odhindji dhokuulukila yakwetu ohole. Ngele otu hole Kalunga nosho wo ooyakwetu, otatu ulike kutya otwa lenga omayele gaJesus. Sha simanenena, otatu nyanyudha Tate yetu gwomegulu, Jehova.