1. Iiningwanima yini ya ningwa momumvo 66? (Tala kethano lyopetameko.)

NATU tye ando owa li Omukriste muJerusalem momumvo 66. Momumvo ngoka omwa li mwa ningwa iinima oyindji. Omukwanepangelo gwaRoma gwedhina Florus okwa yaka iitalenti 17 moshiketha shotempeli. Oshinima shoka osha geyitha Aajuda, e taya dhipaga aakwiita oyendji yaRoma noya tukulile epangelo lyaRoma oshipotha, ya kale ya manguluka ko kulyo. Ihe epangelo olya katuka mbala, nomeni lyoomwedhi ndatu aakwiita 30 000 taya wilikwa kuCestius Gallus, oya dhingilile Jerusalem. Aajuda mboka aanashipotha oya holama motempeli, ihe aakwiita yaRoma oya thiki pekuma lyotempeli e taya kambadhala oku li ngumuna po. Aantu ayehe mboka ye li moshilando oya li ya tila. Mbela ngoye oto ka kala wu uvite ngiini, ando owa li wu wete iinima mbyoka tayi ningwa?

2. Aakriste oya li ye na okuninga shike, ngele ya mono oshilando sha kondekwa kaakwiita yaRoma, noye shi ningi ngiini?

² Jesus okwa li a londodha aalongwa ye kombinga yoshiningwanima shoka, oomvula odhindji manga inaashi ningwa. Okwe ya lombwele  a ti: “Uuna tamu mono, Jerusalem sha kondekwa komatanga gaakwiita, tseyeni kutya oshi li popepi nokuhanagulwa po. Nena ayehe mboka ye li muJudea, naa tembukile koondundu; naamboka ye li moshilando shoshene, naa fadhuke po; naamboka taa adhika kondje yasho, inaa galukila mo.” (Lukas 21:20, 21) Aalongwa oya li taya ka vulika ngiini kelombwelo lyaJesus kutya naya ze mo muJerusalem, sho oshilando sha li sha kondekwa kaakwiita? Opwa ningwa oshinima oshikumithi. Aakwiita yaRoma oya shuna, ngaashi Jesus a popi kutya eponokelo ndyoka ota li ka “fupipikwa.” (Mateus 24:22) Sho aakwiita ya shuna, Aakriste aadhiginini oya mono ompito yokuya ontuku koondundu. Kungeyi, oya vulika kelombwelo lyaJesus.  * Momumvo 70, konima owala yoomvula dhontumba, etangakwiita lilwe lyaRoma olya galuka ishewe li kondeke Jerusalem. Ihe oshikando shino, olya hanagula po oshilando. Ayehe mboka ya vulika kelombwelo lyaJesus oyo ayeke ya hupithwa.

3. Onkalo yini natse tatu ki iyadha muyo masiku, noshike tatu ka kundathaneni moshitopolwa shika?

³ Elondodho lyaJesus nomalombwelo ge, oge tu kwatela mo wo kunena. Masiku natse otatu ka kala monkalo ya fa ndjoka ya li muJerusalem. Jesus okwa longitha iiningwanima yomethelemumvo lyotango a fatulule shoka tashi ka ningwa po ngele “uudhigu uunene” mboka tawu ka tameka ombaadhilila wa tameke. (Mateus 24:3, 21, 29) Ngaashi naanaa pwa li Aakriste aadhiginini mboka ya hupile pehanagulo lyaJerusalem, ota pu ka kala “ongundu onene,” ndjoka tayi ka hupa pethimbo lyuudhigu uunene. (Lesha Ehololo 7:9, 13, 14, yelekanitha NW) Osha simanenena unene kutse tu uve ko shoka Ombiimbeli tayi tu lombwele kombinga yiiningwanima mbyoka tayi ka ningwa monakuyiwa. Omolwashike? Opo tu ka hupithwe. Natu kundathaneni kutya iiningwanima mbyoka otayi ke tu guma ngiini pauhandimwe.

4. Uudhigu uunene otawu ka tameka ngiini?

⁴ Uudhigu uunene otawu ka tameka ngiini? Otawu ka tameka nehanagulo lyomalongelokalunga giifundja. MOmbiimbeli omalongelokalunga giifundja otaga ithanwa “Babilon oshinene, yina yoohonda adhihe.” (Ehololo 17:5-7) Omolwashike omalongelokalunga taga ithanwa ohonda? Omolwaashoka aasita yoongeleka inaya kala aadhiginini kuKalunga. Pehala lyokwaambidhidha Jesus nUukwaniilwa we nuudhiginini, ohaya ambidhidha omapangelo gopantu, nohaya ipwililikile omalongo gOmbiimbeli, opo ya nwethe mo aantu oyendji. Elongelokalunga lyawo inali yogoka ngaashi lyaagwayekwa. (2 Aakorinto 11:2; Jakob 1:27; Ehololo 14:4) Ihe mbela olye ta ka hanagula po Babilon oshinene? Jehova ota ka ningitha ‘ooniga omulongo’ ‘dhoshilikama oshitiligane’ dhi longe “ehalo lye.” ‘Oshilikama oshitiligane’ otashi thaneke Iigwana ya Hangana, omanga “ooniga omulongo” tadhi thaneke omapangelo omanankondo agehe ngoka hage shi ambidhidha. —  Lesha Ehololo 17:3, 16-18.

5, 6. Omolwashike tatu tile kutya iilyo yomalongelokalunga giifundja itayi ka hanagulwa po ayihe, sho Babilon oshinene tashi hanagulwa po?

⁵ Mbela iilyo ayihe yomalongelokalunga giifundja otayi ka dhipagwa sho Babilon oshinene tashi hanagulwa po? Aawe. Jehova okwa nwetha mo Sakaria a nyole kombinga yaashoka tashi ka ningwa po. Okwa ti kutya pethimbo mpoka omuntu ngoka a li melongelokalunga lyiifundja ota ka tya: “‘Ngame kandi shi omuhunganeki,  ngame omunepya —  ngame onda longo omapya nonda litha iimuna mokukala kwandje akuhe.’ Nena ngele gumwe te mu pula ta ti: ‘Iilalo mbyoka yi li molupati lwoye, oyashike?’ Ota ka yamukula ta ti: ‘Onde yi monene maandjakuume kandje.’” (Sakaria 13:4-6) Ano aawiliki yomalongelokalunga otaye ki iningitha ya fa kaaye shi aakwangeleka, notaye ki ipatana kutya kapu na siku ya li momalongelokalunga ngoka giifundja.

⁶ Oshike tashi ka ningilwa aapiya yaJehova pethimbo mpoka? Jesus okwe shi yelitha a ti: ‘Omasiku ngoka ando itaga fupipikwa, ando kaku na nando omuntu ta hupithwa. Ihe Kalunga ota fupipike omasiku ngoka omolwaahogololwa ye.’ (Mateus 24:22) Methelemumvo lyotango ehanagulo lyaJerusalem olya li lya “fupipikwa.” Shika osha li sha gandja ompito ‘kaahogololwa,’ ano kAakriste aagwayekwa, ya ye ontuku. Sha faathana, oshitopolwa shotango shuudhigu uunene otashi ka “fupipikwa” “omolwaahogololwa” yaKalunga. Omapangelo omanankondo ngoka taga thanekwa ‘kooniga omulongo,’ itaga ka pitikwa ga hanagule po oshigwana shaKalunga. Pehala lyaashono, otapu ka kala ethimbo efupi lyombili, ngele eponokelo lyotango lya hulu.

7, 8. Ompito yini tatu ka kala tu na konima ngele omalongelokalunga giifundja ga hanagulwa po, naapiya yaJehova otaya ka kala ya yooloka ko ngiini kaantu ooyakwawo pethimbo ndyoka?

⁷ Oshike tashi ka ningwa po, konima yehanagulo lyomalongelokalunga giifundja? Otali ka kala ethimbo lyokuulika shoka shi li lela momitima dhetu. Pethimbo mpoka aantu oyendji otaya ka kambadhala okukonga egameno nekwatho komahangano gopantu, ngoka taga thanekwa ‘komamanya gokoondundu.’ (Ehololo 6:15-17) Ihe aapiya yaJehova otaya ka konga egameno kuye. Sho ehanagulo lya li lya “fupipikwa” methelemumvo lyotango, kalya li ethimbo lyAajuda ayehe yi itedhulule ya ninge Aakriste. Ihe olya li ethimbo lyaamboka ye li nale Aakriste ya ze mo muJerusalem ngaashi Jesus e ya lombwelele. Sha faathana, sho lyaBabiloni oshinene tashi ka hanagulwa po, ehanagulo ndyoka otali ka “fupipikwa,” ihe inatu tegelela aantu oyendji ye ki itedhulule ya ninge Aakriste yashili. Pehala lyaashono, otashi ka pa aalongelikalunga yashili ompito yokwaambidhidha aagwayekwa, noyokuulukila Jehova kutya oye mu hole. —  Mateus 25:34-40.

⁸ Katu shi lela shoka tashi ka ningwa po pethimbo ndyoka lyokumakelwa. Ihe otu shi kutya onkalamwenyo otayi ka kala ondhigu notatu ka pumbwa tu ninge omaiyambo ogendji. Methelemumvo lyotango, Aakriste oya li ya thigi po omagumbo gawo nokwiidhidhimikila oonkalo oondhigu, opo ya hupe. (Markus 13:15-18) Natu ipule tatu ti: ‘Mbela ondi ilongekidha ngaa okuthiga po omaliko gandje? Mbela ondi na ngaa ehalo lyokuninga kehe shimwe sha pumbiwa, opo ndi kale omudhiginini kuJehova?’ Dhimbulukwa kutya pethimbo ndyoka otse owala tatu ka kala tatu longele Kalunga ketu, nonando oonkalo  odhi nayipale shi thike peni, ngaashi omuhunganeki Daniel e shi ningile. —  Daniel 6:10, 11.

9, 10. (a) Aapiya yaJehova otaya ka uvitha etumwalaka lyashike pethimbo lyuudhigu uunene? (b) Aatondi yoshigwana shaKalunga otaye ki inyenga ngiini?

⁹ Ethimbo lyuudhigu uunene itali ka kala ethimbo lyokuuvitha ‘onkundana ombwanawa yUukwaniilwa.’ Ihe otali ka kala ethimbo ‘lyehulilo.’ (Mateus 24:14) Ethimbo lyokuuvitha etumwalaka ndyoka otali ka kala lya pwa po. Oshigwana shaKalunga otashi ka uvitha nuulaadhi etumwalaka lyepangulo ndyoka tali ka guma aantu ayehe. Otashi vulika etumwalaka ndyoka tali ka popya kutya uuyuni waSatana mboka wa kolokosha, owu li pokuhanagulwa po thiluthilu. Ombiimbeli otayi yelekanitha etumwalaka ndika noompawe, sho tayi ti: “Omamanya omanene goompawe, kehe limwe li na uudhigu u thike pookilograma omilongo ne, oga koloka kegulu noga gwile kombanda yaantu. Nena aantu oya tuku Kalunga omolwoshiponga shika shoompawe, oshoka osha li oshinene noonkondo.” —  Ehololo 16:21.

¹⁰ Aatondi yetu otaya ka uva etumwalaka ndika edhigu. Jehova okwa nwetha mo omuhunganeki Hesekiel a yelithe nkene oshipandi shiigwana yi imanga kumwe tashi ki inyenga. Oshipandi shoka otashi ithanwa mOmbiimbeli, Gog yaMagog. Hesekiel okwe shi popi a ti: “Omuwa Omupangeliawike ota lombwele Gog ta ti: ‘Esiku uuna tali ya, oto ka pangela ompangela ombwinayi. Oto ka tokola, u homone oshilongo sha weya nokuponokela aantu aanambili ya kala miilando yaa na eshigo lyedhingililokuma [mo kamu] na omiyelo nomakumba. Oto ka hakana nokuyuga aantu mboka ya kala miilando mbyoka ya li ya kumuka po nale. Oya gongelwa ya kongololwa miigwana, nongashingeyi oye na iimuna nuuyamba noye li poompagiila dhuuyuni.’” (Hesekiel 38:10-12) Aapiya yaJehova otaya ka kala ya yooloka ko kaantu ooyakwawo, ya fa owala ye li “poompagiila dhuuyuni.” Iigwana otayi ka kala tayi nyu, ya hala okuponokela aagwayekwa yaJehova ya mana mo, naamboka haye ya ambidhidha.

11. (a) Oshike tu na okudhimbulukwa ngele tashi ya pelandulathano lyiiningwanima mbyoka tayi ka ningwa puudhigu uunene? (b) Aantu otaye ki inyenga ngiini, uuna ya mono omandhindhiliko ngoka?

¹¹ Okuza mpoka oshike tashi ka ningwa po? Ombiimbeli itayi popi kondandalunde kutya iiningwanima otayi ka ningwa ya landulathana ngiini. Ihe yimwe otashi vulika yi ka ningilwe oshita. Jesus okwa popi mehunganeko lye li na ko nasha nehulilo lyuuyuni mbuka a ti: “Otaku ka holoka omandhindhiliko ketango, komwedhi nokoonyothi. Aantu ayehe yokombanda yevi otaa ka limbililwa notaa ka tilithwa kepopomo lyefuta nokomakuthikuthi galyo. Aantu otaa ka sa omoluumbanda mokutegelela mbyoka tayi ka adha evi alihe, oshoka oonkondo dhomewangandjo otadhi ka tukuluka. Oyo otaa ka mona Omuna gwOmuntu te ya te endele moshikogo e na oonkondo odhindji neadhimo.” (Lukas 21:25-27; lesha Markus 13:24-26.) Mbela egwanitho lyehunganeko ndika otali ka kwatela mo omandhindhiliko niiningwanima iitilithi tayi ningwa lelalela kegulu? Otu na okutegelela tu ka tale shoka tashi ka ningwa. Otu shi shi kutya uuna aatondi yaKalunga taya mono omandhindhiliko  ngoka otaya ka kwatwa kuumbanda uunene.

12, 13. (a) Oshike tashi ka ningwa po, sho Jesus te ke ya “e na oonkondo odhindji neadhimo”? (b) Aapiya yaJehova otaye ki inyenga ngiini pethimbo mpoka?

¹² Oshike tashi ka ningwa po, uuna Jesus te ke ya “e na oonkondo odhindji neadhimo?” Ota ka pa mboka ya kala aadhiginini ondjambi nota ka hanagula po mboka kaaye shi aadhiginini. (Mateus 24:46, 47, 50, 51; 25:19, 28-30) Jesus okwa longitha ethaneko a yelithe shoka tashi ka ningwa. Okwa ti: “Ano uuna Omuna gwOmuntu te ya meadhimo lyuukwaniilwa we pamwe naayengeli ye ayehe, nena ota ka kuutumba koshipangelapundi shuukwaniilwa we. Aantu ayehe yokombanda yevi otaa ka gongelwa ihe koshipala she, note ke ya yoolola mooyakwawo, ongashika omusita ta yoolola oonzi miikombo. Oonzi ote dhi gameke kolulyo lwe, iikombo okolumoho lwe.” (Mateus 25:31-33) Oshike tashi ka ningilwa mboka ya fa oonzi nenge iikombo? Otaya ka pangulwa. Mboka ya fa iikombo, ano mboka kaaye shi aadhiginini, “otaa ka ya ihe mokugeyelwa kwaaluhe.” Ihe mboka ya fa oonzi, ano mboka aadhiginini, otaya ka mona omwenyo gwaaluhe. —  Mateus 25:46.

¹³ Mboka ya fa iikombo otaye ki inyenga ngiini uuna ya mono kutya otaya ka hanagulwa po? Ombiimbeli otayi ti: “Otaa ka lilagana.” (Mateus 24:30) Ihe aagwayekwa naamboka haye ya ambidhidha otaye ki inyenga ngiini? Otaya ka ninga ngaashi Jesus a popi, sho a ti: “Ano mbika ayihe ngele tayi tameke okuningwa, yelutheni omitse dheni, mu ukilila nokutegelela, oshoka ehupitho lyeni lya thiki popepi.” —  Lukas 21:28.

14, 15. Okugongelwa kuni taku ka ningwa konima ngele eponokelo lyaGog yaMagog lya tameke, notaku ka ningwa ngiini?

¹⁴ Konima ngele Gog yaMagog a tameke okuponokela oshigwana shaKalunga, oshike tashi ka ningwa po? Ombiimbeli otayi ti kutya Omuna gwOmuntu ‘ota ka tuma ko aayengeli ye, ya ka gongele aahogololwa ye koombinga ne dhevi, okuza koshigo yevi sigo okoshigo yegulu.’ (Markus 13:27; Mateus 24:31) Okugongelwa hoka taku popiwa, hako hoka kwa ningilwe sho Aakriste aagwayekwa ya tameke okuhogololwa. Ko itaku ulike kokutulwa iihako kwaagwayekwa mboka ye li natango kombanda yevi. (Mateus 13:37, 38) Okutulwa iihako hoka ota ku ka ningwa manga uudhigu uunene inaawu tameka. (Ehololo 7:1-4) Mbela okugongelwa hoka taku popiwa, otaku ka ningwa uunake? Opethimbo mpoka aagwayekwa mboka ye li natango kombanda yevi taya ka pewa ondjambi yawo, e taya yi megulu. (1 Aatessalonika 4:15-17; Ehololo 14:1) Oshiningwanima shika otashi ka ningwa, konima ngele eponokelo lyaGog yaMagog lya tameke. (Hesekiel 38:11) Opo nduno shoka Jesus a popi sho a ti kutya ‘aayuuki otaa ka adhima ngetango omOshilongo shaHe,’ otashi ka gwanithwa. —  Mateus 13:43. *

¹⁵ Mbela shika osha hala okutya aagwayekwa otaya ka fegulwa po? Aantu oyendji mboka ye li momalongelokalunga giifundja gopaKriste, oyi itaala kutya Aakriste otaya ka falwa megulu nomalutu gopanyama. Ohaya dhiladhila wo kutya otaya ka mona Jesus nomeho gokomutse, sho ta galuka e ye a pangele kombanda yevi. Ihe Ombiimbeli otayi popi sha yela kutya sho Jesus ta ka galuka, ita ka monika nomeho gokomutse. Oya popi ya ti: “Endhindhiliko lyOmuna gwOmuntu otali ka holoka ihe kegulu,” nosho wo kutya Jesus ote ke ya “te ende kiikogo yokegulu.” (Mateus 24:30) Ombiimbeli oya ti wo kutya “olutu nduka lwonyama nombinzi italu vulu okuya mOshilongo shaKalunga.” Ano mboka taya ka falwa megulu oye na tango ‘okushitululwa ombaadhilila, ongepathimo lyeho, uuna enkuma lyahugunina tali ka hika.’ * (Lesha 1 Aakorinto 15:50-53.) Molwaashoka oshitya fegulwa oshi na ekwatathano nomalongo giifundja gUukwakriste, itatu longitha oshitya shoka, opo tu yelithe oshiningwanima shika. Ihe osha yela kutya aagwayekwa aadhiginini mboka ye li natango kombanda yevi otaya ka gongelwa mepathimo lyeho.

16, 17. Oshike tashi ka ningwa po manga oshituthi shohango yOnzigona inaashi ningwa?

¹⁶ Ngele aagwayekwa ayehe 144 000 ya yi megulu, omalongekidho gahugunina goshituthi shohango yOnzigona, otaga ka tameka. (Ehololo 19:9) Ihe opu na ishewe oshiningwanima shimwe shituntula shi na okuningwa. Dhimbulukwa kutya Gog ota ka ponokela oshigwana shaKalunga, manga aagwayekwa yamwe ye li natango kombanda yevi. (Hesekiel 38:16) Oshigwana shaKalunga otashi ki inyenga ngiini? Otashi ka landula omalombwelo ngaka: “Itamu pumbwa okukondja. Thikameni owala mwa tegelela: Otamu ka tala, nkene Omuwa te mu pe esindano . . . inamu tenguka nenge mu haluke.” (2 Ondjalulo 20:17) Ethimbo efupi konima ngele eponokelo lyaGog lya tameke, aagwayekwa ayehe mboka ye li natango kombanda yevi, otaya ka falwa megulu. Ehololo 17:14 otali tu lombwele kombinga yankene mboka ye li megulu taye ki inyenga, ngele eponokelo  lyaGog lya tameke. Aatondi yaapiya yaKalunga ‘otaa ka kondjitha Onzigona, ihe Onzigona pamwe naalanduli ye aayithanwa, aahogololwa naainekelwa, ote ke ya sinda, oshoka oye Omuwa gwaawa nOmukwaniilwa gwaakwaniilwa.’ Kungeyi, Jesus pamwe naakwaniilwa ye aagwayekwa, 144 000 megulu, otaya ka katuka onkatu ya hupithe oshigwana shaKalunga kombanda yevi.

¹⁷ Onkatu ndjoka otayi ka e ta iita yaArmagedon, mbyoka tayi ka simanekitha edhina lyaJehova eyapuki. (Ehololo 16:16) Ayehe mboka ya pangulwa e taku monika kutya yo iikombo, nenge kaaye shi aadhiginini, otaya ka hanagulwa po. “Ongundu onene” otayi ka hupa puArmagedon, nokombanda yevi itaku ka kala we uukolokoshi. Opo ihe oshituthi shohango yOnzigona, shoka sha popiwa pehulilo lyembo lyEhololo otashi ka ningwa. Oshiningwanima shika otashi ka kala shituntula. (Ehololo 21:1-4) * Ayehe mboka taya ka hupa kombanda yevi, otaya ka kala ya hokiwa kuKalunga, otaye ku ulukilwa ohole ye onene nosho wo esilohenda lye. Otwa tegelela nondjuulukwe uuna iinima mbyoka tayi ka ningwa. Oshituthi shoka shohango itashi ka kala tuu oshiwanawa shili! —  Lesha 2 Petrus 3:13.

18. Molwaashoka iiningwanima mbyoka ya hunganekwa oyi li pokuningwa, otu na okukala twa tokola toko okuninga shike?

¹⁸ Molwaashoka iiningwanima mbika yi tuntula oyi li pokuningwa, oshike kehe gumwe gwomutse e na okuninga ngashingeyi? Jehova okwa nwetha mo omuyapostoli Petrus a nyole ta ti: “Ngele ano iinima ayihe otayi ka yonwa po pamukalo nguno, ne aantu omu na okwaadhika mwa tya ngiini? Omu na okwiiyapulila Kalunga noku mu igandjela, sho mwa tegelela esiku lyaKalunga . . . Onkee ano, ne ookuume kandje, manga mwa tegelela esiku ndyoka, kambadhaleni okukala aayogoki nomwaa na oshipo koshipala shaKalunga, nomu na ombili naye.” (2 Petrus 3:11, 12, 14) Natu kale twa tokola toko okukaleka elongelokalunga lyetu lya yogoka nokaali na ekwatathano nomalongelokalunga giifundja. Natu ambidhidhe wo Omukwaniilwa gwOmbili, Jesus Kristus.