OSHILESHWA 40
Ongiini tatu vulu okukala twa yogoka momeho gaKalunga?
Dhiladhila ando meme ta longekidha okamwanamati ka ye kosikola. Oha shilipaleke kutya oki iyoga, oka zala nawa noonguwo dhako odha yela. Shika ohashi ka kwathele ka kale ke na uukolele, nayalwe ohaya mono kutya aavali yako ohaye ka sile nawa oshimpwiyu. Sha faathana, Tate yetu omunahole, Jehova, okwa hala tu kale twa yogoka palutu, tse tu yande omikalo dha nyata. Uuna twa yogoka, ohashi tu etele uuwanawa nohashi mu simanekitha.
1. Ongiini tatu vulu okukala twa yogoka palutu?
Jehova ote tu lombwele ta ti: “Omu na okukala aayapuki.” (1 Petrus 1:16) Okukala aayapuki, otashi ti otu na okukala twa yogoka palutu nokuyanda omikalo dha nyata. Okukala twa yogoka palutu otashi ti wo otu na okukala hatu iyogo aluhe, hatu kaleke oonguwo dhetu dha yela, omagumbo getu nohatu kaleke iiyenditho yetu monkalo ombwanawa noya yela. Otu na wo okukala hatu kwathele mokwoopaleka Oshinyanga shUukwaniilwa. Ngele ohatu kala twa yela komalutu, ohashi simanekitha Jehova. — 2 Aakorinto 6:3, 4.
2. Opo tu kale twa yogoka, omikalondjigilile dhini tu na okuyanda?
Ombiimbeli otayi tu ladhipike tu iyoge “shaa shoka tashi nyateke olutu nenge omwenyo.” (2 Aakorinto 7:1) Onkee, otu na okuyanda kehe shimwe shoka tashi vulu okuyona po omalutu nomadhiladhilo getu. Kehe shimwe tatu dhiladhila, oshi na okukala tashi nyanyudha Jehova. Onkee ano, otu na okuninga ngaashi tatu vulu tu ekelehi omadhiladhilo inaaga yogoka. (Episalomi 104:34) Ohatu kambadhala wo okupopya oohapu oombwanawa. — Lesha Aakolossa 3:8.
Oshike ishewe tashi vulu oku tu nyateka palutu nopamikalo? Iinima yimwe ohayi vulu okunyateka omalutu getu. Onkee ano, ohatu yanda okuhila omakaya, iingangamithi nokulongitha nayi omiti. Ngele otwa yanda iinima mbika, otatu ka kala tu na uukolele notatu ka ulika kutya otwa simaneka omagano gomwenyo. Ohatu kambadhala wo okuyanda omikalo dha nyata mokwaakutha ombinga miinima ngaashi, okwiidhanena kiilyo yoluvalo nokutala omathano giipala. (Episalomi 119:37; Aaefeso 5:5) Otashi vulika shi kale oshidhigu okweetha po omikalondjigilile ndhika, ihe Jehova ota vulu oku tu kwathela. — Lesha Jesaja 41:13.
ILONGA OSHINDJI
Ilonga kutya omolwashike okukala twa yogoka haku simanekitha Jehova, e to tala wo nkene tatu vulu okweetha po omikalo dha nyata.
3. Okukala twa yogoka palutu, ohashi simanekitha Jehova
Otatu vulu okumona kutya Jehova oha tala ko ngiini uuyogoki, mokukonakona iipango mbyoka a li a pe oshigwana shaIsraeli. Lesha Eksodus 19:10 nosho wo 30:17-19, e tamu kundathana omapulo taga landula:
-
Oovelise ndhika otadhi ulike kutya Jehova okwa tala ko ngiini uuyogoki wopalutu?
-
Omikalondjigilile dhini omiwanawa tadhi vulu oku ku kwathela wu kale wa yogoka palutu?
Okukala twa yogoka palutu, ohashi pula ethimbo noonkambadhala. Ihe otatu vulu oku shi ninga, kutya nduno ohatu kala peni, aayamba nenge oohepele. Dhana OKAVIDIO, e tamu kundathana epulo tali landula.
-
Okukaleka iinima yetu melandulathano noya yogoka, ohashi simanekitha ngiini iilonga yetu yokuuvitha?
4. Etha po omikalondjigilile omiwinayi
Jehova ota vulu oku tu kwathela tu ethe po omukalondjigilile kehe gwa nyata
Ngele oho hili omakaya nenge ho longitha iingangamithi wu inyanyudhe, otashi vulika wu shi kutya oshidhigu oku yi etha po. Oshike tashi vulu oku ku kwathela? Tala nkene omikalondjigilile ndhoka dhe ku nwetha mo. Lesha Mateus 22:37-39, e tamu kundathana nkene omakaya, iingangamithi nokulongitha nayi omiti hayi gumu . . .
-
ekwatathano lyomuntu naJehova.
-
aantu yaandjawo naamboka ha kala nayo.
Kambadhala okweetha po omukalondjigilile omwiinayi. a Dhana OKAVIDIO.
Lesha Aafilippi 4:13, e tamu kundathana epulo tali landula:
-
Okugalikana aluhe, okukonakona Ombiimbeli nosho wo okukala pokugongala, otaku vulu ngiini okukwathela omuntu a kale e na oonkondo dhokweetha po omukalondjigilile omwiinayi?
5. Kondjitha omadhiladhilo nosho wo omikalondjigilile dha nyata
Lesha Aakolossa 3:5, e tamu kundathana omapulo taga landula:
-
Otu shi shi ngiini kutya iinima tayi landula oya nyata momeho gaJehova: Omathano giipala, iinima mbyoka hayi vulu okutuminwa gumwe, opo wu ye naye momilalo okupitila miikwaelektronika (sexting) nosho wo okwiidhanena kiilyo yoluvalo?
-
Sho to tala, oshi li ngaa nawa sho Jehova a hala tu yande omikalo dha nyata? Omolwashike to tile ngawo?
Tala nkene to vulu okukondjitha omadhiladhilo ga nyata. Dhana OKAVIDIO.
Jesus okwa li a longitha ethaneko a ulike kutya otwa pumbwa okukatuka pandunge, tu yande omikalo dha nyata. Lesha Mateus 5:29, 30, e tamu kundathana epulo tali landula:
-
Jesus ka li ta ti kutya otu na okwiiyehameka komalutu, ihe okwa li ta ti kutya otu na okukatuka onkatu. Onkatu yopandunge yini omuntu ta vulu okukatuka, opo a yande okunyateka omadhiladhilo ge? b
Ngele oto kondjo nokweetha po omadhiladhilo ga nyata, Jehova okwa lenga oonkambadhala dhoye. Lesha Episalomi 103:13, 14, e tamu kundathana epulo tali landula:
-
Ngele oto kondjo nomikalondjigilile dha nyata, enyolo ndika otali ku ladhipike ngiini wu tsikile oku dhi kondjitha?
Ngele owa punduka, itashi ti kutya ito vulu okuyambuka po
Oshipu okudhiladhila kutya ‘itandi vulu we okuninga po sha, nandi ethe owala.’ Dhiladhila kwaashika: Ngele omumatuki okwi ihata po, itashi ti kutya okwa kana methigathano ndyoka. Okwa pumbwa owala okuthikama po e ta tsikile. Sha faathana, ngele owa punduka, itashi ti kutya ito vulu we okukondja wu ethe po omukalondjigilile ngoka omwiinayi. Natango itashi ti kutya ino ninga ehumokomeho lyasha. Okupunduka oshinima hashi vulu okuningwa, onkee ino teka omukumo! Kekwatho lyaJehova, oto vulu okusinda omukalo- ndjigilile ngoka omwiinayi.
AANTU YAMWE OHAYA TI: “Onda pikwa nayi komukalondjigilile gwontumba, itandi vulu oku gu etha po.”
-
Enyolo lini to vulu okulongitha wu ulukile omuntu kutya Jehova ota vulu oku mu kwathela a ethe po omukalondjigilile ngoka omwiinayi?
OWI ILONGO SHIKE?
Ohatu nyanyudha Jehova mokukaleka omalutu getu ga yela, omadhiladhilo getu nosho wo eihumbato lyetu.
Omapulo geendululo
-
Omolwashike sha simana tu kale twa yogoka?
-
Ongiini tatu vulu okukala twa yogoka palutu?
-
Ongiini tatu vulu okukaleka omadhiladhilo getu neihumbato lyetu lya yela?
UUYELELE WA GWEDHWA PO
Iinima yini iipu to vulu okuninga, opo wu kale wa yogoka palutu, nonando ku na iiniwe oyindji?
Tala kutya iinima yini to vulu okuninga wu ethe po okuhila omakaya.
“Nkene to vulu okweetha po okuhila omakaya” (Penduka mo! Mei 2010)
Lesha wu uve nkene omathano giipala taga vulu oku ku nwetha mo.
“Omathano giipala — mbela oga nika oshiponga?” (Oshungolangelo, 1 Septemba 2013)
Tala nkene omulumentu gumwe ngoka a li a pikwa kokutala omathano giipala, e ga etha po.
“Onda kala tandi nyengwa olundji manga inaandi pondola” (Oshungolangelo No. 4 2016)
a Oshitopolwa “Nkene to vulu okweetha po okuhila omakaya,” kohi yokapalanyolo: Uuyelele wa gwedhwa po, moshileshwa shika, otashi yelitha iinima mbyoka tayi vulu okukwathela omuntu a ethe po omukalondjigilile ngoka omwiinayi.
b Opo wu mone uuyelele kombinga yankene omuntu ta vulu okweetha po omukalondjigilile gwokwiidhanena kiilyo yoluvalo, tala oshitopolwa “Ongiini tandi vulu okusinda omukalondjigilile gwokwiidhanena kiilyo yoluvalo?” membo Omapulo ngoka aagundjuka haya pula, Embo 1, ontopolwa 25.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
