OMIMVO mbali manga oshinima shoka inaashi ningwa, ngame nomumwameme Evelyn Trabert ngoka twa li hatu longo pamwe naye, otwa adhika owala opo twa mana Osikola yOmbiimbeli yoWatchtower yaGilead. Ethimbo ndyoka oya li popepi naIthaca, ondoolopa yi li moshilando shaNew York. Otse twa li ongundu ontine, notwa li twa tumwa tu ku uvithile koSanta Ana. Onda kala konyala miilonga yuutumwa uule womimvo 29. Ihe manga inaandi tsikila nehokololo lyandje, tango nandi mu lombwele kutya omolwashike nda hogolola iilonga mbika.

Onda valwa mo 1923. Aavali yandje, otate John Olson nameeEva. Oya li haya zi moSpokane, Washington, moAmerika. Oya li Aakwaluteri, ihe oya li ompinge nelongo lyomulilo gwoheli, oshoka itali tsu kumwe nelongo kutya Kalunga ohole. (1 Joh. 4:8) Tate okwa li ha longo mombeka. Ongulohi yimwe omuniilonga pamwe naye okwa li e mu lombwele a ti, Ombiimbeli itayi longo nando aantu kutya otaya ka pya moheli. Inapu pita ethimbo ele, aavali yandje oya tameke okukonakona Ombiimbeli nOonzapo dhaJehova. Oyi ilongo oshili kombinga yeyumuko ndyoka tali popiwa mOmbiimbeli.

Pethimbo ndyoka onda li owala ndi na oomvula omugoyi. Ihe otandi dhimbulukwa sho aavali yandje ya li taya popi ya nyanyukwa sho ya mono oshili yOmbiimbeli. Enyanyu lyawo olya li lyi vule lyambishi megumbo mwa tselwa sho yi ilongo kutya edhina lyaKalunga, oJehova, naasho ya manguluka ko kelongo lyUukwatatu. Oshili yOmbiimbeli oya tameke okuningina mungame, ya fa  omeya taga ningine mefulafula. ‘Oshili ndjoka ohayi mangulula omuntu.’ (Joh. 8:32) Onda li ndi hole aluhe okukonakona Oohapu dhaKalunga. Ohadhi kutha ndje uuza. Ngame mwene ondi na oohoni. Ihe onda li handi yi pamwe naavali yandje miilonga yokuuvitha. Oya ninginithwa mo 1934. Sho nda ninginithwa mo 1939, mepipi lyomimvo 16, onda ningi omupiya gwaJehova ngaashi yo.    

Aavali yandje oya li ya landitha po egumbo lyawo pokwenye mo 1940. Okuza mpono atuhe yatatu otwa yi miilonga yethimbo lyu udha yuukokolindjila. Otwa ka longa mokandoolopa kedhina Coeur d’Alene, ke li moshilando shaIdaho moAmerika. Otwa li hatu kala megumbo ndyoka hatu futu komwedhi, lya li pombanda yongalashe yokupangela iihauto. Megumbo moka omo wo mwa li hamu gongalelwa. Pethimbo ndyoka omagongalo ogendji kaga li ge na Iinyanga yUukwaniilwa. Oga li owala haga gongalele momagumbo gopaumwene nenge moondunda ndhoka hadhi futilwa.

Ngame naavali yandje otwa li twa yi koshigongi shomasiku gaali koSt. Louis, Missouri, moAmerika mo 1941. Osoondoha oya li “Esiku lyaanona.” Aanona yoomvula ntano sigo 18 oya li ya kuutumba komeho popepi nomutuni. Omumwatate Joseph F. Rutherford okwa gandja oshipopiwa shahugunina shoka sha nuninwa aanona. Okwa ti: “Aanona . . . amuhe . . . mboka hamu vulika kuKalunga nosho wo kOmukwaniilwa gwe ngoka a langeka po, thikameni.” Atuhe otwa thikama. Opo nduno omumwatate Rutherford okwa landulitha ko oohapu tadhi ti: “Taleni oonzapo dhUukwaniilwa oompe dhi vulithe po 15 000.” Oohapu dhe ndhoka odha koleke etokolo lyandje lyokuninga omukokolindjila onkalamwenyo yandje ayihe.

Otwa li twa tembukile kuumbugantu waCalifornia, moAmerika, konima yoomwedhi oonshona okuza poshigongi shokoSt. Louis. Otwa pewa oshinakugwanithwa shokutota egongalo moshilando shaOxnard, notwa li hatu zi mokakalafana mu na owala ombete yimwe. Kanda li ndi na ondunda yandje mwene ngaashi nale! “Ombete” yandje oya li oshitaafula shokulila shoka hashi yalwa ongulohi kehe konima ngele twa li.

Omanga inaatu thika moCalifornia, momasiku 7 Desemba 1941, Japani okwa ponokele etululilosikepa hali ithanwa Pearl moshilongo shaHawaii. Esiku lya landula ko, Iita Iitiyali yUuyuni oya tameke moAmerika. Epangelo olya tete ko olusheno, notwa li tu na okudhima oolamba adhihe uusiku. Etanga lyomomeya lyaJapani olya kala nokuninga okashawa komunkulofuta gwaCalifornia. Ihe omolwomilema thokothoko ndhoka dha li ko, inali vula okudhenga aatondi yalyo mboka ye li komutunda.

Konima yoomwedhi dhontumba, muSeptemba 1942, otwa kala poshigongi shedhina Oshigongi shUuyuni Uupe wopaKalunga, moCleveland, Ohio, moAmerika. Poshigongi mpoka omumwatate Nathan H. Knorr okwa gandja oshipopiwa shi na oshipalanyolo: “Mbela ombili otayi vulu ngaa okukalelela?” Okwa kundathana natse Ehololo ontopolwa 17, ndjoka tayi popi “oshilikama” shoka ‘sha li shi na nale omwenyo, ihe ngashingeyi kashi ko we. Ihe oshi li pokwaanduka mo molumbogo lwomuule.’ (Eh. 17:8, 11) Omumwatate Knorr okwa yelitha kutya “oshilikama” osha li Oshipandi shIigwana shoka sha hulithwa po mo 1939. Ombiimbeli oya hunganeka kutya Oshipandi shIigwana otashi ka pingenwa po. Uuna sha ningwa otapu ke ya ethimbo lyombili. Osha pingenwa po mo 1945, moka Iita Iitiyali yUuyuni ya hulu. “Oshilikama” osha ka anduka ishewe shi li Iigwana ya Hangana. Okuza mpono Oonzapo dhaJehova odha tamununa mo iilonga yadho yokuuvitha muuyuni awuhe. Omwaalu gwadho ogwi indjipala inaashi monika nando onale.    

Ehunganeko ndyoka olya kwathele ndje ndi mone shoka shi li komeho. Sho etseyitho kutya osikola yaGilead otayi tameke muFebuluali mo 1943 lya ningwa, ehalo lyandje lyokuninga omutumwa olya koko. Onda tumwa ndi ka longe moPortland, shi li muOregon. Uuna tatu  uvitha otwa li hatu patulula ongalamathona, opo omunegumbo a pulakene. Konima yaashono, ohatu mu pe iileshomwa yopaMbiimbeli tayi popi kombinga yUukwaniilwa waKalunga. Omumvo 1943 onda kala owala tandi ipula niilonga yuutumwa.

Mo 1944, onda li nda nyanyukwa sho nda hiywa ndi ye kosikola yaGilead pamwe nakahewa kandje Evelyn Trabert. Uule woomwedhi ntano, aalongi yetu oye tu ulukile nkene tatu vulu okumona enyanyu mokukonakona Ombiimbeli. Otwa li twa kuminwa eifupipiko lyawo. Omathimbo gamwe, uuna tatu li, oyo nokuli ya li haye tu topolele iikulya. Otwa mana osikola mo 22 Januali 1945.    

Ngame, Evelyn nomumwatate Leo nomukadhi, Esther Mahan, otwa tumwa tu ka longe koEl Salvador. Otwa thiki ko muJuni 1946. Sho twe ya mo otwa adha ‘omapya ga thika nokuteywa.’ (Joh. 4:35) Ihe ngaashi twa lesha petameko lyoshitopolwa shika, aasita yoongeleka oya li ya lya moonyandi. Konima owala yoshiwike shimwe otwa adhika opo twa zi koshigongi shoshikandjo. Oshigongi shoka osho sha li shotango tashi ningilwa moSanta Ana. Otwa hiya aantu kehe pamwe ye ye ya pulakene koshipopiwa shomontaneho. Otwa kumwa lela sho konyala aantu 500 ya li ye ya. Shoka oshe tu kumike tu kale moEl Salvador, opo tu kwathele aanamitima omiwanawa. Katwa li we twa tila aasita yoongeleka. Nonando oya li ya tsu aantu omaminimini kaaya leshe Ombiimbeli, oyendji oya li ya sa enota lyoshili. Ihe aantu aashona yowala ya li ye na Oombiimbeli. Oye tu pandula sho tatu ilongo Oshispania, opo tu vule oku ya longa kombinga yaKalunga kashili, Jehova, nokombinga yomauvaneko ge goku ka ninga evi Oparadisa.

Omukonakonimbiimbeli gwandje gwotango okwa li meme Rosa Ascencio. Konima sho a tameke okukonakona, okwa topoka nomulumentu ngoka a li e mu oteka. Ihe omulumentu ngoka naye okwa tameke okukonakona Ombiimbeli. Oya hokana, noya ninginithwa notaya longele Jehova nuulaadhi. Omumwameme Rosa oye omukokolindjila gwotango moSanta Ana, ngoka omvalele yomoshilongo. *

Rosa okwa li e na okasitola okashona kokulanditha uushike pe ndje wo we. Okwa li he ka pata uuna ta yi muukalele, nokwa li i inekela thiluthilu kutya Jehova ote ke mu gwanithila po oompumbwe dhe. Okwa li e shi mono nkene oohapu dhaMateus 6:33 tadhi mu gwanithilwa. Shampa ngaa a patulula okasitola ke, konima ngele a zi muukalele, oto mono shi ku umininwa kaantu ye ya okulanda. Omumwameme Rosa okwa kala omudhiginini sigo okusa kwe.

Atuhe yahamano otwa li hatu kala megumbo lyomulumentu gumwe, ndyoka hatu futu tu kale mo. Esiku limwe omupristeli gwomoshitopolwa okwe ya okutalela po mwene gwegumbo. Okwe mu ulike omunwe kutya ngele ite tu tidha, ye nomukadhi otaya ka kondwa mo mongeleka. Mwene gwegumbo okwa li omunangeshefa a simana, nokwa adhika a kenyanana nale aasita yoongeleka omolwomaihumbato gawo ngoka taga lengitha. Onkee ano, ine mu pulakena nokuli. Okwa lombwele omupristeli kutya ke na mpa u uvite ngele okwa kondwa mo mongeleka. Mwene gwegumbo okwe tu lombwele kutya, egumbo olye tu egulukila ethimbo kehe twa hala.

Omumwameme gumwe omutumwa moSan Salvador,  okwa li ha konakona Ombiimbeli nomukulukadhi gwomulumentu omwiindjiniya, tate Baltasar Perla. Okwa li e na omutima omwaanawa, ihe omolwiihelele yaawiliki yoongeleka okwa kanitha eitaalo muKalunga. Moshilongo moka omwa li mu na okutungwa oshitayimbelewa. Tate Baltasar ka li natango e ya moshili, ihe okwi iyamba a thaneke opulana nokutunga oshitayimbelewa. Ina pula nando oyo osenda yohoni.

Konima sho tate Baltasar a kala ta longo pamwe naapiya yaJehova miilonga yokutunga, okwa li a tompwa kutya okwa mona eitaalo lyashili. Okwa ninginithwa mo 22 Juli 1955, nomukulukadhi Paulina, okwa landula ko owala konima yokathimbo okafupi. Oyana yawo ayehe otaya longele Jehova nuudhiginini. Omwanamati Baltasar, Jr., okwa longa omimvo 49 moBetel, moBrooklyn. Oha ambidhidha iilonga yokuuvitha mbyoka tayi humu komeho shimwe to nyengwa muuyuni awuhe. Ngashingeyi oku li oshilyo shOkomitiye yOshitayimbelewa moAmerika. *

Sho twa tameke niigongi yoshitopolwa moSan Salvador, omumwatate Perla okwe tu kwathele tu mone ehala enene moka aantu hayi idheulile. Oshikando shotango twa ningile mo oshigongi, iipundi iishona yowala ya li yi na aantu. Ihe konima yethimbo omwaalu ogwe ende tagu indjipala omumvo kehe sigo tatu kala hatu udha mo. Konima yethimbo, osho twa ka thinana mo. Jehova okwa yambeka oonkambadhala dhetu shili. Shampa tu li piigongi, ohandi mono aakonakonimbiimbeli yandje yonale. Oshikando shimwe onda li nda nyanyukwa nayi. Omukonakonimbiimbeli gwandje gumwe okwa li u ulukile ndje “okatekulu” kandje kopambepo ya konakona nako, hoka opo owala ka ninginithwa.

Poshigongi shimwe, omumwatate gumwe okwe ya kungame. Okwa lombwele ndje ta ti okwa hala ndi mu dhimine po. Onda li nda kumwa, molwaashoka olupe lwe itandi lu dhimbulukwa. Okwa ti: “Onda li gumwe gwomongundu yaamati ndjoka ye ku dhaadhigile nomamanya moSanta Ana.” Omutima gwandje ogwa li gwa nuka mo kenyanyu. Dhiladhila owala omulumentu ngoka a li ha umbu ndje nomamanya, ngashingeyi ota longele Jehova pamwe nangame. Oonkundathana dhetu naye odhu ulukile ndje kutya uukalele wethimbo lyu udha owu na ondjambi ndjoka kehe gumwe ta vulu okuhogolola.

Konyala uule womimvo 29, onda kala omutumwa moEl Salvador. Tango omoshilando Santa Ana, e tandi yi  koSonsonate. Okuza hono onda yi koSanta Tecla nonda hugunine moSan Salvador. Konima sho nda dhiladhila pamwe negalikano, onda tokola ndi thige po iilonga yandje yuutumwa mo 1975. Onda shuna koSpokane hoka ku na aavali yandje ya kulupa. Oya li aadhiginini kuJehova, ihe oya li ya pumbwa ekwatho lyandje.

Tate okwa si mo 1979. Konima onda kala tandi sile meme oshimpwiyu. Okwa li omunkundi noita vulu okwiikwatha. Okwa kala nomwenyo oomvula hetatu konima yaashoka, nokwa si mepipi lyuukokele woomvula 94. Osha li ethimbo edhigu kungame, nonda li nda vulwa palutu nopamadhiladhilo. Uudhigu mboka owa ka etela ndje ondhiya, nenge uuvu woshipa. Ihe egalikano noshikaha shaJehova shi na oonkondo oya kwathele ndje, opo ndi idhidhimikile uudhigu mboka. Onda ningilwa naanaa ngaashi Jehova a ti: “Sigo tamu kulupa mu ninge oomvi . . . otandi mu kwatha notandi mu hupitha.” —  Jes. 46:4.

Mo 1990, onda tembukile kokandoolopa kaOmak, ke li moshilando shaWashington, moAmerika. Onda kala handi longo moshitopolwa moka hamu popiwa Oshispania. Aakonakonimbiimbeli yandje oyendji oya ninginithwa. MuNovomba 2007 onda kala te nyengwa okukaleka po egumbo lyandje ndyoka li li moOmak. Onda tembukile megumbo eshona li li popepi nondoolopa yaChelan, moWashington. Egongalo lyOshispania mokandoolopa hoka, olya kala tali sile ndje oshimpwiyu nondi shi oku li pupula kombunda. Aamwatate naamwameme megongalo oya tala ndje ko ndi li “yinakulu,” molwaashoka ongame owala omukokele kwaayehe.     

Onda pititha tango komeho iinima mbyoka ya simana monkalamwenyo yandje. Molwaashoka ondi iyapulila Jehova ondi igandja ndi mu longele nomutima aguhe. Onda hogolola kaandi hokanwe nokuli, opo ndi mu longele nopwaahe na shoka sha “manga” ndje. (1 Kor. 7:34, 35) Nonando kandi na oluvalo, ondi aanona oyendji yopambepo. Omanga tu li monkalelo ndjika, itandi vulu okukala ndi na iinima ayihe. Muuyuni uupe otandi ka kala ndi na ethimbo lya gwana ndi nyanyukilwe iinima ayihe iiwanawa. Enyolo ndyoka ndi hole, Episalomi 145:16 ndyoka tali tu shilipaleke kutya Jehova ota ka ‘kamununa eke lye e ta kutitha iinamwenyo ayihe.’

Ondi na oomvula 91, ihe ondi na natango uukolele notandi tsikile niilonga yuukokolindjila. Iilonga mbyoka ohayi kwathele ndje ndi kale ndu uvite nda nyashuka komwenyo nondi na elalakano monkalamwenyo. Sho nda thiki moEl Salvador oshikando shotango, onda adha opo iilonga yokuuvitha ya tameke. Nonando Satana okwa li te tu pataneke omutenya nuusiku, moEl Salvador ngashingeyi omu na aauvithi ye vulithe po 39 000. Shika osha koleka eitaalo lyandje. Osha yela kutya ombepo yaJehova ondjapuki oyo tayi ambidhidha aapiya ye!