Jehova okwe tu shita tu na omagano omakumithi gokupopya. Mbela omukalo moka hatu ga longitha ogwa simana ngaa kuye? Eeno, ogwa simana! (Lesha Jakob 1:26.) Ongiini nduno tatu vulu okulongitha omagano getu gokupopya momukalo ngoka Jehova a hokwa?

1. Otu na okulongitha ngiini omagano gokupopya?

Ombiimbeli oye tu lombwela tu ‘kumagidhathane notu kwathathane.’ (1 Aatessalonika 5:11) Mbela owu shi yamwe mboka ya pumbwa okukumagidhwa nenge okutsuwa omukumo? Oshike to vulu okuninga wu ya kwathele? Oto vulu oku ya shilipaleka kutya owu na ko nasha nayo. Ya lombwela wo kutya omolwashike wu ya hole. Mbela oto vulu oku ya leshela enyolo ndyoka tali ya tsu omukumo? Opu na omanyolo ogendji ngoka to vulu okulongitha. Dhimbulukwa wo kutya omukalo moka ho popi, otagu vulu okutsa lela yalwe omukumo. Onkee ano, kambadhala aluhe okukala ho popi nombili nonewi etalala. — Omayeletumbulo 15:1.

2. Okupopya kwa tya ngiini tu na okuyanda?

Ombiimbeli otayi ti: “Inamu popya oohapu oombwinayi.” (Lesha Aaefeso 4:29.) Shoka otashi ti kutya katu na okupopya iinima iiwinayi nenge okuula yalwe omalaka omakukutu, ngoka tage ya uvitha nayi. Otu na wo okuyanda okuhokola yalwe nosho wo oku ya lundila. — Lesha Omayeletumbulo 16:28.

3. Oshike tashi ke tu kwathela tu kale hatu popi momukalo tagu tsu yalwe omukumo?

Olundji iinima mbyoka hatu popi ohayi holola shoka tatu dhiladhila nenge shoka shi li momitima dhetu. (Lukas 6:45) Onkee ano, otu na okukala hatu ningi oonkambadhala tu kale hatu dhiladhila kombinga yiinima iiwanawa, yoshili, yo opala, yu uka, ya yogoka noyi na epopilo ewanawa. (Aafilippi 4:8) Opo tu vule okuninga ngawo, otu na okukala hatu hogolola pandunge omainyanyudho getu nosho wo ookuume ketu. (Omayeletumbulo 13:20) Shoka otashi ke tu kwathela tu kale hatu dhiladhila manga inaatu popya. Kala wo ho dhiladhila kutya shoka to popi otashi ka guma ngiini yalwe. Ombiimbeli otayi ti: “Aanamalaka omadhigu otayu ulula ngegongamwele, ihe elaka lyaanawino olyo ealudho.” — Omayeletumbulo 12:18.

 ILONGA OSHINDJI

4. Pangela okupopya kwoye

Omathimbo gamwe, atuheni ohatu popi iinima mbyoka lwanima hatu ki ipa uusama kutya omolwashike twe yi popile. (Jakob 3:2) Lesha Aagalati 5:22, 23, e tamu kundathana omapulo taga landula:

• Omaukwatya geni to vulu okupula Jehova megalikano, opo ge ku kwathele wu kale ho pangele okupopya kwoye? Ongiini omaukwatya ngono taga vulu oku ku kwathela?

Lesha 1 Aakorinto 15:33, e tamu kundathana epulo tali landula:

• Ongiini ookuume koye nosho wo omainyanyudho goye taga vulu okunwetha mo okupopya kwoye?

Lesha Omuuvithi 3:1, 7, e tamu kundathana epulo tali landula:

• Uunake tashi vulika wa pumbwa okukala wa mwena nenge wa tegelela ethimbo lyo opala, opo wu popye?

 5. Kala ho popile yalwe muuwanawa

6. Kala ho popi nombili noyaandjeni

 OWI ILONGO SHIKE?

Shoka hatu popi otashi vulu okutunga yalwe nenge oku ya teya po. Tango, otwa pumbwa okudhiladhila nawa kombinga yaashoka twa hala okupopya, nokutala kutya uunake tu na oku shi popya nomomukalo guni.

Omapulo geendululo

• Ongiini to vulu okupopya momukalo tagu tungu yalwe?

• Okupopya kwa tya ngiini wa pumbwa okuyanda?

• Oshike tashi vulu oku tu kwathela tu kale aluhe hatu popi momukalo gwombili notagu tsu yalwe omukumo?