1, 2. Omukriste kehe oku na okwiitulila po elalakano lini? Gandja oshiholelwa.

NGELE omukulukadhi okwa hala okulandela aanegumbo lye iiyimati iiwanawa pomatala, oha tala kushike? Iha tala kwaambyoka iinene nenge yi na ombiliha. Pehala lyaashono, oha kutha iiyimati mbyoka tayi monika nawa, kaayi na iilalo, inaayi ganya, yo oyooloya nawa notayi vulu okuliwa. Ano okwa hala iiyimati mbyoka ya koka nawa.

² Ngele omuntu okwi ilongo kombinga yaJehova, oha tokola a ninginithwe. Ekwatathano lye naKalunga ohali tsikile okukola. Elalakano lye olyo okukoka pambepo. Okukoka hoka taku popiwa kaku shi moomvula, ihe okukala e na ekwatathano lyopothingo naJehova. Omuyapostoli Paulus okwa li a hala Aakriste yomuEfeso ya koke pambepo. Okwe ya ladhipike ya kale ya hangana meitaalo noya tsikile okwiilonga kombinga yaJesus, opo ‘ya ninge aakuluntu ya koka, ya thika kegwano lyuukuluntu waKristus.’ —  Aaefeso 4:13.

3. Iilyo yegongalo lyomuEfeso oya faathana ngiini naapiya yaJehova yonena?

 ³ Pethimbo Paulus a nyolele egongalo lyokuEfeso ontumwafo, egongalo olya adhika lya dhikwa po nale uule woomvula dhontumba. Oyendji megongalo oya li ya pyokoka noya koka pambepo. Ihe omwa li natango yalwe mboka ya pumbwa okukoleka ekwatathano lyawo naJehova. Nonena momagongalo omu na aamwatate naamwameme oyendji mboka ya kala taya longele Jehova ethimbo ele noya koka ngashingeyi pambepo. Ihe momagongalo omu na wo mboka inaaya adha omuthika ngoka. Pashiholelwa, aantu omayuvi ohaya ninginithwa omumvo kehe, ihe opu na yamwe natango ya pumbwa okukoka. Ngoye owu li pomuthika guni? —  Aakolossa 2:6, 7.

4, 5. Opu na omayooloko geni pokati kAakriste mboka ya koka pambepo, ihe ayehe oye na uukwatya wuni? (Tala kethano lyopetameko.)

⁴ Ngele owa tala kiiyimati ya pya, oto ka ndhindhilika kutya ihayi oloyele oshita. Ihe oyi na uukwatya mboka tawu ulike kutya ayihe oya pya. Aakriste mboka ya koka pambepo nayo otaya vulu okufaathanithwa niiyimati mbyoka. Inaya faathana, oshoka oya za kiilongo nomomaputuko ga yoolokathana. Kaye thike pamwe moomvula nokaye hole iinima ya faathana. Ihe Aakriste ayehe ya koka pambepo, oye na uukwatya wa faathana, mboka hawu ulike kutya oya koka. Natu taleni kuukwatya wumwe womuwo.

⁵ Omukriste ngoka a koka pambepo oha holele Jesus noha ‘landula ondjila ndjoka a li e yi ende.’ (1 Petrus 2:21) Jesus okwa ti kutya osha simana omuntu a kale e hole Tate Jehova nomutima gwe, nomwenyo gwe nonomadhiladhilo ge agehe. Oku na wo okuhola ooyakwawo ngaashi i ihole mwene. (Mateus 22:37-39) Omukriste ngoka a koka pambepo, oha kambadhala okuvulika komayele ngoka. Onkalamwenyo ye ohayi ulike kutya ekwatathano lye naJehova nosho wo ohole ye yokuhola aantu oyo ya simanenena kuye.

6, 7. (a) Uukwatya wulwe wuni Aakriste mboka ya koka pambepo ye na? (b) Otu na okwiipula omapulo geni?

⁶ Uukwatya wumwe mboka wu niwe kAakriste mboka ya koka pambepo, owo ohole. (Aagalati 5:22, 23) Oye na wo eifupipiko, eikwatonawa neidhidhimiko. Uukwatya mbuka ohawu ya kwathele kaayu uve nayi, sho tayi idhidhimikile omaudhigu. Ohawu ya  kwathele wo kaaya teke omukumo, uuna yu uvithwa nayi. Omuntu ngoka a koka pambepo oha kongo omithikampango ndhoka tadhi mu kwathele a tseye shoka shi li mondjila naashoka sha puka, sho ta konakona Ombiimbeli paumwene. Naashika ohashi mu kwathele a ninge omatokolo gopandunge, ta longitha eiyuvo lye lya dheulwa kOmbiimbeli. Molwaashoka Omukriste a koka pambepo omwiifupipiki, okwi itaala kutya omayele nomisindalandu ndhoka Jehova he tu pe, odho dhi li mondjila dhi vule dhe. * Ohu uvitha onkundana ombwanawa nuulaadhi noha ningi kehe shoka ta vulu a kwathele egongalo li kale li na uukumwe.

⁷ Kutya nduno otwa kala tatu longele Jehova uule woomvula dhi thike peni, kehe gumwe gwomutse ni ipule ta ti: ‘Mbela opu na omalunduluko ngoka ndi na okuninga, opo ndi holele lela Jesus? Mbela opu na omikalo moka tandi vulu okuhwepopala?’

8. Jesus Kristus okwa li e shi Ombiimbeli nokwa li e yi uvite ko shi thike peni?

⁸ Jesus Kristus okwa li e shi nawa Omanyolo nokwa li e gu uvite ko. Naasho a li e  na owala oomvula 12, okwa li e ga longitha sho ta popi naalongimpango potempeli. Ombiimbeli otayi ti: “Ayehe mboka ye mu pulakene, oya kuminwa oondunge dhe nomayamukulo ge.” (Lukas 2:46, 47) Sho a ka tameka okuuvitha, okwa li ha longitha Oohapu dhaKalunga nuunkulungu a mweneke aatondi ye. —  Mateus 22:41-46.

9. (a) Omukriste ngoka a koka pambepo okwi itulila po elandulathano lini lyokukonakona Ombiimbeli? (b) Omolwashike tu na okukonakona Ombiimbeli?

⁹ Omuntu ngoka a hala okukoka pambepo, oku na okuholela Jesus, nokuuva ko Ombiimbeli nawa ngaashi tashi vulika. Oha kongo aluhe oshili yOmbiimbeli yomuule, oshoka oku shi shi kutya “iikulya ya kola oyaakuluntu.” (Aahebeli 5:14) Okwa hala okukala e na ‘ontseyo’ yashili yOmbiimbeli. (Aaefeso 4:13) Onkene ipula to ti: ‘Mbela ohandi lesha ngaa Ombiimbeli esiku kehe? Ondi itulila po ngaa esiku lyoku yi konakona paumwene? Ohandi ningi ngaa elongelokalunga lyuukwanegumbo oshiwike kehe?’ Aluhe uuna to konakona Ombiimbeli, konga omithikampango ndhoka tadhi ku kwathele wu tseye omadhiladhilo nomaiyuvo gaTate Jehova. Opo nduno, uuna to ningi omatokolo, longitha omithikampango ndhoka. Shika otashi ke ku kwathela wu hedhe popepielela naTate Jehova.

10. Omukriste a koka pambepo oku uvitile ngiini omayele nomithikampango dhaKalunga?

¹⁰ Omukriste a koka pambepo ke na owala okutseya shoka Ombiimbeli tayi ti. Oku na okukala e hole omayele nomithikampango dhaKalunga. Ohole ndjoka ohe yi ulike ngiini? Oha kala a hala aluhe okulonga ehalo lyaJehova, pehala lyokulonga ehalo lye mwene. Oha lundulula nokuli onkalamwenyo ye, okudhiladhila kwe niilonga ye. Pashiholelwa, oha holele Jesus noha zala omuntu omupe “ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.” (Lesha Aaefeso 4:22-24.) Osha simana tu dhimbulukweni kutya Kalunga okwa longitha ombepo ondjapuki a wilike aanyoli yOmbiimbeli. Onkee ano, uuna Omukriste ta konakona Ombiimbeli, ombepo ondjapuki ohayi mu kwathele a gwedhe ko kontseyo ye, a kokeke ohole ye nosho wo ekwatathano lye naTate Jehova.

11. Jesus okwa piti moonkalo dhini, sho a li kombanda yevi?

¹¹ Jesus okwa li omuntu a gwanenena. Ihe sho a li kombanda yevi, okwa li ha kala pamwe naantu inaaya gwanenena. Aakuluntu ye nosho wo aamwayina ayehe kaya li ya gwanenena. Nokuli naayapostoli ye oya li ye na omaukwatya ngaashi uuntsa nokwiihola mwene. Pashiholelwa, ongulohi yeso lye, aalongwa ye oya li taya patathana kutya “olye ngoka e na okutalwa omukuluntu e vule ooyakwawo ayehe.” (Lukas 22:24) Nonando oya li ye na omadhiladhilo ga penga, Jesus okwa li e shi kutya masiku aalongwa ye otaya ka koka pambepo, e taya dhiki po egongalo li na uukumwe. Ongulohi ndjoka, Jesus okwe ya galikanene, ya kale ye na uukumwe. Okwa galikana He yomegulu e ya pe uukumwe, ta ti: “Tate, naa kale mutse, ongaashi ngoye u li mungame nangame ndi li mungoye.” Okwa gwedha ko wo, a ti: “Opo ya ninge gumwe, ngashika ngoye nangame tu li gumwe.” —  Johannes 17:21, 22.

12, 13. (a) Tseni Aakriste, otu na okulalakanena shike? (b) Ongiini omumwatate gumwe i ilongo okuhumitha komeho uukumwe?

 ¹² Omukriste a koka pambepo oha humitha komeho uukumwe megongalo. (Lesha Aaefeso 4:1-6, 15, 16.) Aakriste, elalakano lyetweni, olyo okukwathela ‘iilyo ayihe yolutu yi ili noyi ili yi kwatathane kumwe nolutu aluhe,’ ano yi longele kumwe muukumwe. Opo pu kale uukumwe, Omukriste oku na okukala omwiifupipiki. Onkee ano, Omukriste a koka pambepo oku na okulonga nuudhiginini a kaleke po uukumwe megongalo, nonando ota uvithwa nayi kokwaagwanenena kwooitaali ooyakwawo. Onkene, ipula omapulo ngaka: ‘Ohandi inyenge ngiini, ngele omwiitaali omukwetu okwa ningi epuko? Ohandi kala ndi uvite ngiini ngele omuntu okwa ningi ndje nayi? Mbela ohatu kala ihaa tu popi we? Nenge ohandi kambadhala okukaleka po ekwatathano?’ Omukriste ngoka a koka pambepo oha kala a hala okukandula po uupyakadhi, pehala lyoku wu eta.

¹³ Natu kundathaneni oshiholelwa shaUwe. Uwe okwa li he etha okwaagwanenena kwooitaali ooyakwawo ku mu geyithe. Okwa tokola a konakone kombinga yonkalamwenyo yaDavid mOmbiimbeli, ta longitha embo Insight on the Scriptures. Omolwashike a tokola a konakone onkalamwenyo yaDavid? Omolwaashoka David naye okwa li a ningwa nayi kaapiya yamwe yaJehova. Pashiholelwa, omukwaniilwa Saul okwa li a hala oku mu dhipaga. Yamwe oya li ya hala oku mu dhipaga nomamanya. Nokuli nomukulukadhi gwe mwene, okwa li e mu yolo. (1 Samuel 19:9-11; 30:1-6; 2 Samuel 6:14-22) Ihe nonando ongaaka, David okwa li e hole Jehova nokwa li e mu inekela. David okwa li wo e na ohenda. Uwe okwa mono kutya naye okwa pumbwa iikala mbyoka. Sho a konakona Ombiimbeli, okwa dhimbulula kutya okwa pumbwa okulundulula omukalo moka a li hi inyenge omolwokwaagwanenena kwa yalwe. Kali e na okukala ha konenene omapuko gawo. Pehala lyaashono, okwa li e na okuhumitha komeho uukumwe megongalo. Mbela ndyoka olyo elalakano lyoye?

14. Jesus okwa li a panga uukuume noolye?

¹⁴ Jesus Kristus okwa li e na ombili naantu. Ayehe oya li ye mu mangulukila, kutya nduno aalumentu, aakiintu, aagundjuka, aakokele nenge aanona nokuli. Ihe okwa li a hogolola ookuume ke nawa. Okwa lombwele aayapostoli ye a ti: “One ookuume kandje, ngele tamu ningi shoka tandi mu lombwele.” (Johannes 15:14) Jesus okwa panga uukuume wopothingo naalanduli ye aadhiginini, mboka ya li ye hole Jehova nohaye mu longele. Mbela oho panga ngaa uukuume naamboka ye hole Jehova nomutima gwawo aguhe? Omolwashike sha simana?

15. Aagundjuka otaya vulu ngiini okumona uuwanawa, mokupanga uukuume naamboka ya koka pambepo?

 ¹⁵ Iiyimati oyindji ohayi oloya nawa, ngele ohayi mono oonte dhetango. Sha faathana, ohole yaamwatate naamwameme ya hwama otayi vulu oku ku kwathela wu koke pambepo. Mbela ngoye omugundjuka nowa hala okutokola shoka to ka ninga monkalamwenyo yoye? Oto ningi nawa, ngele owa panga uukuume naamboka ya kala taya longele Jehova oomvula odhindji nohaya humitha komeho uukumwe megongalo. Otashi vulika ya pita muupyakadhi noyi idhidhimikila omashongo monkalamwenyo yawo, sho taya longele Jehova. Otaya vulu oku ku kwathela wu hogolole onkalamwenyo ndjoka ya dhenga mbanda. Ngele owa kala ho kala pamwe nayo, otaye ke ku kwathela wu koke pambepo nowu tokole mondjila. —  Lesha Aahebeli 5:14.

16. Omumwameme gumwe okwa kwathelwe ngiini kaakuluntu megongalo lye, sho a li omugundjuka?

¹⁶ Helga ota dhimbulukwa sho a li momvula ye yahugunina mosikola. Aanasikola ooyakwawo oya li haya kala taya popi kombinga yomalalakano gawo. Oyendji oya li ya hala okuya kouniveesiti, nelalakano lyoku ki ikongela eithano ewanawa. Ihe ye, okwa popi nookuume mboka ya koka pambepo megongalo lyawo. Ota ti: “Oyendji oya li ye vule ndje kokule moomvula, noya li ya kwatha ndje noonkondo. Oya kumagidha ndje ndi ye miilonga yethimbo lyu udha. Onkee ano, onda kokola ondjila uule woomvula ntano. Ngashingeyi sho tadhi shi dhiladhila, onda nyanyukwa sho nda kala ndi itula mokulongela Jehova muugundjuka wandje. Inandi ipa uusama.”

17, 18. Oshike tu na okuninga tu vule okulongela Jehova nawa lela?

¹⁷ Ngele ohatu holele Jesus, otatu ka koka pambepo. Otatu ka hedha popepielela naTate Jehova, notatu ka kala twa halelela oku mu longela. Omuntu oha vulu owala okulongela Jehova nawa, ngele okwa koka pambepo. Jesus okwa ladhipike aalanduli ye a ti: “Uuyelele weni nau yele montaneho yaantu, ya mone iilonga yeni iiwanawa noya hambelele Ho yeni yomegulu.” —  Mateus 5:16.

¹⁸ Otwi ilongo nkene Omukriste a koka pambepo ta vulu okwaambidhidha nawa egongalo. Omukriste ngoka ohu ulike wo kutya okwa koka, momukalo moka ha longitha eiyuvo lye. Eiyuvo lyoye otali vulu ngiini oku ku kwathela wu tokole nawa? Nongiini tu na okusimaneka eiyuvo lya yakwetu? Omapulo ngaka otaga ka yamukulwa moshileshwa tashi landula.