Ilonga sha moohapu dhaKalunga

Elalakano lyaKalunga li na ko nasha nevi olini?

Oshitopolwa shika oshi na omapulo ngoka tashi vulika ho ipula kombinga yago noshi na omanyolo ngoka taga yamukula omapulo ngoka. Oonzapo dhaJehova otadhi ke shi nyanyukilwa okukundathana nangoye omayamukulo gomapulo ngoka.

1. Elalakano lyaKalunga li na ko nasha nevi olini?

Evi olyo ehala lyokukala aantu. Konima sho Kalunga a shiti aayengeli ya kale megulu, okwa li wo a shiti omuntu a nyanyukilwe onkalamwenyo kombanda yevi. (Job 38:4, 7) Kungawo, Jehova okwa li a tula omuntu gwotango moparadisa ombwanawa hayi ithanwa oshikunino shaEden nokwe mu pe pamwe noluvalo lwe etegameno lyokunyanyukilwa omwenyo sigo aluhe kombanda yevi.—Genesis 2:15-17; lesha Episalomi 115:16.

Oshikunino shaEden osha li owala pokatopolwa okashona kevi. Aihokani yotango, Adam naEva oya li ye na okukala ye na aanona. Uukwanegumbo mboka owa li wu na okwiindjipala nokupangela evi e taye li ningi oparadisa. (Genesis 1:28) Evi kali na nando esiku li hanagulwe po.—Lesha Episalomi 104:5.

2. Omolwashike evi kaali shi oparadisa ngaashingeyi?

Adam naEva kaya li ya vulika kuKalunga, onkee ano, oya li ya tidhwa mo muEden. Oparadisa oya li ya kana, nokapu na omuntu a li a pondola oku yi galula. Ombiimbeli otayi ti: “Evi olya gandjwa mepangelonkondo lyaakolokoshi.”—Job 9:24, KB; lesha Genesis 3:23, 24.

Ihe Jehova ina dhimbwa nando elalakano lye lyopetameko li na ko nasha naantu noita vulu nando okukala inee li gwanitha. (Jesaja 45:18) Ota ka galulila aantu monkalo ndjoka a li a hala ya kale petameko—Lesha Episalomi 37:11.

3. Ongiini Kalunga te ke etulula ombili kombanda yevi?

Opo aantu ya kale nokunyanyukilwa ombili, tango Kalunga oku na okukutha po aakolokoshi. Piita yaArmagedon, aayengeli yaKalunga otaya ka hanagula po ayehe mboka haya pataneke Kalunga. Satana ota ka tulwa mondholongo uule woomvula 1 000, ihe mboka ye hole Kalunga otaya ka hupithwa nokunyanyukilwa uuyuni uupe.—Lesha Ehololo 16:14, 16; 20:1-3; 21:3, 4.

 4. Uunake okumona iihuna taku ka hula po?

Pethimbo lyoomvula 1 000, Jesus ota ka pangela kombanda yevi okuza megulu nota ka ninga ishewe evi oparadisa. Ota ka dhima po wo oondjo dhaamboka ye hole Kalunga. Kungawo, Jesus ota ka kutha po uuwehame, uukulupe nosho wo eso.—Lesha Jesaja 11:9; 25:8; 33:24; 35:1.

Uunake Kalunga ta ka hanagula po uukolokoshi kombanda yevi? Jesus okwa li a gandja “endhindhiliko” okuulika kutya ehulilo oli li popepi. Oonkalo dhuuyuni dhongashingeyi odha tula onkalamwenyo yaantu moshiponga notadhi ulike kutya otu li ‘pehulilo lyuuyuni.’—Lesha Mateus 24:3, 7-14, 21, 22; 2 Timoteus 3:1-5.

5. Oolye taya ka kala mOparadisa yomonakuyiwa?

Jesus okwa li a lombwele aalanduli ye ya ninge aantu aalongwa noku ya longa oondjila dhaKalunga dhohole. (Mateus 28:19, 20) Jehova ota longekidhile aantu omamiliyona muuyuni auhe onkalamwenyo yokukala muuyuni uupe kombanda yevi. (Sefanja 2:3) PIinyanga yUukwaniilwa yOonzapo dhaJehova, aantu ohayi ilongo nkene ye na okukala aasamane, ootate, aakulukadhi nosho wo oomeme ye li nawa. Aanona nosho wo aavali ohayi ilongo pamwe kombinga yekankameno lyokukala yi itaala monakuyiwa ombwanawa.—Lesha Mika 4:1-4.

POshinyanga shUukwaniilwa, oto ka tsakanena po naantu mboka ye hole Kalunga nosho wo mboka ya hala okukala ya hokiwa kuye.—Lesha Aahebeli 10:24, 25.

Opo wu mone uuyelele wa gwedhwa po, tala ontopolwa 3 yembo ndyoka lyu ulikwa mpoka Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.